Octubre

Guiráʼ ni rusíʼdinu ne ni runi crenu zeedacani de lu Stiidxaʼ Dios. Neca zacá stale binni maʼ qué rinacaʼ guni crecaʼ ni rusíʼdinu purtiʼ para laacaʼ nabé sencillu modo runi adorarnu Dios ne qué riuuláʼdxicaʼ ni. ¿Xi zacané lii cadi gusaana de gápaluʼ fe? Sicaríʼ gudxi apóstol Pablo ca xpinni Cristu de Roma: «Rapa binni fe ora maʼ binadiaga mensaje riʼ, ne runadiaga binni mensaje riʼ ora raca predicar stiidxaʼ Cristu» (Rom. 10:17). Pa racaláʼdxinu gaca fe stinu naguidxi, naquiiñeʼ guni estudiarnu Biblia ne cadi chuʼnu lu ca eventu ni runi ca religión ni qué rusiidiʼ ni dxandíʼ neca ruluíʼ galán cani. Ni guizíʼdinu lu Biblia zacaneni gaca fe stinu naguidxi purtiʼ «pa qué gápanu fe qué ziuulaʼdxiʼ Dios ni rúninu» (Heb. 11:1, 6). Para chuʼnu seguru dxandíʼ ni cazíʼdinu, cadi caquiiñenu ti señal ni zeeda de Dios. Caquiiñeʼ guni estudiar chaahuinu ni zeeda lu Biblia, purtiʼ nga nga zacané laanu iguidxi fe stinu ne guidxélanu respuesta stiʼ ca duda ni gápanu. w21.05 4, 5 párr. 11, 12

Bidxaagalú apóstol Pablo stale guendanagana. Gudiñe binni Pablo, bichácabe guié ne biseguyoocabe laa, ngue runi biquiiñeʼ tu gudii stipa laa (2 Cor. 11:23-25). Ne guniʼbe stale biaje bíʼnibe stipa para cadi guiníʼ íquebe cosa ni cuee gana laabe (Rom. 7:18, 19, 24). Ne laaca gunábabe Dios cuee ti guichi ni daabi lu beela ládibe purtiʼ cayuninani laabe (2 Cor. 12:7, 8). Bidii Jehová stipa Pablo para guni xhiiñabe neca bidxagalú guendanagana. Guiníʼ íquenu xi guiráʼ biʼniʼ apóstol Pablo. Dxi deguyoobe Roma ndaaniʼ ti yoo, biʼniʼ defenderbe ca noticia galán stiʼ Reinu nezalú ca líder stiʼ ca judíu ne zándaca nezalú binni ni runi dxiiñaʼ para gobiernu (Hech. 28:17; Filip. 4:21, 22). Laaca biʼniʼ predicarbe ca guardia stiʼ emperador ne guiráʼ binni ni riganna laabe (Hech. 28:30, 31; Filip. 1:13). Tiempu que laaca biquiiñeʼ Dios Pablo para gucaa caadxi carta ni gucané ca xpinni Cristu ni bibani dxiqué ne laaca racanécani laanu dede yanna. w21.05 21 párr. 4, 5

Guca Uzías, rey stiʼ Judá, ti binni orgulloso, qué niná nucaadiaga conseju ni bidiicabe laa ne biʼniʼ xiixa ni cadi naquiiñeʼ ñuni. Jneza biree ca cosa ni bíʼnibe, biʼniʼ ganarbe stale guerra, bicuibe stale guidxi ne bíʼnibe stale dxiiñaʼ layú. Gucané Dios laabe para guiree ca cosa ni bíʼnibe jneza (2 Crón. 26:3-7, 10). Peru Biblia ná ti tiempu despué, gúcabe ti binni orgulloso ne biyúbibe guendananá stibe. Maca guníʼ Jehová ca sacerdote si nga zanda guzaaquicaʼ inciensu ndaaniʼ templu, peru cumu orgulloso rey Uzías, gucalaʼdxiʼ ñúnini laa, ngue runi biʼniʼ huará Jehová laabe de lepra (2 Crón. 26:16-21). ¿Ñee laaca zanda guiábanu lu trampa stiʼ Binidxabaʼ, gácanu binni orgulloso ne gúninu ti cosa malu casi biʼniʼ rey Uzías la? Pa qué gácanu humilde, zanda gueeda guizaacanu ni. Cadi guiaandaʼ laanu, pa randa rúninu xiixa ne pa nápanu xiixa privilegiu ndaaniʼ congregación, de Dios nga zeedacani (1 Cor. 4:7). Pa nácanu binni orgulloso qué zaquiiñeʼ Jehová laanu. w21.06 16 párr. 7, 8

Nanna Jesús cadi guiráʼ diʼ biaje zieni ca discípulo stiʼ galán ora guni predicarcaʼ. Qué gánnadinu panda de ca binni ni biʼniʼ predicar ca discípulo que beeda gácacaʼ xpinni Cristu. Naquiiñeʼ chuʼcaʼ nayecheʼ cadi purtiʼ rucaadiaga binni laacaʼ, sínuque purtiʼ riecheʼ Jehová pur stipa ni rúnicaʼ. Pa qué gusaana de guni predicarnu, zacaanu guendanabani ni qué zaluxe. Ora rúninu stipa pur guni predicarnu, ne gusíʼdinu binni de ca noticia galán stiʼ Reinu laaca riníʼ íquenu guibáninu para gúninu ni ná espíritu, purtiʼ zacá rudiʼnu lugar gacané espíritu santu laanu lu xquendanabáninu. «Pa qué guidxáganu», maʼ guníʼ Jehová zudii laanu guendanabani ni qué zaluxe neca qué gacanenu nin ti binni chúʼnisa (Gál. 6:7-9). w21.10 26 párr. 8, 9

