Agosto

¿Xiñee zucaa Jehová lu ti libru lá ca binni ni ridxibi laabe ne rusisaca labe? Purtiʼ ni rininu rusihuinni xi nuu ndaaniʼ ladxidoʼno. Sicaríʼ guníʼ Jesús: «Ni nuu ndaaniʼ ladxidóʼ binni nga riníʼ» (Mat. 12:34). Nga runi, ca binni ni nadxii Jehová nga racaláʼdxibe guibánicaʼ ndaaniʼ ti guidxilayú cubi. Qué ziuulaʼdxiʼ Jehová modo runi adorarnu laa pa qué chuʼnu cuidadu modo rininu (Sant. 1:26). Ca binni ni cadi nadxii Jehová guizáʼ nadúxhucaʼ, nadipaʼ modo riníʼnecaʼ binni ne orgulloso laacaʼ (2 Tim. 3:​1-5). Qué lica racaláʼdxinu gácanu casi laacabe. Ni racaláʼdxinu nga guiecheʼ Jehová ora gunadiaga modo rininu. Peru ¿ziechené xa Jehová tuuxa ni rusihuinni naca ti binni nadóʼ ra reunión ne lu predicación, peru ra lidxi naduxhuʼ ne ridindené familia stiʼ? (1 Ped. 3:7). w22.04 5 párr. 4, 5

Guluu Dios ndaaniʼ ladxidoʼcaʼ chii cachu que ne bestia salvaje que gunitilucaʼ Babilonia guidxi roʼ. Casi bidúʼndanu ca, zucaa Jehová bestia salvaje naxiñáʼ rini, o Naciones Unidas, para gucaalucaʼ ca religión falsu ne gunitilucaʼ ni (Apoc. 18:​21-24). ¿Xi rusiidiʼ ndiʼ laanu yaʼ? Nabé risaca «gaca adoración stinu nayá casi racalaʼdxiʼ Dios [ . . . ] ne cadi gaca ni nabiidiʼ» (Sant. 1:27). Qué chuʼ dxi gucaadiáganu ca cosa ni cadi dxandíʼ ni rusiidiʼ Babilonia guidxi roʼ, cadi gúninu ca saa ni rúnicabe, cadi guiníʼ íquenu modo riníʼ ique binni guidxilayú ne cadi guni practicarnu espiritismo. Cadi gusaana de gábinu binni «laguiree de ndaaniʼ guidxi ca». Pa gúnicabe ni, zuuyaʼ Dios cadi nácacabe «cómplice de ca pecadu» stiʼ Babilonia guidxi roʼ (Apoc. 18:4). w22.05 11 párr. 17; 14 párr. 18

Biiyaʼ pora zanda gusiidiluʼ ca xiiñiluʼ de Jehová ne de ca cosa galán ni huayuni pur laatu (Deut. 6:​6, 7). Nabé risaca gúniluʼ ni pa qué ganda guni estudiárneluʼ ca xiiñiluʼ ra lídxitu purtiʼ gadxé religión napa xheelaluʼ. Sicaríʼ guníʼ hermana Christine: «Cumu huaxiéʼ gunda gunieniaʼ ca xiiñeʼ de Dios la? ngue runi bineʼ aprovechar ora zanda guneʼ ni». Biʼniʼ stipa guiniʼluʼ cosa galán de xquidxi Jehová ne de ca hermanu ne cadi guni criticarluʼ ca ancianu. Pa guiniʼluʼ cosa galán de ca ancianu, zacaneni ca xiiñitu guidxíñacaʼ laacabe ora gápacaʼ xiixa guendanagana. Gucané familia stiluʼ chuʼ tobi si. Gupa costumbre gábiluʼ xheelaluʼ ne ca xiiñiluʼ nadxiiluʼ laacaʼ. Guníʼ cosa galán de xheelaluʼ ne biʼniʼ ni né respetu, ne bisiidiʼ ca xiiñiluʼ gúnicaʼ zaqueca. Zacá zacaneluʼ laacabe guiziidicabe de Jehová. (Sant. 3:18). w22.04 18 párr. 10, 11

Ca diidxaʼ ni gudxi Jesús ca xpinni Cristu de Éfeso bisihuinni ni pabiáʼ maʼ biʼniʼ huantarcaʼ ne qué huasaana de gúnicaʼ ni ná Jehová neca cadíʼdicaʼ lu guendanagana. Peru bisaana de gannaxhiicabe Jehová casi bíʼnicabe ni dxi binibiáʼcabe laa. Nga runi naquiiñeʼ guibiguetaʼ gannaxhiicabe Jehová sti biaje ti chuulaʼdxiʼ modo runi adorárcabe laa. Ngaca rizaaca tiempu riʼ, cadi caquiiñeʼ si guni huantarnu guendanagana, sínuque naquiiñeʼ gúninu ni purtiʼ nadxiinu Dios. Qué ruuyaʼ si Jehová ca ni rúninu, laaca ruuyabe xiñee rúninu ca ni. Ribézabe guni adorarnu laabe purtiʼ nadxiinu laabe ne rudiʼnu xquixe peʼ laabe pur ni rúnibe pur laanu (Prov. 16:2; Mar. 12:​29, 30). Gatananu ne cueenu bacaandaʼ lunu. Maʼ gadxé guendanagana gupa ca hermanu de congregación ni guyuu Sardis. Neca dxiqué bíʼnicabe xhiiñaʼ Jehová né stale gana, peru bisaana de gúnicabe ni. Nga runi gudxi Jesús laacabe naquiiñeʼ cueecabe bacaandaʼ lúcabe (Apoc. 3:​1-3). Ne nánnanu qué rusiaandaʼ Jehová guiráʼ ni rúninu pur laa (Heb. 6:10). w22.05 3 párr. 6, 7

