Octubre

Guiranu nga zanda guidúʼndanu ra reunión ne gudiʼnu ti comentariu ni maca biʼniʼ prepararnu. Nuu tu raca nagana para laa guʼndaʼ ne guni comentar ora maʼ cayaca reunión. ¿Ñee rizaacaluʼ nga la? Pa zacá ni, biiyaʼ xi huayuni xcaadxi para maʼ cadi guidxíbicaʼ. Ni racané caadxi de laacabe nga gúʼndacaʼ de guidubi ladxidoʼcaʼ. Cadi guiaandaʼ lii ridúʼndanu lu reunión para gusisácanu Jehová. Nga runi, ora maʼ cayaca prepararluʼ para reunión zanda gúʼndaluʼ canción ni chiguiuundaʼ luni, biiyaʼ xiñee biaʼsi peʼ ni ná canción ca né tema stiʼ reunión ca ne laaca zanda guiníʼ íqueluʼ ca diidxaʼ ni riete lúcani. Qué chuʼluʼ xizaa pa galán ruundaluʼ o pa coʼ. Peru, ¿xi zanda guʼnuʼ pa ni raca nagana para lii nga guni comentarluʼ yaʼ? Biʼniʼ stipa pur gúniluʼ ni seguidu. Ne cadi guiaandaʼ lii, primé respuesta ca naquiiñeʼ gácani nachucu, sencíu ne respuesta si stiʼ pregunta ca. Ni jma rusisaca Jehová nga stipa ni rúninu pur gusisácanu laa ndaaniʼ congregación. w22.04 7, 8 párr. 12-15

Ca diidxaʼ «racané naa» riʼ caníʼ ni de ti binni ni ziguxooñeʼ para gacané tuuxa ni canabaʼ gacanécabe laa. Guxuíʼlunu ziguxooñeʼ Jehová para gacané tuuxa ni cadxaagalú xiixa guendanagana. Ndiʼ rusiidiʼ laanu cadi nuusi Jehová listu para gacané laanu, sínuque laaca racaláʼdxibe gúnibe ni de guidubi ladxidoʼbe. Pa nuu Jehová gaxha de laanu zanda guni huantarnu ca guendanagana stinu sin gusaana de chuʼnu nayecheʼ. ¿Ximodo racané Jehová laanu yaʼ? Lu libru stiʼ Isaías ridxélanu respuesta ca. Stale de ca profecía ni bicaa Isaías racanécani ca xpinni Dios ni nabani tiempu riʼ. Ne stale biaje biquiiñeʼ Isaías diidxaʼ ni cadi nagana ora caniʼbe de Jehová. Lu capítulo 30 biquiiñebe caadxi ejemplu sicarú para gusiénebe ximodo racané Jehová xquidxi. Lu ni riete chonna cosa. Primé, rucaadiaga chaahuiʼ Jehová ne ricabi ca oración stinu. Guiropa, rábibe laanu xi caquiiñeʼ gúninu. Ne guionna, riguu ndaayabe laanu tiempu riʼ ne zúnibe ni despué. w22.11 8 párr. 2, 3

Jesús gudxi congregación ni guyuu Esmirna ne Filadelfia cadi guidxíbicaʼ ora sananda binni laacaʼ purtiʼ zaguu Jehová ndaayaʼ stipa ni gúnicaʼ pa cadi gucheenecaʼ laabe (Apoc. 3:10). Rusiidiʼ ni laanu zazananda binni laanu ne naquiiñeʼ chuʼnu listu para guni huantarnu ni (Mat. 24:​9, 13; 2 Cor. 12:10). Lu libru stiʼ Apocalipsis riete zazanándacabe ca xpinni Dios lu «dxi stiʼ Señor», o tiempu nabáninu riʼ (Apoc. 1:10). Lu capítulo 12 riete «bizulú ti guerra guibáʼ» despué de bizulú cayuni mandar Reinu stiʼ Dios. Gudindené Jesucristu ne ca ángel stiʼ, Binidxabaʼ ne ca demonio (Apoc. 12:​7, 8). Biniti ca enemigu stiʼ Dios ne gulacaʼ lu Guidxilayú riʼ ne pur nga nabé runinácabe binni (Apoc. 12:​9, 12). w22.05 5 párr. 12, 13

Jneza guiráʼ decisión ni ricaa Jehová. Qué ribibe tu guni perdonarbe. Ne ora runi perdonarbe, qué ruuyadibe ximodo naca ti binni, pa napa bueltu o pa coʼ, pa napa ti dxiiñaʼ risaca o pa napa xiixa habilidad (1 Sam. 16:7; Sant. 2:​1-4). Qué zanda siʼ tuuxa Jehová para guni xiixa cosa. Ne ora cadxiichibe o nuube triste, qué raca lúgube para guni juzgarbe tuuxa (Éx. 34:7). Nga runi, nanna dxíchinu gastiʼ sti juez casi Jehová purtiʼ riene chaahuibe ximodo nácanu ne xi guiráʼ huadídinu (Deut. 32:4). Ca hombre ni bicaa Biblia lu diidxaʼ hebreu gúnnacaʼ gastiʼ qué zanda guchaaganu modo runi perdonar Jehová. Nuu biaje biquiiñecabe caadxi diidxaʼ hebreu. Ne sicaríʼ bizeeteʼ ti libru de laani: «Biquiiñecabe ca diidxaʼ que ora si guníʼcabe modo runi perdonar Dios ti binni ni bichee». Laaca bizeeteʼ libru que: «Qué niquiiñecabe ca diidxaʼ que para guiníʼcabe modo runi perdonar binni sti binni». Jehová si nga napa poder para guni perdonar ti pecador ni gaca arrepentir. w22.06 4 párr. 10, 11