Ti biaje, guizáʼ maʼ bidxaga Jesús ne ca discípulo stiʼ despué de biʼniʼ predicarcaʼ, ngue runi biyúbicaʼ ti lugar ra guiziiláʼdxicaʼ. Peru maʼ cabeza stale binni laacabe raqué. Guizáʼ biá Jesús ca binni que ngue runi, «bizulú bisiidibe laacaʼ stale cosa». Biene Jesús ximodo cayuni sentir ca binni que, ngue runi gucanebe laacaʼ. Nánnabe guizáʼ cayuni sufrir ca binni que ne caquiiñecaʼ ti esperanza. Tiempu riʼ, laaca caquiiñeʼ binni ti esperanza, neca ruluíʼ nabánicaʼ nayecheʼ. Zeeda gácacaʼ casi dendxuʼ ni cananiti ne qué gapa pastor. Apóstol Pablo guníʼ qué runibiáʼcabe Dios ne qué gápacabe esperanza (Efes. 2:12). Ora riníʼ íquenu pabiáʼ caquiiñeʼ ganna ca binni ni nuu lu territorio stinu de Dios, rucaa guendarannaxhii ne guendariáʼ ca laanu gacanenu laacabe. Ne ni jma galán ni zanda gúninu nga guinabadiidxanu laacabe pa zudiʼnu estudiu laacabe. w21.07 5 párr. 8

Ti binni orgulloso ruyubi puru si para laa. Ne ti binni ni napa envidia cadi racalaʼdxiʼ si gapa ni napa sti binni, sínuque laaca racalaʼdxiʼ pa ñanda si qué ñapa binni ca ni napa. Nga runi pa gápanu envidia ti binni la? laaca cayaca nanaláʼdxinu laa. Gaca binni orgulloso ne gapa envidia zeeda gácani casi bandaa ni ró ti mueble. Chaahuiʼ chaahuiʼ runi feucame mueble ca ne maʼ qué riquiiñeni. Zacaca nga zanda guizaaca tuuxa ni maʼ ziné tiempu de cayuni ni ná Jehová, pa gaca orgulloso ne gapa envidia chaahuiʼ chaahuiʼ zuninani laa (Prov. 16:18). Zusaana de guni ni ná Jehová ne zuniná xcaadxi. Ni zacané laanu cadi gácanu orgulloso nga chinándanu conseju bidii apóstol Pablo: «Cadi gúnitu xiixa para si chuʼ pleitu o para guchatu bi yánnitu, sínuque lagusihuinni humilde laatu ora guiníʼ íquetu jma risaca xcaadxi que laatu» (Filip. 2:3). w21.07 15, 16 párr. 6-8

Nuu binni riníʼ ique naquiiñeʼ guicabi religión ni dxandíʼ ca guiráʼ ca pregunta ni runi binni, dede né ca pregunta ni cadi zeeda lu Biblia. ¿Ñee jneza nga cuézanu guizaaca nga la? Guidúʼyanu ejemplu stiʼ apóstol Pablo. Dxandíʼ nga gúdxibe ca xpinni Cristu «laguyubi chaahuiʼ xii nga ni jneza», peru laaca gúnnabe nuu stale cosa ni qué riénebe (1 Tes. 5:21). Laabe guniʼbe «huaxiéʼ conocimientu nápanu» ne laaca «nachuunduʼ cadúʼyanu yanna, casi ñaca nidúʼyanu lu ti espeju de guiibaʼ» (1 Cor. 13:9, 12). Qué ñanna Pablo guiráʼ cosa, ne ngaca laanu. Peru gúnnabe ca cosa caquiiñeʼ ganna ti xpinni Cristu, ne gucané ni laabe ganna dxiichibe dxandíʼ ni runi crebe. ¿Ximodo zanda ganna dxíchinu dxandíʼ ni runi crenu yaʼ? Ti cosa ni zanda gúninu nga guchaaganu modo biʼniʼ adorar Jesús Dios ne modo runi adorar ca testigu stiʼ Jehová Dios tiempu riʼ. w21.10 18, 19 párr. 2- 4

Hermanu ni maʼ huaniisicaʼ, pa nuutu lu serviciu de tiempu completu o coʼ, zanda gacanetu xcaadxi, ¿ximodo zanda gúnitu ni yaʼ? Ra gánnatu nuu cosa ni maʼ qué zanda gúnitu, quíxhetu meta ne guicá íquetu ca cosa ni zanda gúnitu. Casi rey David guizáʼ gucalaʼdxiʼ nucuí ti yoo galán para Jehová, peru ora gudxi Jehová laabe Salomón chigucuí ni la? qué nidxiichibe ne gucanebe Salomón chuʼ listu para gucuí yoo que (1 Crón. 17:4; 22:5). Qué niníʼ ique diʼ David laa nga nucuí templu que purtiʼ nahuiiniruʼ Salomón ne qué gapa experiencia (1 Crón. 29:1). Nanna David para ganda cuí yoo que la? naquiiñeʼ cuʼ ndaayaʼ Jehová dxiiñaʼ que ne cadi purtiʼ nahuiiniʼ o qué gapa binni ni chigucuí yoo ca experiencia. Cásica David, ca xpinni Cristu ni maʼ huaniisi cayúnirucaʼ xhiiñaʼ Jehová neca maʼ bichaa ca privilegiu ni nápacaʼ ne laaca nánnacabe zaguu Jehová ndaayaʼ ca hermanu ni nahuiiniʼ ni cayuni ca dxiiñaʼ ni bíʼnicabe dxiqué. w21.09 9 párr. 4; 10 párr. 5, 8