Salomón guníʼ zanda chuʼnu nayecheʼ ora rúninu dxiiñaʼ, purtiʼ nácani ti regalu stiʼ Dios (Ecl. 5:​18, 19). Ne nánnabe dxandíʼ ni purtiʼ guizáʼ bíʼnibe dxiiñaʼ. Bicuibe stale yoo, bizuhuaabe yaga uva, bíʼnibe stale jardín ne tanque ra ridaa nisa ne laaca bicuibe stale guidxi (1 Rey. 9:19; Ecl. 2:​4-6). Ne laaca nánnanu guyuu Salomón nayecheʼ pur ca dxiiñaʼ ni biʼniʼ. Peru cadi ngue diʼ nga ni jma bisiecheʼ laabe. Laaca bíʼnibe stale cosa para Jehová. Gucanebe cuí ti templu sicarú para gaca adorar Jehová, bindaa dxiiñaʼ que gadxe iza (1 Rey. 6:38; 9:1). Despué de bíʼnibe stale cosa lu xquendanabánibe, bidiibe cuenta ni jma risaca nga gúnibe xhiiñaʼ Jehová. Sicaríʼ bicaa Salomón: «Despué de maʼ bicaadiágaluʼ guiráʼ ca diidxaʼ riʼ: bidxibi Dios ni dxandíʼ ne biʼniʼ guiráʼ ni ná ca mandamientu stiʼ» (Ecl. 12:13). w22.05 22 párr. 8

Lu Biblia riete stale binni ni biʼniʼ perdonar Jehová. ¿Rietenaláʼdxiluʼ tobi de laacabe la? Zándaca guiníʼ íqueluʼ de rey Manasés. Guizáʼ malu gúcabe ne naroʼbaʼ ca pecadu bíʼnibe nezalú Jehová. Bicaabe binni guni adorar dios falsu ne bitiidibe ca xiiñibe lu bele casi sacrificiu para ca dios que. Ne qué ñápabe respetu templu stiʼ Jehová, guluube ti bidóʼ ndaaniʼ lugar santo que. Sicaríʼ ruzeeteʼ Biblia de laabe: «Bíʼnibe stale cosa malu nezalú Jehová para guchiichibe laa» (2 Crón. 33:​2-7). Peru ora bisihuinni Manasés dxandíʼ guca arrepentir, biʼniʼ perdonar Jehová laabe (2 Crón. 33:​12, 13). Sti binni ni zanda guietenaláʼdxinu nga rey David. Laaca guizáʼ naroʼbaʼ ca pecadu bíʼnibe, guyuunebe ti gunaa ni cadi xheelabe ne biitibe. Peru ora guníʼ David maʼ bichee ne guca arrepentir de guidubi ladxidóʼ, laaca biʼniʼ perdonar Jehová laabe (2 Sam. 12:​9, 10, 13, 14). Laaca zanda chuʼnu seguru racalaʼdxiʼ Jehová guni perdonar laanu. w22.06 3 párr. 7

Nuu biaje zaca nagana para laanu guquídxinu esperanza stinu. Zándaca nuu biaje guirá paciencia stinu laga cabézanu guni cumplir Dios ca promesa stiʼ. Cadi guiaandaʼ laanu qué gapa Jehová ra guiluxe ne maʼ gadxé modo ruuyabe tiempu (2 Ped. 3:​8, 9). Zuni cumplir Jehová guiráʼ ni maʼ gudixhe ique, peru zándaca cadi ora racaláʼdxinu nga gúnibe ni. ¿Xi zacané laanu guquídxinu esperanza ni nápanu ne cadi guirá paciencia stinu laga cabézanu guedandá dxi guni cumplir Jehová guiráʼ ni maʼ biʼniʼ prometer laanu yaʼ? (Sant. 5:7). Chuʼnu gaxha de Jehová purtiʼ laa nga chiguni cumplir guiráʼ ni cabézanu. Para gápanu esperanza laaca caquiiñeʼ gápanu fe nuu Jehová, ne «rudiibe premiu ca ni ruyubi laabe sin guiree gana» (Heb. 11:​1, 6). Ra jma guni crenu nuu Jehová, jma zápanu confianza zúnibe guiráʼ ni maʼ biʼniʼ prometerbe. Para gaca esperanza stinu jma naguidxi la? naquiiñeʼ guni orarnu Jehová ne guidúʼndanu Stiidxaʼ. Dxandíʼ qué zanda guidúʼyanu Jehová, peru zanda gaca xhamígunu laabe. Zanda guinínenu laabe ora guni orarnu, ne nápanu confianza zucaadiágabe laanu (Jer. 29:​11, 12). w22.10 26, 27 párr. 11-13

