Julio

Cumu nadxii Jehová laanu la? bizaʼbe laanu para ganda guininu, ne nácani ti regalu bidiibe laanu. Peru nin qué nindaa nuu tu maʼ qué niquiiñeʼ regalu riʼ jneza. Bisiguii Binidxabaʼ Eva, ne pur bisiguiibe laa la? guiranu nápanu pecadu ne rucheʼnu (Gén. 3:​1-4). Cadi jneza biquiiñeʼ Adán regalu ni bidii Jehová laa purtiʼ guniʼbe Eva napa donda pur bicheebe ne ngueca guniʼbe de Jehová (Gén. 3:12). Bisiguii Caín Jehová despué de biiti Abel, biʼchiʼ (Gén. 4:9). Yanna riʼ guizáʼ maʼ nagana nga guidxélanu ti película ra qué riníʼcabe diidxaʼ guidxa. Ne zacaca nga riníʼ binni ra scuela ne ra dxiiñaʼ. Zándaca guiráʼ dxi runadiáganu diidxaʼ ni cadi jneza. Nga runi, pa qué chuʼnu cuidadu la? zándaca maʼ guzulú guininu diidxaʼ ni cadi jneza. Laanu, ca xpinni Cristu, rúninu stipa pur gusiéchenu Jehová, nga runi qué rininu diidxaʼ guidxa. Peru laaca rúninu stipa iquiiñenu regalu ni bidii Jehová riʼ laanu jneza ne zacá gusisácanu laa. w22.04 4 párr. 1-3

Qué niníʼ ique Jesús jma risaca ca cosa material. Guyuube nayecheʼ purtiʼ gúpabe ni gobe ne ni guebe (Luc. 19:​2, 6, 7). Ti biaje bíʼnibe nisa vinu chaʼhuiʼ ne ngue nga primé milagru bíʼnibe (Juan 2:​10, 11). Ne dxi gútibe guizáʼ caru lari ni nácube (Juan 19:​23, 24). Peru cadi ca cosa material nga ni jma bisaca para laabe. Jesús bisiidiʼ, pa gúninu ni ná Reinu stiʼ Dios primé lu xquendanabáninu, zudii Jehová laanu ni caquiiñenu (Mat. 6:​31-33). Stale hermanu ne hermana huabeenducaʼ ni galán purtiʼ yenándacaʼ ca conseju stiʼ Jehová ni caníʼ de guendarapa bueltu. Guidúʼyanu ni bizaaca ti hermanu ni caʼruʼ guichaganáʼ ni láʼ Daniel. Sicaríʼ guniʼbe: «Dxi nahuiineʼ gudixheʼ iqueʼ guneʼ ni ná Jehová primé lu xquendanabaneʼ». Cumu runi Daniel stipa guibaniné huaxiéʼ si cosa la? huaquiiñebe tiempu stibe ne ni nánnabe gúnibe para gacanebe lu ca dxiiñaʼ de socorro ne guni servirbe Betel. Laaca guniʼbe: «Qué zanda diʼ siʼ bueltu guiráʼ ndaayaʼ ni maʼ bidii Jehová naa». w22.05 21, 22 párr. 6, 7

Ti modo zanda gúninu ni nga ra cadi gusaananu de guni estudiarnu Biblia ne ca publicación stinu. Neca maʼ zinenu stale iza de nácanu testigu stiʼ Jehová siempre nuuruʼ cosa ni zanda guizíʼdinu. Naquiiñeʼ gúninu stipa para guni estudiarnu Biblia, peru stale nga ni zabeendunu. Cadi guiranu riuuláʼdxinu guidúʼndanu ne guni estudiarnu, peru canabaʼ Jehová laanu cadi gusaana de gunibiaʼ chaahuinu laa para guiénenu ni dxandíʼ rusiidiʼ Biblia (Prov. 2:​4-6). Pa gúninu ni né gana zabeendunu ni galán. Ti hermanu láʼ Corey guníʼ ora ruundaʼ Biblia ruyubi guiene versículo pur versículo, sicaríʼ guníʼ: «Ruundaʼ ca nota zeeda luni, ruyubeʼ ca referencia zeeda lu ca versículo ne runeʼ investigar. […] Zacá riziideʼ stale cosa ora ruundaʼ». Pa gúninu sicaríʼ o sti modo la? naquiiñeʼ cueenu tiempu ne gúninu stipa para guni estudiarnu Biblia, purtiʼ zacá rusihuínninu rusisácanu ni dxandíʼ rusiidiʼ Biblia (Sal. 1:​1-3). w22.08 17 párr. 13; 18 párr. 15, 16

Dxi guyuu Jesús lu Guidxilayú, biquiiñebe guiráʼ ni bizáʼ Bixhózebe para gusiidibe ca discípulo stibe cosa risaca de laa. Guidúʼyanu ti ejemplu. Nadxii Jehová guiráʼ xixé binni guidxilayú. Lu Sermón del Monte que biquiiñeʼ Jesús chupa cosa ni bizáʼ Dios para gusiidiʼ ca discípulo stiʼ stale cosa risaca: biaaniʼ stiʼ gubidxa ne nisaguié. Neca stale binni huaxiéʼ rusisaca guiropa cosa riʼ, peru qué zanda guibani binni sin laacani. Pa ñacalaʼdxiʼ Jehová la? ca xpínnisibe nudiibe ca cosa riʼ, peru cumu nácabe ti Dios ni rannaxhii la? guiráʼ xixé binni rudiibe ca regalu riʼ (Mat. 5:​43-45). Biquiiñeʼ Jesús ejemplu riʼ para gusiidiʼ ca discípulo stiʼ ni racalaʼdxiʼ Jehová nga gannaxhiinu guiráʼ xixé binni. Ora guidúʼyanu pabiáʼ sicarú modo riaaziʼ gubidxa ne ora riaba ti nisaguiedé, guietenaláʼdxinu pabiáʼ nadxii Jehová guiráʼ xixé binni. Rucaa ejemplu stibe laanu gusihuínninu guendarannaxhii ra guni predicarnu guiráʼ clase binni. w23.03 17 párr. 9, 10