Pa stúbiluʼ cusiniisiluʼ ca xiiñiluʼ o qué runi xheelaluʼ ni ná Jehová, cadi guiaandaʼ lii racané fe ni rusihuínniluʼ ca hermanu ni runibiáʼ lii. Peru ¿pa cadi cayuni progresar xiiñiluʼ yaʼ? Cadi guiaandaʼ lii riné tiempu para gusiidiʼ binni xiiñiʼ. Ora rudxiibaʼ tuuxa ti semiáhuiiniʼ, zándaca guiníʼ ique pa zeeda gácani ti yaga ni gudii cuananaxhi. Neca qué gánnabe pa zudiini cuananaxhi, peru ruzeebe ni para guiroobaʼ ni galán (Mar. 4:​26-29). Zacaca nga zanda guizaaca ca hermana ni napa xiiñiʼ, zándaca guiníʼ íquecabe pa cayacanécabe chindá Stiidxaʼ Dios ndaaniʼ ladxidóʼ xiiñicabe. Dxandíʼ, qué zanda cuitu xi decisión guicaa ca xiiñitu. Peru pa gúniluʼ stipa gusiidiluʼ laacabe de Jehová la? zanda gacané ni laacabe gaca xhamígucabe Dios. w22.04 19, 20 párr. 16, 17

Dxi biʼniʼ Salomón ni ná Jehová la? gúcabe humilde. Ti biaje, dxi joven laabe ne huaxieʼruʼ tiempu de nácabe rey, gúnnabe nuu cosa ni qué gánnabe ngue runi gunábabe Jehová gacané laabe (1 Rey. 3:​7-9). Ne gúnnabe zápabe guendanagana pa gueeda gácabe ti binni orgulloso. Ra gudiʼdiʼ tiempu la? biaandaʼ laabe ca diidxaʼ ni bicaabe. Dxi maʼ zinebe chupa chonna iza de nácabe rey, gúcabe orgulloso ne maʼ qué ñúnibe ni ná ca ley stiʼ Dios. Ndiʼ ngue ni biʼniʼ mandar Ley que ca rey hebreu: «Cadi naquiiñeʼ gápabe stale xheelabe, para cadi guireechú ladxidoʼbe» (Deut. 17:17). Qué ninanda Salomón ni ná ley que ne gupa 700 xheelaʼ ne 300 concubina, ne ¡stale de ca gunaa riʼ runi adorarcaʼ dios falsu! (1 Rey. 11:​1-3). Zándaca guníʼ íquebe qué zazaacabe gastiʼ. Peru despué gúpabe guendanagana purtiʼ qué nuzuubabe stiidxaʼ Jehová (1 Rey. 11:​9-13). w22.05 23 párr. 12

Tiempu riʼ naquiiñeʼ guicaa binni ti decisión nabé risaca: ¿zúnicabe ni ná Jehová, ni runi mandar lu guidubi naca universu la? o zúnicabe ni ná Binidxabaʼ, enemigu stiʼ Dios? Naquiiñeʼ guicaacabe decisión ca pa racaláʼdxicabe guibánicabe sin qué chuʼ dxi gáticabe (Mat. 25:​31-33, 46). Lu gran tribulación zacá ca xpinni Jehová ni qué guchee ti marca para guilacaʼ (Apoc. 7:14; Ezeq. 9:​4, 6). Ne zanitilú ca binni ni guicá marca stiʼ bestia salvaje (Apoc. 14:​9-11). Pa maʼ cayúniluʼ ni ná gobiernu stiʼ Jehová guizáʼ jneza decisión gucuaaluʼ. Zándaca laaca racaláʼdxiluʼ gacaneluʼ xcaadxi gúnini. Stale ndaayaʼ zacaa ca binni ni guni ni ná gobiernu stiʼ Dios. Guizáʼ galán guni estudiarnu ni rusiidiʼ libru stiʼ Apocalipsis purtiʼ zacané ca ni laanu quixhe íquenu gúninu jma lu xhiiñaʼ Jehová. Ne laaca zanda iquiiñenu ni maʼ bizíʼdinu para gacanenu xcaadxi guicaacaʼ decisión jneza ne cadi guireecaʼ gana. w22.05 15 párr. 1, 2

Naquiiñeʼ gucaʼdiáganu Jehová ne cadi ca enemigu stinu. Bicaadiaga chaahuiʼ Job Jehová ora guniʼné laabe. Para gacanebe Job guiníʼ ique, sicaríʼ ga gúdxibe laa: «Nannaʼ xi guiráʼ maʼ bizaacaluʼ, ¿ñee raʼbuʼ qué zanda gapaʼ lii la?». Cumu humilde Job ne rudii xquixe Jehová purtiʼ nachaʼhuiʼ né laabe, sicaríʼ bicabi: «Maʼ huayunadiagaʼ guiníʼcabe de lii, peru yanna maʼ cayuuyapiaʼ lii» (Job 42:5). Ora guníʼ Job ca diidxaʼ riʼ, zándaca zúbaruʼbe ndaaniʼ dé, dxaʼ guiʼdxuʼ ládibe. Óraque nga biluíʼ Jehová laabe nácarube siervu stiʼ ne nadxii laabe (Job 42:​7, 8). Tiempu riʼ, zándaca tindené binni laanu o guiniʼcaʼ qué risácanu. Zándaca gacalaʼdxiʼ stale binni guni biidicaʼ lanu o guiniʼcaʼ mal de organización stinu. Relatu stiʼ Job rusiidiʼ ni laanu napa Jehová confianza qué zuchéʼnenu laa ora tídinu lu ti prueba. w22.06 23, 24 párr. 15, 16

