Diciembre

¿Ñee maʼ nuu hombre ni napa autoridad lu gobiernu stiʼ Etiopía que listu para chúʼnisa la? Guníʼ ique ndiʼ: Guyé hombre de Etiopía que Jerusalén para guni adorar Dios (Hech. 8:27). Nga runi, zándaca nácabe ti prosélito judíu o tuuxa ni beeda gaca de religión stiʼ ca judíu. Biziidibe de Jehová lu ca Escrituras Hebreas. Peru racaláʼdxirube gánnabe jma. Purtiʼ ora guniʼné Felipe laabe la? biiyaʼ cayuundabe ni bicaa profeta Isaías (Hech. 8:28). Biyúbirube guiziidibe jma. Bireebe de Etiopía ne guyebe Jerusalén para guni adorarbe Jehová. Bisiene Felipe etíope que caadxi cosa nabé risaca ni zeeda lu Stiidxaʼ Dios, casi Jesús nga Mesías que (Hech. 8:​34, 35). Cumu biroobaʼ guendarannaxhii ni nápabe Jehová ne Jesús la? gucuaabe ti decisión nabé risaca, chuʼnísabe ne gácabe ti xpinni Cristu. Guluunisa Felipe etíope que, purtiʼ biiyaʼ maʼ nuube listu para chuʼnísabe. w23.03 8, 9 párr. 3-6

Pa qué guininu ni dxandíʼ la? qué ziechené Jehová laanu, purtiʼ laa nanalaʼdxiʼ guendarusiguii (Prov. 6:​16, 17). Para binni cadi malu nga gusiguii, peru laanu racaláʼdxinu guiníʼ íquenu casi riníʼ ique Jehová (Sal. 15:​1, 2). Dxandíʼ, qué ziuu ora guininu ti cosa ni cadi dxandíʼ, peru laaca qué zucáʼchinu xiixa para si guiníʼ ique tuuxa jneza ni cayúninu o jneza modo cayaca xiixa. Sti cosa ni cadi naquiiñeʼ guininu nga chisme (Prov. 25:23; 2 Tes. 3:11). Pa ra cayuíʼneluʼ binni diidxaʼ gudiiluʼ cuenta maʼ chiguiete chisme, bichaa de diidxaʼ ne guníʼ xiixa ni uguu gana stobi. Nabáninu ndaaniʼ ti guidxilayú ra nabé maʼ feu ca diidxaʼ ni riníʼ binni. Nga runi caquiiñeʼ gúninu stipa guininu diidxaʼ ni riuulaʼdxiʼ Jehová. Zaguu Jehová ndaayaʼ laanu pa gúninu stipa gusisácanu laa né ca diidxaʼ ni rininu ora maʼ ziuunu predicación, ora maʼ cayaca reunión ne ora maʼ caninenu sti binni. Ora maʼ binitilú Jehová guidxilayú malu riʼ, maʼ qué zaca nagana para laanu gusisácanu Jehová né ca diidxaʼ ni rininu (Jud. 15). w22.04 9 párr. 18-20

Ora riníʼ íquenu pabiáʼ nadxii Jehová ne Jesús laanu, laaca rucaa ni laanu gannaxhiinu laacabe (1 Juan 4:​10, 19). Ne jma rannaxhiinu laacabe ora gánnanu xiñee guti Jesús pur cada tobi de laanu. Guizáʼ bidii apóstol Pablo xquixe peʼ pur regalu riʼ. Nga runi ndiʼ nga ni bicaabe ra nuu ca xpinni Cristu de Galacia: «Xiiñiʼ Dios, ni nadxii naa ne ni bidii xpida pur naa» (Gál. 2:20). Pur sacrificiu stiʼ Jesús, bichiña Jehová lii ra nuu para gácaluʼ xhamigu (Juan 6:44). ¿Cadi dxandíʼ riécheluʼ gánnaluʼ biiyaʼ Jehová xiixa cosa galán luguialuʼ ne guizáʼ naroʼbaʼ ni gudíxebe para gaca xhamíguluʼ laabe la? ¿Cadi rucaa nga lii gannaxhiiluʼ Jehová ne Jesús la? Nga runi guiranu naquiiñeʼ guinabadiidxanu: «¿Xi rucaa guendarannaxhii ca naa guneʼ?». Guendarannaxhii ni nápanu Dios ne Cristu rucaani laanu gannaxhiinu binni (2 Cor. 5:​14, 15; 6:​1, 2). w23.01 28 párr. 6, 7