Guníʼ ique cayuuyaluʼ zuba Job ndaaniʼ dé ne cayuniná yuubaʼ que laabe dxi ne gueelaʼ (Job 2:8). Caniʼruʼ ca hombre ni ná naca xhamígube que cadi nacháʼhuibe ne pur gana guiráʼ ni maʼ bíʼnibe. Guizáʼ maʼ biree Job gana pur guiráʼ guendanagana ni napa ne ora rietenaláʼdxibe maʼ guti guiráʼ xiiñibe casi ñaca rireza ladxidoʼbe. Ngue runi qué niníʼgabe gastiʼ (Job 2:13). Guníʼ ique ca hombre que pur cadi caníʼ Job gastiʼ zudxiideche Jehová. Peru cadi zaqué diʼ ni. Zándaca málasi gundisaʼ ique Job, biiyadxí laacabe ne guníʼ: «¡Dede dxi gateʼ qué zucheeniaʼ Dios!» (Job 27:5). ¿Xiñee qué nuniti Job stipa ne qué nidxibi ora gudiʼdiʼ lu guiráʼ guendanagana que yaʼ? Purtiʼ gunna dxíchibe zacané Dios stibe laabe neca xa guizáʼ nagana ra tídibe. Laaca gúnnabe zusibani Jehová laabe sti biaje pa gátibe (Job 14:​13-15). w22.06 22 párr. 9

Maʼ bidii Jehová, Dios ni bizáʼ guibáʼ ne Guidxilayú, laanu privilegiu de guinínenu laa lu oración. Guizáʼ galán ndiʼ purtiʼ zanda guxhélenu ladxidoʼno nezalú Jehová ora tiica si, lu intiica diidxaʼ. Zanda guni orarnu Bixhózenu ni nadxii laanu pa nuunu ra hospital o ndaaniʼ cárcel, purtiʼ nánnanu zucaadiágabe laanu. ¿Cadi dxandíʼ guizáʼ rusisácanu privilegiu ca la? Nabé bisisaca rey David guni orar. Lu ti canción gúdxibe Jehová: «Gaca oración stinneʼ nezaluluʼ casi inciensu ni guca preparar» (Sal. 141:​1, 2). Tiempu bibani David biquiiñecabe ti inciensu especial ni biʼniʼ preparar ca sacerdote que né stale cuidadu para iquiiñeʼ ra gaca adorar Jehová (Éx. 30:​34, 35). Zándaca ora guníʼ David de inciensu ni nuube guiniʼbe nga, zaníʼ ique chaahuibe xi chitídxibe Bixhózebe ni nuu guibáʼ lu oración stibe. Laanu laaca ngaca racaláʼdxinu gúninu, purtiʼ racaláʼdxinu chúʼlaʼdxiʼ Jehová ca oración stinu. w22.07 20 párr. 1, 2; 21 párr. 4

Gudiʼnu lugar Jehová guquixe ni guni binni laanu. Qué nudii Jehová permisu laanu para guquíxenu ni biʼniʼ xcaadxi laanu (Rom. 12:​19-21). Cumu binni ruchee laanu ne qué randa ridúʼyanu xi guiráʼ rizaaca la? nga runi Jehová si nga randa runi juzgar jneza (Heb. 4:13). Ne nuu biaje ni runi sentirnu ca rucaani laanu cadi guiníʼ íquenu jneza. Sicaríʼ bicaa Santiago: «Ora cadxiichi binni la? qué zanda guni ni riuulaʼdxiʼ Dios» (Sant. 1:20). Nga runi zanda chuʼnu seguru zuni Jehová ni jneza ne zuni chaahuibe guendanagana stinu. Ora runi perdonarnu, rusihuínninu nápanu confianza zuni Jehová ni jneza. Pa gusaananu ca cosa ca lu náʼ Jehová, zusihuínninu runi crenu zuni chaahuibe ca guendananá huayápanu pur pecadu. Ndaaniʼ guidxilayú cubi ca maʼ qué zietenalaʼdxiʼ binni ca cosa ni bininá laa «ne maʼ qué zuninácani ladxidóʼ» (Is. 65:17). w22.06 10, 11 párr. 11, 12

Ne pa nanalaʼdxiʼ binni laanu la? rusihuínnini zinándanu ejemplu stiʼ Jesús ne nuu Jehová nayecheʼ né laanu (Mat. 5:​11, 12). Binidxabaʼ nga cucaa binni gucueeza dxiiñaʼ stinu peru jma nadipaʼ Jesús que laabe. Ne cumu cayacané Cristu laanu la? cayanda cayaca predicar mensaje stiʼ Reinu ndaaniʼ guiráʼ guidxi. Sti guendanagana nga nuu stale idioma. Lu visión ni biluíʼ Jesús apóstol Juan gúdxibe laa qué zucueeza nga para gaca predicar ca noticia galán (Apoc. 14:​6, 7). Cudxíʼlunu guendanagana riʼ purtiʼ maʼ nápanu stale publicación ni biree lu Biblia lu sitiu jw.org, lu jma de 1,000 idioma para guʼndaʼ binni. Laaca maʼ bidii Grupu ni Zániru permisu para gaca traducir libru ni riquiiñenu para gudiʼnu estudiu ni láʼ ¡Zanda guibániluʼ nayecheʼ! lu jma de 700 idioma. w22.07 9 párr. 6, 7

Biá Jesús binni. Sicaríʼ guníʼ apóstol Mateo: «Ora ruuyabe guiráʼ ca binni que, guizáʼ riabe laacaʼ, purtiʼ guizáʼ maʼ gucanacaʼ ne nuucaʼ stúbicaʼ casi dendxuʼ ni qué gapa pastor» (Mat. 9:36). ¿Ximodo ruuyaʼ Jehová binni yaʼ? Sicaríʼ guníʼ Jesús de Bixhoze: «Qué racalaʼdxiʼ guiniti nin tobi de ca ni nahuiiniʼ riʼ» (Mat. 18:14). ¡Guizáʼ riéchenu gánnanu nabé nadxii Jehová laanu! Pa jma gunibiaʼnu Jesús, jma zannaxhiinu Jehová. Nuu sti cosa ni zanda gúniluʼ para jma gannaxhiiluʼ Jehová ne cadi gusaana de guni progresarluʼ. ¿Xii ni yaʼ? Gaca xhamíguluʼ ca hermanu ne ca hermana espiritual ni nuu ndaaniʼ congregación stiluʼ. Biiyaʼ pabiáʼ nayecheʼ ca hermanu ne ca hermana riʼ. Qué raca arrepentírcabe pur gudixhe íquecabe gúnicabe ni ná Jehová. Gunabaʼ laacabe gábicabe lii xiixa experiencia ni nápacabe. Ne ora chiguicaaluʼ xiixa decisión risaca, gunabaʼ laacabe gudiicabe lii xiixa conseju. Biblia ná «ora nuu stale tu gudii conseju» riree ca cosa ca jneza. w22.08 3 párr. 6, 7