Ziecheʼ ca ni nuu guibáʼ ora guinitilú Babilonia guidxi roʼ. Peru nuu sti cosa ni jma zusiecheʼ guiráʼ ca xpinni Dios (Apoc. 19:​1-3). Apocalipsis ruzeeteʼ laani nga: «boda stiʼ Dendxuhuiiniʼ». Neca maʼ nuu 144,000 riʼ guibáʼ ante guzulú Armagedón, cadi dxi ca diʼ nga chigaca boda stiʼ Dendxuhuiiniʼ ( Apoc. 21:​1, 2). Zaca boda ca despué de Armagedón, ora maʼ binitilú guiráʼ ca enemigu stiʼ Dios (Sal. 45:​3, 4, 13-17). ¿Xi zabeendú ca ni guni participar lu boda stiʼ Dendxuhuiiniʼ yaʼ? Lu ti boda la? richaganáʼ ti hombre ne ti gunaa. Yanna lu boda ni riete lu Apocalipsis, zachaganáʼ Rey, Jesucristu, ne novia stiʼ, 144,000. Ra gaca boda riʼ, zuzulú zuni mandar Jesús né 144,000 lu Guidxilayú 1,000 iza (Apoc. 20:6). w22.05 17 párr. 11-13

Guníʼ Jesús zuni nombrar ti «mozo ni nuu xpiaaniʼ ne ni runi jneza» tiempu ra mayaca gueeda fin para gudii laanu guendaró espiritual (Mat. 24:45). Ne nga peʼ nga ni cayuni mozo riʼ, cayúnicaʼ dxiiñaʼ nadipaʼ tiempu riʼ. Caquiiñeʼ Jesús ti grupuhuiiniʼ de ungidu para gudii guendaró espiritual ora peʼ caquiiñeʼ ca xpinni Dios ni ne ca binni ni caziidiʼ de lu Biblia. Nanna ca hermanu riʼ cadi sticaʼ fe ni napa ca xpinni Cristu (2 Cor. 1:24). Nánnacabe Jesucristu nga líder ne comandante stiʼ xquidxi (Is. 55:4). Dede lu iza 1919, huabee mozo ni nuu xpiaaniʼ stale publicación ni zeeda lu Biblia ni dxandíʼ zacané binni. Lu iza 1921 gulee mozo ni nuu xpiaaniʼ ti libru lu diidxaʼ inglés ni láʼ El Arpa de Dios para gacané binni ganna ca cosa ni rusiidiʼ Biblia. Ne ra zidiʼdiʼ tiempu guleecabe xcaadxi libru. ¿Xi gucané lii gunibiaʼluʼ ne gannaxhiiluʼ Bixhózenu ni nuu guibáʼ? w22.07 10 párr. 9, 10

Naca Jehová binni ni jma rudii de ni napa. Biaʼ tiica gudiiluʼ laabe, laabe zudiibe lii jma que ni bidiiluʼ (Mar. 10:​29, 30). Ne neca nabániluʼ lu Guidxilayú malu riʼ, zacanebe lii guibániluʼ galán ne nayecheʼ. Zanda guni servirluʼ Bixhózeluʼ ni nuu guibáʼ para siempre. Zaroobaʼ guendarannaxhii ni nápaluʼ Jehová ne zabániluʼ para siempre cásica laabe. Jehová nga bidii lii guiráʼ cosa galán ni nápaluʼ ne zanda gusigáʼdeluʼ ni bizáʼ guibáʼ ne Guidxilayú riʼ xiixa ni qué gapa, ¿xii ni yaʼ? Laani nga: cadi guixéleluʼ de laa ne gúniluʼ ni ná. Ora rudiiluʼ lii Jehová ne riuunísaluʼ, rápaluʼ privilegiu gudiiluʼ Bixhózeluʼ ni nuu guibáʼ xiixa nabé risaca (Job 1:8; 41:11; Prov. 27:11). Gástiruʼ sti cosa jma galán ni zanda gúniluʼ lu xquendanabániluʼ. w23.03 6 párr. 16, 17

Ora joven tuuxa, zándaca jma nadipaʼ ca deseu sexual ni napa, ne zándaca chuʼ tu gucaa laacaʼ gápacaʼ relación sexual. Racalaʼdxiʼ Binidxabaʼ gúniluʼ ni ná ca deseu malu stiluʼ. ¿Xi zacané lii cadi guiábaluʼ lu trampa riʼ yaʼ? (1 Tes. 4:​3, 4). Ora guni orarluʼ Jehová, gudxi laabe ximodo cayuni sentirluʼ ne gunabaʼ laabe gudiibe lii stipa (Mat. 6:13). Cadi guiaandaʼ lii, zacané Jehová lii ne qué zuni juzgarbe lii (Sal. 103:​13, 14). Cadi gudxiiluluʼ stúbiluʼ ca guendanagana ni gápaluʼ. Gudxi bixhózeluʼ o jñaaluʼ xi cazaacaluʼ. Zándaca gaca nagana para lii guiniʼluʼ xi cazaacaluʼ, peru nabé risaca gúniluʼ ni. Pa gúʼndaluʼ Biblia ne guiníʼ íqueluʼ ca principiu zeeda luni qué zaca nagana para lii guicaaluʼ decisión ni gusiecheʼ Jehová. Zudiiluʼ cuenta cadi caquiiñediouʼ ti ley para cada cosa ni chigúniluʼ. Zacá zahuinni cayuni progresarluʼ ndaaniʼ congregación. w22.08 5 párr. 10-12