Ribáninu nayecheʼ ora riguixhe íquenu ugaandanu xiixa meta lu xhiiñaʼ Jehová. Cadi quixhe íquenu ugaandanu meta stiʼ sti hermanu, sínuque guyúbinu ugaandanu meta ni zanda ugaandanu. Purtiʼ pa quixhe íquenu ugaandanu meta stiʼ stobi la? Zareʼnu gana (Luc. 14:28). Guizáʼ risácaluʼ ndaaniʼ xquidxi Jehová ne gástiruʼ stobi casi lii. Cadi bichiña Jehová laanu ra nuu purtiʼ si jma nánnanu que xcaadxi, sínuque biiyabe xi nuu ndaaniʼ ladxidoʼno, biiyabe nácanu ti binni nadóʼ ne humilde ne nuunu dispuestu gusiidibe laanu ne guchaʼnu. Nanna dxíchinu riecheʼ Jehová ora rúninu biaʼ gándatiʼ lu xhiiñaʼ. Rusihuínninu nayá ladxidoʼno ora runi huantarnu ne qué rixélenu de Jehová (Luc. 8:15). Nga runi, cadi gusaana de gúninu biaʼ gándatiʼ lu xhiiñaʼ Dios. Pa guninu ni, ziuʼnu nayecheʼ pur ca cosa ni gúninu (Gál. 6:4). w21.07 24 párr. 15; 25 párr. 20

Stale biaje naquiiñeʼ gápanu paciencia laga cabézanu gaca chaahuiʼ xiixa cosa ni cadi jneza. Guzéʼtenu ti ejemplu, ora ranna ca ancianu ca maʼ biʼniʼ cometer tuuxa hermanu xiixa pecadu malu, rinábacabe Jehová «guendabiaaniʼ ni zeeda de guibáʼ» para ganda gúʼyacaʼ ca cosa ca modo ruuyabe ca ni (Sant. 3:17). Ni racaláʼdxicabe nga gacanécabe binni ca gusaana ca cosa malu ni cayuni (Sant. 5:19, 20). Laaca racaláʼdxicabe gúnicabe guiráʼ ni nuu lu nácabe para gacanécabe congregación ne quixhedxícabe ladxidóʼ ca ni gucaná (2 Cor. 1:3, 4). Ne ora ganna ca ancianu ca maʼ biʼniʼ cometer tuuxa ti pecadu malu, naquiiñeʼ gánnacabe primeru xi guiráʼ bizaaca. Riné ndiʼ tiempu. Despué, naquiiñeʼ guni orárcabe, iquiiñecabe Biblia para gudiicabe conseju binni ca ne guni corregírcabe laa «biaʼ caquiiñeʼ si» (Jer. 30:11). Qué zacaa diʼ ca ancianu ti decisión nagueenda. Ora rinándacabe ni ná Jehová ribeendú congregación ca ni galán. w21.08 11 párr. 12, 13

Pur guyuu hambre guidxi Israel ti tiempu, ngue runi yendeza Noemí, xheelaʼ ne chupa xiiñiʼ guidxi Moab, raqué gutiʼ xheelaʼ Noemí. Bichaganáʼ guiropaʼ xiiñibe raqué peru laaca gúticaʼ (Rut 1:3-5). Nabé guluu ca cosa riʼ triste Noemí. Tantu naná nuube dede guníʼ íquebe maʼ bidxiideche Jehová laabe. Guidúʼyanu xi guniʼbe de Dios: «Maʼ bidxiideche Jehová naa, [...]. Maʼ bitiidiʼ ni jma napa poder naa lu stale yuubaʼ». Ne laaca guniʼbe: «Maʼ bidxiideche Jehová naa. Maʼ biseendaʼ ni jma napa poder stale yuubaʼ ra nuaaʼ» (Rut 1:13, nota, 20, 21). Nanna Jehová ora ruquiichinácabe tuuxa ni nuu xpiaaniʼ zándaca guni cosa ni cadi jneza (Ecl. 7:7). Biquiiñeʼ Jehová Rut para gusihuinni nadxii Noemí. Né stale cariñu gucané Rut suegra para chuʼ nayecheʼ ne chuʼ gaxha de Dios sti biaje. w21.11 9 párr. 9; 10 párr. 10, 13

Pa maʼ cayúninu biaʼ gándatiʼ lu xhiiñaʼ Jehová, ¿ñee riníʼ nga maʼ qué zanda gúninu jma la? Coʼ, zanda gúninu ni, ne naquiiñeʼ quíxhenu meta ni gacané laanu guni predicarnu ne gusíʼdinu jma jneza, ne gacanenu ca hermanu stinu. Zugaandanu ca meta riʼ pa gácanu binni nuu xpiaaniʼ ne gánnanu nuu cosa ni qué zanda gúninu, ne pa jma guicá íquenu gacanenu xcaadxi lugar de guicá íquenu ni caquiiñenu (Prov. 11:2; Hech. 20:35). ¿Xi meta zanda quixhe íquenu ugaandanu? Guinábanu Jehová gacané laanu guidúʼyanu pabiáʼ zanda gúninu (Prov. 16:3). ¿Ñee zanda quixhe íquenu ugaandanu meta casi gácanu precursor auxiliar o regular, guni servirnu Betel o gacanenu la construcción? O ¿Ñee zanda guizíʼdinu sti idioma para guni predicarnu jma binni o zanda chindézanu sti lugar ra caquiiñeʼ jma publicador la? w21.08 23 párr. 14, 15