Riquiiñeʼ Jehová Biblia para guni ni naguixhe ique ne laani nga guni ca xpínnibe «xhiiñabe tobi si». Biiyabe guicá ndaaniʼ stale lugar stiʼ Biblia ni zanda guiene si ca binni humilde (Lucas 10:21). Naca Biblia ti libru ni ruundaʼ binni de guiráʼ guidxi. Peru ca binni humilde si zanda guiene ni ne guni ni ná ni (2 Cor. 3:​15, 16). Guidúʼyanu sti modo rihuinni guendanuuxpiaaniʼ stiʼ Jehová lu Biblia. Riquiiñebe Stiidxabe para gusiidibe guiranu casi xquídxibe ne para gusiidibe ne quixhedxibe ladxidóʼ cada tobi de laanu. Ra guidúʼndanu Stiidxabe, ridúʼyanu rizaaláʼdxibe cada tobi de laanu (Is. 30:21). Stale biaje ridúʼndanu xiixa textu stiʼ Biblia ni peʼ caquiiñenu ne ni racané laanu. Peru pa gucuá Biblia para gacané millón de binni, ¿ximodo nga napa ni información ni peʼ caquiiñeʼ cada binni yaʼ? Purtiʼ binni ni guníʼ xi guicá lu Biblia nga ni jma nuu xpiaaniʼ lu guidubi naca universu (2 Tim. 3:​16, 17). w23.02 4-5 párr. 8-10

Laanu ca ni dxandíʼ xpinni Cristu guizáʼ nadxiinu Jehová ne racaláʼdxinu gudiʼnu laabe ti serviciu de ni jma galán. Peru para ganda gúninu ni la? caquiiñeʼ quixhe íquenu ugaandanu xiixa meta, casi gápanu xiixa cualidad ni naquiiñeʼ gapa ca xpinni Cristu, gápanu ti habilidad ne guyúbinu modo gacanenu xcaadxi. ¿Xiñee naquiiñeʼ quíxhenu xiixa meta ne gúninu stipa ugaandanu ni yaʼ? Primé la? purtiʼ racaláʼdxinu gusiéchenu ladxidóʼ Bixhózenu ni nuu guibáʼ. Riecheʼ Jehová ora riquiiñenu ca habilidad ni nápanu para gúninu ni ná. Peru laaca racaláʼdxinu guni progresarnu para ganda gacanenu ca hermanu jma (1 Tes. 4:​9, 10). Ndiʼ rusiidiʼ laanu, neca maʼ zinenu stale iza de cayúninu ni ná Jehová o coʼ, guiranu naquiiñeʼ guni progresarnu. w22.04 22 párr. 1, 2

Maʼ cadi candaa zucaalú guiráʼ gobiernu políticu Babilonia guidxi roʼ, laani nga guiráʼ religión falsu ni nuu lu Guidxilayú. Racá nga guzulú gran tribulación. ¿Ñee zucaa nga guiráʼ binni guni adorarcaʼ Jehová la? Coʼ. Lu capítulo xhoopaʼ stiʼ Apocalipsis riete zuyubi ca binni ni qué runi ni ná Jehová guilacaʼ ra nuu ca gobiernu políticu ne sistema comercial stiʼ Guidxilayú riʼ. Ruchaaga Biblia ca sistema riʼ casi dani. Cumu qué zuyubi ca binni ca Reinu stiʼ Dios la? zuuyaʼ Jehová laacabe casi enemigu stiʼ (Luc. 11:23; Apoc. 6:​15-17). Lu gran tribulación, guizáʼ zuyadxícabe ca xpinni Jehová. Purtiʼ laasicaʼ nga grupu ni guni ni ná Jehová lu Guidxilayú riʼ ne qué zanacaʼ gúnicaʼ ni ná «bestia salvaje» (Apoc. 13:​14-17). w22.05 16, 17 párr. 8, 9