Ca hermanu ni naca xaíque stiʼ familia rizaaláʼdxicaʼ gudiicaʼ ni caquiiñeʼ familia sticaʼ. Pa nga nga ni cazaacaluʼ, zándaca nuuluʼ xizaa ximodo gudiiluʼ ni gó familia stiluʼ o quíxeluʼ ra nabézatu. Ne dede zándaca guiníʼ íqueluʼ pa gunítiluʼ dxiiñaʼ stiluʼ qué zadxélaluʼ stobi. O zándaca caníʼ íqueluʼ qué zanda guibánitu né caadxi si cosa. Huaquiiñeʼ Binidxabaʼ ca cosa ni ruchibi riʼ, ne huacaabe stale xpinni Cristu gusaana de gúnicaʼ ni ná Jehová. Racalaʼdxiʼ Binidxabaʼ guiníʼ íquenu qué rizaalaʼdxiʼ Jehová cada tobi de laanu, ne ora caquiiñenu gacanebe laanu para gudiʼnu ni caquiiñeʼ familia stinu la? qué zulábibe laanu. Pa guiábanu lu trampa riʼ, zándaca guiníʼ íquenu jma galán cadi gusaananu dxiiñaʼ stinu, neca guchéʼnenu ca principiu ni zeeda lu Biblia. w22.06 15 párr. 5, 6

Nánnanu naca «Jehová ti Dios ni napa misericordia ne riá, rindaa para guidxiichi ne qué rusaana de gannaxhii ne fiel laa» (Éx. 34:6). Rúnibe ni jneza (Is. 61:8). Racaná Jehová ora guʼyaʼ cayuni sufrirnu ne maʼ racaláʼdxibe cueebe ca yuubaʼ nápanu dxi maʼ gudíxhebe gúnibe ni (Jer. 29:11). ¡Guizáʼ maʼ racaláʼdxinu guedandá dxi ca! Nga runi guizáʼ nadxiinu Jehová. Laaca nadxiinu ca ni dxandíʼ zeeda lu Biblia purtiʼ racané ca ni laanu lu xquendanabáninu. Guzéʼtenu ti ejemplu. Tobi de ca cosa ni maʼ bizíʼdinu de lu Biblia nga esperanza ni nápanu para lu ca dxi ni zeeda ca. Cásica rinaaze dxiichiʼ ancla ti barcu, zacaca zanda guinaaze dxiichiʼ esperanza ni zeeda lu Biblia laanu ora gápanu guendanagana. Lu textu ni biaba yannadxí riʼ caníʼ Pablo de esperanza ni napa ca ungidu para checaʼ guibáʼ. Peru ni guniʼbe ca laaca rugaanda ni ca xpinni Cristu ni napa esperanza guibani lu Guidxilayú riʼ ora maʼ gaca ni ti paraísu (Juan 3:16). Esperanza ni nápanu de guibáninu sin chuʼ dxi gátinu, racané ni laanu para guibáninu nayecheʼ. w22.08 14, 15 párr. 3-5

Pa nadxiinu binni, zápanu confianza laa. Lu 1 Corintios capítulo 13 riete stale cosa ni zanda gúninu pa nadxiinu binni. Zacané ni laanu gápanu jma confianza xcaadxi o guibiguetaʼ gápanu confianza tuuxa (1 Cor. 13:​4-8). Guzéʼtenu ti ejemplu, lu versículo 4 stini ná «ti binni ni napa amor la? napa paciencia ne nachaʼhuiʼ». Napa Jehová paciencia laanu neca ruchéʼnenu laa. Nga runi, laanu laaca naquiiñeʼ gápanu paciencia ca hermanu stinu pa guiniʼcaʼ o gúnicaʼ xiixa cosa ni guchiichi laanu o ni guniná laanu. Versículo 5 stini ná, ti binni ni napa amor «qué ridxiichi nagueenda» ne «qué rugabaʼ panda biaje guninácabe laa». Qué racaláʼdxinu ugábanu panda biaje maʼ bininá ca hermanu stinu laanu. Eclesiastés 7:9 cayabi laanu cadi naquiiñeʼ guidxiichinu nagueenda. Gúninu stipa pur guidúʼyanu laacabe cásica ruuyaʼ Jehová laacabe. Nadxii Jehová laacabe ne qué rugabaʼ panda biaje maʼ bicheecabe. Nga runi, laanu laaca cadi naquiiñeʼ ugábanu panda biaje maʼ bicheecabe (Sal. 130:3). Lugar de guidúʼyanu ra cucheecabe, guidúʼyanu ca cualidad sicarú ni nápacabe (Mat. 7:​1-5). w22.09 4, 5 párr. 6, 7