Riuulaʼdxiʼ Jehová gusihuinni guendarannaxhii stiʼ (Os. 6:6). Biquiiñeʼ Dios stinu profeta Miqueas para gabi laanu naquiiñeʼ gannaxhiinu (Miq. 6:8, nota). Para gánnanu ximodo gusihuínninu ni, naquiiñeʼ gunibiáʼ chaahuinu cualidad riʼ. Diidxaʼ «amor leal» zeedani biaʼ 230 biaje lu La Biblia. Traducción del Nuevo Mundo. ¿Xi riníʼ ni yaʼ? Lu glosario stiʼ Biblia ca ná: «Laani nga guendarannaxhii ni rucaa tuuxa gacané stobi, ne laaca laani nga guiale de laanu guidxaaganu sti binni ne cadi guixélenu de laa dede ora maʼ bíninu xiixa para gacanenu laa. Stale biaje ora riete diidxaʼ riʼ caniʼni de guendarannaxhii ni napa Dios ca xpinni, peru laaca caniʼni de guendarannaxhii ni rusihuinni tuuxa sti binni». Ne Jehová nga ni jma rusihuinni guendarannaxhii riʼ. Nga runi sicaríʼ bicaa rey David: «Jehová, dede guibáʼ rindá guendarannaxhii stiluʼ. Dios, ¡qué rusaana de gannaxhiiluʼ ne guizáʼ risaca ni!» (Sal. 36:5, 7). ¿Ñee laaca rusisácanu guendarannaxhii stiʼ Jehová cásica biʼniʼ David ni la? w21.11 2 párr. 1, 2; 3 párr. 4

Napa Jehová ti familia ra nuu ca xpinni ni runi adorar laa. Ládecabe nuu Jesús, laa nga «ni bizáʼ Dios primé lade guiráʼ cosa», ne nuu stale ángel (Col. 1:15; Sal. 103:20). Dxi guyuu Jesús lu Guidxilayú riʼ, bisihuinni zanda guʼyaʼ binni Jehová casi Bixhózecaʼ. Ti biaje dxi caníʼnebe ca discípulo stibe, guniʼbe naca Jehová «Bixhózebe ne Bixhózecaʼ» (Juan 20:17). Ne ora guca dedicarnu Jehová ne guyuunísanu, guyuʼnu ndaaniʼ ti familia ra nuu hermanu ne hermana ni nadxiisaa (Mar. 10:29, 30). Jehová nga Bixhózenu ni nadxii laanu, ne racalaʼdxiʼ Jesús guidúʼyanu Jehová cásica ruuyaʼ laabe: casi ti padre ni nadxii xiiñiʼ ne zanda guinínenu laa ora tiica si, ne cadi nácabe casi ti binni naduxhuʼ ni runi mandar si. Bisiidibe ca discípulo stibe guni orarcaʼ, ne guniʼbe ca diidxaʼ riʼ: «Bixhózedu». Ñanda niníʼ Jesús nidxíñanu ra nuu Jehová ne nininu «ni jma napa poder», «ni bizáʼ guiráʼ ni nuu» o «ni qué ziuu dxi gusaana de gaca Rey», nácacani título biaʼsi peʼ para Jehová ne zeedacani lu Biblia (Gén. 49:25; Is. 40:28; 1 Tim. 1:17). Peru biquiiñeʼ Jesús ti diidxaʼ de cariñu ora guníʼ «Bixhózedu». w21.09 20 párr. 1, 3

Qué nulabi rey Manasés ni gudxi ca profeta ni biseendaʼ Jehová ra nuu. «Ngue runi biseendacaa Jehová ca jefe stiʼ ejércitu stiʼ rey de Asiria para gucaalucaʼ» Judá. «Gunaazecabe Manasés ne bizaacabe argolla xii ne bindiibicabe laabe né chupa cadena de cobre ne zinécabe laabe Babilonia». Ne zándaca dxi deguyoobe Babilonia guníʼ íquebe ca cosa malu ni bíʼnibe. «Qué nusaana de ñaca humillarbe nezalú Dios stiʼ ca bixhozebiidabe». Peru bíʼnirube sti cosa «biinabe nezalú Jehová» ne «qué nusaana de ñuni orarbe» (2 Crón. 33:10-12). Ra gudiʼdiʼ tiempu bicabi Jehová oración ni biʼniʼ Manasés. Biiyaʼ Jehová dxandíʼ maʼ bichaabe ne bihuínnini lu ca oración ni bíʼnibe. Biá Jehová laabe ne bidii lugar gácabe rey sti biaje. Biʼniʼ Manasés stipa gusihuinni dxandíʼ cayaca arrepentir. w21.10 4 párr. 10, 11