Cadi runi predicar si ca xpinni Dios ca noticia galán stiʼ Reinu (Mat. 24:14). Laaca racanécabe ca ángel ni riete lu capítulo 8 hasta 10 stiʼ Apocalipsis. Caníʼ ca ángel riʼ guirá guendananá chigueeda luguiáʼ ca ni cucaanaʼ Reinu stiʼ Dios. Nga runi laanu, ca testigu stiʼ Jehová cudiʼnu ti mensaje nadipaʼ ni zeeda gaca casi «granizu ne guí». Mensaje riʼ caniʼni xi chiguni Dios guiráʼ sistema ni nuu lu guidxilayú stiʼ Binidxabaʼ (Apoc. 8:​7, 13). Caquiiñeʼ ganna binni mayaca guinitilú guidxilayú malu riʼ. Zacá zanda guchaacaʼ ne guilacaʼ dxi gueeda xiana stiʼ Jehová (Sof. 2:​2, 3). Peru, cumu stale binni qué riuulaʼdxiʼ gunadiaga mensaje riʼ la? nga runi naquiiñeʼ gácanu nadxibalú. Ne lu gran tribulación jma nadipaʼ mensaje ni zudiʼnu binni (Apoc. 16:21). w22.05 7 párr. 18, 19

Guiníʼ íquenu ti guendaxheelaʼ ni mayaca gápacaʼ xiiñicaʼ. Neca maʼ huayunadiágacabe stale discursu ni caníʼ ximodo naquiiñeʼ gusiniisi binni xiiñiʼ la? óraruʼ maʼ nápacabe xiiñicabe nga zinándacabe ca conseju ca. ¡Ti dxiiñaʼ naroʼbaʼ nga rapa ca guendaxheelaʼ ca ora maʼ nápacaʼ xiiñicaʼ! Racá ridúʼyanu ora guchaa xquendanabáninu maʼ gadxé modo ridúʼyanu ca principiu ni zeeda lu Biblia ni runibiáʼ chaahuinu. Nga runi laanu, ca xpinni Jehová, ridúʼndanu Biblia «guirá dxi», cásica biʼniʼ ca rey stiʼ Israel ne runi meditarnu ni nani (Deut. 17:19). Padre caʼ, ti privilegiu naroʼbaʼ nga nápatu: gusiiditu ca xiiñitu gunibiaʼcaʼ Jehová. Peru cadi naquiiñeʼ si gusiiditu laacabe de Dios, sínuque laaca naquiiñeʼ gacanetu laacabe gannaxhiicabe Jehová de guidubi ladxidóʼcabe. w22.05 26 párr. 2, 3

Cadi caquiiñeʼ si chuʼ tuuxa triste pur ni biʼniʼ, sínuque naquiiñeʼ guni xiixa. Nabé risaca para Jehová gaca tobi ti binni nacubi, ndiʼ riníʼ gusaana de guni cosa malu ne guibani modo ná Jehová (Is. 55:7). Binni ni gaca nacubi ca naquiiñeʼ guchaa modo riníʼ ique ti ganda guni ni riuulaʼdxiʼ Jehová (Rom. 12:2; Efes. 4:23). Naquiiñeʼ quixhe íquebe gusaana de gúnibe ne guiníʼ íquebe cosa malu (Col. 3:​7-9). Peru cadi guiaandaʼ laanu ni racané para guni perdonar ne guxhiá Jehová ca pecadu stinu nga gápanu fe guendaguti stiʼ Jesús. Ora ruuyaʼ Jehová cayúninu stipa guchaʼnu modo nabáninu, runi perdonarbe laanu purtiʼ guti Xiiñibe pur laanu (1 Juan 1:7). w22.06 6 párr. 16, 17

