Noviembre

Cadi naquiiñeʼ guiníʼ ti xpinni Cristu diidxaʼ guidxa. Peru naquiiñeʼ chuʼnu cuidadu purtiʼ zándaca guininu diidxaʼ ni guniná sti binni sin gudiʼnu cuenta. Guzéʼtenu ti ejemplu, cadi naquiiñeʼ diʼ guininu mal de ca binni ni napa gadxé costumbre o de gadxé guidxi. Ne laaca cadi naquiiñeʼ guininu xiixa ni gusituí lú tuuxa o ni guniná laa. Guininu diidxaʼ ni gacané ne uguu gana stobi. Lugar de gácanu ti binni ni maʼ caguicheruaa ne maʼ caníʼ mal, jma galán guininu diidxaʼ ni uguu gana xcaadxi binni. Qué racaláʼdxinu gácanu casi ca israelita. Neca gúpacaʼ stale cosa ni ñacané laacaʼ ñácacaʼ binni rudii xquixe peʼ, peru laga gúcacaʼ binni ni maʼ caguicheruaa ne nánnanu ricá nga stobi. Pur ca cosa ni cadi galán guníʼ chii espía que la? «guiráʼ ca israelita que bizulú gudiche ruaacaʼ pur ni cayuni Moisés» (Núm. 13:​31–14:4). Pa guni felicitarnu stobi pur ni cayuni la? guizáʼ zacaneni laa. Nga runi, ora gúʼyaluʼ zanda guni felicitarluʼ tuuxa la? biʼniʼ ni. w22.04 8 párr. 16, 17

Dede tiempu gucuá Biblia, huayacané Jehová stale joven para gácacaʼ xhamígube. Nga runi, pa gudii ca xiiñitu lugar, zanda gacané Jehová laacaʼ chuʼcaʼ gaxha de laabe (1 Cor. 3:​6, 7). Neca ruluíʼ caxeleʼ ca xiiñitu de lu neza stiʼ Jehová, peru laabe nuube listu para gacanebe laacaʼ né cariñu (Sal. 11:4). Ne ora guʼyaʼ Jehová racaláʼdxicabe gúnicabe ni ná, laabe nuube listu para gacanebe laacaʼ gaca xhamígucaʼ laabe (Hech. 13:48; 2 Crón. 16:9). Laaca zanda gacanebe laatu guidxélatu diidxaʼ ni gábitu ca xiiñitu ne ora peʼ caquiiñecabe ni (Prov. 15:23). Laaca zanda iquiiñeʼ Jehová ti hermanu o ti hermana de congregación stitu para guizaalaʼdxiʼ laacabe. Ne ora maʼ huaniisicabe, zanda gacané Jehová laacabe guietenaláʼdxicabe xiixa ni bisiiditu laacabe dxi nahuiinicabe (Juan 14:26). Pa qué gusaana de gusiiditu ca xiiñitu pur ni riniʼtu ne ni rúnitu, zaguu Jehová ndaayaʼ stipa stitu. w22.04 21 párr. 18

Guládxicabe Binidxabaʼ guibáʼ, nga runi cucaalube ca ungidu, ca representante stiʼ Reinu stiʼ Dios ni nuu lu Guidxilayú, ne cudiicaʼ «testimonio de Jesús» (2 Cor. 5:20; Efes. 6:​19, 20). Lu iza 1918, bigaanicabe donda ique xhono hermanu ni biʼniʼ dirigir dxiiñaʼ stiʼ Dios ne gucuaacabe sentencia para guiaanacabe stale iza ndaaniʼ cárcel. Ruluíʼ raqué nga biluxe dxiiñaʼ que (Apoc. 11:​3, 7-11).Peru lu beeu marzo iza 1919, biree ca hermanu riʼ de ndaaniʼ cárcel, purtiʼ qué nidxélacabe donda luguiacaʼ. Nagueendaca biguetaʼ biʼniʼ dirigir ca hermanu riʼ dxiiñaʼ stiʼ Reinu sti biaje. Peru dede dxiqué, qué huasaana Binidxabaʼ de gucaalú ca xpinni Dios (Apoc. 12:15). Nga runi caquiiñeʼ guni huantarnu ne gápanu fe (Apoc. 13:10). w22.05 5, 6 párr. 14-16

Lu ti visión, biiyaʼ apóstol Juan chupa grupu de binni ni cayuni ni ná gobiernu stiʼ Jehová ne cacaacaʼ guendanabani ni qué zaluxe ne stale ndaayaʼ. Lu primé grupu ca nuu 144,000 binni. Guirácabe de lu Guidxilayú riʼ laacabe ne ziécabe guibáʼ para guni mandarnécabe Jesús lu ti Reinu o gobiernu. Ne zuni mandárcabe Guidxilayú riʼ (Apoc. 5:​9, 10; 14:​3, 4). Biiyaʼ Juan zuhuaanécabe Jesús lu dani Sion guibáʼ (Apoc. 14:1). Dede dxi bibani ca apóstol hasta tiempu riʼ, cabí Jehová binni para chuʼcaʼ lade 144,000 (Luc. 12:32; Rom. 8:17). Peru lu visión que laaca binadiaga Juan maʼ xcaadxi si binni ni nuu lu grupu que zabani lu ca últimu dxi (Apoc. 12:17). Ne ora maʼ nuunu lu gran tribulación, zié ca ungidu ni nuuruʼ lu Guidxilayú guibáʼ para chuʼcaʼ ra nuu xcaadxi ungidu ni maʼ nuu raqué, zacá nga guizaa 144,000. Zuni mandarnécabe Jesús lu Reinu stiʼ Dios (Mat. 24:31; Apoc. 5:​9, 10). w22.05 16 párr. 4, 5

