Septiembre

Tiempu bibani Jesús, guyuu binni ni gucalaʼdxiʼ ñúnirube xcaadxi cosa ne cadi nusiidisibe. Peru cumu qué ninabe nudiibe ti señal laacaʼ la? bisaana de gápacaʼ fe laabe ne bicaanacaʼ laabe (Mat. 16:4). ¿Xi rusiidiʼ Biblia? Ndiʼ nga ni guníʼ Isaías de Mesías: «Qué zucaabe ridxi ne qué zandísabe ridxi, ne qué zúnibe xiixa para gunadiaga binni laabe ndaaniʼ calle» (Is. 42:1, 2). Biʼniʼ Jesús xhiiñaʼ Dios, peru qué ñúnibe ni para si nidxagayaa binni laabe. Qué nucuibe templu naroʼbaʼ, qué ñácube xiixa lari especial ne qué ninabe niquiiñeʼ binni ti título risaca para guiniʼné laabe. Dxi cayuni juzgárcabe Jesús qué niná ñuni ti milagru para si guidxagayaa rey Herodes laa neca nuu xquendanabani lu peligru (Luc. 23:8-11). Dxi biʼniʼ predicar Jesús, biʼniʼ caadxi milagru, peru ni jma risaca para laa nga guni predicar ca noticia galán stiʼ Reinu. Ngue runi gúdxibe ca discípulo stibe: «Purtiʼ para nga bendaʼ» (Mar. 1:38). w21.05 4 párr. 9, 10

Ruyúbinu ca binni «ni nachaʼhuiʼ ladxidóʼ ni maʼ nuu para guicaa guendanabani ni qué zaluxe» (Hech. 13:48). Para ganda gácacabe discípulo stiʼ Jesús, naquiiñeʼ gacanenu laacabe, 1) guiénecabe, 2) guni crécabe ne 3) gúnicabe ca cosa ni caziidicabe de lu Biblia (Col. 2:6, 7; 1 Tes. 2:13). Guiráʼ ca hermanu de congregación zanda gacanecaʼ ca estudiante ra gusihuínnicaʼ nadxiicaʼ laacabe ne ora guidxaagalucaʼ laacabe ora chécabe reunión (Juan 13:35). Zándaca naquiiñeʼ cuee ti maestru tiempu ne guni stipa para gacané estudiante stiʼ gusaana creencia o práctica «ni zuhuaa dxiichiʼ casi ti torre» ndaaniʼ ladxidóʼ (2 Cor. 10:4, 5). Para gacanenu tuuxa guchaa ne ugaanda chúʼnisa, zándaca zadiʼdiʼ stale beeu, peru nabé risaca stipa ni gúninu. w21.07 3 párr. 6

¿Ñee runi crenu dxandíʼ ni rusíʼdinu ne runi crenu laanu nga religión ni dxandíʼ la? Apóstol Pablo la? gunna dxichi dxandíʼ ni runi cré (1 Tes. 1:5). Ne gúnnabe zacá ni cadi purtiʼ si bisiecheʼ ni laabe, sínuque purtiʼ biʼniʼ estudiar chaahuibe Stiidxaʼ Dios. Biʼniʼ crebe «guiráʼ ni cá lu Stiidxaʼ Dios la? Dios nga guníʼ xi guicá luni» (2 Tim. 3:16). Ra biʼniʼ estudiar Pablo bidii cuenta Jesús nga Mesías ni maca nexheʼ gueeda que. Peru ca líder stiʼ ca religión stiʼ ca judíu qué ninacaʼ ñuni crecaʼ ni. Ca hombre ni rusiguii riʼ riniʼcaʼ runibiaʼcaʼ Dios, peru pur ni rúnicaʼ rihuinni cadi dxandíʼ ni (Tito 1:16). Maʼ gadxé guca Pablo de ca hombre riʼ purtiʼ laa qué ñuni cré diʼ ca ni guyuulaʼdxiʼ si, sínuque biʼniʼ cré guiráʼ ni caziidiʼ de lu Biblia. Guyuuláʼdxibe gusiidibe ne gúnibe ni ná «guiráʼ ca conseju stiʼ Dios» (Hech. 20:27). w21.10 18 párr. 1, 2

Racanenu binni casi ñaca nudxiibanu ne nuzeʼnu ti yagahuiiniʼ, peru cadi guiaandaʼ laanu Dios «nga rusiniisi ni» (1 Cor. 3:6, 7). Nabé risaca xquendanabani guiráʼ binni para Jehová. Maʼ bidiibe laanu privilegiu de guninenu Jesús dxiiñaʼ ra gacanenu binni de gadxé gadxé lugar guidxiña ndaaniʼ xquidxi Jehová ante gunitilube guidxilayú stiʼ Binidxabaʼ (Ageo 2:7). Ora runi predicarnu, zeeda gácanu casi ca binni ni rié rindee binni ni biaana ndaaniʼ yoo ni bixiá pur ti xú. Neca caadxi si rescatista guidxela binni ni nabani, risaca dxiiñaʼ ni runi guirácabe. Zacaca nga zeeda gaca ora runi predicarnu, qué gánnanu panda binni zanda gulanu de lu guidxilayú stiʼ Binidxabaʼ riʼ, peru zanda iquiiñeʼ Jehová tutiica de laanu para gacanenu laacabe. Ti hermanu nabeza Bolivia guníʼ: «Stale hermanu nga racané ora riziidiʼ ti binni de Jehová ne riuunisa». Nga runi, gúninu stipa chuʼnu nayecheʼ ora gúninu xhiiñaʼ Dios. Pa gúninu ni, zaguu Jehová ndaayaʼ laanu ne qué zusaana de chuʼnu nayecheʼ ora guni predicarnu. w21.05 18, 19 párr. 19, 20