¿Tuu ndiʼ guizáʼ bidxagayaa apóstol Juan yaʼ? Biiyabe ti gunaa ni zuba deche ti bestia salvaje color naxiñáʼ rini. Biblia ná nácabe ti prostituta ne labe nga «Babilonia guidxi roʼ». Runi cometerbe pecadu sexual né «ca rey ni nuu lu guidxilayú» (Apoc. 17:​1-5). ¿Tuu nga «Babilonia guidxi roʼ»? Qué runi representar gunaa riʼ ti organización política purtiʼ Apocalipsis ná runi cometerbe pecadu sexual né ca líder políticu ni nuu lu guidxilayú riʼ (Apoc. 18:9). Ne cumu zúbabe deche bestia salvaje riʼ la? nga rusihuinni racaláʼdxibe guni controlarbe ca líder políticu. Ne laaca qué runi representar gunaa riʼ sistema comercial ni nuu lu guidxilayú stiʼ Binidxabaʼ, purtiʼ jma despué ruzeeteʼ libru stiʼ Apocalipsis de laacani ra ná: «Ca comerciante nuu lu guidxilayú» (Apoc. 18:​11, 15, 16). Ndaaniʼ guidxi Babilonia nabé guyuu stale religión ni cadi dxandíʼ. Nga runi, Babilonia guidxi roʼ runi representar ni guiráʼ ca religión ni cadi dxandíʼ ni nuu lu Guidxilayú. (Apoc. 17:​5, 18). w22.05 11 párr. 14-16

Zándaca guiníʼ ique ti hermana pa zuni xiiñiʼ ni ná Jehová. Nanna ca padre cumu nabáninu lu guidxilayú malu stiʼ Binidxabaʼ la? nga runi ridxaagalú xiiñicaʼ stale guendanagana. Ne stale hermana rápacaʼ guendanagana purtiʼ stúbisicaʼ o qué runi xheelacaʼ ni ná Jehová. Dxandíʼ, nagana nga gacané ti hermanu o ti hermana xiiñiʼ gaca xpinni Jehová ora stubi si cayuni ni. Peru laaca rácani nagana ora guirópacabe rúnicabe ni ná Jehová. Neca zacá ni la? cadi chuʼluʼ xizaa, nuu Jehová listu para gacané lii. Ne zúnibe ni. Laaca zanda guinabadiidxaluʼ xcaadxi hermanu ximodo huaquiiñecaʼ ca herramienta ni nápanu ora rúnicaʼ adoración en familia sticaʼ (Prov. 11:14). Zanda guinábaluʼ Jehová gacané lii guiníʼneluʼ ca xiiñiluʼ para gánnaluʼ xi runi sentírcabe ne xi riníʼ íquecabe (Prov. 20:5). w22.04 17 párr. 4, 7; 18 párr. 9

Sti cosa ni zacané laanu gannaxhiinu Jehová nga gunibiaʼnu Xiiñibe, purtiʼ laa rusihuinni ximodo peʼ naca Bixhoze (Heb. 1:3). Ti cosa ni zacané laanu gúninu ni nga ra guni estudiarnu guidapaʼ Evangeliu. ¿Ñee nápaluʼ costumbre gúʼndaluʼ Biblia guiráʼ dxi la? Pa qué ruʼnuʼ ni, ¿ñee zanda guzululuʼ gúniluʼ ni yannadxí ca la? Ora gúʼndaluʼ guiráʼ ni biʼniʼ Jesús ne ni guníʼ, biiyaʼ xi guiráʼ cualidad bisihuínnibe. Cumu nacháʼhuibe la? bidxiña guiráʼ binni laabe, dede ca xcuidihuiiniʼ guluube laacaʼ ndaaniʼ nabe (Mar. 10:​13-16). Qué nidxibi ca discípulo stibe ora nuucaʼ ra nuube, ngue runi gúdxicaʼ laabe guiráʼ ni riníʼ íquecaʼ (Mat. 16:22). Guca Jesús zaqué purtiʼ zaqué nga Bixhózebe ni nuu guibáʼ. Nga runi zanda guni orarnu Jehová ne gábinu laa guiráʼ ni nuu ndaaniʼ ladxidoʼno. Ne nánnanu qué zadxiichinebe laanu. Nadxiibe laanu ne rizaaláʼdxibe laanu (1 Ped. 5:7). w22.08 3 párr. 4, 5

Cumu Jehová nga bizáʼ laanu la? runibiáʼ chaahuibe laanu. ¿Cadi dxandíʼ ridxagayaanu ora guiníʼ íquenu runibiáʼ chaahuiʼ Jehová cada binni nabani lu Guidxilayú riʼ la? (Sal. 139:​15-17). Nanna Jehová binni ruchee jñaanu ne bixhózenu ne pur nga rucheʼnu. Ne cadi ngasi, laaca nánnabe ximodo laanu pur guiráʼ ni maʼ gudídinu ne maʼ bibáninu. ¿Xi runi Jehová né guiráʼ ni nanna de laanu yaʼ? Rucaani laabe guiabe laanu (Sal. 78:39; Sal. 103:​13, 14). Maʼ bisihuinni Jehová racalaʼdxiʼ guni perdonar laanu. Nánnabe pur bichee Adán nga ralenenu pecadu ne rátinu (Rom. 5:12). Ne gastiʼ qué zanda gúninu ne ninca ni guni sti binni para guireʼnu de lu náʼ pecadu ne guendaguti (Sal. 49:​7-9). Peru biá Dios laanu ne biʼniʼ xiixa para gulá laanu. Casi ná Juan 3:​16, pur nadxii Jehová laanu biseendaʼ tobi lucha Xiiñiʼ para gatiʼ pur laanu (Mat. 20:28; Rom. 5:19). w22.06 3 párr. 5, 6