Bisiidiʼ Jesús ca discípulo stiʼ cadi guiníʼ íquecaʼ jma risácacaʼ que xcaadxi, peru laaca gucanebe laacaʼ cadi guiníʼ íquecaʼ qué lica risácacaʼ. Sicaríʼ gúdxibe laacaʼ: «Dede guicha íquetu nánnabe panda» (Mat. 10:30). Guizáʼ riguixhedxí ca diidxaʼ riʼ ladxidoʼno, jmaruʼ si pa riníʼ íquenu qué lica risácanu. Rusietenalaʼdxiʼ ca diidxaʼ riʼ laanu guizáʼ rizaalaʼdxiʼ Jehová laanu ne nabé risácanu para laabe. Pa cudii Jehová lugar guni adorarnu laa ne riníʼ íquebe zanda guibáninu sin qué chuʼ dxi gátinu ndaaniʼ ti paraísu, cadi naquiiñeʼ guiníʼ íquenu cadi biaʼsi ni nabe. Raca 15 iza, sicaríʼ bizeeteʼ revista Torre stiʼ ni rapa: «Qué racaláʼdxinu guiníʼ íquenu jma risácanu que xcaadxi dede gácanu orgulloso, peru laaca cadi naquiiñeʼ guiníʼ íquenu qué lica risácanu gastiʼ. Ni naquiiñeʼ gúninu nga guiníʼ íquenu nuu cosa ni nánnanu gúninu ne nuu cosa ni qué randa rúninu». w22.05 24, 25 párr. 14-16

¿Xi zanda gúninu para chuʼnu tobi si né ca hermanu de congregación stinu? Gúninu stipa chuʼ paz ládenu (Mat. 5:9; Rom. 12:18). Cada biaje gúninu stipa gaca llevarnu ca hermanu de congregación stinu, racanenu gaca paraísu espiritual ca jma sicarú. Cadi guiaandaʼ laanu Jehová nga bichiña ca hermanu stinu ndaaniʼ paraísu espiritual riʼ (Juan 6:44). Guiníʼ íquenu pabiáʼ riéchebe ora ruuyabe rúninu stipa chuʼnu en paz ne tobi si né ca xpínnibe, purtiʼ guizáʼ risácacaʼ para laabe (Is. 26:3; Ageo 2:7). Jehová rudii stale cosa galán ca xpinni, ¿xi zanda gúninu para guni aprovecharnu ca ni yaʼ? Guiníʼ ique chaahuinu ni rizíʼdinu lu Stiidxaʼ Dios. Pa guni estudiarnu ne guiníʼ íquenu, zacané ni laanu gusihuínninu cualidad ni zucaa laanu gannaxhiinu ca hermanu stinu cásica nadxiinu familia stinu (Rom. 12:10). w22.11 12, 13 párr. 16-18

Ora maʼ biénenu maʼ biʼniʼ perdonar Jehová laanu, ratadxí ladxidoʼno. Ne racané ni laanu gápanu guendariuudxi ne ti conciencia nayá. Qué rápanu ca ndaayaʼ riʼ ora runi perdonar ti binni laanu, sínuque ora si runi Jehová ni (Hech. 3:19). Ne ora runi perdonarbe laanu rudiibe lugar gácanu xhamígube sti biaje. Ne para laabe casi ora qué lica nucheʼnu. Despué de maʼ biʼniʼ perdonar Jehová ti binni, qué rugaanirube donda que ique ne qué runi castigarbe laa pur ni biʼniʼ (Is. 43:25). «Biaʼca zitu nuu de ra rindani gubidxa ne dede ra riaaziʼ ni» biaʼca de zitu rundaa Jehová ca pecadu stinu (Sal. 103:12). Ora riníʼ íquenu pabiáʼ naroʼbaʼ perdón stiʼ Jehová rucaani laanu gudiʼnu xquixe ne gápanu respetu laabe (Sal. 130:4). Qué ruuyadxí diʼ Jehová pabiáʼ naroʼbaʼ pecadu ni bíninu para guni perdonar laanu. Ne casi maʼ bizíʼdinu, Jehová nga bizáʼ laanu, runibiaʼbe laanu, nácabe ti Juez nachaʼhuiʼ ne laabe nga riguíxhebe ca ley ni rinándanu. Nga runi, jneza modo runi juzgarbe ne nánnabe pora guni perdonarbe tuuxa o coʼ. w22.06 5 párr. 12-14

Jehová maʼ guníʼ zuni xiixa para ca binni ni nadxii laabe. Laani nga maʼ cadi candaa zaree guendahuará, maʼ guirutiʼ tu ziuu triste ne maʼ qué ziuu guendaguti (Apoc. 21:​3, 4). Zacanebe ca binni nadóʼ, ca ni cabeza gacanebe laa, para gúnicaʼ Guidxilayú riʼ ti paraísu (Sal. 37:​9-11). Ne laaca zacanebe laanu para chuʼnu jma gaxha de laabe, jma que biaʼ rúninu ni yanna. ¡Guizáʼ sicarú ora maʼ gaca ndiʼ! Yanna, ¿xiñee nuunu seguru zaca cumplir ca promesa stiʼ Dios yaʼ? Purtiʼ siempre rúnibe ni riniʼbe. Nga runi nápanu razón para cuézanu gacané Jehová laanu (Sal. 27:14). ¿Ximodo rusihuínninu cabézanu gacanebe laanu yaʼ? Zusihuínninu ni ra cuézanu né paciencia ne guendanayecheʼ guni cumplirbe ca promesa stibe (Is. 55:​10, 11). Naquiiñeʼ gánnanu pa gúninu stipa pur cadi guchéʼnenu Jehová laabe zudiibe «premiu ca ni ruyubi laabe sin guiree gana». w22.06 20 párr. 1; 25 párr. 18