Gupa xidé bisaana Priscila ne Áquila lugar ra nabézacaʼ ne familia sticaʼ, biyúbicaʼ ti lugar ra cuézaca’ ne ra quíxheca’ negocio de gúnica’ carpa ndaaniʼ sti guidxi. Dxi maʼ nuu Áquila ne Priscila Corinto, gucanecaʼ congregación sticaʼ ne gucanecaʼ apóstol Pablo para cuʼ gana xcaadxi hermanu. Gudiʼdiʼ si tiempu, yendézacabe ndaaniʼ xcaadxi guidxi ra caquiiñeʼ tu gacané para gaca predicar (Hech. 18:18-21; Rom. 16:3-5). Nánnanu nabé bíʼnicabe xhiiñaʼ Jehová ne guyuucabe nayecheʼ. Laaca zanda chinanda ca guendaxheelaʼ de tiempu riʼ ejemplu stiʼ Áquila ne Priscila ra gúnicaʼ xhiiñaʼ Reinu primé lu xquendanabánicaʼ. Ante guichaganáʼ ti pareja nga naquiiñeʼ guiniʼcaʼ xi meta cá íquecaʼ ugaandacaʼ. Ora riguixhe ique ti pareja ugaandacaʼ meta lu xhiiñaʼ Jehová ne gúnicaʼ stipa pur ugaandacaʼ ni, jma ruuyacaʼ ximodo runi espíritu santu dxiiñaʼ (Ecl. 4: 12). w21.11 17 párr. 11, 12

Naquiiñeʼ gúninu ni ná mandatu ni zeeda lu Biblia ra ná guni respetarnu bixhózenu ne jñaanu. Cadi guiaandaʼ laanu mandatu ni zeeda lu Levítico 19:3 ra ná naquiiñeʼ guni respetartu bixhózetu ne jñaatu, ne dxaagani ca diidxaʼ ni zeeda ante ra ná: «Naquiiñeʼ gácatu santo, purtiʼ naa Jehová Dios stitu, nacaʼ santo» (Lev. 19:2). Cada xpinni Cristu naquiiñeʼ guiníʼ ique: «¿Ñee runeʼ respetar jñaaʼ ne bixhozeʼ casi ná mandatu ni zeeda lu Biblia la?». Pa cadi cayúninu ni, galán quixhe íquenu gúninu ni. Zándaca pa dxiqué qué ñúninu ni, peru yanna naquiiñeʼ gúninu stipa pur gacanenu bixhózenu ne jñaanu. Zanda gúninu ni ra cueenu tiempu para laacabe, gudiʼnu ni caquiiñecabe ne gacanenu laacabe chúʼcabe gaxha de Jehová. Pa gúninu ca ndiʼ la? zinándanu ni ná mandatu ni zeeda lu Levítico 19:3. w21.12 4, 5 párr. 10-12

Guizáʼ naroʼbaʼ ca pecadu biʼniʼ rey David. Guzéʼtenu ti ejemplu, guyuunebe Bat-Seba ne biʼniʼ mandarbe guuticabe xheelaʼ (2 Sam. 11:2-4, 14, 15, 24). Ne pur nga la? gucanabe, bininabe familia stibe ne xcaadxi xheelabe (2 Sam. 12:10, 11). Ne sti cosa ni biʼniʼ David nga qué ñapa confianza Jehová ora biʼniʼ mandar gaca ti censu ndaaniʼ guidxi Israel. Ne pur ngue la? 70,000 israelita guti pur ti epidemia (2 Sam. 24:1-4, 10-15). ¿Ñee nininu cadi naquiiñeʼ guiá Jehová David la? Cadi zacá diʼ nga biʼniʼ Jehová. Biiyaʼ Jehová qué nusaanaʼ David laa dxiqué ne dxandíʼ cayaca arrepentir. Ngue runi biʼniʼ perdonarbe ca pecadu stiʼ. Nanna Jehová guizáʼ nadxii David laa ne racalaʼdxiʼ guni ni jneza. ¿Cadi dxandíʼ guizáʼ riéchenu ora gánnanu ruuyaʼ Dios ca cosa galán ni rúninu la? (1 Rey. 9:4; 1 Crón. 29:10, 17). w21.12 19 párr. 11-13

Biá Jesús ca binni ni napa xiixa guendahuará. Sicaríʼ gúdxibe Juan Bautista: «Maʼ ruuyaʼ ca ciegu, maʼ rizá ca ni nachiitaʼ ñee, maʼ bianda ca ni napa lepra, maʼ runadiaga ca diagacuaataʼ, maʼ bibani ca ni maʼ guti». Ne ora biʼyaʼ guidxi que ca milagru ni cayuni Jesús, «laaca cusisácacaʼ Dios» (Luc. 7:20-22). Laanu ca xpinni Cristu, rinándanu ejemplu stiʼ Jesús ra gácanu nachaʼhuiʼ, guianu ne gápanu paciencia binni ni napa xiixa guendahuará. Dxandíʼ qué nudii Jehová laanu poder para gúninu xiixa milagru. Peru cudiibe lugar laanu gábinu ca binni ni qué ruuyaʼ ne ca binni ni nuchii Binidxabaʼ lú, zuni Dios Guidxilayú riʼ ti paraísu ra maʼ qué ziuu guendahuará ne guiráʼ binni zaca xhamigu Dios (Luc. 4:18). Pur mensaje riʼ stale binni maʼ cusisácacaʼ Dios. w21.12 9 párr. 5