Ni racalaʼdxiʼ ti binni ni rié guuzeʼ maniʼ nga guuti o guinaazeʼ ti maniʼ interu nabani. Para ganda gúnibe ni la? riquiiñebe trampa, casi ca ni bizeeteʼ tobi de ca ni ná xhamigu Job (Job 18:8-10). ¿Ximodo runi hombre riʼ para guiaba maniʼ ca lu trampa stiʼ yaʼ? Rundaachibe laame para gúʼyabe pa ladu rieme, xi riuuláʼdxime ne xi zanda guchibi laame. Ngaca nga runi Binidxabaʼ né laanu, rundaachibe laanu para gánnabe xi rúninu ne xi riuuláʼdxinu gúninu ne ora cadi cabézanu ni la? riguíxhebe ti trampa laanu. Peru Biblia rabi laanu xi naquiiñeʼ gúninu para cadi guiábanu lu trampa stiʼ Binidxabaʼ ne pa guiábanu lúcani la? laaca rábini laanu xi naquiiñeʼ gúninu para guireʼnu de lu ni. Chupa de ca trampa ni jma riquiiñeʼ Binidxabaʼ nga, gucaabe binni gaca orgulloso ne guyubi gapa jma. Maʼ stale iza de riquiiñebe ca trampa riʼ, ne stale tu huayaba lúcani. Zeeda gaca Binidxabaʼ casi tuuxa ni rinaaze maniʼ ni ripapa ni riquiiñeʼ stale cosa para gusaba ca manihuiiniʼ lu trampa stiʼ (Sal. 91:3). Peru qué zanda diʼ quiteʼ Binidxabaʼ laanu, purtiʼ cayabi Jehová laanu gunáʼ nga ca trampa ni riquiiñebe (2 Cor. 2:11). w21.06 14 párr. 1, 2

Nabé risaca ca hermanu stinu ni maʼ huaniisi. Stiidxaʼ Dios ruchaaga guicha toope stícabe casi ti corona (Prov. 20:29). Peru zándaca qué gudiʼnu cuenta pabiáʼ risácacabe. Ora rusisaca ca joven ca hermanu ni maʼ huaniisi ridxélacabe ti cosa jma risaca que ti tesoro. Guizáʼ rusisaca Jehová ca hermanu ni maʼ huaniisi. Nanna dxichi Jehová ximodo laacabe ne rusisaca ca cualidad sicarú ni nápacabe. Riecheʼ Jehová ora ruuyaʼ rusiidicabe ca ni jma nahuiiniʼ guiráʼ ni maʼ biziidicabe lu ca iza zinécabe de cayúnicabe ni ná Jehová (Job 12:12; Prov. 1:1-4). Laaca rusisaca Jehová laacabe purtiʼ runi huantárcabe (Mal. 3:16). Neca huayápacabe stale guendanagana lu xquendanabánicabe, rusihuínnicabe naguidxi fe stícabe. Ne yanna, jma naguidxi esperanza ni nápacabe Jehová que dxi binibiáʼcabe laa. Nadxii Jehová laacabe purtiʼ qué huasaana de guiníʼcabe de lá neca maʼ nagólacabe (Sal. 92:12-15). w21.09 2 párr. 2, 3

Galán nga guiníʼ íquenu gatigá ximodo laanu. Zanda guiníʼ íquenu sicaríʼ: «¿Ñee caquiiñeʼ guchaagaʼ naa né xcaadxi para guneʼ sentir galán la? ¿Xi rucaa naa gacaniáʼ ndaaniʼ congregación? ¿Ñee purtiʼ si riníʼ iqueʼ jma risacaʼ que xcaadxi hermanu ne hermana la? O purtiʼ riuuladxeʼ guneʼ ni ná Jehová?». Biblia ná cadi guchaaganu laanu né xcaadxi. ¿Xiñee yaʼ? Purtiʼ pa guchaaganu laanu né xcaadxi zándaca guiníʼ íquenu jma risácanu ne gácanu ti binni orgulloso. Ne pa guiníʼ íquenu qué risácanu, zabee ni gana laanu. (Rom. 12:3). Cadi guiaandaʼ laanu, qué nibidxi Jehová laanu ra nuu purtiʼ nácanu binni sicarú, pur nánnanu guininu o pur runibiáʼ stale binni laanu. Bíʼnibe ni purtiʼ nánnabe zanda gannaxhiinu laabe ne zucaʼdiáganu Xiiñibe (Juan 6:44; 1 Cor. 1:26-31). w21.07 14 párr. 3, 4