Dxi bibani Job bisihuinni Jehová zaca perdonarnu pa guni perdonarnu. Biʼniʼ huantar hombre chaʼhuiʼ riʼ ca cosa feu ni gudxi Elifaz, Bildad ne Zofar laa. Gunabaʼ Jehová Job guni orar pur ca hombre riʼ. Ne ora biʼniʼ Job ni la? guluube ndaayaʼ laa (Job 42:​8-10). Pa guidaʼnu xiana zuniná ni laanu. Zeeda gaca xiana ca casi ti cosa ni nanaa ni nuanu, nga runi racalaʼdxiʼ Jehová cadi guidaʼnu xiana (Efes. 4:​31, 32). Cudii Jehová conseju riʼ: «Bisaana de guidxiichiluʼ ne bisaana de guidaaluʼ xiana» (Sal. 37:8). Pa chinándanu conseju riʼ zacaneni laanu, purtiʼ ora ridaa binni xiana zanda guni huará ni cuerpu stiʼ ne xquendabiaaniʼ (Prov. 14:30). Guidaa binni xiana zeeda gácani casi ora ñeʼ venenu purtiʼ runiná laca laa. Nga runi ora guni perdonarnu xcaadxi riuʼnu nayecheʼ . Zápanu guendariuudxi ne gastiʼ qué zucueeza laanu para gúninu ni ná Jehová. w22.06 10 párr. 9, 10

Esperanza stinu zeeda gácani casi ti cascu purtiʼ rápani xquendabiaaninu ne racaneni laanu cadi gacaláʼdxinu gúninu puru si ni riuuláʼdxinu ne guxheleʼ ni laanu de Jehová (1 Cor. 15:​33, 34). Esperanza ni zeeda gaca casi ti cascu laaca rápani laanu para cadi guiníʼ íquenu cadi naquiiñeʼ gusiéchenu Jehová. Cadi guiaandaʼ laanu ngaca gudxi Elifaz Job ná ndaʼ xhamigu laabe. Sicaríʼ guniʼbe: «¿Zándaxa gaca ti hombre ni rati nayá?». Ne laaca guniʼbe: «Biaa, qué gapa Dios confianza ca santo stiʼ, nin guibáʼ ca cadi nayá nezalube» (Job 15:​14, 15). ¡Cadi dxandíʼ nga! Cadi guiaandaʼ laanu Binidxabaʼ nga racalaʼdxiʼ guiníʼ íquenu zacá. Nánnabe, pa nisi laani guiníʼ íquenu la? chaahuiʼ chaahuiʼ zunítinu esperanza ni nápanu Jehová. Nga runi cadi guiníʼ íquenu guendarusiguii ca. Ne cadi guiaandaʼ laanu racalaʼdxiʼ Jehová guibáninu sin qué chuʼ dxi gátinu ne zacanebe laanu ugaandanu ni (1 Tim. 2:​3, 4). w22.10 25, 26 párr. 8-10

Gucalaʼdxiʼ Binidxabaʼ niníʼ ique Job cayacaná purtiʼ maʼ cadi nadxii Jehová laa. Ngue runi biseendabe ti bi guizáʼ reciu ne bisaba ni yoo ra nuu chii xiiñiʼ Job ra cayúnicaʼ ti saa huiiniʼ (Job 1:​18, 19). Laaca bisábabe bele de guibáʼ ni biiti ca dendxuʼ stiʼ Job ne ca siervu stiʼ, ca ni cayapa ca dendxuʼ que (Job 1:16). Cumu biiyaʼ Job cadi normal ngue modo beeda bi ne bele que la? guníʼ íquebe Jehová ngue biseendaʼ ca ni purtiʼ cadxiichiné laabe. Neca zaqué, qué ninádibe ñuni maldecirbe Bixhózebe ni nuu guibáʼ. Bidiibe cuenta stale iza bidii Jehová laabe stale cosa galán. Ne guníʼ íquebe, pa maʼ gucuaabe cosa galán la? laaca naquiiñeʼ guicaabe ca cosa malu que. Ngue runi guniʼbe cadi naquiiñeʼ gusaana de guisaca lá Jehová (Job 1:​20, 21). w22.06 21 párr. 7

Chupa chonna gubidxa de guníʼ Jesús ca diidxaʼ ca ngaca gúdxibe ca discípulo sti biaje ni cá lu Juan 17:14. Maʼ cadúʼyanu cayaca cumplir profecía riʼ, jmaruʼ si lu ti gayuaa iza ni maʼ gudiʼdiʼ ca. ¿Ximodo nánnanu ni yaʼ? Guca si Jesús Rey lu iza 1914, guládxibe Binidxabaʼ de guibáʼ. Yanna maʼ lu Guidxilayú si nga randa runi Binidxabaʼ ni ná, ne cabézabe dxi guinitilube (Apoc. 12:​9, 12). Peru laga cabézabe dxi ca, cadxiichibe ne cucaalube xquidxi Dios (Apoc. 12:​13, 17). Nga runi, jmaruʼ si nanalaʼdxiʼ binni xquidxi Dios tiempu riʼ. Peru cadi naquiiñeʼ diʼ guidxíbinu Binidxabaʼ ne ca xpinni. Naquiiñeʼ chuʼnu seguru casi guyuu apóstol Pablo, ora bicaa: «Pa nuu Dios pur laanu, ¿tu zanda gucaalú laanu yaʼ?» (Rom. 8:31). Zanda gápanu confianza Jehová. w22.07 18 párr. 14, 15