Biquiiñeʼ Santiago Stiidxaʼ Dios para gusiidiʼ. Biquiiñebe ni para gacanebe binni ganna riguu ndaayaʼ Jehová ca ni qué rusaana laa cásica guluube ndaayaʼ Job. Zacá bisihuinni Santiago cadi de laa zeeda ni bisiidiʼ, sínuque de Jehová ne qué niquiiñeʼ diidxaʼ nagana para biʼniʼ ni. Ni rizíʼdinu: Iquiiñenu Stiidxaʼ Dios ora gusíʼdinu ne cadi iquiiñenu diidxaʼ nagana. Qué racaláʼdxinu guluinu binni pabiáʼ nánnanu, sínuque ni racaláʼdxinu nga guluinu laacabe nga pabiáʼ nanna Jehová ne pabiáʼ rizaalaʼdxiʼ laanu (Rom. 11:33). Zanda gúninu ni pa siempre iquiiñenu Biblia. Guidúʼyanu ti ejemplu, ora maʼ cusiidiluʼ ti estudiante lugar de gábiluʼ laabe xi ñúniluʼ lii, mejor biluíʼ laabe ti ejemplu ni zeeda ndaaniʼ Biblia ni zacané laabe gúʼyabe ximodo riníʼ ique Jehová de laani. Zacá, ni gucaa laabe gúnibe ni caziidibe nga gusiéchebe Jehová ne cadi laanu. w22.01 10, 11 párr. 9, 10

Cadi cayabi si Jehová laanu cadi guninanu xcaadxi binni. Laaca nabé risaca gannaxhiinu prójimo stinu pa racaláʼdxinu gusiéchenu Dios. Ti biaje bizeeteʼ Jesús pabiáʼ risaca nga chinándanu ni ná mandamientu ni zeeda lu Levítico 19:18. Ora gunabadiidxaʼ ti fariseu laabe: «¿Gunáʼ nga mandamientu jma risaca stiʼ Ley?». Jesús gudxi laabe gannaxhiibe Jehová Dios stibe de guidubi ladxidoʼbe, de guidubi xhiálmabe ne de guidubi xquendabiaanibe purtiʼ ngue nga «primé mandamientu ni jma risaca». Ne óraque bizeetebe ni ná lu Levítico 19:18 ra guniʼbe: «Ne guiropa ni zeeda gaca casi laani que, ná: “Gunnaxhii prójimo stiluʼ cásica nadxiiluʼ lii”» (Mat. 22:35-40). Nuu stale modo zanda gusihuínninu ni. Ti modo zanda gúninu ni nga chinándanu ni ná Levítico 19:18: «Cadi guquíxeluʼ ni guni ca xiiñiʼ binni xquídxiluʼ lii ne cadi gapuʼ xiana laacabe». w21.12 11 párr. 11-13

Nagueendaca bisigaanáʼ Jesús ne bilá apóstol Pedro. Gunda guzá Pedro lu nisa que purtiʼ cayuuyadxí Jesús, peru ora bitiixhi lube ne biiyabe pabiáʼ reciu cundubi bi que la? bidxíbibe ne bizulú biaazibe (Mat. 14:24-31). Ni bizaaca Pedro que rusiidini laanu ti cosa risaca. Ora biétebe de lu canuá que ne zizabe lu nisa que, zándaca qué niníʼ íquebe pa zudxiguetaʼ lube sti ladu ne ziaazibe. Purtiʼ cá íquebe chindabe ra nuu Jesús, peru cumu biiyadxibe bi reciu que la? biaazibe. Laanu qué zanda diʼ sanu lu nisa, peru ridxaagalunu guendanagana ni rusihuinni pa naguidxi fe stinu. Pa gusaana de gápanu confianza Jehová ne ca promesa stiʼ zándaca guiráʼ fe stinu ne guizaacanu casi bizaaca Pedro. Nga runi, intiica si guendanagana guidxaagalunu ni zeeda gaca casi ti bi reciu, cadi gusaana de gápanu confianza Jehová ne guni crenu zacanebe laanu. w21.12 17, 18 párr. 6, 7

Ora guni orarnu, guni estudiarnu ne guni meditarnu cayuni adorarnu Dios. Ora runi orarnu caninenu Bixhózenu ni nuu guibáʼ ni guizáʼ nadxii laanu. Ora runi estudiarnu Biblia, rizíʼdinu de Dios, binni ni jma nuu xpiaaniʼ lu guidubi universu (Prov. 2:1-5). Ne ora runi meditarnu riníʼ íquenu ca cualidad galán ni napa Jehová ne propósitu ni nápabe para laanu ne para binni. Sicaríʼ nga jma jneza iquiiñenu tiempu stinu. Dxandíʼ, guiranu nga huaxiéʼ tiempu nápanu. Yanna, ¿xi zacané laanu iquiiñenu tiempu stinu jneza yaʼ? Biyubi ti lugar ra chuʼluʼ stúbiluʼ. Guiníʼ íquenu ximodo biʼniʼ Jesús ni. Dxi bizulú bíʼnibe xhiiñaʼ Dios lu Guidxilayú, guyuube 40 dxi lu desiertu (Luc. 4:1, 2). Raqué biʼniʼ orarbe ne guníʼ íquebe xi racalaʼdxiʼ Jehová gúnibe ne gucaneni laabe para gudxiilube ca guendanagana ni zadxaagalube despué. w22.01 27, 28 párr. 7, 8