Para ganda guchaʼnu modo riníʼ íquenu, naquiiñeʼ guni orarnu, guni estudiarnu Stiidxaʼ Dios ne guiníʼ íquenu ni cadúʼndanu. Cadi gusaana de gúninu ca cosa riʼ ne guinábanu Jehová gudii stipa laanu. Zacané espíritu santu stiʼ Jehová laanu para maʼ cadi guchaaganu laanu xcaadxi. Zacané Jehová laanu para gudiʼnu cuenta pa cayácanu ti binni orgulloso o ni napa envidia ne zacanebe laanu para guchaʼnu (2 Crón. 6:29, 30). Nanna Jehová xi nuu ndaaniʼ ladxidoʼno. Laaca nanna Jehová cudxíʼlunu modo riníʼ ique binni guidxilayú ne nácanu binni ruchee. Ora ruuyaʼ Jehová cudxíʼlunu ca guendanagana riʼ la? jmaruʼ si rannaxhiibe laanu. Nadxii Jehová laanu cásica nadxii ti gunaa baʼduhuiiniʼ stiʼ (Is. 49:15). Ora ruuyaʼ Jehová guirá stipa ni rúninu pur gúninu ni ná la? Laaca guizáʼ rannaxhiibe laanu. ¿Cadi dxandíʼ riguixhedxí nga ladxidoʼno la? w21.07 24, 25 párr. 17-19

Zanda chuʼnu jma nayecheʼ pa gúninu stale stipa guni cumplirnu dxiiñaʼ ni gudiicabe laanu lu xhiiñaʼ Jehová. Guni predicarnu jma ne gacanenu ndaaniʼ congregación stinu dede biaʼ gándatiʼ (Hech. 18:5; Heb. 10:24, 25). Gaca preparar chaahuinu para cuʼnu gana ca hermanu ra guni comentarnu. Guni cumplirnu né ca asignación ni gudiicabe laanu lu reunión ni raca ndaaniʼ semana. Pa gábicabe laanu gacanenu gaca xiixa dxiiñaʼ ndaaniʼ congregación, gúninu stipa gácanu puntual ne guni cumplirnu. Cadi guiníʼ íquenu huaxiéʼ risaca xiixa dxiiñaʼ ne gusaananu ni para despué. Gúninu stipa pur gúninu xhiiñanu jma jneza (Prov. 22:29). Ra jma gúninu xhiiñaʼ Jehová, jma ziuʼnu gaxha de laa ne jma nayecheʼ ziuʼnu (Gál. 6:4). Ne qué zaca nagana para laanu guiéchenu ora guicaa xcaadxi xiixa privilegiu ni ñuuláʼdxinu nicaanu (Gál. 5:26). w21.08 22 párr. 11

Cadi gácanu binni orgulloso ne gudiʼnu lugar gusiidiʼ Jehová laanu. Cásica rucueeza ti guendahuará dxiiñaʼ runi ladxidóʼ binni, zacaca zanda guquidxi orgullo ladxidoʼno para cadi guzúʼbanu stiidxaʼ Jehová. Bidii ca fariseu que lugar iguidxi ladxidoʼcaʼ neca biiyacaʼ ca cosa ni biʼniʼ Jesús. Qué ñuni crecaʼ pa laabe nga Xiiñiʼ Dios ne nápabe espíritu stiʼ (Juan 12:37-40). Ne pur nga la? biníticaʼ oportunidad de guibánicaʼ sin qué chuʼ dxi gáticaʼ (Mat. 23:13, 33). Nga runi, nabé risaca nga gudiʼnu lugar gacané Stiidxaʼ Dios laanu ne espíritu stiʼ para guchaʼnu modo riníʼ íquenu, modo nácanu ne ca decisión ni guicaanu. Cumu guca Santiago humilde la? bidii lugar gusiidiʼ Jehová laa. Ne pur gúcabe humilde gúcabe ti buen maestru. w22.01 10 párr. 7

Ora cadi gusaana de guni orarnu, zanda chuʼnu seguru zucaadiaga Bixhózenu ni nuu guibáʼ laanu (Col. 4:2). Zándaca guiníʼ íquenu candaa Jehová para guicabi oración stinu, peru maʼ guniʼbe zacábibe laanu «ora peʼ caquiiñenu» ni (Heb. 4:16). Nga runi, cadi naquiiñeʼ guiníʼ íquenu cadi jneza cayuni Jehová pa cadi cacabi ca oración stinu ora racaláʼdxinu. Guzéʼtenu ti ejemplu, stale hermanu maʼ ziné stale iza de canábacaʼ Jehová gacané laacaʼ gúʼyacaʼ ora gunitilú Reinu stibe guidxilayú malu riʼ. Dede Jesús gudxi laanu guinábanu gueeda Reinu stiʼ Dios (Mat. 6:10). Peru ti guendahuati nga gusaana de gápanu fe Dios purtiʼ caʼruʼ gueeda fin stiʼ guidxilayú riʼ ora racaláʼdxinu (Hab. 2:3; Mat. 24:44). Ni jma jneza nga cadi gusaana de cuézanu guni Jehová xiixa ne gusihuínninu nápanu fe ora guni orarnu. Maʼ gudixhe Jehová padxí ne pora gunitilú guidxilayú riʼ ne biaʼsi dxi maʼ gudíxhebe ca para guiranu (Mat. 24:36; 2 Ped. 3:15). w21.08 10 párr. 10, 11