Guyuu Jesús seguru ziuu stale tu zuni predicar tiempu ra mayaca gueeda fin. Gúnnabe zaca cumplir profecía riʼ: «Ziale de ndaaniʼ ladxidóʼ xquídxiluʼ gacané dxi guni dirigirluʼ ejércitu stiluʼ para cheʼ lu ti guerra» (Sal. 110:3). Pa cayuni predicarluʼ ca noticia galán stiʼ Reinu, cayacaneluʼ Jesús ne mozo ni nuu xpiaaniʼ ne laaca cayacaneluʼ gaca cumplir profecía riʼ. Cayaca predicar lu guidubi Guidxilayú peru laaca riuu caadxi guendanagana. Ti guendanagana ni ridxaagalunu nga nuu tu rucaalú dxiiñaʼ riʼ. Riníʼ ca apóstata, ca políticu ne ca líder stiʼ ca religión ca cosa ni cadi dxandíʼ de dxiiñaʼ ni rúninu. Ne pa guni cré familia stinu, ca binni ni runibiaʼnu ne ca compañeru de dxiiñaʼ ca cosa riʼ la? zándaca gucaacaʼ laanu gusaana de gúninu ni ná Jehová ne gusaana de guni predicarnu. Ndaaniʼ caadxi guidxi, runi amenazar ca enemigu stinu laanu, rucaalucaʼ, rucueezacaʼ ne dede ruseguyoocaʼ caadxi de laanu ndaaniʼ cárcel. w22.07 8 párr. 1; 9 párr. 5, 6

Maʼ bidii Jehová laanu Stiidxaʼ para gacané laanu, nga runi iquiiñenu ni ra guni estudiarnu. Ribézabe gúninu ni guiráʼ dxi ne guiníʼ íquenu ni guidúʼndanu. Pa gúninu ni cazíʼdinu, jma naguidxi zaca fe stinu ne ziuʼnu gaxha de laabe. Ne nga zacané laanu guni huantarnu ca guendanagana ni guidxaagalunu. Ne pa guni crenu ni cá lu Biblia zudii Jehová laanu espíritu santu stiʼ. Né espíritu ca zudii Dios laanu poder stiʼ para guni huantarnu intiica guendanagana (2 Cor. 4:​7-10). Riquiiñeʼ Jehová «mozo ni nuu xpiaaniʼ ne ni runi jneza» para gudii laanu stale publicación, videu ne canción ni racané laanu gaca fe stinu naguidxi ne cadi guixélenu de Dios (Mat. 24:45). Huasiidiʼ Jehová ca xpinni gannaxhiisaacaʼ ne cúʼsaacaʼ gana laacaʼ ora cadíʼdicaʼ lu guendanagana (2 Cor. 1:​3, 4; 1 Tes. 4:9). Racalaʼdxiʼ ca hermanu ne ca hermana stinu gacanecaʼ laanu ora tídinu lu ti guendanagana para cadi guixélenu de Jehová. w22.08 12 párr. 12-14

Ra gábinu ca hermanu stinu xiixa cualidad ni riuuláʼdxinu nápacaʼ ne gábinu ni xcaadxi, zacatiʼ zacanenu ca hermanu gannaxhiisaacaʼ ne gaca xhamígucaʼ. Zándaca ziuu ora zapa ca xpinni Cristu ni maʼ ziné stale iza guendanagana né sti hermanu. Nga peʼ nga ni bizaaca apóstol Pablo ne Bernabé, chupa hermanu ni guizáʼ guca xhamigu. Ni bicaa laacabe gápacabe guendanagana nga pa zinécabe Marcos lu sti biaje misional ni chigúnicabe o coʼ. ¿Xi bizaaca óraque yaʼ? Biblia ná: «Nabé nadipaʼ modo biʼniʼ discutírcabe pur ngue ne cada tobi gucuaa gadxé gadxé ladu» (Hech. 15:​37-39). Peru biʼniʼ chaahuiʼ Pablo, Bernabé ne Marcos guendanagana gúpacaʼ. Gudiʼdiʼ si ti tiempu guníʼ Pablo cosa galán de Bernabé ne de Marcos (1 Cor. 9:6; Col. 4:10). Laanu laaca naquiiñeʼ guni chaahuinu intiica guendanagana gapanenu ca hermanu de congregación ne guidúʼyanu ca cualidad galán nápacaʼ. Pa gúninu ni zacanenu chuʼ guendariuudxi ne ziuu congregación tobi si. w22.08 23 párr. 10, 11

Neca rúninu stipa pur chinándanu ca ley stiʼ Jehová, cadi naquiiñeʼ guni juzgarnu xcaadxi o guiníʼ íquenu jma jneza rúninu ca cosa ca que laacabe. Cadi guiaandaʼ laanu, Jehová nga «Juez stiʼ guidubi naca guidxilayú» (Gén. 18:25). Ne guietenaláʼdxinu qué ñúnidibe laanu juez. Guidúʼyanu ni bizaaca José, laabe gúcabe ti hombre ni runi jneza. Neca guyuu tu biʼniʼ tratar laabe mal, qué ñuni juzgarbe laacaʼ. Nabé feu modo biʼniʼ tratar ca bíʼchibe laabe, bitoocaʼ laabe casi esclavu ne gúdxicaʼ bixhózecaʼ guti José. Gudiʼdiʼ si iza, biiyaʼ José laacabe sti biaje. Peru yanna maʼ naca ti gobernante ni napa poder, ñanda ñuni juzgar laacabe ne dede nuquixe laacabe ni bíʼnicabe laa. Ne nga peʼ nga ni guleza ca bíʼchibe ñúnibe neca nuucaʼ arrepentidu pur ni bíʼnicaʼ. Peru gudxi José laacabe: «Cadi guidxíbitu. ¿Ñee naa nga nuaaʼ lugar stiʼ Dios la?» (Gén. 37:​18-20, 27, 28, 31-35; 50:​15-21). Guca José humilde ne guníʼ ique Jehová si nga napa derechu guni juzgar ca biʼchiʼ. w22.08 30 párr. 18, 19