Guiranu zadxaagalunu xiixa prueba. Peru casi maʼ bidúʼyanu ca, cadi stúbinu nuunu. Cásica nuu ti padre pendiente de xiiñiʼ, zaqueca nuu Jehová pendiente de laanu. Nuube gaxha de laanu ne nuube listu para gucaadiágabe laanu ora guinábanu laabe gacanebe laanu (Is. 43:2). Nánnanu zanda gudxíʼlunu ca guendanagana ni gápanu purtiʼ rudii Jehová laanu ni caquiiñenu para guni huantarnu. Laaca ni nga: oración, Biblia, guendaró espiritual ne ca hermanu ne hermana ni nadxii laanu. Riéchenu purtiʼ nuu Bixhózenu ni nuu guibáʼ pendiente de cada tobi de laanu. «Laabe nga rusiéchebe ladxidoʼno» (Sal. 33:21). ¿Ximodo zanda gusihuínninu cudiʼnu xquixe Jehová purtiʼ rapa laanu né cariñu yaʼ? Zúninu ni ra iquiiñenu guiráʼ ni rudiibe laanu. Para cadi gusaana de gapa Jehová laanu laaca naquiiñeʼ gúninu xiixa. Naquiiñeʼ gúninu stipa guzúʼbanu stiidxabe ne gúninu ca cosa ni riuuláʼdxibe. Pa gúninu ni, ziuube pendiente de laanu para siempre. w22.08 13 párr. 15, 16

Tiempu riʼ, raca nagana para stale binni gapa confianza xcaadxi. Stale tu runi respetar ca políticu, ca científicu ne ca hombre de negocio, peru qué runi crécabe pa dxandíʼ zúnicaʼ ni riniʼcaʼ. Ne qué runi respetárcabe ca líder ni ná zinanda Cristu. Nga runi qué ridxagayaanu xiñee qué gápacabe confianza Biblia, libru ni según rinanda ca líder stiʼ ca religión ni ná runi ni ná Dios. Ca xpinni Jehová, nanna dxíchinu laabe nga «Dios ni riníʼ ni dxandíʼ» ne racaláʼdxibe guibáninu galán (Sal. 31:5; Is. 48:17). Nánnanu zanda gápanu confianza Stiidxaʼ Dios. Zanda guininu dxandíʼ ni bicaa ti hombre ni runi estudiar chaahuiʼ Biblia, sicaríʼ bicaabe: «Gastiʼ nin ti guisi de guendarusiguii lu guiráʼ ni maʼ guníʼ Dios ne qué ruchee ni riniʼbe. Zanda gapa xquidxi Dios confianza ni riniʼbe purtiʼ nápacabe confianza Dios ni guníʼ ni». w23.01 2 párr. 1, 2

Racanenu ca hermanu ora ruquídxinu fe ni nápacaʼ Jehová. Nuu de laacaʼ runi huantarcaʼ burla stiʼ familia sticaʼ ni cadi naca Testigu. Ne nuu tu laa huará o bininá tuuxa hermanu laa. Ne nuu tu laa maʼ xadxí de cabeza guedandá fin. Guiráʼ guendanagana riʼ zándaca gutiidiʼ ca ni fe stiʼ ti xpinni Cristu lu ti prueba. Zaqueca nga ca guendanagana ni bidxaagalú ca xpinni Cristu ni bibani lu primé siglu. Biquiiñeʼ apóstol Pablo Stiidxaʼ Dios para biquidxi fe stiʼ ca hermanu. Guzéʼtenu ti ejemplu, zándaca qué ñanna ca xpinni Cristu judíu xi guicábicaʼ ora gudxi familia sticaʼ laacaʼ jma risaca religión stiʼ ca judíu que gácacaʼ xpinni Cristu. Nuunu seguru guizáʼ gucané carta ni bicaa Pablo ra nuu ca hebreu que laacaʼ para iguidxi fe sticaʼ (Heb. 1:​5, 6; 2:​2, 3; 9:​24, 25). Ca xpinni Cristu que gunda biquiiñecaʼ ca ni guníʼ Pablo para guicábicaʼ ca binni ni guníʼ mal de laacaʼ. w22.08 23, 24 párr. 12-14