Biaʼ tiempu huabani binni lu Guidxilayú riʼ, huayuninásaacaʼ laacaʼ (Ecl. 8:9). Nuu tu laa riquiiñeʼ autoridad ni napa para guniná binni, rúnicaʼ cosa malu ne ridíndecaʼ, ridindenecaʼ ne runi amenazarcaʼ ca compañeru de scuela o runinacaʼ familia sticaʼ. ¡Ngahuaʼ runi ridxibi binni sti binni! ¿Xi runi Binidxabaʼ ora guʼyaʼ cadxíbinu binni yaʼ? Ora ruuyaʼ Binidxabaʼ ridxíbinu binni, riquiiñebe ni para gucaabe laanu gusaana de guni predicarnu ne cadi gúninu xcaadxi cosa ni rinabaʼ Jehová laanu. Huacaa Binidxabaʼ caadxi gobiernu gucueezacaʼ dxiiñaʼ stinu ne sanándacaʼ laanu (Luc. 21:12). Ndaaniʼ guidxilayú ni naazeʼ Binidxabaʼ riʼ stale binni riníʼ cosa feu ne ni cadi dxandíʼ de ca testigu stiʼ Jehová. Nga runi, ca ni runi cré ni riníʼcabe riʼ runi búrlacaʼ ne dede runinacaʼ laanu (Mat. 10:36). Peru qué ridxagayaanu riquiiñeʼ Binidxabaʼ ca cosa riʼ para guchibi laanu, purtiʼ ngaca biquiiñebe lu primé siglu (Hech. 5:​27, 28, 40). w22.06 16 párr. 10, 11

¿Tuu nga ca binni zié lu neza stiʼ justicia yaʼ? Ca ni guiasa de lade gueʼtuʼ, ca ni guilá lu Armagedón ne ca xcuidihuiiniʼ ni gale ndaaniʼ guidxilayú cubi. Ra guiluxe ti mil iza ca, guiráʼ binni ni guibani ndaaniʼ Guidxilayú riʼ zácacaʼ perfectu. Cadi guiaandaʼ laanu, ora maʼ perfectu tuuxa qué riníʼ diʼ ni maʼ biʼniʼ ganar guendanabani ni qué zaluxe. Guietenaláʼdxinu ni bizaaca Adán ne Eva. Neca perfectu laacaʼ, peru naquiiñeʼ nuzuubacaʼ stiidxaʼ Jehová para nicaacaʼ guendanabani ni qué zaluxe. Peru qué ñúnicabe ni (Rom. 5:12). Ra guiluxe ti mil iza ca, guiráʼ ca binni guibani ndaaniʼ Guidxilayú riʼ zácacaʼ perfectu. Peru ¿ñee zuni apoyar ca binni perfectu riʼ gobiernu stiʼ Jehová la? ¿O ziuu tu zaca casi Adán ne Eva, neca perfectu laacaʼ, peru qué nuzuubacaʼ diidxaʼ? Naquiiñeʼ gánnanu xi zazaaca. w22.09 22, 23 párr. 12-14

¿Ñee raca nagana para lii guibániluʼ nayecheʼ pur guiráʼ ni cazaaca lu Guidxilayú riʼ la? Ndaaniʼ stale familia maʼ gastiʼ guendarannaxhii, zeʼ dxi jma malu binni, puru si para laacaʼ ruyúbicaʼ ne stale binni maʼ qué gapa confianza ca autoridad. Peru ca cosa ni bizéʼtenu riʼ racané ca ni laanu gánnanu zazaaca cosa galán despué. ¿Xiñee yaʼ? Purtiʼ maʼ naca binni modo peʼ riete ni lu 2 Timoteo 3:​1-5, ra zeeda ti profecía ni caníʼ de «ca últimu dxi». Nin ti binni ni nachaʼhuiʼ qué zanda guiníʼ cadi dxandíʼ cayaca cumplir ni ná profecía ca. Ra cayaca cumplir ni cusihuinni ni maʼ naca Jesucristu Rey lu Reinu stiʼ Dios. Peru nuu xcaadxi profecía ni caníʼ de Reinu riʼ. Guiráʼ profecía naca ca ni casi ca pieza stiʼ ti rompecabeza ne racané ca ni laanu guiénenu xi tiempu nabáninu lu ca cosa ni naguixhe ique Jehová guni. w22.07 2 párr. 1, 2