¿Ñee nánnaluʼ zanda iquiiñeʼ Jehová lii para guicabi oración stiʼ ti hermanu la? Zanda iquiiñebe lii pa nácaluʼ ancianu, siervu ministerial, precursor, publicador, joven, huaniisi, hombre o gunaa. Ora guinabaʼ ti binni ni nadxii Jehová gacanebe laa, stale biaje riquiiñeʼ Dios stinu ca ancianu ne xcaadxi xpinni para quixhedxí ladxidóʼ binni ca (Col. 4:11). Ti privilegiu nga gúninu ni ná Jehová ne gacanenu ca hermanu stinu. Zanda gúninu ni ora chuʼ ti epidemia, guizaaca xiixa cosa ni cadi cabézanu o sanándacabe laanu. Zándaca racaláʼdxinu gacanenu xcaadxi, peru pa laaca cayacaná familia stinu la? qué zanda gúninu ni. Neca zacá, racaláʼdxinu gacanenu ca hermanu ne riecheʼ Jehová ora ruuyaʼ rúninu biaʼ gándatiʼ para gacanenu laacabe (Prov. 3:27; 19:17). w22.12 22 párr. 1, 2

Pa nápanu amor zacané ni laanu gácanu binni de confianza. Jesús guníʼ guiropaʼ mandamientu jma risaca nga gannaxhiinu Jehová ne gannaxhiinu prójimo (Mat. 22:​37-39). Cumu nadxiinu Jehová la? racaláʼdxinu gácanu casi laabe purtiʼ laa nga binni ni jma zanda gápanu confianza. Ne pur nadxiinu ca hermanu stinu qué zazanu zaninu xiixa cosa ni gábicaʼ laanu. Qué chuʼ dxi gúninu xiixa ni guniná o gusituí lucaʼ. Pa humilde laanu zacané ni laanu gácanu binni de confianza. Ti xpinni Cristu ni naca humilde qué zuyubi gaca primé ni guiníʼ xiixa cosa (Filip. 2:3). Laaca qué zaníʼ íquenu risácanu purtiʼ si nánnanu xiixa cosa ni qué zanda guininu. Ne pa humilde laanu qué zazanu zaninu xiixa cosa ni riníʼ íquenu de ni qué riete lu Biblia o lu ca publicación. w22.09 12 párr. 12, 13

Gudxi ti ángel Daniel jma ziene xquidxi Dios ca profecía zeeda lu libru stiʼ Daniel. Peru guniʼbe «nin ti binni malu qué ziene» (Dan. 12:10). Yanna nga zanda gusihuínninu cadi nuunu lu grupu ra nuu ca binni malu (Mal. 3:​16-18). Cucaalisaa Jehová «ti guidxi risaca» para laa. ¿Cadi dxandíʼ riuuláʼdxinu chuʼnu ndaaniʼ guidxi ca la? Tiempu riʼ cazaaca cosa ni guizáʼ cadxagayaanu. Peru maʼ cadi candaa zazaaca xcaadxi cosa ni jma zadxagayaanu. Maʼ cadi candaa zaree guiráʼ cosa malu. Despué, zadúʼyanu ximodo gaca cumplir promesa ni biʼniʼ Jehová Daniel ora gúdxibe laa: «Ziásaluʼ para guicaaluʼ ni maʼ nexheʼ guicaaluʼ ora maʼ guiluxe ca dxi ca» (Dan. 12:13). ¿Ñee maʼ racaláʼdxiluʼ guedandá dxi guiasa Daniel ne ca familia stiluʼ de lade gueʼtuʼ la? Pa zacá ni, biʼniʼ stipa gácaluʼ fiel, ne qué zaxiá laluʼ lu libru de guendanabani stiʼ Jehová. w22.09 24 párr. 17; 25 párr. 19, 20

Zándaca guizáʼ guluu ca diidxaʼ riʼ gana profeta Ezequiel. Purtiʼ bietenaláʼdxibe zacá gá nga ca diidxaʼ ni gudxi Jehová Moisés ne Isaías dxi gulí laacabe para gácacabe profeta stiʼ (Éx. 3:10; Is. 6:8). Laaca gunna Ezequiel gucané Jehová ca profeta riʼ para gúnicaʼ dxiiñaʼ nagana ni bidiibe laacaʼ. Ngue runi, ora gudxi Dios laabe chupa biaje «Cuseendaʼ lii», nánnabe zacané laabe gúnibe dxiiñaʼ que. Ne lu libru stiʼ Ezequiel stale biaje riete ca diidxaʼ riʼ: «Óraque gucuaaʼ ca stiidxaʼ Jehová» (Ezeq. 14:2). Ne laaca gatigá riete ca diidxaʼ riʼ: «Sti biaje ca gucuaaʼ ca stiidxaʼ Jehová» (Ezeq. 6:1). Ngue runi qué ñaandaʼ profeta riʼ Jehová ngue biseendaʼ laa. Ne cumu sacerdote bixhózebe la? zándaca bisiidiʼ laabe rabi Jehová ca profeta stiʼ zacanebe laacaʼ ora cudiibe laacaʼ ti dxiiñaʼ. Ne maca gudxi Jehová Isaac, Jacob ne Jeremías qué zaxélebe de laacaʼ (Gén. 26:24; 28:15; Jer. 1:8). w22.11 3 párr. 3