Zándaca gudii ti ancianu o sti hermanu conseju laanu purtiʼ cayuuyaʼ caquiiñeʼ guchaʼnu. Pa gudii tuuxa laanu conseju ni zeeda lu Biblia la? cusihuinni nadxii laanu. Nga runi rusihuínninu naquiiñeʼ gucaʼdiáganu conseju ca ne chinándanu ni. Dxandíʼ nga raca nagana para laanu guicaanu conseju ni gudii tuuxa laanu, ne nuu biaje dede ridxiichinu. ¿Xiñee yaʼ? Qué raca nagana para laanu guininu rucheʼnu. Peru ora gabi tuuxa laanu paraa cucheʼnu la? zándaca gaca nagana para laanu guni crenu ni (Ecl. 7:9). Zándaca cueenu pretextu ne guiníʼ íquenu xiñee bidiibe laanu conseju ca o qué chuuláʼdxinu modo gúdxibe ni laanu. O dede zándaca guiníʼ íquenu sicaríʼ: «¿Tu nácabe para gudiibe conseju naa? ¡Laaca la? rucheebe yaʼ!». Ne pa qué chuuláʼdxinu conseju bidiibe laanu la? qué zacaanu ni o zándaca zuyúbinu sti binni ni gudii laanu conseju ni riuuláʼdxinu. w22.02 8, 9 párr. 2-4

Ora maʼ nuunu ndaaniʼ guidxilayú cubi ca, ¿ñee zazaaca xiixa cosa ni zucaa laanu gusihuínninu pa nápanu confianza jneza guiráʼ ni runi Jehová la? Guiníʼ íquenu ni bizaaca gulee si Jehová ca israelita de Egipto. Nuu de laacaʼ guca quejarcaʼ purtiʼ cabánacaʼ ca guendaró ni gudocaʼ Egipto ne bíʼnicaʼ menu maná ni bidii Jehová laacaʼ (Núm. 11:4-6; 21:5). ¿Ñee ngaca zanda guizaacanu tidiʼ si gran tribulación la? Qué gánnanu pabiáʼ tiempu zúninu dxiiñaʼ para gusianu Guidxilayú riʼ ne chaahuiʼ chaahuiʼ gácani ti Paraísu. Zándaca ziuu stale dxiiñaʼ ni gúninu ne gácani caadxi nagana. Yanna, ¿ñee zaca quejarnu de ca cosa ni gudii Jehová laanu tiempu ca la? Pa de ca yanna rudiʼnu xquixe peʼ Jehová pur guiráʼ cosa ni rudii laanu laaca zacaca zúninu ni lu ca dxi ni zeeda ca. w22.02 7 párr. 18, 19

Lu profecía ni zeeda lu Zacarías 8:23 riete ca diidxaʼ «ti judíu» ne «laatu» guiropaʼ diidxaʼ riʼ caníʼ ca ni de ca xcaadxi ungidu (Rom. 2:28, 29). «Chii hombre de guiráʼ idioma stiʼ ca guidxi» runi representar ni ca xcaadxi dendxuʼ. Rinaazeʼ dxiichicabe ca ungidu, ndiʼ riníʼ qué rixélecabe de laacaʼ ne riuucabe tobi si né ca ungidu para guni adorárcabe Jehová. Zacaca nga maʼ biʼniʼ cumplir Jehová profecía ni zeeda lu Ezequiel 37:15-19, 24, 25 purtiʼ cayacané ca ungidu ne grupu de xcaadxi dendxuʼ gúnicaʼ dxiiñaʼ tobi si. Caníʼ profecía riʼ de chupa palu. Ca binni napa esperanza de guibani guibáʼ nga ca ni zeeda gaca palu «para Judá» (tribu ra ribícabe ca binni gaca rey stiʼ guidxi Israel). Ne ca ni cabeza guibani lu Guidxilayú riʼ nga zeeda gaca palu «stiʼ Efraín». Jehová nga chiguni guiropaʼ grupu riʼ «ti palu si». Ndiʼ riníʼ ziuucabe tobi si para gúnicabe ni ná Rey stícabe, Cristu Jesús (Juan 10:16). w22.01 22 párr. 9, 10

Guníʼ Jesús de ca binni ni rudii bueltu ca pobre peru ruyúbicaʼ ganna xcaadxi ni cayúnicaʼ. Ca cosa riʼ la? nánnanu qué rusiecheʼ diʼ ca ni Jehová (Mat. 6:2-4). Zanda gácanu binni nachaʼhuiʼ pa gúninu cosa galán pur xcaadxi binni ne cadi guyúbinu puru si para laanu. Naquiiñeʼ guiníʼ íquenu ndiʼ: «¿Ñee nannaʼ xii nga ni jneza ne runeʼ ni la? ¿Xi rucaaʼ naa guneʼ cosa galán pur xcaadxi?». Siempre cayuni Jehová dxiiñaʼ ne siempre caniibi espíritu stiʼ (Gén. 1:2). Ndiʼ rusiidiʼ laanu guiráʼ ca cualidad stiʼ espíritu zanda gacané ca ni laanu guibáninu modo ná Dios. Guzéʼtenu ti ejemplu, sicaríʼ bicaa discípulo Santiago: «Zaqueca qué iquiiñeʼ fe stinu pa qué gusihuínninu ni né ca obra stinu» (Sant. 2:26). Nga ca nga runi xcaadxi cualidad ni zeeda de espíritu stiʼ Dios. Cada biaje gusihuínninu ca ni cusihuínninu cayuni espíritu stiʼ Dios dxiiñaʼ luguianu. w22.03 11 párr. 14-16