Cumu Jehová nga xaíque stinu la? zanda chuʼnu seguru zúnibe ni rinábabe guni ca ni naca xaíque stiʼ familia casi ná 1 Timoteo 5:8. Pa dxandíʼ runi crenu nadxii Jehová laanu ne familia stinu, ziuʼnu seguru zacanebe laanu gápanu ni caquiiñenu (Mat. 6:​31-33). Racalaʼdxiʼ Jehová gudii ni caquiiñenu, rúnibe ni purtiʼ nadxiibe laanu ne rudiibe laanu jma que biaʼ ni rinábanu laabe. Dxi bizaʼbe Guidxilayú riʼ, qué nuzáʼsibe ca cosa ni caquiiñenu para guibáninu, sínuque pur nadxiibe laanu bizaʼbe stale cosa sicarú ni gusiecheʼ laanu (Gén. 2:9). Neca nuu biaje ni tidinésinu dxi nápanu, gudiʼnu xquixe peʼ purtiʼ nápanu ni. Jehová nga rudii ni laanu ne qué zusaana de gudiibe laanu «pan para yannadxí» (Mat. 6:11). Cadi guiaandaʼ laanu, guiráʼ ca cosa ni qué gápanu yanna qué zanda guchaaganu ca ni né guiráʼ ni chigudii Jehová laanu lu guidxilayú nacubi (Is. 65:​21, 22). w22.06 15 párr. 7, 8

Cadi ca binni si ni cacaa estudiu nga ni caquiiñeʼ guendaró espiritual ni guquidxi fe sticaʼ. Guiranu nga caquiiñenu ni. Apóstol Pablo guníʼ pa gúninu guiráʼ ni cazíʼdinu zacaneni laanu gánnanu «xii nga ni jneza ne ni cadi jneza». Cumu zeʼ dxi jma feu ziyaca xpiaʼ binni la? nga runi zándaca gaca nagana para laanu chinándanu guiráʼ ni rusiidiʼ Jehová laanu. Peru rudii Jesús laanu guendaró espiritual ni zeeda de lu Biblia ni racané laanu chuʼ fe stinu naguidxi. Cásica biʼniʼ Jesús, laaca rusisácanu lá Dios (Juan 17:​6, 26). Guzéʼtenu ti ejemplu, lu iza 1931 biree lanu testigu stiʼ Jehová casi cá ni lu Biblia. Zacá rusihuínninu racaláʼdxinu iquiiñenu lá Bixhózenu ni nuu guibáʼ, purtiʼ nabé risaca ni para laanu (Is. 43:​10-12). Ne lu Biblia Traducción del Nuevo Mundo maʼ cá la Dios ra naquiiñeʼ cheni. w22.07 11 párr. 11, 12

Laaca naca ca noticia galán stiʼ Reinu stiʼ Dios ni dxandíʼ rusiidiʼ Biblia. Bichaaga Jesús ni dxandíʼ de Reinu stiʼ Dios casi ti tesoro ni gaʼchiʼ. Laa guníʼ: «Zeeda gaca Reinu ni nuu guibáʼ casi ti tesoro gaʼchiʼ lu ti layú ni bidxela ti hombre. Bicaachiʼ hombre que ni sti biaje, ne de tantu cayecheʼ, biree zeʼ ne bitoo guiráʼ ni napa ne guzíʼ layú que» (Mat. 13:44). Casi bidúʼyanu ca, cadi canayubi diʼ hombre que tesoro que. Peru, ora bidxélabe ni, bíʼnibe ti sacrificiu naroʼbaʼ para guiaananebe ni ra bitoobe guiráʼ ni nápabe. ¿Xiñee bíʼnibe ni yaʼ? Purtiʼ biénebe pabiáʼ risaca tesoro que Nánnanu jma risaca ni dxandíʼ rusiidiʼ Biblia que intiica cosa rudii guidxilayú riʼ laanu, purtiʼ riuʼnuʼ nayecheʼ ora rúninu ni ná Jehová. Laaca rusisácanu esperanza ni nápanu de guibáninu sin chuʼ dxi gátinu ora maʼ guni mandar Reinu stiʼ Dios. Risaca intiica sacrificiu ni rúninu para gaca xhamígunu Jehová. Ti privilegiu nga gácanu xhamígube. Ne ti cosa ni guizáʼ rusiecheʼ laanu nga gúninu ni gusiecheʼ ladxidóʼ Jehová (Col. 1:10). w22.08 15-17 párr. 8, 9; 17 párr. 12