Ca hermanu ni maʼ huaniisi ni naca humilde riénecaʼ maʼ qué zanda gúnicaʼ biaʼ bíʼnicaʼ lu xhiiñaʼ Jehová dxi nahuiinicaʼ. Casi ca hermanu ni naca superintendente de circuito. Ora rusaacaʼ 70 iza, ridxaa asignación sticaʼ. Zándaca gácani nagana para laacabe purtiʼ riuuláʼdxicabe gacanécabe ca hermanu lu asignación stícabe. Peru nánnacabe jma galán guni tender ti hermanu jma nahuiiniʼ asignación ca. Zeeda gácacabe casi ca levita ni guyuu ndaaniʼ guidxi Israel de dxiqué purtiʼ dxi gusaacaʼ 50 iza naquiiñeʼ gusaana de guni servircaʼ ndaaniʼ tabernáculo que. Cadi pur privilegiu ni gupa ca levita que nga guyuucaʼ nayecheʼ, sínuque purtiʼ bíʼnicaʼ xhiiñacaʼ né stale gana ne gucanecaʼ ca levita ni jma nahuiiniʼ (Núm. 8:25, 26). Tiempu riʼ, stale hermanu ni guca superintendente de circuito guizáʼ riguucabe gana ne racanécabe ca hermanu ni nuu ndaaniʼ congregación ra cayuni servírcabe. w21.09 8, 9 párr. 3, 4

Guníʼ Jesús historia stiʼ ti joven ni biniti, zadxélanu ni lu libru stiʼ Lucas 15:11-32. Guniʼbe maʼ qué niná ti joven nuzuubaʼ stiidxaʼ bixhoze ngue runi biree de ra lidxi ne «zeʼ ti guidxi zitu». Raqué biʼniʼ ni gupa gana. Peru ora gúpabe guendanagana guníʼ íquebe xii ngue bíʼnibe ne bidiibe cuenta galán ngue nuube ra lidxi bixhózebe. Jesús guníʼ biguetaʼ xpiaaniʼ joven riʼ, biguetaʼ ra lidxi ne gunabaʼ bixhoze guni perdonar laa. Jneza ngue bíʼnibe ora guníʼ íquebe cadi jneza ca decisión ni gucuaabe. Peru cadi ngue si naquiiñeʼ gúnibe. Naquiiñeʼ guchaabe. Ne dxandíʼ bisihuinni joven que cayaca arrepentir. Cadi ti historia si parábola ni guníʼ Jesús, sínuque rusiidini stale cosa ni zacané ca ancianu gánnacaʼ pa dxandíʼ maʼ guca arrepentir ti binni ni biʼniʼ ti pecadu grave. w21.10 5 párr. 14, 15

¿Xii nga ni qué zanda guiniibi dxacha o qué zanitilú yaʼ? Sicaríʼ bicaa apóstol Pablo: «Nga runi, cumu chiguicaanu ti Reinu ni qué ziuu dxi guiniibi la? gúninu xhiiñaʼ Dios modo riuulaʼdxiʼ, guidxíbinu Dios ne gápanu stale respetu laa» (Heb. 12:28). Guiluxe si guiniibi dxacha últimu biaje, Reinu si stiʼ Dios ziaana purtiʼ guirutiʼ zanda gunitilú ni (Sal. 110:5, 6; Dan. 2:44). Yanna nga naquiiñeʼ cuí binni xi guni. Pa cuícabe gúnicabe ni ná guidxilayú riʼ la? zanitilúcabe. Peru pa cuícabe guchaacabe modo nabánicabe para gúnicabe ni ná Jehová la? zacaacabe guendanabani ni qué zaluxe (Heb. 12:25). Ora runi predicarnu racanenu binni guyubi guicaa ti decisión risaca. Ne cadi guiaandaʼ laanu ca diidxaʼ guníʼ Jesús, Señor stinu: «Zaca predicar ca noticia galán stiʼ Reinu lu guidubi guidxilayú para gunadiaga guiráʼ xixé guidxi ni, ne oraqueruʼ nga gueeda fin» (Mat. 24:14). w21.09 19 párr. 18-20

Ancianu caʼ, laatu nga jma naquiiñeʼ quixhedxitu ladxidóʼ ca hermanu ni maʼ bixeleʼ familia stiʼ de Jehová (1 Tes. 5:14). Laquixhe ique cuʼtu gana laacabe ante ne despué de reunión. Lachiganna laacabe ne laguni orar pur laacabe. Laaca zanda guni predicárnetu laacabe o guni invitartu laacabe lu adoración en familia stitu. Naquiiñeʼ guiá, gannaxhii ne gacané ca ancianu ca dendxuhuiiniʼ stiʼ Jehová ni cayacaná (1 Tes. 2:7, 8). Qué racalaʼdxiʼ Jehová «guinitilú nin tobi, ni racaláʼdxibe nga gaca arrepentir guiráʼ binni» (2 Ped. 3:9). Neca guni cometer binni ti pecadu grave risácaruʼ xquendanabánibe para Dios. Cadi guiaandaʼ lii nabé naroʼbaʼ ni gudixe Jehová pur cada tobi de laanu: bidiibe xquendanabani Xiiñibe ni nadxiibe pur laanu. Né guendarannaxhii cayacané Jehová ca binni ni maʼ bisaana laa guibiguétacaʼ ra nuube. Ne racaláʼdxibe guibiguétacaʼ ra nuube casi riete ni lu parábola ni guníʼ Jesús stiʼ hijo pródigo (Luc. 15:11-32). w21.09 30, 31 párr. 17-19