Lu pandemia stiʼ COVID-19, laaca bidiicabe laanu instrucción modo gápanu ca reunión stinu ne modo guni predicarnu. Nagueendaca gúdxicabe laanu modo gápanu ca reunión ne ca asamblea stinu lu videollamada, ne guni predicarnu pur carta ne pur teléfono. Caguu Jehová ndaayaʼ stipa stinu. Ne cayuuyaʼ stale sucursal cayuu stale publicador ndaaniʼ xquidxi Dios. Tiempu ca, stale hermanu gúpacaʼ stale experiencia galán lu predicación. Zándaca nuu caadxi hermanu guiníʼ ique nabé exageradu ca instrucción ni gucuaanu lu pandemia riʼ. Peru maʼ bihuinni biaʼsi ca instrucción ni bidii xquidxi Dios laanu. Pa guiníʼ íquenu cayapa Jesús laanu né guendarannaxhii, zanda chuʼnu seguru intiica si guidxaagalunu lu ca dxi ni zeeda ca qué zaxeleʼ Jehová ne Xiiñiʼ de laanu (Heb. 13:​5, 6). w22.07 13 párr. 15, 16

Aparte de gusisácanu Jehová lu ca oración stinu, laaca naquiiñeʼ gudiʼnu xquixe peʼ laabe pur ca cosa sicarú ni rudiibe laanu, casi ca color sicarú stiʼ ca guiéʼ ni ridúʼyanu, ca guendaró nanixhe ni nápanu ne pur ca xhamígunu. Guiráʼ ndiʼ rudii Jehová laanu purtiʼ racalaʼdxiʼ guibáninu nayecheʼ (Sal. 104:​12-15, 24). Ne jmaruʼ si rudiʼnu xquixe peʼ laabe pur guiráʼ guendaró espiritual ni ricaanu ne pur ni maʼ biʼniʼ prometerbe gudiibe laanu. Guizáʼ nagueenda rusiáʼndanu gudiʼnu xquixe Jehová pur guiráʼ ni runi pur laanu. ¿Xi zanda gúninu para cadi guizaacanu nga yaʼ? Zanda gúninu ti lista de guiráʼ cosa ni maʼ gunábanu laabe ne gatigá guidúʼyanu ximodo maʼ bicabi Jehová laanu. Despué, zanda guni orarnu para gudiʼnu xquixe laabe pur gucanebe laanu (Col. 3:15). w22.07 22 párr. 8, 9

Cadi naquiiñeʼ si guni estudiarnu ni dxandíʼ zeeda lu Biblia. Naquiiñeʼ gúninu stipa pur gúninu guiráʼ ni cazíʼdinu lu xquendanabáninu. Zacatiʼ zabáninu nayecheʼ (Sant. 1:25). ¿Ne ximodo zanda gudiʼnu cuenta cayúninu ni cazíʼdinu lu xquendanabáninu yaʼ? Ti hermanu guníʼ zanda gúninu ti examen laca laanu para guidúʼyanu xi cayúninu jneza ne paraa naquiiñeʼ guni mejorarnu. Apóstol Pablo guníʼ: «Dede biaʼ ra biʼniʼ progresarnu, cadi gusaana de gúninu ni» (Filip. 3:16). Guiníʼ íquenu xi guiráʼ cosa galán ribeendunu ora rúninu stipa sanu lu neza «ni dxandíʼ». Cadi ribánisinu galán, sínuque laaca rusiéchenu ladxidóʼ Jehová ne ladxidóʼ ca hermanu stinu (Prov. 27:11; 3 Juan 4). ¡Gástiruʼ sti cosa jma galán que gusisácanu ca ni dxandíʼ rusiidiʼ Biblia ne guibáninu modo ná ca ni! w22.08 18, 19 párr. 16-18