Ndaaniʼ guidxilayú stiʼ Binidxabaʼ riʼ, maʼ qué ridxela binni tu laa gapa confianza. Ruuyacabe qué runi ca empresariu, ca políticu ne ca líder stiʼ ca religión ca ni riniʼcaʼ. Ne zacaca riníʼ íquecabe naca ca xhamígucabe, ca vecinu stícabe dede né familia stícabe. Ne qué ridxagayaanu guidúʼyanu ndiʼ, purtiʼ Biblia maca guníʼ «lu ca últimu dxi» riʼ zucheené binni xhamigu, zaniʼcaʼ mal de sti binni ne zuni traicionarcaʼ stobi. Ndiʼ riníʼ zaca binni casi Binidxabaʼ, dios ni naaze guidxilayú riʼ ne guirutiʼ zanda gapa confianza laa (2 Tim. 3:​1-4; 2 Cor. 4:4). Peru ca ni dxandíʼ xpinni Cristu, nánnanu zanda gápanu confianza Jehová. Nanna dxíchinu nadxiibe laanu ne qué ziuu dxi guixélebe de ca xhamígube (Sal. 9:10). Laaca zanda gápanu confianza Jesucristu purtiʼ bidii xquendanabani pur laanu (1 Ped. 3:18). Ne nanna dxíchinu zanda gápanu confianza guiráʼ ca ni zeeda lu Biblia purtiʼ maʼ huayacané ca ni laanu (2 Tim. 3:​16, 17). w22.09 2 párr. 1, 2

Ora dxandíʼ nayecheʼ nabani ti binni cadi ti ratu si runi sentir zacá, zanda guibánibe nayecheʼ guidubi xquendanabánibe. Lu discursu ni bidii Jesús lu Sermón del Monte bizeeteʼ xi naquiiñeʼ gúninu para guibáninu nayecheʼ. Laabe guniʼbe: «Dichoso ca ni nanna caquiiñeʼ Dios» (Mat. 5:3). Nanna Jesús guyanu para chuuláʼdxinu gunibiaʼnu Jehová ne guni adorarnu laa. Laani nga cuzeeteʼ Biblia ora ná «ca ni nanna caquiiñeʼ Dios», o ca ni napa necesidad espiritual. Ne cumu Jehová nga «Dios ni nayecheʼ» la? laanu, ca ni rúninu ni nabe, laaca zanda guibáninu nayecheʼ (1 Tim. 1:11). ¿Ñee caquiiñeʼ guibáninu galán para chuʼnu nayecheʼ la? Coʼ. Lu Sermón del Monte, guníʼ Jesús dede «ca ni nuu triste» zanda guibánicaʼ nayecheʼ. Laaca guniʼbe «ca ni rizananda binni laacaʼ pur rúnicaʼ ni jneza» zanda guibánicaʼ nayecheʼ (Mat. 5:​4, 10, 11). Qué nusiidiʼ diʼ Jesús zabáninu nayecheʼ ora maʼ qué gápanu guendanagana, sínuque pa gunibiaʼnu Dios ne guni adorarnu laa (Sant. 4:8). w22.10 6 párr. 1-3

Ti xpinni Cristu ni nuu xpiaaniʼ nanna pora zanda guiníʼ ne pora naquiiñeʼ igani (Ecl. 3:7). Ndaaniʼ caadxi guidxi nuu ti refrán ni ná «Ora guiníʼ binni zeeda gácani casi plata ne ora rigani binni zeeda gácani casi oro». Ni ná ca diidxaʼ riʼ nga nuu biaje mejor cadi guiníʼ diʼ tuuxa. Guzéʼtenu ejemplu stiʼ ti ancianu ni napa experiencia ni gatigá rinábacabe laa gacané xcaadxi congregación para gaca tender xiixa asuntu nagana. Sicaríʼ guníʼ sti ancianu de laabe: «Siempre riuube cuidadu ne qué riniʼbe xiixa información confidencial stiʼ xcaadxi congregación». Cumu naca ancianu riʼ ti hermanu ni riene la? runi respetar xcaadxi ancianu de congregación stibe laabe, purtiʼ nánnacabe qué zazabe zaniʼbe xiixa cosa confidencial. Ti binni ni naca honradu zacané ni laa gaca ti binni de confianza. Cumu siempre riníʼcabe ni dxandíʼ la? qué raca nagana para binni gapa confianza laacabe (Efes. 4:25; Heb. 13:18). w22.09 12 párr. 14, 15

Stale binni rusegudiaga ora rucaa guendabiaaniʼ ni dxandíʼ ca «ridxi ndaaniʼ ca neza» ca (Prov. 1:20). Biblia ná nuu chonna clase binni qué riná guicaa guendabiaaniʼ ni zeeda de Dios: «ca ni qué ganna gastiʼ», «ca ni runi burla» ne «ca ni nahuati» (Prov. 1:​22-25). «Ca ni qué ganna gastiʼ» nga ca ni runi cré intiica ni gábicabe laacaʼ ne pur nga nagueenda riguite xcaadxi laacaʼ (Prov. 14:15). Dxandíʼ, nuu millón de binni ni maʼ gudxite ca líder stiʼ ca religión o ca políticu laacaʼ. Nuu de laacabe ridxiichi ora gánnacaʼ ni. Peru ca binni ni riete lu Proverbios 1:22 laapecaʼ riuuláʼdxicaʼ chuʼcaʼ zacá (Jer. 5:31). Qué ruyúbicabe guiziidicabe ni ná Biblia nin chinándacabe ca ley stini. Qué racaláʼdxinu gácanu casi ca binni ni qué ganna gastiʼ (Prov. 1:32; 27:12). w22.10 19 párr. 5-7