Lu libru stiʼ Daniel riete xi orden zazaaca caadxi cosa tiempu ra mayaca gueeda fin. Casi lu Daniel 12:1 riete zuzuhuaa Miguel, o Jesucristu, para gapa xquidxi Dios. Bizulú guca cumplir ti parte stiʼ profecía riʼ lu iza 1914, dxi guca Jesús Rey lu Reinu stiʼ Dios ni nuu guibáʼ. Peru laaca bizeeteʼ Daniel zuzuhuaa Jesús «tiempu zapa binni yuubaʼ ni qué huayuu dxi guihuinni dede dxi bizulú guyuu ti guidxi roʼ hasta ca dxi que». Tiempu zapa binni yuubaʼ, laca laani nga «gran tribulación» ni riete lu Mateo 24:​21, nota. Zuzuhuaa Jesús, o zuni defender xquidxi Dios, ra maʼ ziluxe tiempu zapa binni yuubaʼ, o lu Armagedón. Libru stiʼ Apocalipsis ruzeeteʼ ca binni riʼ nga «gran muchedumbre» ni guilá tiempu gapa binni «stale yuubaʼ» (Apoc. 7:​9, 14). w22.09 21 párr. 4, 5

Zanda guixiá lá ca ni maʼ cá lá lu libru de guendanabani ca; casi xa ñaca nucaa Jehová lácabe né lápiz (Apoc. 3:5). Nga runi caquiiñeʼ gúninu stipa cadi guixiá lanu lu libru ca dede maʼ ora gucaa Jehová ni né tinta ni qué rixiá. Ti grupu ni cá lá lu libru de guendanabani ca nga ca ungidu ni chiguni mandarné Cristu guibáʼ. Pur ca diidxaʼ ni gudxi apóstol Pablo ca ni biʼniné dxiiñaʼ de Filipos, nánnanu maʼ cá lá ca xpinni Cristu ungidu lu libru de guendanabani (Filip. 4:3). Peru para cadi guixiá lácabe lu libru riʼ, cadi naquiiñeʼ gucheenécabe Jehová. Ne ante gáticabe o ante guzulú gran tribulación, zacaacabe últimu sellu, ne óraca maʼ qué zaxiá diʼ lácabe lu libru ca (Apoc. 7:3). w22.09 14 párr. 3; 15 párr. 5, 6

Guiníʼ íquenu biʼniʼ invitar tuuxa laanu ti guendaró ni riuuláʼdxinu. Peru cumu nabé cayaca puranu o nápanu stale guendanagana, gubi gúbisinu guendaró que, ne maʼ qué nuzuiinu ni. Peru ora bilúxenu bidiʼnu cuenta mejor nidoʼno jma chaahuiʼ. Zacaca zanda guizaacanu ora guidúʼndanu Biblia. Zándaca guidúʼndanu ni nagueenda dede maʼ qué gudii tiempu laanu «guzuiinu» ni. Nga runi, cueenu tiempu para guiduʼndaʼ chaahuinu ne guxuíʼlunu xi guiráʼ cayaca lu relatu ni cadúʼndanu. Pa gúninu ca ni bizéʼtenu riʼ, zabáninu jma nayecheʼ. Maʼ bisaana Jesús «mozo ni nuu xpiaaniʼ ne ni runi jneza» para gudii laanu guendaró espiritual ora peʼ caquiiñenu ni (Mat. 24:45). Biblia nga ni riquiiñeʼ mozo ni nuu xpiaaniʼ para guni guendaró espiritual (1 Tes. 2:13). w22.10 7, 8 párr. 6-8

Biblia ná lu ca últimu dxi, ziuu stale binni ni zuni burla (2 Ped. 3:​3, 4). Ca binni ni runi burla «rúnicaʼ cosa ni qué rusisaca Dios» (Jud. 7, 17, 18). ¿Xi zanda gúninu para cadi gácanu casi ca binni ni runi burla? Ni zanda gúninu nga cadi guidxaaganu binni ni raca quejar pur intiica si cosa (Sal. 1:1). Ndiʼ riníʼ cadi naquiiñeʼ gucaʼdiáganu nin guidúʼndanu xiixa ni zeeda de ca apóstata. Pa qué chuʼnu cuidadu zándaca guzulú gácanu binni ni runi criticar, guiníʼ íquenu cadi nadxii Jehová laanu o cadi jneza ca instrucción ni rudii organización stibe laanu. Para cadi gácanu casi ca binni ca, galán guinabadiidxanu: «¿Ñee maʼ biaaʼ guiniéʼ xiixa cosa ni cadi galán ora gusiene xquidxi Dios laanu xiixa o gudiicaʼ laanu xiixa instrucción nacubi la? ¿Ñee ruyubeʼ puru si ra cuchee ca hermanu ni zániru la?». Pa zacá rúninu, nagueendaca gúninu stipa gusaananu ca cosa ca, ne ziechené Jehová laanu (Prov. 3:​34, 35). w22.10 20 párr. 9, 10

Espíritu ca nga bidii stipa Ezequiel para gunda biʼniʼ predicar ca judíu ni naguidxi ique ne ni naca tercu dede ndaaniʼ ladxidóʼ (Ezeq. 3:7). Sicaríʼ gudxi Jehová laabe: «Maʼ bineʼ luluʼ naguidxi cásica lúcabe, ne maʼ bineʼ lucualuʼ naguidxi cásica lucuácabe. Maʼ bineʼ lucualuʼ casi ti diamante, jma naguidxi que ti guié. Cadi guidxíbiluʼ laacabe, ne cadi guidxibi xhaataluʼ lúcabe» (Ezeq. 3:​8, 9). Casi xa ñaca ñabi Jehová Ezequiel: «Cadi guireeluʼ gana pur qué ruzuubacabe diidxaʼ. Naa zacaniáʼ lii gácaluʼ ti hombre nadxibalú». Ne óraque yené espíritu stiʼ Dios Ezequiel lugar ra caquiiñeʼ chiguni predicar. Laabe bicaabe gucané Jehová laabe né stipa stiʼ. Ti semana yené profeta que para guníʼ ique ne biene chaahuiʼ mensaje ni chiguni predicar (Ezeq. 3:​14, 15). Despué, gudxi Jehová laabe chebe lu ti layú ra napampa, ne raqué guyuu espíritu que luguiabe (Ezeq. 3:​23, 24). Zaqué nga maʼ nuu Ezequiel listu para guzulú guni predicar. w22.11 4, 5 párr. 8, 9