Zanda gusihuinni ca ancianu nadxiicaʼ Jehová ne Jesús ra gápacaʼ né stale cariñu ca dendxuhuiiniʼ stiʼ Jesús (1 Ped. 5:​1, 2). Nga peʼ nga ni gudxi Xiiñiʼ Dios apóstol Pedro guni. Cumu chonna biaje guníʼ Pedro qué runibiáʼ Jesús la? nga runi guizáʼ racaláʼdxibe gusihuínnibe nadxiibe laa. Biasa si Jesús de lade gueʼtuʼ, gunabadiidxaʼ laabe: «Simón xiiñiʼ Juan, ¿nadxiiluʼ naa la?». Nanna dxíchinu ñuni Pedro intiica cosa para gusihuinni dxandíʼ nadxii laabe. Ne ndiʼ nga ni bicabi Jesús laabe: «Gupa ca dendxuhuiiniʼ stinneʼ» (Juan 21:​15-17). Ne dede dxi que, né stale cariñu gupa Pedro ca dendxuhuiiniʼ stiʼ Señor, ne zaqué bisihuínnibe nadxiibe laa. ¿Ximodo zanda gusihuinni ca ancianu zinándacaʼ ca diidxaʼ ni gudxi Jesús Pedro? Zusihuínnicabe nadxiicabe Jehová ne Jesús pa cueecabe tiempu para cúʼcabe gana ca hermanu ne gacanécabe ca ni nuu inactivu chuʼcaʼ jma gaxha de Jehová (Ezeq. 34:​11, 12). w23.01 29 párr. 10, 11

Ti trampa nga guiníʼ íquenu guirutiʼ tu riene ca debilidad ni nápanu. Purtiʼ zándaca guiníʼ íquenu qué zaca chaahuiʼ guendanagana nápanu ne qué zanda gudxíʼlunu debilidad stinu. Peru maʼ gadxé ni ná Biblia: «Zacané [Dios] laatu guni huantartu prueba ca». Nga runi neca nabé nadipaʼ gaca ti deseu, zanda gácanu fiel Jehová. Pa gacanebe laanu qué zúninu ni ná ca deseu stinu. Cadi guiaandaʼ laanu cumu nácanu binni ruchee, rápanu deseu ni cadi jneza. Ora guizaaca nga nagueendaca naquiiñeʼ gucáʼnanu ni, cásica biʼniʼ José dxi bicaanáʼ xheelaʼ Potifar (Gén. 39:12). Cadi caquiiñeʼ diʼ gácanu esclavu stiʼ ca deseu malu stinu. w23.01 12, 13 párr. 16, 17

Ti cualidad nabé risaca napa Jehová nga justicia (Deut. 32:4). Tuuxa ni rusihuinni cualidad riʼ, biaʼca risaca guiráʼ binni para laa ne zacá nga Jehová (Hech. 10:​34, 35). Ne bisihuínnibe ni purtiʼ dxi gucuá Biblia, gucuá ni lu idioma ni nabé riníʼ binni dxiqué. Biʼniʼ prometer Jehová tiempu gueeda fin «stale tu ziene chaahuiʼ» ne «stale tu zaziidiʼ ni dxandíʼ» rusiidiʼ Biblia (Daniel 12:4). Cumu huayaca traducir, huayaca imprimir ne riaaziʼ Biblia ne ca publicación ni riree de lu Stiidxaʼ Dios la? huayacané ndiʼ binni guiziidiʼ ne guiene chaahuiʼ Biblia. Ne xquidxi Jehová maʼ biʼniʼ traducir Biblia guidubi ni o ti ndaa ni lu jma de chupa gayuaa cuarenta idioma ne tutiica binni zanda guinabaʼ tobi sin quixe. Pur huayaca nga la? stale binni de guiráʼ guidxi caziidicaʼ de «ca noticia galán stiʼ Reinu» ante gueeda fin (Mat. 24:14). Naca Jehová ti Dios ni rusihuinni justicia ne racaláʼdxibe gunibiáʼ stale binni laabe ra gúʼndacaʼ Stiidxabe, Biblia. ¿Xi rucaa laabe gúnibe nga yaʼ? Guendarannaxhii ni nápabe laanu. w23.02 5 párr. 11, 12