¿Ximodo gunna José qué riuulaʼdxiʼ Dios gapa binni jnadxii o guni cometer adulteriu yaʼ? Cadi guiaandaʼ laanu bizaaca ndiʼ chupa gayuaa iza ante guicá Ley stiʼ Moisés, ra ná: «Cadi gápaluʼ jnadxiiluʼ» (Éx. 20:14). Peru né ni maʼ biziidiʼ José de Jehová gucané ni laa gudii cuenta qué riuulaʼdxiʼ Dios guni cometer binni pecadu sexual. Guzéʼtenu ti ejemplu, gúnnabe gudixhestí Dios guichaganáʼ ti hombre ne ti gunaa. Ne zándaca gúnnabe xi biʼniʼ Jehová para gapa bisabuela stibe, Sara, purtiʼ chupa biaje gucalaʼdxiʼ chupa rey ñatané laa (Gén. 2:24; 12:​14-20; 20:​2-7; 26:​6-11). Ra guníʼ ique José guiráʼ ni biʼniʼ Jehová la? bidii cuenta xii nga ni jneza ne ni cadi jneza. Ne cumu nadxiibe Jehová la? laaca gunnaxhiibe ca ley stiʼ ne biʼniʼ respetarbe ca ni. w22.08 26 párr. 1, 2

Profecía ca cuzeeteʼ ziasa ca binni ni maʼ guti. Peru cadi caníʼ diʼ ni ora guiasa ca ungidu para checaʼ guibáʼ lu ca últimu dxi, casi biénenu ni dxiqué, sínuque caniʼni ora guiasa ca ni maʼ guti para guibánicaʼ ndaaniʼ guidxilayú cubi. ¿Xiñee caninu zacá yaʼ? Lu Job 17:16 laaca riquiiñeʼ ni diidxaʼ «ndaaniʼ yu» para guiniʼni de «Baʼ». Ndiʼ rusihuinni caníʼ Daniel 12:2 de ora guiasa ca binni ni maʼ guti para guibánicaʼ lu Guidxilayú riʼ tidiʼ si Armagedón. Yanna, ¿xii nga caníʼ Daniel 12:2 ora ruzeeteʼ ziasa caadxi binni «para guicaacaʼ guendanabani ni qué zaluxe» yaʼ? Ndiʼ riníʼ ca binni ni guiasa de lade gueʼtuʼ, ne guiziidicaʼ o qué gusaana de guiziidicaʼ de Jehová ne de Jesús ne guzuubacaʼ diidxaʼ lu 1,000 iza ca, zacaacaʼ guendanabani ni qué zaluxe (Juan 17:3). w22.09 21 párr. 6, 7

Peru qué riníʼ diʼ ca diidxaʼ ca cayabi Jehová laanu gápanu confianza tuuxa pa qué runibiaʼnu laa, sínuque ribézabe gápanu confianza ti binni ni rusihuinni dxandíʼ nachaʼhuiʼ. Naquiiñeʼ tidiʼ tiempu para gápanu confianza tuuxa. ¿Xi zanda gúniluʼ para gápaluʼ jma confianza xcaadxi yaʼ? Binibiáʼ chaahuiʼ laacabe. Guniʼné laacabe lu ca reunión, laguni predicar juntu, gupa paciencia ne bidii lugar gusihuínnicabe zanda gápaluʼ confianza laacabe. Pa qué runibiáʼ chaahuiluʼ tuuxa, zándaca gaca nagana para lii guiníʼneluʼ laabe de ca cosa ni cazaacaluʼ. Peru ra gunibiáʼ chaahuiluʼ binni ca, zándaca dede zudii gana lii gábiluʼ laabe ximodo nuuluʼ (Luc. 16:10). Yanna, ¿xi zanda gúniluʼ pa gunítiluʼ confianza ti hermanu purtiʼ biʼniʼ lii xiixa yaʼ? Cadi gusaana de gaca xhamíguluʼ laabe ne guleza tidiʼ tiempu. Cadi gudiiluʼ lugar pur ni biʼniʼ tuuxa lii maʼ cadi gápaluʼ confianza xcaadxi. w22.09 4 párr. 7, 8

Ti ancianu ni láʼ Miqueas biʼniʼ sentirbe cadi jneza modo biʼniʼ tratar caadxi ancianu laabe. Neca zaqué, bisihuinni Miqueas naca ti binni nuu xpiaaniʼ ne biʼniʼ stipa para cadi guidxiichi. Guizáʼ biʼniʼ orarbe Jehová para guinábabe laa espíritu santu ne stipa para guni huantarbe. Laaca biyúbibe información lu ca publicación stinu. ¿Xi rusiidiʼ ndiʼ laanu yaʼ? Pa caníʼ íqueluʼ cadi jneza modo biʼniʼ tratar tuuxa hermanu o hermana de congregación lii, cadi guidxiichiluʼ ne cadi guiníʼ íqueluʼ cosa feu de laabe. Zándaca nuu xiixa ni bicaa laabe guiniʼbe o gúnibe ni, ne qué gannuʼ xiñee. Nga runi, gudxi Jehová guiráʼ ni cazaacaluʼ ne gunabaʼ laabe guiníʼ íqueluʼ casi riníʼ ique hermanu que. Pa gúniluʼ ni, zacané ni lii cadi guidxiichiluʼ ne gusiaandaluʼ ni bíʼnibe lii (Prov. 19:11). Cadi guiaandaʼ lii cayuuyaʼ Jehová ni cazaacaluʼ ne zudiibe stipa lii para guni huantarluʼ (Ecl. 5:8). w22.11 21 párr. 5