Laga pa maʼ qué ganda guni predicarluʼ ne gusiidiluʼ casi bíʼniluʼ ni dxiqué purtiʼ maʼ huaraluʼ yaʼ. Neca zacá, zanda chuʼluʼ nayecheʼ pur ca cosa ni zanda gúniluʼ para gacaneluʼ binni gaca discípulo. Guidúʼyanu xi bizaaca despué de biʼniʼ ganar rey David ne ca xpinni caadxi amalequita ni ziné familia sticaʼ ne guiráʼ ni nápacaʼ. Maʼ bidxaga chupa gayuaa soldadu stiʼ David para checaʼ chitíndecaʼ ngue runi biaanacaʼ cayápacaʼ ca cosa stícabe. Bigueta si David né xcaadxi soldadu que, gudiiziʼ ni biʼniʼ ganarcaʼ lu guiracaʼ dede né ca soldadu ni qué nitinde gucuaacaʼ (1 Sam. 30:21-25). Zacaca nga rizaaca tiempu riʼ né dxiiñaʼ de gúninu discípulo. Guiranu riuuláʼdxinu gudiʼnu de ni jma galán Jehová, nga runi zanda chuʼnu nayecheʼ cada biaje chuʼ ti binni ndaaniʼ xquidxi Dios ne zacá saʼ lu neza ni ziné lu guendanabani ni qué zaluxe. Ruuyaʼ Jehová stipa naroʼbaʼ ni rúninu purtiʼ nadxiinu laabe ne riguu ndaayabe laanu pur nga. Laaca rusiidibe laanu chuʼnu nayecheʼ né biaʼ ni rúninu para gacanenu binni gaca discípulo (Juan 14:12). Cadi guiaandaʼ ndiʼ laanu: zusiéchenu Dios pa qué guireʼnu gana. w21.10 28 párr. 15-17

Ora maʼ ziniisinu zándaca chuʼnu triste ne guiníʼ íquenu maʼ qué zúninu jma lu xhiiñaʼ Jehová casi bíninu ni dxi nahuiininu. Zándaca maʼ qué gápanu stipa biaʼ gúpanu dxiqué, peru zanda iquiiñenu experiencia stinu ne ca ni maʼ bizíʼdinu para gacanenu ca hermanu ni jma nahuiiniʼ gacanecaʼ jma ndaaniʼ xquidxi Jehová ne chuʼcaʼ dispuestu guicaacaʼ jma dxiiñaʼ. Pa racalaʼdxiʼ ca hermanu ni maʼ huaniisi ca gacanecaʼ ca ni nahuiiniʼ naquiiñeʼ gácacaʼ humilde. Ti binni humilde la? riníʼ ique jma risaca xcaadxi que laa (Filip. 2:3, 4). Ca hermanu ni maʼ huaniisi ni naca humilde nánnacaʼ nuu xcaadxi modo zanda guni cumplir tuuxa xiixa asignación sin gucheené ni ná Biblia. Nga runi, qué ribézacabe guni guiráʼ hermanu xiixa cosa cásica bíʼnicabe ni dxiqué (Ecl. 7:10). Neca nápacabe stale experiencia ni gábicabe xcaadxi hermanu nánnacabe «maʼ cuchaa guiráʼ cosa ni cayaca lu guidxilayú». Nga runi zándaca laaca naquiiñeʼ guchaacabe ne guiziidicabe gúnicabe ca cosa ca de sti modo (1 Cor. 7:31). w21.09 8 párr. 1, 3

Maʼ gadxé Jehová de ca dios falsu purtiʼ qué rinábabe laanu gúninu xiixa ni cadi jneza. Nácabe ti Dios santo. Nánnanu zacá ni pur ca diidxaʼ ni gucuá lu placa de oro ni gucuá lucuá sumo sacerdote que. Sicaríʼ nani: «Stiʼ Jehová guiráʼ ni naca santo» (Éx. 28:36-38). Tutiica binni guʼyaʼ placa que la? rudii cuenta gastiʼ sti dios santo casi Jehová. ¿Ximodo ránnacabe naca Jehová ti Dios santo pa qué ruuyacabe placa ni cá lucuá sumo sacerdote que yaʼ? Ránnacabe ni ora riuundaʼ Ley que nezalú ca israelita, hombre, gunaa ne xcuidi (Deut. 31:9-12). Pa ñuʼnu lade ca binni que la? ñunadiáganu ca diidxaʼ riʼ: «Naa nga Jehová Dios stitu, [...] ne laatu naquiiñeʼ gácatu santo purtiʼ naa nacaʼ santo», ne «naquiiñeʼ gácatu santo purtiʼ naa, Jehová, nacaʼ santo» (Lev. 11:44, 45; 20:7, 26). w21.12 3 párr. 6, 7

Zándaca nuu hermanu nabé riuu xizaa. Zándaca lugar ra nabézacaʼ gastiʼ dxiiñaʼ, nga runi nagana para guni ganárcabe bueltu ni iquiiñeʼ familia stícabe. O zándaca guti familia stícabe ni runi dxiiñaʼ para gudii ni iquiiñecabe. Ni zacané laanu cadi chuʼ xhaatanu xizaa nga gápanu confianza Jehová. Cadi guiaandaʼ laanu maʼ guníʼ Jehová, pa gúninu ni ná Reinu stibe primé lu xquendanabáninu, zudiibe laanu ni caquiiñenu (Mat. 6:32, 33). Qué huasaana Jehová de guni cumplir promesa riʼ (Deut. 8:4, 15, 16; Sal. 37:25). Pa rapa Jehová ca maniʼ ripapa ne ca guieʼ ca, naquiiñeʼ guni crenu laaca zudiibe ni guidoʼno ne ni gácunu (Mat. 6:26-30; Filip. 4:6, 7). Cumu nadxii ti hombre ca xiiñiʼ rudii ni riquiiñecabe, zacaca nga Jehová né laanu, cumu nadxiibe laanu la? rudiibe ni riquiiñenu ne zanda guni crenu zapa Jehová laanu. w21.12 17 párr. 4, 5; 18 párr. 8