Rudii organización stiʼ Jehová laanu instrucción para gapa laanu. Gatigá rusietenaláʼdxicabe laanu gudiʼnu ca datu stinu ca ancianu para guiníʼnecaʼ laanu ora guizaaca xiixa emergencia. Zándaca gudii organización laanu instrucción para guiaananu ra lídxinu, guireʼnu de ndaaniʼ guidxi ra nabézanu o para guyúbinu cosa ni tidinenu dxi. Ne zándaca gábicabe laanu padxí ne ximodo zanda gacanenu xcaadxi. Pa qué guzúʼbanu diidxaʼ la? zaguʼnu xquendanabáninu ne xquendanabani ca ancianu lu peligru, ca hombre ni rapa laanu (Heb. 13:17). Stale hermanu rusaana lidxi pur xiixa desastre natural o pur ridinde binni lugar ra nabeza. Runi ca hermanu riʼ stipa guiaacaʼ lugar ra chindézacaʼ ne qué rusaana de gúnicaʼ ni ná Jehová. Qué rusaana de guni «predicarcaʼ ca noticia galán ni cá lu Stiidxaʼ Dios», cásica biʼniʼ ca primé xpinni Cristu dxi bisaanacaʼ lídxicaʼ pur canazananda binni laacaʼ (Hech. 8:4). Ora qué rusaana ca hermanu ca de guni predicarcaʼ, racané ni laacaʼ guiníʼ íquecaʼ ca ndaayaʼ ni chigueedané Reinu ne cadi guicá íquecaʼ ca guendanagana sticaʼ. Zacá riuucabe nayecheʼ ne rápacabe paz. w22.12 19 párr. 12, 13

Cada tobi de laanu risácanu para Jehová. Ante guseendaʼ Jesús ca apóstol stiʼ chiguni predicar, gúdxibe laacaʼ cadi guidxíbicaʼ ora gucaalúcabe laacaʼ (Mat. 10:​29-31). Biquiiñebe caadxi pájaru ni jma runibiáʼ binni ndaaniʼ guidxi Israel: ca gorrión. Tiempu que huaxiéʼ risaca ca gorrión. Peru Jesús gudxi ca discípulo stiʼ: «Nanna Bixhózetu pora riaba cada tobi de laacame layú». Ne gúdxibe laacaʼ: «jma risácatu que stale gorrión». Zaqué bisiidibe laacaʼ risaca cada tobi de laacaʼ para Jehová. Ne ngue gucané laacaʼ cadi guidxíbicaʼ ora sananda binni laacaʼ. Ora maʼ cayuni predicar ca discípulo que ndaaniʼ ca guidxi que ne gúʼyacaʼ ca gorrión que, rietenaláʼdxicaʼ ni gudxi Jesús laacaʼ. Nga runi, cada biaje gúʼyaluʼ ti pajaruhuiiniʼ, bietenalaʼdxiʼ, guizáʼ rusisaca Jehová lii, purtiʼ jma risácaluʼ «que stale gorrión». Zacané Dios lii para cadi guidxíbiluʼ ora gucaalúcabe lii (Sal. 118:6). w23.03 18 párr. 12

Zándaca nuu biaje zucaalú familia stinu laanu o gunítinu dxiiñaʼ stinu. Ora rindaa ti guendanagana nápanu zándaca guiníʼ íquenu maʼ qué zaca chaahuiʼ ni ne guireʼnu gana. Riquiiñeʼ Binidxabaʼ ca cosa riʼ para gucaa laanu guiníʼ íquenu maʼ cadi nadxii Jehová laanu. Racaláʼdxibe guiníʼ íquenu Jehová ne organización stiʼ nga napa donda pur ca guendanagana nápanu. Ngaca nga bizaaca caadxi israelita ni guyuu Egipto. Biʼniʼ crécabe Jehová nga gulí Moisés ne Aarón para cuee laacabe de esclavu raqué (Éx. 4:​29-31). Peru ora jma bininá faraón laacabe la? bigaanicabe donda ique Moisés ne Aarón (Éx. 5:​19, 20). ¡Guizáʼ triste purtiʼ bigaanicabe donda ique ca xpinni Dios riʼ! Pa maʼ stale tiempu zineluʼ de cayuni huantarluʼ ti guendanagana, biʼniʼ orar Jehová, gudxi laabe xi nuu ladxidoʼloʼ ne biyubi gacanebe lii. w22.11 15 párr. 5, 6

Jehová nga rudii laanu guendanabani ne laasi zanda gusibani ca ni maʼ guti. Bidiibe poder profeta Elías para gusibani xiiñiʼ ti viuda de Sarepta (1 Rey. 17:​21-23). Ra gudiʼdiʼ tiempu gucané Dios profeta Eliseo para gusibani xiiñiʼ ti gunaa de guidxi Sunem (2 Rey. 4:​18-20, 34-37). Ca ejemplu riʼ ne xcaadxi ni riete lu Biblia, rusihuinni ca ni napa Jehová poder para gusibani ca binni ni maʼ guti. Ne dxi guyuu Jesús ndaaniʼ Guidxilayú riʼ bisihuinni bidii Bixhoze laa poder para gusibani binni ni maʼ guti (Juan 11:​23-25, 43, 44). Yanna maʼ nuu Jesús guibáʼ ne «maʼ gucuaaʼ guiráʼ xixé autoridad guibáʼ ne lu guidxilayú». Nga runi zanda gusibánibe «guiráʼ ca ni nuu ndaaniʼ baʼ» ne gápacaʼ esperanza de guibánicaʼ para siempre (Mat. 28:18; Juan 5:​26-29). w22.12 5 párr. 10