Biyubi gaca xhamíguluʼ ca binni ni nadxii Jehová. Zanda gacané ca xhamíguluʼ lii para guni progresarluʼ (Prov. 13:20). Ti ancianu láʼ Julien guníʼ: «Dxi jma joven naa, bidxelaʼ lu predicación tu gacaʼ xhamiguaʼ. Runi predicárcabe né stale gana ne gucanécabe naa guuyaʼ zanda chuaaʼ nayecheʼ ora guneʼ predicar. Gudixheʼ iqueʼ ugaandaʼ meta guneʼ servir de tiempu completu. Cumu puru binni biaʼ naa si biyubeʼ gacaʼ xhamiguaʼ la? bidieeʼ cuenta zándaruʼ gacaʼ xhamiguaʼ binni ni gacané naa neca jma huaniisicaʼ que naa». Yanna, ¿pa gúʼyaluʼ nuu tuuxa ndaaniʼ congregación stiluʼ ni qué zacané lii guni progresarluʼ yaʼ? Gunna apóstol Pablo guyuu binni ni cadi naca espiritual ndaaniʼ ca congregación ni guyuu lu primé siglu. Ngue runi gúdxibe Timoteo guixeleʼ de ca binni riʼ (2 Tim. 2:​20-22). Ni jma risaca nga gaca xhamígunu Bixhózenu ni nuu guibáʼ ne riné tiempu para ganda gúninu ni. Nga runi, cadi naquiiñeʼ gudiʼnu lugar chuʼ xiixa ni guxheleʼ laanu de laabe. w22.08 5, 6 párr. 13-15

Maʼ gadxé laanu de ca binni ni nanalaʼdxiʼ ca conseju stiʼ Dios, purtiʼ laanu riuuláʼdxinu modo riníʼ ique Jehová ne nadxiinu ca ley stiʼ. Ne jma zannaxhiinu laabe ora guiníʼ íquenu xi ribeendunu pur ruzúʼbanu stiidxabe ne xi ribeendú ca ni qué runi ni. Guidúʼyanu xi guiráʼ guendanagana rapa ca binni ni runi guendahuati purtiʼ qué rinándacaʼ ca conseju stiʼ Jehová. Ne guidúʼyanu pabiáʼ galán nabáninu purtiʼ ruzúʼbanu stiidxaʼ Dios (Sal. 32:​8, 10). Racalaʼdxiʼ Jehová guicaa guiráʼ binni guendabiaaniʼ ni zeeda de laa, peru qué runi obligarbe binni guni ni. Peru riniʼbe xi zazaaca ca binni ni qué chinanda ca conseju stibe (Prov. 1:​29-32). Zápacaʼ guendanagana pur ni gúnicaʼ. Ra tidiʼ tiempu pur modo nabánicabe zápacabe stale guendanagana ne qué zabánicabe nayecheʼ, ne últimu la? zunitilú Jehová laacabe. Peru ca binni ni gucaadiaga ca conseju stiʼ Jehová ne chinándacaʼ ni, zaca cumplir promesa riʼ luguiacaʼ: «Ni gucaadiaga naa zabani galán, qué zadxibi purtiʼ caníʼ ique guizaaca xiixa desgracia» (Prov. 1:33). w22.10 21 párr. 11-13

Guidxíbinu Jehová riníʼ ni guni respetarnu laa ne cadi gúninu xiixa cosa ni qué riuulaʼdxiʼ (Prov. 16:6). Nga runi, rúninu stipa chinándanu ca ley ni zeeda lu Biblia ni caníʼ xii nga ni jneza ne ni cadi jneza (2 Cor. 7:1). Pa gúninu ni riuulaʼdxiʼ Jehová ne cadi gúninu ca cosa ni nanaláʼdxibe, zabáninu nayecheʼ (Sal. 37:27; 97:10; Rom. 12:9). Zándaca nuu tuuxa nanna napa Jehová autoridad para quixheʼ xii nga ni jneza ne ni cadi jneza, peru cadi nga si nga laa ni, laaca naquiiñeʼ chinándabe ca ley stiʼ Dios. Pur conducta stinu zusihuínninu pa dxandíʼ runi crenu zabáninu jma galán pa chinándanu ca ley stiʼ Jehová (Prov. 12:28). Biʼniʼ cré David zacá ni, purtiʼ gúdxibe Jehová: «Ruluiʼluʼ naa neza stiʼ guendanabani. Nuu stale guendanayecheʼ neza luluʼ; ladu derechu stiluʼ qué rirá guendanayecheʼ» (Sal. 16:11). w22.10 8 párr. 9, 10

Siempre guca Jesús ti hombre humilde. Ante gueedabe lu Guidxilayú gucanebe Jehová gaca stale cosa sicarú. Colosenses 1:16 ná: «Pur mediu de laabe guyáʼ xcaadxi cosa ni nuu guibáʼ ne ni nuu lu guidxilayú». Zándaca dxi guyuunisa Jesús bietenalaʼdxiʼ guiráʼ cosa ni biʼniné Bixhoze guibáʼ (Mat. 3:16; Juan 17:5). Peru ora bietenaláʼdxibe ca cosa riʼ, qué ñácabe orgulloso. Ne qué niníʼ íquebe jma risácabe que xcaadxi. Gúdxibe ca discípulo stibe cadi beedabe lu Guidxilayú riʼ para gacanecaʼ laabe, sínuque para gacanebe ne para gudiibe xquendanabánibe para guilá stale binni (Mat. 20:28). Laaca guniʼbe qué zanda gúnibe ti cosa de laasibe. ¡Dxandíʼ peʼ guca Jesús humilde! ¿Cadi dxandíʼ racaláʼdxinu chinándanu ejemplu stibe la? w22.05 24 párr. 13