¿Ñee huayuniná tuuxa hermanu o hermana de congregación stinu laanu la? Guidúʼyanu ejemplu stiʼ José. Neca biʼniʼ ca biʼchiʼ José laa stale cosa ni cadi jneza, peru jma gucuá íquebe gúnibe ni ná Jehová, ne pur nga guluu ndaayaʼ Jehová laabe pur paciencia stibe ne pur biʼniʼ huantarbe. Ra gudiʼdiʼ tiempu biʼniʼ perdonar José ca biʼchiʼ ne biiyabe ximodo guluu ndaayaʼ Jehová laabe (Gén. 45:5). Cásica José laanu laaca zatadxí ladxidoʼno ora guidxíñanu gaxha de Jehová ne gudiʼnu lugar laabe guni chaahuibe ca cosa ni cadi jneza (Sal. 7:17; 73:28). Pa cayuni huantarnu xiixa cosa ni cadi jneza o nápanu sti guendanagana ni cayuniná laanu, cadi guiaandaʼ laanu nuu Jehová gaxha de ca ni «maʼ gucadé ladxidóʼ» (Sal. 34:18). Nadxiibe laanu purtiʼ ribézanu ne rulaʼnu guiráʼ ni nuanu luguiabe (Sal. 55:22). Laabe nga Juez stiʼ Guidxilayú ne cayuuyabe guiráʼ ni cazaaca luni (1 Ped. 3:12). Nga runi, pa cadídinu lu ti guendanagana ni qué ganda guni chaahuinu, cadi guiaandaʼ laanu naquiiñeʼ cuézanu guni Jehová xiixa. w21.08 11 párr. 14; 12 párr. 16

Ni jma jneza gúninu nga iquiiñenu xquendanabáninu para gusiéchenu Jehová. Naquiiñeʼ gúninu ca cosa ni jma risaca. Para iquiiñenu tiempu stinu jneza nuu biaje naquiiñeʼ gusaana de gúninu ti cosa neca cadi malu ni. Nga peʼ nga ni bizaaca Jesús dxi yeganna María ne Marta. Cumu guizáʼ riuulaʼdxiʼ Marta guidxaagalú binni la? ora guyé Jesús ra lídxibe guizáʼ biéchebe ngue runi bizulú cayúnibe stale guendaró. Peru béndabe María, gurí para gucaadiaga ni cusiidiʼ Jesús. Cadi malu ngue ni biʼniʼ Marta peru Jesús guníʼ gulí María ni jma galán (Luc. 10:38-42). Zándaca despué maʼ qué ñetenalaʼdxiʼ María xi gudó dxi que peru qué ñuu dxi ñaandaʼ laabe ni biziidibe de Jesús. Nánnanu nabé bisaca para María gucaadiaga Jesús ngue runi gulee tiempu para chuʼ gaxha de laabe. Ngaca naquiiñeʼ gúninu, naquiiñeʼ cueenu tiempu para chuʼnu gaxha de Jehová. w22.01 27 párr. 5, 6

Neca gucaná ladxidóʼ Acab, peru ca cosa ni bíʼnibe despué bisihuínnini cadi dxandíʼ cayaca arrepentirbe. Qué nucueezabe guidxi Israel para maʼ cadi ñuni adorarcaʼ Baal, ne laaca qué ñacanebe laacaʼ ñuni adorarcaʼ Jehová. Despué de guti Acab, bisihuinni Jehová ximodo ruuyaʼ laabe. Jehú, profeta stiʼ Dios guníʼ guca Acab ti binni malu (2 Crón. 19:1, 2). Guiníʼ íquenu ndiʼ: pa ñaca dxandíʼ guca arrepentir Acab, qué niníʼ diʼ profeta que gúcabe «binni malu» ne «ni nanalaʼdxiʼ Jehová». Racá ridúʼyanu, neca gucaná Acab pur ca cosa malu ni biʼniʼ, peru cadi dxandíʼ diʼ guca arrepentirbe. ¿Xi rizíʼdinu de ni bizaaca Acab? Dxi gudxi Elías laabe xi chiguizaacabe né familia stibe, gucaná ladxidoʼbe. Ne biaʼsi ni bíʼnibe que. Peru ca cosa ni bíʼnibe despué, bisihuínnicani cadi dxandíʼ cayaca arrepentirbe. Ndiʼ rusiidiʼ laanu, ora dxandíʼ raca arrepentir ti binni cadi riuubaʼ si ladxidóʼ pur ca cosa malu ni biʼniʼ. w21.10 3 párr. 4, 5, 7, 8