Guiráʼ ca xpinni Cristu rúninu stipa gúninu xhiiñaʼ Dios ne gacanenu xcaadxi binni. Peru bizeeteʼ apóstol Pedro ti cosa ni naquiiñeʼ gúninu. Ante guiniʼbe gácanu binni santo lu guiráʼ ni rúninu bizeetebe: «Laguni preparar xquendabiaanitu para gúnitu stale dxiiñaʼ» (1 Ped. 1:13). ¿Xi dxiiñaʼ ngue caniʼbe yaʼ? Laabe bisiénebe zaníʼ ca ungidu guiráʼ ladu pabiáʼ nachaʼhuiʼ Dios ni gulí laacaʼ (1 Ped. 2:9). Tiempu riʼ, guiráʼ ca xpinni Cristu nápanu privilegiu gúninu dxiiñaʼ ca ne guizáʼ racaneni stale binni. Ne nabé galán privilegiu napa xquidxi Dios, purtiʼ runi predicarnu ne rusíʼdinu binni de stiidxaʼ Dios né stale gana (Mar. 13:10). Pa gúninu ni, zusihuínninu nadxiinu Dios stinu, prójimo stinu ne racaláʼdxinu gácanu binni santo lu guiráʼ ni gúninu. w21.12 13 párr. 18

Siempre biiyaʼ apóstol Pablo ca cualidad galán ni napa ca hermanu. Laaca gúnnabe neca guchee tuuxa, qué riníʼ diʼ ni malu laa. Gunnaxhiibe ca hermanu ne biiyabe ca cualidad galán ni nápacaʼ. Ne ora bíʼyabe tuuxa cayaca nagana para laa guni ni jneza, gucanebe laa purtiʼ guníʼ íquebe racalaʼdxiʼ guni ni jneza. ¿Ximodo gucané Pablo chupa hermana de congregación de Filipo? (Filip. 4:1-3). Zándaca qué ñaca llevar Evodia ne Síntique purtiʼ gúpacaʼ guendanagana. Peru qué ñaca Pablo naduxhuʼ né laacabe ne qué ñuni criticar laacabe. Ni bíʼyabe nga ca cualidad stiʼ ca hermana riʼ ne purtiʼ qué huasaanacaʼ Jehová. Gúnnabe nadxii Jehová ca hermana que, cumu biiyabe zanda guchaacaʼ la? guluube gana laacaʼ guni chaahuicaʼ ca guendanagana nápacaʼ. Ne laaca biiyaʼ Pablo ca cualidad galán napa ca hermanu, ne ngue gucané laa chuʼ nayecheʼ ne gapa xhamigu ndaaniʼ congregación que. w22.03 30 párr. 16-18

Paz ni rudii Jehová laanu, riguixhedxini ladxidoʼno ne racaneni laanu guiníʼ íquenu jneza. Nga peʼ nga ni bizaaca ti hermana láʼ Luz. Sicaríʼ guniʼbe: «Nuu biaje runeʼ sentir stubeʼ, ne rucaani naa guiníʼ iqueʼ cadi nadxii Jehová naa. Peru óraca rabeʼ Jehová xi cayuneʼ sentir. Ra guneʼ orar racané ni naa chuaaʼ galán». Ni bizaaca hermana Luz rusihuinni ni racané oración laanu para gatadxí ladxidoʼno (Filip. 4:6, 7). Nápanu confianza zacané Jehová ne Jesús laanu ora gatiʼ ti binni ni nadxiinu. Ne cásica riá Jehová ne Jesús binni la? laanu laaca naquiiñeʼ guianu laacaʼ ra guni predicarnu ne gusíʼdinu laacaʼ. Ratadxí ladxidoʼno purtiʼ riene Jehová ne Jesús ni cazaacanu ne racaláʼdxicaʼ gacanecaʼ laanu guni huantarnu. Guizáʼ maʼ racaláʼdxinu guedandá dxi guni cumplir Jehová promesa riʼ: «Zuchaabe nisa riete lucaʼ» (Apoc. 21:4). w22.01 15 párr. 7; 19 párr. 19, 20

Guníʼ Jesús nuu chupa puertaʼ ne cada tobi de laani ziné laanu lu gadxé gadxé neza. Nuu chupa si neza, tobi ca «xilaga» ne stobi ca «nabéʼ». Cada tobi de laanu caquiiñeʼ guni decidirnu pa neza chuunu. Laani nga decisión jma risaca ni naquiiñeʼ guicaanu purtiʼ pur laani zanda guicaanu guendanabani ni qué zaluxe. Neza «xilaga» ca nga neza ra zeʼ stale purtiʼ fácil para sácabe luni (Mat. 7:14). Triste ni purtiʼ stale tu laa qué riná guiree de lu neza ca tisi zeʼ stale binni luni, qué rudiicabe cuenta pa Binidxabaʼ nga racalaʼdxiʼ chécabe lu neza riʼ purtiʼ zineni laacabe lu guendaguti (1 Cor. 6:9, 10; 1 Juan 5:19). Guníʼ Jesús de ti neza «xilaga» ne guniʼbe de sti neza gadxé peʼ, laani nga neza «nabéʼ» ne ná Jesús huaxiéʼ tu ridxela ni. ¿Xiñee yaʼ? Lu sti versículo ca guníʼ Jesús naquiiñeʼ chuʼnu cuidadu né ca falsu profeta (Mat. 7:15). w21.12 22, 23 párr. 3-5