Ni ruuyadxí Jehová para guni perdonar nga pa bidii binni ca cuenta cosa malu ni cayuni. Nga peʼ nga ni guníʼ Jesús lu Lucas 12:​47, 48. Ora runi binni xiixa cosa ni cadi jneza neca nanna maʼ guníʼ Dios malu ni, cayuni cometer ti pecadu grave. Ne pa qué gusaanabe de gúnibe ni, zándaca qué zuni perdonar Jehová laabe (Mar. 3:29; Juan 9:41). Peru pa guininu bíninu ti cosa ni cadi jneza, ¿ñee zuni perdonar Jehová laanu la? Zúnibe ni. Sti cosa ni ruuyadxí Jehová nga pa dxandíʼ cayaca arrepentir binni ni bichee ca. Gaca arrepentir tuuxa nga guchaa ni runi ne ni cá ique guni. Ne laaca riuu triste pur ca cosa feu ni biʼniʼ o pur qué ñuni ni jneza. Cadi nuusibe triste pur ni bíʼnibe, sínuque nuube triste purtiʼ bixélebe de Jehová ngue runi bíʼnibe cosa malu que. w22.06 5, 6 párr. 15-17

Riquiiñeʼ ca enemigu stinu ca mediu de comunicación ne ca red social, para guiniʼcaʼ cosa ni cadi dxandíʼ ne ni cadi biaʼsi de ca hermanu ni zániru ndaaniʼ organización stiʼ Jehová (Sal. 31:13). Nuu hermanu huanaazeʼ ca autoridad ca laacaʼ ne riniʼcaʼ nácacabe binni malu. Zacagá nga ni bizaaca lu primé siglu. Gunaazecabe apóstol Pablo ne bigaanicabe donda ique neca qué ñuni cosa malu. Dxi bieguyoo apóstol Pablo ndaaniʼ guidxi Roma bisaana caadxi xpinni Cristu laabe (2 Tim. 1:​8, 15; 2:​8, 9). Zándaca guyuu Pablo triste purtiʼ biʼniʼ huantar ne guluu xquendanabani ra naxoo pur laacabe (Hech. 20:​18-21; 2 Cor. 1:8). Qué chuʼ dxi gácanu casi ca xpinni Cristu ni bisaana Pablo que. Nga runi cadi naquiiñeʼ guidxagayaanu, ca hermanu ni zániru ndaaniʼ organización stiʼ Jehová nga ca ni rucaalú Binidxabaʼ primé. Racaláʼdxibe gucaabe laacaʼ gucheenecaʼ Jehová ne guidxíbinu (1 Ped. 5:8). Cadi guixélenu de ca hermanu ni zániru ndaaniʼ organización (2 Tim. 1:​16-18). w22.11 16, 17 párr. 8-11

Zándaca judíu gubaanaʼ ni guca arrepentir que. Ti Dios si runi adorar ca judíu, peru ca binni de xcaadxi guidxi la? biʼniʼ crecaʼ nuu stale dios (Éx. 20:​2, 3; 1 Cor. 8:​5, 6). Pa ñaca cadi judíu gubaanaʼ que la? zándaca ndiʼ nga ni ninabadiidxabe: «¿Ñee qué ridxíbiluʼ ca dios ca la?». Ne laaca «ra nuu si ca dendxuʼ ni cananiti stiʼ guidxi Israel» biseendaʼ Dios Jesús, nga runi huaxiéʼ biʼniʼ predicarbe ca binni de xcaadxi guidxi (Mat. 15:24). Ne maca gudxi Dios ca israelita zusibani ca binni ni maʼ guti. Zándaca gunna gubaanaʼ ni guca arrepentir que ca cosa riʼ, ne pur ca diidxaʼ ni guniʼbe nánnabe zusibani Jehová Jesús para guni mandar lu Reinu stiʼ Dios. Ndiʼ rusihuinni, biʼniʼ cré hombre que zanda gusibani Dios laa. Pa judíu gubaanaʼ ni guca arrepentir que, nánnabe de Adán ne Eva. Nga runi zándaca guníʼ íquebe lu Guidxilayú riʼ nga chichuu Paraísu ni bizeeteʼ Jesús (Gén. 2:15). w22.12 8, 9 párr. 2, 3

Laanu qué ñanda ñuni predicarnu pa ñaca qué ñacané espíritu santu laanu. ¿Xiñee coʼ yaʼ? Purtiʼ cucaalú Binidxabaʼ laanu para cadi guni predicarnu (Apoc. 12:17). Stale binni riníʼ ique nadipaʼ Binidxabaʼ ne qué zanda guni ganarnu laa. Peru runi ganarnu laabe ora runi predicarnu (Apoc. 12:​9-11). Ora runi predicarnu rusihuínninu qué ridxíbinu guiráʼ ni riquiiñeʼ Binidxabaʼ para gucueeza laanu. Cada biaje guni predicarnu cayuni ganarnu laabe. Nga runi zanda guiníʼnu espíritu santu nga cudii stipa laanu ne riuulaʼdxiʼ Jehová ni cayúninu (Mat. 5:​10-12; 1 Ped. 4:14). Zanda gacané espíritu santu laanu gudxíʼlunu intiica guendanagana guidxaagalunu ora maʼ cayuni predicarnu (2 Cor. 4:​7-9). Yanna, ¿xi caquiiñeʼ gúninu para cadi gusaana de guicaanu espíritu stiʼ Dios yaʼ? Gatigá guinábanu ni laabe lu oración, ne gánnanu zucaadiaga Jehová laanu. w22.11 5 párr. 10, 11