Neca bichee Adán ne Eva ne pur nga rati guiráʼ ca xiiñicaʼ, caʼruʼ guchaa Jehová ni maʼ gudixhe ique guni (Is. 55:11). Racaláʼdxirube guibani ca binni ni ruzuubaʼ diidxaʼ sin qué chuʼ dxi gáticaʼ. Biiyaʼ guiráʼ ca cosa ni maʼ guníʼ Jehová ne ni maʼ biʼniʼ para guni ni maʼ gudixhe ique. Maʼ guníʼ Jehová zandisaʼ ca binni ni maʼ guti ne zudiibe laacaʼ oportunidad de guibánicaʼ sin qué chuʼ dxi gáticaʼ (Hech. 24:15; Tito 1:​1, 2). Gunna dxichi Job guizáʼ maʼ racalaʼdxiʼ Jehová guindisaʼ ca binni ni maʼ guti (Job 14:​14, 15). Ne profeta Daniel gunna zabani ca binni ni maʼ guti ne zápacaʼ oportunidad de guibánicaʼ sin qué chuʼ dxi gáticaʼ (Sal. 37:29; Dan. 12:​2, 13). Ca judíu ni bibani tiempu stiʼ Jesús laaca gúnnacaʼ zanda gudii Jehová «guendanabani ni qué zaluxe» ca xpinni ni guzuubaʼ diidxaʼ (Luc. 10:25; 18:18). Stale biaje guníʼ Jesús de promesa riʼ ne laapebe gundisaʼ Bixhózebe de lade gueʼtuʼ (Mat. 19:29; 22:​31, 32; Luc. 18:30; Juan 11:25). w22.12 4, 5 párr. 8, 9

Canabaʼ Jehová laanu chuʼnu gaxha de laa (Sant. 4:8). Racaláʼdxibe gácabe Dios stinu, Bixhózenu ne xhamígunu. Ricábibe ca oración ni rúninu ne racanebe laanu ora nápanu guendanagana. Laaca rusiidibe laanu ne rápabe laanu ra riquiiñebe organización stibe. Zanda guidxíñanu gaxha de Jehová ra guni orarnu, guidúʼndanu Stiidxaʼ ne guiníʼ íquenu ni nani. Zucaa ndiʼ laanu gannaxhiinu laabe ne gudiʼnu xquixe peʼ laabe. Racaláʼdxinu guzúʼbanu stiidxabe ne gusisácanu laabe purtiʼ laasibe runi merecerbe ni (Apoc. 4:11). Ra jma gunibiaʼnu laabe jma zápanu confianza laabe ne organización ni maʼ bidiibe para gapa laanu. Peru chaahuiʼ chaahuiʼ ruyubi Binidxabaʼ modo guirá confianza ni nápanu Jehová ne organización stiʼ. Peru zanda gudxíʼlunu laabe. Pa naguidxi fe stinu ne confianza ni nápanu Jehová, qué zaxélenu de laa ne de organización stiʼ (Sal. 31:​13, 14). w22.11 14 párr. 1-3

Biaʼ dxi huabani binni, stale xpinni Cristu huayuucaʼ dispuestu guseguyoocabe laacaʼ o dede guuticabe laacaʼ pur nadxiicaʼ Jehová, Rey ni jma nandxóʼ sticaʼ. Maʼ gudixhe íquecabe cadi gucheenécabe Dios cásica guionnaʼ hebreu ni bilá Dios para cadi ñáticaʼ ndaaniʼ ti horno de bele (Dan. 3:28). Gunna David pabiáʼ risaca nga cadi guchéʼnenu Dios. Sicaríʼ bicaabe: «Zaguixhe Jehová sentencia stiʼ ca guidxi ca. Biʼniʼ juzgar naa, Jehová, según ca cosa jneza huayuneʼ, según ca cosa ni bineʼ para cadi gucheeniaʼ lii» (Sal. 7:8). Laaca guniʼbe: «Pa qué gucheeniáʼ lii ne guneʼ ni jneza zulá ni naa» (Sal. 25:21). Modo jma galán zanda guibáninu nga cadi guchéʼnenu Jehová. Zacá zuni sentirnu casi biʼniʼ sentir salmista que ora bicaa: «Nayecheʼ nga canazá ca binni ni qué ruchee, ca ni canazá casi ná ca ley stiʼ Jehová» (Sal. 119:1). w22.10 17 párr. 18, 19

Tobi de ca cosa ni jma bisisaca Job lu xquendanabani nga ra guniʼné Jehová laa. Gudxi Jehová laabe gúʼyabe pabiáʼ sicarú guiráʼ ca ni bizáʼ. Ndiʼ zacané laabe gúʼyabe pabiáʼ nuu xpiaaniʼ Jehová ne gápabe confianza rapa Jehová ca xpinni. Casi ra biʼyaʼ Job rudii Jehová ni caquiiñeʼ ca maniʼ ca para guibánicaʼ, gunna dxíchibe laaca zudii Jehová guiráʼ ni caquiiñebe (Job 38:​39-41; 39:​1, 5, 13-16). Ra guníʼ ique Job lu ca ni bizáʼ Jehová riʼ, gucané ni laabe gunibiáʼ chaahuibe ca cualidad stiʼ. Laanu laaca zanda gunibiáʼ chaahuinu Jehová ra guidúʼyanu ca ni bizáʼ. Peru zándaca gácani nagana para laanu, ¿xiñee yaʼ? Purtiʼ pa nabézanu ndaaniʼ guidxi la? zándaca qué ridúʼyanu ca cosa ni bizáʼ Jehová. Ne zándaca neca nabézanu xiixa lugar casi ti ranchu la? zándaca huaxiéʼ tiempu nápanu para guidúʼyanu ca ni. Peru risaca cueenu tiempu para guidúʼyanu guiráʼ ca ni bizáʼ Jehová. w23.03 15 párr. 1, 2