Ra gudxiidéchecabe profeta riʼ, cudxiidéchecabe Jehová. Guizáʼ gudixhedxí ca diidxaʼ stiʼ textu ni biaba yannadxí ca ladxidóʼ Ezequiel purtiʼ gúnnabe pa qué naʼ binni gucaadiaga laabe la? qué riníʼ diʼ ni cadi jneza cayúnibe dxiiñaʼ de profeta. Ne laaca gudxi Jehová laabe, ora gaca cumplir mensaje ni zinebe que, zanna ca judíu guyuu ti profeta ládecaʼ (Ezeq. 2:5; 33:33). Nánnanu guizáʼ guluu ca diidxaʼ que gana Ezequiel para gunda biʼniʼ predicar ca binni que. Laanu laaca riuʼnu gana ora guiníʼ íquenu Jehová nga cuseendaʼ laanu. Maʼ bidiibe laanu privilegiu gácanu ca testigu stibe (Is. 43:10). Cásica gudxi Jehová Ezequiel: «Cadi guidxíbiluʼ», laaca cayábibe laanu: «Cadi guidxibi xhaatatu» (Ezeq. 2:6). ¿Xiñee cadi naquiiñeʼ guidxíbinu ca binni ni rucaalú laanu yaʼ? Purtiʼ cásica Ezequiel, laaca Jehová nga cuseendaʼ laanu ne zacanebe laanu (Is. 44:8). w22.11 3, 4 párr. 4, 5

Tiempu riʼ, guizáʼ rusisácanu dxiiñaʼ runi ca ancianu ne ca siervu ministerial, purtiʼ nácacaʼ hermanu de confianza. Rudiʼnu quixe peʼ Jehová purtiʼ rapa ca hermanu riʼ laanu. Peru ¿ximodo zanda gusihuínninu zanda gápacabe confianza laanu yaʼ? Nadxiinu ca hermanu ne ca hermana stinu ne riuʼnu xizaa pur laacaʼ. Peru naquiiñeʼ chuʼnu cuidadu cadi chuʼnu lu xpídacabe. Ndaaniʼ ca congregación ni guyuu lu primé siglu que guyuu binni nabé chismoso, riuucaʼ lu xpida binni ne riniʼcaʼ cosa ni cadi naquiiñeʼ guiniʼcaʼ (1 Tim. 5:13). Nánnanu qué racaláʼdxinu gácanu clase binni ca. Guxuíʼlunu gudxi tuuxa laanu xiixa peru cadi para sanu guininu ni. Guzéʼtenu ti ejemplu, zándaca gudxi ti hermana laanu napa xiixa guendahuará o cadiʼdiʼ lu sti prueba, ne gunábabe laanu cadi gábinu ni guirutiʼ. Naquiiñeʼ guni respetarnu ni gunábabe laanu. w22.09 10 párr. 7, 8

Cadi caquiiñeʼ si gúninu caadxi cosa galán lu xquendanabáninu. Ni naquiiñeʼ gúninu nga guiduʼyaʼ chaahuinu ximodo nácanu pur dentru ne guchaʼnu modo laanu pa caquiiñeʼ gúninu ni, para chinándanu ca norma stiʼ Jehová lu xquendanabáninu. Cadi ti biaje si naquiiñeʼ gúninu ni bizéʼtenu riʼ, sínuque naquiiñeʼ gúninu ni gatigá. Ora maʼ gácanu perfectu, siempre zusiéchenu Jehová lu guiráʼ ni gúninu. Peru laga cabézanu guedandá dxi ca dede ca yanna zanda gúninu stipa para gusiéchenu laabe. Lu Romanos 12:2 bizeeteʼ apóstol Pablo naquiiñeʼ guchaʼnu modo riníʼ íquenu para gánnanu xi racalaʼdxiʼ Dios gúninu. Nga runi, lugar de guicá modo riníʼ ique binni guidxilayú laanu ne maʼ qué gúninu stipa pur guchaʼnu, nabé risaca guidúʼyanu pa zinándanu modo riníʼ ique Dios lu ca meta ni riguíxhenu o lu ca decisión ni ricaanu. w23.01 8, 9 párr. 3, 4

¿Ñee runi Jehová xiixa lu cada cosa ni rizaacanu la? ¿Ñee laabe rúnibe guizaacanu xiixa cosa malu ti zacá guiree xiixa cosa galán la? Cadi nga diʼ nga ni rusiidiʼ Biblia (Ecl. 8:9; 9:11). Peru nuu ti cosa ni nanna dxíchinu, ora ridídinu lu ti guendanagana, ruuyaʼ Jehová laanu ne rucaadiágabe laanu ora rucaʼrídxinu laabe (Sal. 34:15; Is. 59:1). Ne cadi ngasi, racanebe laanu gudxíʼlunu ca guendanagana ni rápanu. ¿Ximodo rúnibe ni yaʼ? Stale biaje riguixhedxí Jehová ladxidoʼno ne riguu gana laanu ora peʼ caquiiñenu ni (2 Cor. 1:​3, 4).¿Ñee redasilú laanu dxi cadídinu lu xiixa guendanagana gudixhedxí Jehová ladxidoʼno ne guluu gana laanu ora jma peʼ caquiiñenu ni la? Stale biaje, óraruʼ maʼ gudídinu lu ti guendanagana oracaruʼ rudiʼnu cuenta gucané Jehová laanu. w23.01 17, 18 párr. 13-15