Sti modo zanda gusihuínninu nadxiinu ca hermanu stinu nga ra gúninu stipa pur chuʼnu galán né laacabe. Rúninu stipa guni perdonarnu casi runi Jehová ni. Guiníʼ íquenu ndiʼ: pa bidii Jehová lugar gatiʼ Xiiñiʼ pur ca pecadu stinu, ¿ñee cadi naquiiñeʼ gucaa nga laanu guni perdonarnu ca hermanu stinu ora gúnicaʼ laanu xiixa la? Qué racaláʼdxinu gácanu casi esclavu malu ni bizeeteʼ Jesús lu ti parábola. Biʼniʼ perdonar xpixuaanabe laabe deuda ni nuzaabibe laa, peru laabe qué ninabe ñuni perdonarbe sti esclavu ni jma huaxiéʼ nuzaabiʼ laabe (Mat. 18:​23-35). Nga runi, pa napaneluʼ ti hermanu xiixa guendanagana, ¿xiñee qué gúniluʼ stipa guiníʼneluʼ laabe para guni chaahuitu ni ante de Conmemoración yaʼ? (Mat. 5:​23, 24). Pa gúniluʼ ni zusihuínniluʼ guizáʼ nadxiiluʼ Jehová ne Jesús. w23.01 29 párr. 8, 9

Ti modo zanda ganna ca ancianu xi caquiiñeʼ ca hermanu nga ra guinabadiidxacabe laacaʼ, peru sin gusituícabe lucaʼ (Prov. 20:5). ¿Ñee napa ca hermanu ni gocaʼ, medicina ne xcaadxi cosa ni caquiiñecaʼ la? ¿Ñee zándaca guníticabe dxiiñaʼ stícabe o lídxicabe la? ¿Ñee caquiiñeʼ gacanenu laacabe para guicaacabe xiixa ayuda ni rudii Gobiernu la? Rinabaʼ Jehová guiranu cuʼnu gana ne gacanenu xcaadxi (Gál. 6:10). Dede ca cosa ni jma nahuiiniʼ ni gúninu para gacanenu tuuxa ni huará zanda cuʼ ni gana laa. Ca xcuidihuiiniʼ zanda gúnicaʼ ti dibujuhuiiniʼ para cuʼcaʼ gana ti hermanu. Ca joven zanda gacanecaʼ para chisicaʼ ca cosa stiʼ ti hermana. Ne xcaadxi hermanu la? zanda gúnicaʼ ti guendaró para ti binni ni huará. Nuu hermanu rucaacaʼ caadxi diidxaʼ para gudiicaʼ xquixe peʼ ca ancianu, purtiʼ ora nuu ti epidemia rápacabe stale dxiiñaʼ. Nga runi galán nga guni guiranu stipa chinándanu conseju riʼ: «Lauguusaa gana laatu ne lagacanesaa» (1 Tes. 5:11). w22.12 22 párr. 2; 23 párr. 5, 6

Neca binibiáʼ chaahuiʼ ca saduceu ca primé gaayuʼ libru stiʼ Escrituras Hebreas, peru qué ninándacabe ca ni, neca Dios ndaʼ nga guníʼ xi guicá lu ca libru ca. Guiníʼ íquenu xi gudxi Jesús ca saduceu dxi gucaláʼdxicaʼ nutiidicaʼ laabe prueba ora gunabadiidxacaʼ laabe pa zabani ca ni maʼ guti. Ndiʼ nga ni gunabadiidxaʼ Jesús laacabe: «¿Qué ñuundatu lu libru stiʼ Moisés, lu relatu stiʼ xa yagahuiiniʼ que, ra guníʼ Dios: “Naa nga Dios stiʼ Abrahán, ne Dios stiʼ Isaac ne Dios stiʼ Jacob” la?» (Mar. 12:​18, 26). Nánnanu zándaca stale biaje maʼ biindacabe relatu ca, peru ni gunabadiidxaʼ Jesús laacabe bisihuinni ni qué runi crécabe ti cosa ni rusiidiʼ Biblia ne laani nga ziasa ca binni ni maʼ guti (Mar. 12:27; Luc. 20:38). ¿Xi rizíʼdinu de ora guniʼné Jesús ca saduceu? Rizíʼdinu ora guidúʼndanu Biblia naquiiñeʼ guidúʼyanu xi zanda gusiidiʼ ti versículo o ti relatu laanu. Qué racaláʼdxinu guizíʼdisinu cosa ni cadi nagana, sínuque laaca naquiiñeʼ guyúbinu guizíʼdinu xcaadxi cosa ni rusiidiʼ Biblia ne guidxélanu principiu ni zacané laanu purtiʼ zeeda gácacani casi tesoro ni gaʼchiʼ. w23.02 11 párr. 9, 10