¿Ñee nadxiiluʼ justicia stiʼ Dios la? Nánnadu zacá ni. Peru cumu binni ruchee laanu, caquiiñeʼ gápanu cuidadu pa coʼ la? zanda guicá modo riníʼ ique binni laanu ne maʼ qué gudiʼnu cuenta xii nga ni jneza ne ni cadi jneza (Is. 5:20). Dxi guyuu Jesús lu Guidxilayú, stale líder stiʼ ca religión guníʼ íquecaʼ nabé nacháʼhuicaʼ ne qué rucheecaʼ. Peru Jesús gudxi laacabe cadi jneza ni cayúnicabe purtiʼ nabé feu runi tratárcabe xcaadxi ne riguíxhecabe xii nga ni jneza ne ni cadi jneza (Ecl. 7:16; Luc. 16:15). Ca dxi stinu riʼ, laaca nuu binni casi laacabe purtiʼ riníʼ íquecaʼ cadi cayúnicaʼ cosa malu. Runi crecaʼ jma risácacaʼ que xcaadxi ne riniʼcaʼ mal de laacabe. Qué lica riuulaʼdxiʼ Jehová modo riníʼ ique ca binni riʼ, ne cadi nga diʼ nga justicia stiʼ Dios. Naca justicia ca ti cualidad nabé sicarú. Ne laa ni nga guni tobi ca cosa ni riuulaʼdxiʼ Dios. Lu Biblia ná «justicia» stiʼ Dios nga chinanda binni ca ley stiʼ Jehová lu xquendanabani. w22.08 27 párr. 3-5

Gupa Jesús confianza ca discípulo stiʼ neca bicheecaʼ (Juan 15:​15, 16). Dxi gunabaʼ Santiago ne Juan laabe gudiibe laacaʼ ti puestu risaca lu Reinu, qué niníʼ ique Jesús pur ngue nga cayúnicabe ni ná Jehová ne qué niníʼ diʼ maʼ qué zácacabe ca apóstol stiʼ (Mar. 10:​35-40). Ne gueelaʼ gunaazecabe laabe bisaana guiráʼ discípulo stibe laabe (Mat. 26:56). Peru qué nusaana Jesús de ñapa confianza laacabe. Neca biiyabe ra cucheecaʼ, «gunnaxhiibe laacaʼ dede dxi biluxe xquendanabánibe» (Juan 13:1). Ne biásasibe de lade gueʼtuʼ, bisaananebe ca 11 apóstol stibe dxiiñaʼ de gúnicaʼ discípulo ne gápacaʼ ca dendxuhuiiniʼ stibe (Mat. 28:​19, 20; Juan 21:​15-17). Ne qué nucheebe ra gúpabe confianza ca hombre riʼ neca binni ruchee laacaʼ. Guirácabe gúcacabe fiel dede dxi biluxe xquendanabánicabe lu Guidxilayú riʼ. Casi bidúʼyanu ca, Jesús gúpabe confianza binni ruchee. Racané ejemplu stibe laanu gúninu cásica bíʼnicabe. w22.09 6 párr. 12