Biblia ná laaca guca xheelaʼ profeta Isaías ti «profeta» (Is. 8:1-4). Ni jma bisaca para guendaxheelaʼ riʼ nga gúnicaʼ ni ná Jehová. ¿Ximodo zanda chinanda ca guendaxheelaʼ ejemplu stiʼ Isaías ne xheelaʼ yaʼ? Ra gúnicaʼ biaʼ gándatiʼ lu xhiiñaʼ Jehová. Para gaca fe stícabe jma naguidxi, zanda guni estudiárcabe juntu ca profecía ni zeeda lu Biblia ne gúʼyacabe ximodo huayaca cumplir ca ni (Tito 1:2). Zanda guiníʼ íquecabe xi zanda gúnicabe para gacanécabe gaca cumplir caadxi profecía ni zeeda lu Biblia, casi ni guníʼ Jesús naquiiñeʼ gaca predicar ca noticia galán stiʼ Reinu lu guidubi Guidxilayú ante gueeda fin. Ra jma chuʼ ti guendaxheelaʼ seguru dxandíʼ cayaca cumplir ca profecía ni zeeda lu Biblia, jma zucaa íquecaʼ gúnicaʼ jma lu xhiiñaʼ Jehová. w21.11 16 párr. 9, 10

Zándaca maʼ viuda María, ngue runi biyubi Jesús tu gapa laabe. Ne cumu guizáʼ nadxiibe jñaabe la? biyúbibe chuʼ galán, ngue runi gunábabe Juan gacané jñaabe chuʼ gaxha de Jehová. Dede dxi que biiyaʼ María Juan casi xiiñiʼ ne gupa Juan laabe casi jñaa. Guizáʼ gunnaxhii Jesús María, gunaa ni gupa laabe dede dxi gúlebe ne yanna nuu ra cabe lu yaga. ¿Xi rizíʼdinu de ni bizéʼtenu riʼ yaʼ? Zándaca gucaalú familia stinu laanu o dede guixélecaʼ de laanu. Peru zándaca chuʼnu jma gaxha de ca hermanu de congregación stinu que familia stinu. Ne casi maca guníʼ Jesús, pa chuʼnu gaxha de Jehová ne de xquidxi zacaanu «jma de 100» de ni bisaananu. Stale de ca hermanu zeeda gácacaʼ casi xiiñinu, jñaanu ne bixhózenu (Mar. 10:29, 30). ¿Xi runi sentirnu nuunu ndaaniʼ ti familia ni nuu tobi si purtiʼ nápacaʼ fe, nadxiicaʼ Jehová ne ca hermanu yaʼ? (Col. 3:14; 1 Ped. 2:17). w21.04 9-11 párr. 7, 8

Ora qué rusaana tuuxa de gannaxhii, rucaani laa guni stale cosa pur xcaadxi. Cásica dxiqué, tiempu riʼ stale Testigu rusihuinni dxandíʼ nadxiicaʼ ca hermanu sticaʼ dede né ca ni qué runibiaʼcaʼ. Casi ora gánnacabe guca ti desastre natural nagueendaca rinabadiidxacabe ximodo zanda gacanécabe. Ne ora gánnacabe qué gapa tuuxa hermanu de congregación bueltu ruyúbicabe ximodo gacanécabe laa. Rinándacabe ejemplu stiʼ ca xpinni Cristu de Macedonia ni bibani lu primé siglu purtiʼ laacaʼ bidiicaʼ jma que biaʼ nápacaʼ (2 Cor. 8:3). Laaca riguu ca ancianu gana ca hermanu purtiʼ racanecaʼ xcaadxi. Ca diidxaʼ ni gábicabe ca hermanu rudiini stipa laacaʼ para cadi guireecaʼ gana (Is. 32:1, 2). w21.11 11 párr. 14; 12 párr. 21

Guiranu gatigá caquiiñeʼ guicaanu conseju. Nuu biaje laapenu rinábanu gudii tuuxa conseju laanu. Nuu biaje zándaca gudii ti hermanu conseju laanu purtiʼ cayuuyaʼ cayúninu xiixa cosa ni zándaca gucaa laanu gucheʼnu (Gál. 6:1). O zándaca gudiicabe laanu conseju purtiʼ maʼ bíninu cosa ni cadi jneza. Modo tiica si, caquiiñeʼ gucaʼdiáganu ca conseju ca, purtiʼ zacané ca ni laanu ne zanda gulá ca ni xquendanabáninu (Prov. 6:23). Textu ni cadúʼndanu yannadxí caguu ni gana laanu gucaʼdiáganu ca diidxaʼ «ni guiníʼ ca binni nuu xpiaaniʼ». Cadi guiaandaʼ laanu; nuu stale cosa ni qué gánnanu ne nuu tu laa jma nanna o jma napa experiencia que laanu (Prov. 12:15). Nga runi, ora rucaʼdiáganu conseju rusihuínninu nácanu humilde, nánnanu nuu cosa ni qué gánnanu ne rudiʼnu cuenta caquiiñenu tu gacané laanu para ugaandanu ca meta ni maʼ gudixhe íquenu. Rey Salomón bicaa ca diidxaʼ riʼ: «Ora nuu stale tu cudii conseju la? riree ni galán» (Prov. 15:22). w22.02 8 párr. 1, 2