Bestia salvaje ri ruluiʼme bestia salvaje ni napa gadxe ique, peru laame color naxiñáʼ rini laame. Apocalipsis ná laame nga «imagen stiʼ bestia salvaje» ne laaca ruzeeteʼ ni «laame nga ra guizaa xhono rey» (Apoc. 13:​14, 15; 17:​3, 8). Juan guníʼ guyuu rey riʼ dxiqué, despué maʼ coʼ peru zahuinni sti biaje. Nga peʼ nga ni bizaaca Organización de las Naciones Unidas, dxi bizulú ni biree lá ni Sociedad de Naciones. Lu Segunda Guerra Mundial bixá ni. Peru despué bihuínnini sti biaje casi runibiaʼnu ni yanna ne racaneni ca gobiernu políticu ni nuu lu Guidxilayú. Zucaa ca bestia riʼ, o ca gobiernu, binni gucaalú Jehová ne xquidxi. Zacá nga zucaalisaacabe ca rey ni nuu lu guidubi Guidxilayú para tíndecaʼ lu Armagedón, laani nga «guerra ni chigaca dxi roʼ stiʼ Dios ni jma napa poder» (Apoc. 16:​13, 14, 16). w22.05 10 párr. 10, 11

Ra maʼ bizulú biindaʼ Jesús Stiidxaʼ Dios stubi, qué ñanna sibe ni zeeda luni, sínuque gunnaxhiibe ni ne yenándabe ni lu xquendanabánibe. Guietenaláʼdxinu xi bizaaca ndaaniʼ templu dxi napa Jesús doce iza. Ca maestru ni nanna stale de Ley stiʼ Moisés, «nabé cadxagayaacaʼ pabiáʼ riénebe ne modo ricábibe» (Luc. 2:​46, 47, 52). Laanu laaca zanda gunibiaʼnu ne gannaxhiinu Stiidxaʼ Dios pa guidúʼndanu ni guiráʼ dxi. Para gánnanu jma, guidúʼyanu xi gudxi Jesús ca hombre ni binibiáʼ chaahuiʼ Ley que, casi ca escriba, ca fariseu ne ca saduceu. Neca gupa ca líder stiʼ ca religión riʼ costumbre gúʼndacaʼ Biblia, peru qué ñanda nibeendúcabe gastiʼ de laani. Bizeeteʼ Jesús chonna cosa ni ñanda ñúnicabe para nibeendúcabe ni galán. Ni guníʼ Jesús zacaneni laanu gúninu chonna cosa riʼ, primé, guiene chaahuinu ni cadúʼndanu, guiropa, guidxélanu jma conseju ni zacané laanu ne guionna, gudiʼnu lugar guchaa Stiidxaʼ Dios xquendanabáninu. w23.02 8, 9 párr. 2, 3

Caadxi de ca cosa ni cadi naquiiñeʼ gúninu nga guni coquetearnu, guidóʼ xhaatanu, guidéʼ xhaatanu nisadxuʼniʼ, guininu diidxaʼ ni guniná, guidúʼyanu programa ni napa violencia o pornografía (Sal. 101:3). Binidxabaʼ siempre cuyubi modo guxheleʼ laanu de Jehová (1 Ped. 5:8). Pa qué chuʼnu cuidadu, zanda gucaabe laanu gápanu envidia, cadi gácanu honradu, gachelunu gápanu jma, gaca nanaláʼdxinu, gácanu orgulloso ne guidaʼnu xiana (Gál. 5:​19-21). Pa qué gúninu stipa cueenu ca cosa riʼ de ndaaniʼ ladxidoʼno nagueendaca la? zándaca guninácani laanu (Sant. 1:​14, 15). Ti peligru nga ca binni ni cadi naquiiñeʼ guidxaaganu. Cadi guiaandaʼ laanu zanda guicá modo naca ca binni ni ridxaaganu laanu (1 Cor. 15:33). Nga runi, pa guiduʼyaʼ chaahuinu ximodo nuunu, zaduʼyaʼ chaahuinu pabiáʼ tiempu zanda guidxaaganu ca binni ni cadi zinanda ca norma stiʼ Jehová (Luc. 21:34; 2 Cor. 6:15). Zadúʼyanu peligru ni nuu ne zucáʼnanu ni. w23.02 16 párr. 7; 17 párr. 10, 11

Ra jma ziziidiluʼ de Jehová jma ziroobaʼ guendarannaxhii ni nápaluʼ laa. Zanda guidxíñaluʼ jma gaxha de Jehová ne gaca xhamíguluʼ laa yanna ne para siempre. Zanda gusiécheluʼ ladxidóʼ Jehová pur ni gúniluʼ ne ni guiniʼluʼ. Jehová peʼ canabaʼ ni lii né stale cariñu (Prov. 23:​15, 16). Né ni gúniluʼ zusihuínniluʼ pa dxandíʼ nadxiiluʼ Jehová. Decisión jma galán ni zanda guicaaluʼ lu xquendanabániluʼ nga gúniluʼ ni ná Jehová. ¿Ximodo zanda gusihuínniluʼ nadxiiluʼ Jehová? Primé, caquiiñeʼ gudiiluʼ xquendanabániluʼ tobi lucha Dios ni dxandíʼ lu ti oración ra gábiluʼ laa qué ziuu dxi gusaanaluʼ de gúniluʼ ni ná (Sal. 40:8). Despué, caquiiñeʼ chuʼnísaluʼ para gusihuínniluʼ nezalú binni maʼ bidiiluʼ xquendanabániluʼ Dios. Ziécheluʼ ora chuʼnísaluʼ, naca ni ti dxi nabé risaca, purtiʼ dede dxi ca maʼ nabániluʼ para gúniluʼ ni ná Jehová (Rom. 14:8; 1 Ped. 4:​1, 2). Zándaca guiníʼ íqueluʼ: «pa chuaanisaʼ zuchaa xquendanabaneʼ», ne zacá ni, purtiʼ zabániluʼ jma galán. w23.03 5, 6 párr. 14, 15