Gudxi Jesús ca discípulo stiʼ ante gueeda fin «zaca xu roʼ» ne xcaadxi desastre (Luc. 21:11). Laaca guniʼbe zadale guendaquéiquiiñeʼ ne ridúʼyanu ni purtiʼ nuu stale binni ni ribaʼnaʼ, ridíndecaʼ ne nuu stale terrorismo (Mat. 24:12). Qué niníʼ Jesús zuniná ca cosa riʼ ca binni si ni qué runi ni ná Jehová. Stale de ca xpinni Dios huayuniná ca desastre ca laacaʼ (Is. 57:1; 2 Cor. 11:25). Zándaca qué zuni Jehová xiixa para gulá laanu de ca desastre, peru zudiibe laanu ni caquiiñenu para gápanu paz. Ora guizaaca xiixa cosa ni cadi cabézanu qué zadxíbinu pa guyuʼnu listu dede ante. Peru pa gúninu ni, ¿ñee culuinu qué gápanu confianza Jehová la? Coʼ. Purtiʼ pa laanu chuʼnu listu dede ante guizaaca xiixa cosa ni cadi cabézanu, culuinu nápanu fe zápabe laanu. Biblia peʼ cayabi laanu guiníʼ íquenu xi gúninu ora guidúʼyanu xiixa peligru. w22.12 18 párr. 9, 10

Dxi nuu José ndaaniʼ cárcel, biʼniʼ Jehová xiixa para gapa rey stiʼ Egipto chupa bacaandaʼ ni bichiiñaʼ laa. Ngue runi ora gunna rey que randa riníʼ José xi raca significar bacaandaʼ stiʼ binni la? biseendacaabe laa. Gucané Jehová José para gusiene xi riníʼ ca bacaandaʼ ni gúpabe ne laaca gudxi laabe xi naquiiñeʼ gúnibe. Guizáʼ bidxagayaa faraón ni gúdxibe laa. Ora bidii cuenta cayacané Jehová José, gulí laabe para gaca encargarbe guiaapaʼ guendaró guidubi guidxi Egipto (Gén. 41:​38, 41-44). Gudiʼdiʼ si iza, guyuu ti tiempu guyuu guendarindaana ndaaniʼ guidxi Egipto ne bigaanda ni Canaán, ra nabeza familia stiʼ José. Pur dxiiñaʼ ni bidii faraón José, zanda gacanebe familia stibe, familia ra chiguiree Mesías despué. Jehová ngue gucané José para guiree guiráʼ ca cosa ni biʼniʼ jneza. Neca gucalaʼdxiʼ ca biʼchiʼ José ñuuticaʼ laabe, peru biquiiñeʼ Jehová ni bizaacabe que para guni ni naguixhe ique. w23.01 16, 17 párr. 11, 12

Naquiiñeʼ guidúʼyanu gunáʼ nga ca cosa ni zanda guxheleʼ laanu de Jehová ne gúninu stipa gucáʼnanu ca ni. Pa gúninu ni, qué zusaana Dios de gannaxhii laanu (Prov. 22:3; Jud. 20, 21). Apóstol Pablo laaca gudxi ca xpinni Cristu guʼyaʼ chaahuicaʼ ximodo nuucaʼ. Ndiʼ nga ni bicaabe ra nuu ca xpinni Cristu de Éfeso: «Lachuu cuidadu cadi gácatu casi binni huati, sínuque lagaca casi binni nuu xpiaaniʼ» (Efes. 5:​15, 16). Qué rusaana Binidxabaʼ de guyubi modo guxheleʼ laanu de Jehová. Nga runi, Biblia cayabi laanu cadi gusaana de guiduʼyaʼ chaahuinu «xii nga racalaʼdxiʼ Jehová», zacá zanda gudxíʼlunu Binidxabaʼ (Efes. 5:17). Para guicaanu decisión jneza naquiiñeʼ ganna chaahuinu «xii nga racalaʼdxiʼ Jehová». ¿Ximodo zanda gúninu ni yaʼ? Ra guni estudiarnu Stiidxaʼ Dios gatigá ne guiníʼ íquenu ni nani. Ra jma guiénenu xii nga racalaʼdxiʼ Jehová gúninu ne jma gunibiaʼnu «ximodo riníʼ ique Cristu», qué zaca nagana para laanu gácanu «casi binni nuu xpiaaniʼ» neca gastiʼ ti norma lu Biblia ni gabi laanu xi peʼ naquiiñeʼ gúninu (1 Cor. 2:​14-16). w23.02 16, 17 párr. 7-9