Gudiʼdiʼ profeta Habacuc lu stale guendanagana. Zándaca guyuu ora guníʼ íquebe pa rizaalaʼdxiʼ Jehová laabe. Ngue runi gúdxibe Jehová xi cayuni sentirbe. Bicabi Jehová oración stiʼ hombre fiel riʼ (Hab. 2:​2, 3). Despué de guníʼ ique Habacuc ximodo bilá Jehová xquidxi, biguetaʼ guyuu nayecheʼ sti biaje. Gunna dxíchibe rizaalaʼdxiʼ Jehová laabe ne zacané laabe guni huantarbe intiica guendanagana (Hab. 3:​17-19). ¿Xi rusiidiʼ ndiʼ laanu yaʼ? Ora gápaluʼ guendanagana, biʼniʼ orar Jehová, gudxi laabe xi cayuni sentirluʼ ne biyubi gacanebe lii. Gunna dxichi zudii Jehová stipa lii para guni huantarluʼ. Ne ora gúʼyaluʼ ximodo cayacanebe lii la? jma naguidxi zaca fe stiluʼ. Pa gúniluʼ cosa ni guchiña lii gaxha de Jehová qué zuxheleʼ ca guendanagana ne ca duda ca lii de laabe (1 Tim. 6:​6-8). w22.11 15 párr. 6, 7

Chaahuidugá cayati Jesús ne guiropaʼ gubaanaʼ ni cá cueʼ (Luc. 23:​32, 33). Biʼniʼ burla guiropaʼ hombre riʼ Jesús (Mat. 27:44; Mar. 15:32). Peru tobi de ca gubaanaʼ que bichaa. Ne guníʼ: «Jesús, bietenalaʼdxiʼ de naa ora guiuuluʼ lu Reinu stiluʼ». Para gudxi Jesús laabe: ni cá lu textu ni biaba yannadxí ca (Lucas 23:​39-42). Ni gudxi Jesús gubaanaʼ que zanda gucaa ni laanu guiníʼ íquenu ximodo zabáninu ndaaniʼ Paraísu. Ti cosa ni zacané laanu nga guietenaláʼdxinu pabiáʼ galán bibani ca israelita tiempu biʼniʼ mandar Salomón. Ne Biblia ná naca Jesús ti binni «jma risaca que Salomón». Nga runi nanna dxiichinu zuni Jesús ne ca ni guni mandarné laa Guidxilayú riʼ ti lugar guizáʼ sicarú (Mat. 12:42). Pur nga, naquiiñeʼ guiziidiʼ «xcaadxi dendxuʼ» xi naquiiñeʼ gúnicaʼ para ganda guibánicaʼ sin qué chuʼ dxi gáticaʼ ndaaniʼ Paraísu (Juan 10:16). w22.12 8 párr. 1; 9 párr. 4

Cayabi Isaías laanu zucaadiaga Jehová ca oración stinu ne nagueenda zacábibe laanu. Laaca guníʼ profeta que: «Zacábibe lii casi peʼ gunadiágabe lii». Rusietenalaʼdxiʼ ca diidxaʼ riʼ laanu cadi nuu si Bixhózenu listu gacané ca ni caquiiñeʼ ni, sínuque racaláʼdxibe gúnibe ni de guidubi ladxidoʼbe. Ra gánnanu ndiʼ, ¿cadi dxandíʼ racané ni laanu guni huantarnu sin gusaana de chuʼnu nayecheʼ la? Lu versículo riʼ laaca rabi Jehová laanu rucaadiaga chaahuiʼ ca oración ni runi cada tobi de laanu. ¿Ximodo nánnanu ni yaʼ? Ra ruzulú capítulo 30 stiʼ Isaías, biquiiñeʼ Jehová diidxaʼ «laatu», purtiʼ caniʼné xquidxi. Peru lu versículo 19 Jehová biquiiñeʼ diidxaʼ «lii», purtiʼ caníʼnebe cada tobi de ca xpínnibe. Isaías guníʼ «dxandíʼ peʼ zusaana de gúʼnaluʼ», «zacanebe lii», «zacábibe lii». Jehová nga Bixhózenu ni nadxii laanu, rizaaláʼdxibe cada tobi de laanu ne laapebe ricábibe oración stiʼ cada tobi (Sal. 116:1; Is. 57:15). w22.11 9 párr. 5, 6