Ti binni ni dxandíʼ maʼ guca arrepentir pur pecadu ni biʼniʼ cadi riníʼ si cayuubaʼ ladxidóʼ pur ni biʼniʼ. Laaca naquiiñeʼ guchaa modo riníʼ ique, ni runi sentir ne gusihuínnini pur ni guni. Naquiiñeʼ gusaana cosa malu ni cayuni ne guzuubaʼ stiidxaʼ Jehová (Ezeq. 33:14-16). Ni jma guisaca para laabe nga chuʼbe galán né Jehová sti biaje. Yanna, ¿xi gúninu pa gánnanu maʼ biʼniʼ cometer ti xhamígunu ti pecadu grave yaʼ? Pa gucáʼchinu pecadu stiʼ xhamígunu la? lugar de gacanenu laabe, laga zuninanu laabe. Ne qué zanda diʼ gucáʼchinu ni purtiʼ ruuyaʼ Jehová guiráʼ cosa (Prov. 5:21, 22). Zanda gacanenu xhamígunu ra gábinu laa racalaʼdxiʼ ca ancianu gacanecaʼ laabe. Peru pa qué nabe guiníʼnebe ca ancianu, gúninu ni laanu. Zacá zusihuínninu racaláʼdxinu gacanenu laabe. w21.10 6, 7 párr. 19-21

Guiranu zanda guizíʼdinu modo gucané Jesús binni. Biblia ná «gúcabe casi ti esclavu» (Filip. 2:7). Ti esclavu nachaʼhuiʼ ruyubi modo gacané xpixuaanaʼ. Cumu nácanu esclavu stiʼ Jehová ne racanenu ca hermanu stinu la? nga runi, racaláʼdxinu iquiiñeʼ Dios laanu ne gacanérunu ca hermanu stinu. Guníʼ ique ndiʼ: «¿Ñee nuaaʼ dispuestu gusaanaʼ cosa ni riuuladxeʼ guneʼ para gacaniáʼ xcaadxi la? ¿Ñee nagueendaca rigacaniáʼ gaca limpieza ra salón de asamblea o para gudiʼdu mantenimientu ra Yoo stiʼ Reinu la?». Pa gudiiluʼ cuenta caquiiñeruʼ gúniluʼ xiixa, peru qué gápaluʼ deseu de gúniluʼ ni la? biʼniʼ orar Jehová de guidubi ladxidoʼloʼ. Gudxi laabe xi cayuni sentirluʼ ne gunabaʼ laabe gudiibe lii «deseu ne poder» para gúniluʼ guiráʼ ni riuuláʼdxibe (Filip. 2:13). w22.02 23 párr. 9-11

Guca Jesús ti binni nachaʼhuiʼ. Gunnaxhiibe binni ne biénebe laacaʼ neca ora gúcani nagana para laabe (Mat. 11:29, 30). Casi dxi gunabaʼ ti gunaa fenicia laabe gusiándabe dxaapahuiiniʼ stiʼ, qué ninágabe ñúnibe ni. Peru gúcabe nachaʼhuiʼ né gunaa riʼ ora bíʼyabe pabiáʼ naroʼbaʼ fe stiʼ ne bisiándabe dxaapahuiiniʼ que (Mat. 15:22-28). Neca guca Jesús nachaʼhuiʼ qué nudii lugar nucueeza ni laa para nudii conseju ca binni ni nadxii. Guzéʼtenu ti ejemplu, dxi gudxi Pedro laabe guiabe laca laabe para cadi gúnibe ni ná Jehová, gudindenebe laa nezalú xcaadxi discípulo (Mar. 8:32, 33). Qué ñuni Jesús ni para nusituí lú Pedro, sínuque biʼniʼ ni para gusiidiʼ laabe ne xcaadxi discípulo que gacanecaʼ laabe gúnibe ni ná Dios ne cadi gucueezacaʼ laabe. Zándaca bituí lú Pedro, peru gucané conseju que laa. Laaca rusihuínninu nácanu ti binni nachaʼhuiʼ ora rudiʼnu conseju ti binni ni nadxiinu. Ora gúninu ni, chinándanu ejemplu stiʼ Jesús ne gudiʼnu conseju ni zeeda lu Biblia. w22.03 11 párr. 12, 13

Runi adorarnu Jehová ora rusisácanu laa (Sal. 34:1). ¿Ximodo rusisácanu laabe yaʼ? Rúninu ni ora rininu de ca cualidad sicarú ni nápabe ne de ca cosa ni maʼ bíʼnibe. Ne de ndaaniʼ ladxidoʼbe nga riale gúninu ni purtiʼ rudiʼnu xquixe peʼ laabe. Pa cueenu tiempu para guiníʼ íquenu pabiáʼ nachaʼhuiʼ Jehová né laanu pur guiráʼ cosa galán ni maʼ bíʼnibe pur laanu, qué ziaanadxinu de gusisácanu laabe. Ora runi predicarnu rusisácanu Dios «casi ñaca nudiʼnu ti sacrificiu, laani nga ra iquiiñenu ruaanu para guinínenu binni». Cásica dede ante riníʼ íquenu xi chitídxinu Jehová ora runi orarnu laa, zaqueca nga naquiiñeʼ cueenu tiempu para guiníʼ íquenu xi chitídxinu binni ora guni predicarnu laa. Nga runi racaláʼdxinu gusisácanu Dios casi ñaca nudiʼnu laa ti sacrificiu ni jma galán. Ora runi predicarnu binni rininu ni nuu ndaaniʼ ladxidoʼno. w22.03 21 párr. 8