Guiráʼ ca testigu ni riete lu textu ca, neca gudíʼdicabe lu prueba nabé nadipaʼ, qué nucheenécabe Jehová biaʼ dxi bibánicabe (Heb. 11:​36-40). ¿Ñee bisaca stipa bíʼnicabe ne biaʼ biʼniʼ huantárcabe la? Bisaca ni pue. Dxandíʼ nga qué ñuuyacabe ñaca cumplir guiráʼ promesa stiʼ Dios peru qué nusaanaʼ de ñápacabe confianza zuni Dios ni maʼ guníʼ. Ne cumu guyuucabe seguru riuulaʼdxiʼ Jehová ni rúnicabe la? Gunna dxíchicabe zuuyacabe ora gaca cumplir ca promesa stiʼ (Heb. 11:​4, 5). Ora guiníʼ íquenu de ejemplu stícabe, rudiini stipa laanu para cadi gusaana de gápanu confianza Jehová. Zeʼ dxi, jmaruʼ si zinitilú guidxilayú (2 Tim. 3:13). Ne cutiidiruʼ Binidxabaʼ ca xpinni Dios lu prueba. Nga runi, intiica si guidxaagalunu despué, cadi gusaanaʼ de gúninu ni ná Jehová de guidubi ladxidoʼno «purtiʼ maʼ gudíxhenu esperanza stinu lu náʼ Dios ni nabani» (1 Tim. 4:10). w22.06 25 párr. 17, 18

Racaláʼdxinu chuʼnu nazaaca purtiʼ riuuláʼdxinu gúninu xhiiñaʼ Jehová biaʼ gándatiʼ (Mar. 12:30). Cumu racaláʼdxinu gudiʼnu cuerpu stinu «casi ti sacrificiu nabani, santo ne ni chuulaʼdxiʼ Dios», nga runi qué rúninu xiixa cosa ni guniná cuerpu stinu (Rom. 12:1). Dxandíʼ, neca peʼ gápanu laanu stale, ziuu ora zaca huaranu. Peru rúninu stipa para chuʼnu nazaaca purtiʼ racaláʼdxinu guluinu Bixhózenu ni nuu guibáʼ rusisácanu guendanabani ni bisigaʼdeʼ laanu. Pa maʼ huaniisinu o nápanu xiixa guendahuará, zándaca maʼ qué ganda gúninu ca cosa ni bíninu dxiqué, ne pur nga guireʼnu gana ne chuʼnu triste. Peru neca zacá, naquiiñeʼ gúninu stipa gápanu laanu para chuʼnu nazaaca. ¿Xiñee yaʼ? Purtiʼ neca maʼ huaniisinu o huaranu, zándaruʼ gusisácanu Jehová cásica biʼniʼ rey David. ¡Ratadxí ladxidoʼno gánnanu nadxii Dios laanu ne rusisaca laanu neca nácanu binni ruchee! (Mat. 10:​29-31). Ne tantu nadxiibe laanu, dede maʼ biʼniʼ prometerbe zusibánibe laanu pa gueeda gátinu (Job 14:​14, 15). Laga nabáninu, nabé risaca gápanu laanu ne chuʼnu nazaaca. w23.02 20, 21 párr. 3-5

¿Ñee maʼ cá lá stale binni, o gran muchedumbre, lu libru de guendanabani ca la? Maʼ. Ne qué zaxiá diʼ lácabe despué de Armagedón (Apoc. 7:14). Jesús guníʼ naca ca binni riʼ casi dendxuʼ ne zápacaʼ «guendanabani ni qué zaluxe» (Mat. 25:46). Peru ca ni guilá lu Armagedón cadi maca zicaacaʼ guendanabani ni qué zaluxe. Ora maʼ guni mandar Jesús ti mil iza, laa peʼ ziné laacabe «ra cadá nisa de guendanabani». Ca ni chinanda instrucción stiʼ Cristu ne qué gucheenecaʼ Jehová, maʼ qué zaxiá lacaʼ lu libru de guendanabani ca (Apoc. 7:​16, 17). Peru ca chiva, ni chiguinitilú lu Armagedón. Jesús guníʼ zanitilucaʼ «ne maʼ qué ziuuruʼ dxi guibánicaʼ» (Mat. 25:46). Ne gucané espíritu santu apóstol Pablo para guníʼ «condena ni guicaacabe nga guinitilúcabe para siempre» (2 Tes. 1:9; 2 Ped. 2:9). w22.09 16 párr. 7, 8

Racané ca cosa ni bizáʼ Jehová chuʼ ca familia ca nayecheʼ ne chuʼcaʼ tobi si. Maʼ bizáʼ Jehová stale lugar sicarú ni nabé riuuláʼdxinu. Stale familia riuuláʼdxicaʼ checaʼ ra ranchu, quíbacaʼ dani o checaʼ ruaa nisadóʼ. Ndaaniʼ guidxilayú cubi, de guiranu ziuuláʼdxinu guidúʼyanu guiráʼ ni maʼ bizáʼ Jehová. Maʼ qué zadxíbinu ca maniʼ ca ne laaca maʼ qué zadxíbicame laanu (Is. 11:​6-9). Zápanu stale tiempu para guidúʼyanu guiráʼ ni maʼ bizáʼ Jehová (Sal. 22:26). Nga runi laatu, ca ni napa xiiñiʼ, cadi cuézatu dede ora maʼ nuunu ndaaniʼ guidxilayú cubi para guluiʼtu ca xiiñitu guiráʼ ni maʼ bizáʼ Jehová ne gusiiditu laacabe de laacani. Lugar de nga la? laiquiiñeʼ guiráʼ ni maʼ bizáʼ Jehová para gusiiditu ca xiiñitu de laabe. Pa gúnitu ni la? zuni sentir ca xiiñitu cásica biʼniʼ sentir rey David ora guníʼ: «Gastiʼ stobi casi lii, Jehová, ne guirutiʼ qué huayuni cosa casi ca ni maʼ bizaʼluʼ» (Sal. 86:8). w23.03 25 párr. 16, 17