Guizáʼ riuʼnu nayecheʼ ne rápanu paz ora runi predicarnu ne rusíʼdinu binni ni dxandíʼ de Dios neca gucaalucaʼ laanu. Lu primé siglu que, ora biʼniʼ mandar ca autoridad stiʼ ca judíu ca apóstol gusaana de guni predicarcaʼ, bizuubaʼ ca apóstol que stiidxaʼ Dios ne qué ninacaʼ nucheenecaʼ laabe. Qué nusaana de ñuni predicarcaʼ ne guizáʼ guyuucaʼ nayecheʼ (Hech. 5:​27-29, 41, 42). Peru ora rucueeza gobiernu dxiiñaʼ stinu, naquiiñeʼ guni predicarnu né stale cuidadu. Pa gúninu stipa gúninu ni, zápanu paz purtiʼ cusiéchenu Jehová ne cayacanenu binni guilá. Cadi guiaandaʼ laanu neca tídinu ra jma nagana zanda gápanu paz. Ne óraca naquiiñeʼ gánnanu zanda gápanu paz, peru paz ni rudii Dios laanu. Gápanu confianza Jehová ora chuʼ epidemia, guizaaca xiixa cosa ni cadi cabézanu o sananda binni laanu. Cadi guixélenu de organización stibe ne guiníʼ íquenu ca ndaayaʼ sicarú ni chigudiibe laanu. Pa gúninu ni, «Dios ni riguixhedxí ladxidoʼno» qué zaxeleʼ de laanu (Filip. 4:9). w22.12 21 párr. 17, 18

Para ganda gúninu ni la? naquiiñeʼ gúninu stipa gusaana de gúninu caadxi cosa ni cadi jneza, casi guidaʼnu xiana ne guidxiichinu. ¿Xiñee zanda gácani nagana para laanu yaʼ? Purtiʼ zándaca dede dxi nahuiininu zacá laanu. Biblia riníʼ de binni ni «nagueenda ridaa xiana» ne binni «ni nabé ridxiichi» (Prov. 29:22). Ne zándaca para gucueezanu laca laanu naquiiñeʼ gúninu stipa pur guchaʼnu modo laanu, neca maʼ guyuʼnísanu(Rom. 7:​21-23). Guinínenu Jehová lu oración ne gábinu laa xii nga defectu ni cayúninu stipa gusaananu ne ganna dxiichinu zucaadiágabe laanu ne zacanebe laanu (1 Juan 5:​14, 15). Qué zúnibe ti milagru para cueebe ni nagueenda, peru zudiibe stipa laanu para gucueezanu laanu (1 Ped. 5:10). ¿Ximodo zanda gúninu ca ni canábanu lu oración yaʼ? Naquiiñeʼ gucáʼnanu intiica cosa ni gucaa laanu guluinu modo gúcanu dxiqué. Ne cadi gudiʼnu lugar chuʼ xiixa deseu malu ndaaniʼ ladxidoʼno (Filip. 4:8; Col. 3:2). w23.01 10 párr. 7, 9, 10

Ti modo zanda gúninu ni nga ra guni predicarnu binni né stale gana. Runi predicarnu binni de intiica raza, cultura, ricu o pobre. Zacá runinenu Jehová dxiiñaʼ purtiʼ laa «racalaʼdxiʼ gulá guiráʼ xixé binni ne guiziidiʼ chaahuicaʼ ni dxandíʼ» (1 Tim. 2:4). Sti modo zanda gusihuínninu nadxiinu Dios ne Cristu nga ra gannaxhiinu ca hermanu stinu. Guzéʼtenu ti ejemplu, rizaaláʼdxinu laacabe ne racanenu laacabe ora cadíʼdicabe lu xiixa guendanagana. Riguixhedxinu ladxidóʼcabe ora gatiʼ ti binni ni nadxiicabe, rigánnanu laacabe ora huarácabe ne rúninu guiráʼ ni nuu lu nanu para cuʼnu gana laacabe ora nuucabe triste (2 Cor. 1:​3-7; 1 Tes. 5:​11, 14). Laaca runi orarnu pur laacabe purtiʼ nánnanu «napa oración stiʼ ti binni nachaʼhuiʼ stipa» (Sant. 5:16). w23.01 28, 29 párr. 7, 8

Ra tidiʼ tiempu, jma riziidiʼ ti binni ni runi dxiiñaʼ lu construcción guni xhiiñaʼ jma jneza. Laanu laaca ra tidiʼ tiempu jma zazíʼdinu cuʼnu gana ca hermanu stinu. Gacanenu ca hermanu stinu para guni huantarcaʼ ca prueba ni cadíʼdicaʼ ra guinínenu laacaʼ de ejemplu stiʼ xcaadxi xpinni Cristu ni biʼniʼ huantar dxiqué (Heb. 11:​32-35; 12:1). Guyúbinu chuʼ guendariuudxi ládenu ra guininu de ca cualidad galán ni napa xcaadxi ne pa nápanu xiixa guendanagana né tuuxa hermanu la? guni chaahuinu ca ni para ganda chuʼnu tobi si (Efes. 4:3). Cadi gusaana de gacanenu ca hermanu stinu para guquídxinu fe sticaʼ ra guinínenu laacaʼ de ca ni dxandíʼ rusiidiʼ Biblia ne gacanenu laacabe ra caquiiñecabe ni, jmaruʼ si ca ni maʼ cará fe stiʼ. Laanu laaca zuni sentirnu zadxá tipa ladxidoʼno ne ziuʼnu nayecheʼ ora gacanenu ca hermanu stinu chuʼcaʼ gaxha de Jehová. Ti edificiu la? ra tidiʼ tiempu riuxe, peru ni gúninu pur ca hermanu stinu zandaa ni. w22.08 22 párr. 6; 25 párr. 17, 18