¿Panda biaje rusialuʼ ra lídxiluʼ? Zándaca ante chindézaluʼ ndaaniʼ ni bisialuʼ. Peru ¿xi nizaaca pa ñaca qué nusialuʼ ni yaʼ? Nidxá yú ndaaniʼ ni ne ñacabiidiʼ ni nagueenda. Nga runi para gaca ra lídxiluʼ nayá naquiiñeʼ gusialuʼ ni gatigá. Zacagá nga naquiiñeʼ gúninu né ca ni riníʼ íquenu ne modo nácanu. Ante chuʼnísanu bíninu stipa pur guchaʼnu modo nabáninu, bisianu laanu de «guiráʼ ni runi biidiʼ cuerpu stinu ne espíritu stinu» (2 Cor. 7:1). Peru yanna naquiiñeʼ chinándanu conseju ni bidii apóstol Pablo ora guníʼ: «Laguchaa modo riníʼ íquetu» (Efes. 4:23). Nagueenda zanda guicá modo riníʼ ique binni guidxilayú laanu ne guni biidiʼ ni laanu nezalú Jehová. Para cadi guizaacanu nga ne chuʼnu nayá nezalú Jehová la? naquiiñeʼ guidúʼyanu pa jneza modo riníʼ íquenu, modo nácanu ne ca deseu stinu. w23.01 8 párr. 1, 2

¿Ñee huaníʼ íquenu ximodo bisiidiʼ Jesús la? Gúpabe costumbre guiniʼbe de memoria xiixa relatu ni zeeda lu Stiidxaʼ Dios. Dxi guyuunisa Jesús ne gulí Dios laa né espíritu santu, zándaca bietenaláʼdxibe ximodo bibánibe guibáʼ ante gueedabe lu Guidxilayú. Ne rihuinni zacá ni pur ca diidxaʼ ni guniʼbe despué de guyuunísabe, ne ca diidxaʼ ni guniʼbe ante gátibe (Deut. 8:3; Sal. 31:5; Luc. 4:4; 23:46). Ne tiempu biʼniʼ Jesús xhiiñaʼ Dios, chonna iza arondaʼ, gatigá biindabe Stiidxaʼ Dios, bizeetebe de laani ne bisiénebe ni zeeda luni (Mat. 5:​17, 18, 21, 22, 27, 28; Luc. 4:​17-21). Ne dede ante guzulú Jesús guni xhiiñaʼ Dios, maca gúpabe costumbre gúʼndabe Stiidxaʼ Dios ne gunadiágabe ora guʼndaʼ xcaadxi ni ne guiniʼcaʼ de laani. Ne nánnanu laaca binadiágabe guníʼ María ne José de Stiidxaʼ Dios (Deut. 6:​6, 7). Laaca guyé Jesús ne familia stiʼ ndaaniʼ sinagoga guiráʼ sábadu ne rucaadiaga chaahuibe ora guiuundaʼ Stiidxaʼ Dios raqué (Luc. 4:16). w23.02 8 párr. 1, 2

Nuu stale razón para gannaxhiiluʼ Jehová. Maʼ biziidiluʼ ra nuube nga «cadá guendanabani» ne rudiibe laanu «guiráʼ regalu sicarú ne guiráʼ cosa nachaʼhuiʼ» (Sal. 36:9; Sant. 1:17). Guiráʼ ca cosa ni nápaluʼ zeeda ca ni de Jehová, purtiʼ laa rudii de ni napa ne guizáʼ nadxii laanu. Ti cosa nabé risaca nga: bidiibe lugar gatiʼ Xiiñibe. ¿Xiñee risaca ni yaʼ? Guiníʼ íquenu pabiáʼ nadxiisaa Jehová ne Xiiñiʼ. Jesús guníʼ: «Nadxii Bixhozeʼ naa» ne «Nadxieeʼ Bixhozeʼ» (Juan 10:17; 14:31). Biroobaʼ guendarannaxhii stícabe ra guyuucabe juntu stale millón de iza (Prov. 8:​22, 23, 30). Yanna, guníʼ ique pabiáʼ biuubaʼ ladxidóʼ Jehová ra bidii lugar gucaná Xiiñiʼ ne biiticabe laa. Cumu guizáʼ nadxii Jehová binni la? bidii Xiiñiʼ ni jma nadxii beeda gatiʼ pur laanu ti zacá ganda guibáninu sin qué chuʼ dxi gátinu (Juan 3:16; Gál. 2:20). ¿Cadi dxandíʼ rucaa nga lii gannaxhiiluʼ Dios la? w23.03 4, 5 párr. 11-13

Cadi gucaadiáganu ni rusiidiʼ ca apóstata. Gudindené Jesús caadxi xpinni Cristu de Pérgamo purtiʼ cuxhélecaʼ ca hermanu (Apoc. 2:​14-16). Peru guluube gana ca xpinni Cristu de Tiatira, ca ni qué ninanda ni rusiidiʼ Binidxabaʼ ne guluube gana laacaʼ cadi guixélecaʼ de lu neza ni dxandíʼ (Apoc. 2:​24-26). Gupa xidé guca arrepentir ca xpinni Cristu que, ca ni cadi naguidxi nuu fe stiʼ, purtiʼ bicaadiágacaʼ ca cosa ni rusiidiʼ Binidxabaʼ. Laanu laaca cadi naquiiñeʼ gucaʼdiáganu intiica cosa ni cadi zeeda de Jehová. Zándaca zusihuinni ca apóstata «casi ora runi adorarcaʼ Dios, peru pur modo nabánicaʼ zahuinni cadi dxandíʼ ni» (2 Tim. 3:5). Pa runi estudiarnu Stiidxaʼ Dios la? qué zaca nagana para laanu gucáʼnanu ca cosa ni zeeda de Binidxabaʼ (2 Tim. 3:​14-17; Jud. 3, 4). Naquiiñeʼ guidúʼyanu chuulaʼdxiʼ Jehová modo runi adorarnu laa. Pa cayúninu xiixa cosa ni cadi jneza naquiiñeʼ guchaʼnu nagueendaca (Apoc. 2:​5, 16; 3:​3, 16). w22.05 4 párr. 9; 5 párr. 11