Laaca guníʼ Jesús pa racaláʼdxinu guiénenu Biblia, naquiiñeʼ guiene chaahuinu relatu ni cadúʼndanu (Mat. 24:15). ¿Ximodo zanda gúninu nga yaʼ? Naquiiñeʼ cueenu tiempu para guiníʼ ique chaahuinu gunáʼ nga ca idea ni naca tobi si ne gunáʼ nga ca ni naca maʼ gadxé. Laaca racaneni laanu guizíʼdinu gánnanu gunáʼ nga ca cosa ni naquiiñeʼ chinándanu. Laaca guníʼ Jesús, pa gúninu stipa guiene chaahuinu ni cadúʼndanu, zacaneni laanu guidúʼyanu cazaaca cosa ni cusihuinni cayaca cumplir caadxi profecía ni zeeda lu Biblia. Pa guiene chaahuinu ni cadúʼndanu lu Biblia, zabeendunu stale cosa ni galán ne zazíʼdinu stale. Jehová nga racané laanu guiene chaahuinu ni cadúʼndanu lu Biblia. Nga runi naquiiñeʼ guni orarnu ne guinábanu laabe gacanebe laanu. Peru caquiiñeʼ gúnirunu xcaadxi cosa. Caquiiñeʼ cueenu tiempu guni estudiarnu ni cadúʼndanu ne guiníʼ íquenu xiruʼ zanda guizíʼdinu de laacani. Guyúbinu xi rusiidiʼ ca relatu ca laanu ne guidúʼyanu ximodo chinándanu ni cazíʼdinu lu xquendanabáninu (Heb. 5:14). Racá ridúʼyanu nabé risaca guidúʼndanu Biblia ne guiene chaahuinu ni. w23.02 10 párr. 7, 8

Guníʼ ique bisigaʼdeʼ ti xhamíguluʼ lii ti cuadru ni maʼ nayooxhoʼ, peru nabé risaca. Neca napa ni stale mancha ne maʼ biete color stini, peru risaca ni stale millón de dólar. ¿Cadi dxandíʼ ñápaluʼ ni ne nusisácaluʼ ni stale la? Jehová laaca maʼ bisigaʼdeʼ laanu xiixa nabé risaca, laani nga guendanabani stinu. Ne nabé risaca ni para laabe dede bidiibe Xiiñibe pur laanu (Juan 3:16). Ra nuu Jehová «cadá guendanabani» (Sal. 36:9). Nanna apóstol Pablo zacá ni ora guníʼ: «Purtiʼ laabe bizaʼbe laanu, pur laabe nabáninu ne riniibinu» (Hech. 17:​25, 28). Nga runi zanda guininu ti regalu stiʼ Dios nga guendanabani. Né stale cariñu rudiibe laanu ni caquiiñenu para guibáninu (Hech. 14:​15-17). Peru qué zuni Jehová ti milagru para cadi gátinu, sínuque ribézabe gápanu laanu para chuʼnu nazaaca ne gúninu xhiiñabe (2 Cor. 7:1). w23.02 20 párr. 1, 2

¡Guizáʼ rudiʼnu xquixe peʼ Jehová purtiʼ bidii laanu Biblia! Lu libru riʼ rudiibe laanu conseju galán ni racané laanu gánnanu xi gúninu ora nápanu guendanagana. Laaca rudiini laanu ti esperanza galán de ni chiguizaaca despué. Ne ni jma risaca rusiidini laanu nga ximodo naca Jehová. Ora guiníʼ íquenu ca cualidad sicarú napa Jehová rucaa ni laanu chuʼnu jma gaxha de laa ne gaca xhamígunu laa (Sal. 25:14). Racalaʼdxiʼ Jehová gunibiáʼ binni laa. Dxiqué biquiiñebe bacaandaʼ, visión ne ángel para gábibe binni ximodo laabe (Núm. 12:6; Hech. 10:​3, 4). Peru pa ñaca guirutiʼ nucaa guiráʼ ndiʼ qué ñanda ñuni estudiarnu ca ni. Nga runi gudxi Jehová caadxi hombre gucaacaʼ «lu ti libru» ni racaláʼdxibe gánnanu. Zanda guni crenu laabe guniʼbe xi guicá lu Biblia, purtiʼ nánnanu biaʼsi ca neza stiʼ Dios (Sal. 18:30). w23.02 2 párr. 1, 2

Gudixhe meta ni dxandíʼ zacané lii. Gulí meta ni guquidxi fe stiluʼ ne ni zacané lii gácaluʼ ti xpinni Cristu ni zuhuaa dxiichiʼ (Efes. 3:16). Ti meta ni zanda gápaluʼ nga cadi gusaana de gápaluʼ estudiu personal stiluʼ ne gúʼndaluʼ Biblia (Sal. 1:​2, 3). O zándaca caquiiñeʼ guni orarluʼ jma ne gúniluʼ ni de guidubi ladxidoʼloʼ. Zándaca laaca caquiiñeʼ gápaluʼ jma cuidadu né entretenimientu stiluʼ ne iquiiñeluʼ tiempu stiluʼ jma jneza (Efes. 5:​15, 16). Ora racaneluʼ xcaadxi, runi progresarluʼ casi xpinni Cristu. ¿Ximodo zanda gacaneluʼ xcaadxi yaʼ? Zanda quíxheluʼ meta gacaneluʼ ca hermanu ni huará ne ca hermanu ni maʼ huaniisi de congregación stiluʼ ra gúniluʼ mandadu stícabe o gacaneluʼ laacabe iquiiñecabe ca dispositivu electrónicu stícabe. Laaca zanda gusihuínniluʼ nadxiiluʼ ca binni ni qué runibiáʼ Jehová ra guiníʼneluʼ laacabe de ca noticia galán stiʼ Reinu (Mat. 9:​36, 37). Ne pa ganda la? gudixhe ique guni servirluʼ lu xiixa asignación de tiempu completu. w22.08 6 párr. 16, 17