Qué zuchibi Binidxabaʼ laanu pa nuunu seguru nadxii Jehová laanu ne cayacané laanu. Ti ejemplu nga ni bizaaca hombre ni bicaa Salmo 118, gúpabe stale guendanagana dede qué nusisiaasiʼ ca ni laabe. Gúpabe stale enemigu, ne ládecaʼ nuu binni risaca (versículo 9 ne 10). Guyuu biaje nuu tu gucalaʼdxiʼ nucaa laabe nucheebe, peru biʼniʼ huantarbe ni (versículo 13). Ne laaca nadipaʼ modo guluu jneza Jehová laabe (versículo 18). Neca gudíʼdibe lu guiráʼ ngue, bicaabe lu ti canción: «Qué zadxibediáʼ». Laabe gúnnabe, neca guluu jneza Bixhózebe ni nuu guibáʼ laabe, peru nadxiiruʼ laabe. Guyuu salmista que seguru, intiica si gueeda guizaaca, nadxii Dios laa ne nuu listu para gacané laabe (Sal. 118:29). Cada xpinni Cristu naquiiñeʼ ganna dxichi dxandíʼ peʼ nadxii Jehová laa. Pa nuunu seguru zacá ni la? zacané nga laanu gudxíʼlunu chonna cosa ni nabé ruchibi binni. Primé, guidxíbinu cadi málasi qué ganda gudiʼnu ni caquiiñeʼ familia stinu. Guiropa, guidxíbinu binni. Ne guionna, guidxíbinu gátinu. w22.06 15 párr. 3, 4

Ni jma guisaca para laanu nga guni adorarnu Jehová primé lu xquendanabáninu. Cumu Jehová nga bizáʼ laanu la? laasibe nga naquiiñeʼ guni adorarnu (Apoc. 4:11; 14:​6, 7). Nga runi ni jma risaca para laanu nga guni adorarnu laabe modo racaláʼdxibe, «né espíritu ne ni dxandíʼ» (Juan 4:​23, 24). Ruyúbinu gacané espíritu santu stiʼ Dios laanu para guni adorarnu laabe modo rusiidiʼ Biblia. Ni jma guisaca para laanu nga gúninu xhiiñaʼ Dios neca nabézanu ti lugar ra rucueeza gobiernu dxiiñaʼ stinu. Tiempu riʼ, jma de ti gayuaa hermanu ne hermana nuucaʼ cárcel pur nácacaʼ testigu stiʼ Jehová. Neca zacá, riuucabe nayecheʼ purtiʼ rúnicabe biaʼ randa para guni orárcabe, guni estudiárcabe ne guiniʼnécabe xcaadxi de Dios ne de Reinu stiʼ. Neca guiníʼ binni mal de laanu o sanándacaʼ laanu, riuʼnu nayecheʼ purtiʼ nánnanu nuu Jehová gaxha de laanu ne zaguu ndaayaʼ laanu (Sant. 1:12; 1 Ped. 4:14). w22.10 9 párr. 13

Ca conseju stiʼ Jehová ni zeeda lu libru stiʼ Proverbios huayacané ca ni binni dxiqué ne laaca racané ca ni laanu tiempu riʼ pa chinándanu ca ni lu xquendanabáninu. Guidúʼyanu chupa de ca conseju ca. Primé, chuʼnu nayecheʼ né biaʼ nápanu. Proverbios 23:​4, 5 cudii conseju riʼ laanu: «Cadi guibániluʼ para si guyúbiluʼ cosa risaca. [ . . . ] Purtiʼ zaree xhiaa ca ni casi xhiaa bisiá ne maʼ zipapa ca ni guibáʼ». Neca zacá, ca binni ricu ne pobre ruyúbicaʼ gápacaʼ jma bueltu. Rúnicabe intiica cosa neca guiníʼ binni mal de laacabe, guníticabe ca xhamígucabe o dede gaca huarácabe (Prov. 28:20; 1 Tim. 6:​9, 10). Guiropa, guiníʼ íquenu ante guininu. Pa qué chuʼnu cuidadu zanda guninanu tuuxa pur ni guininu. Proverbios 12:18 ná: «Zeeda gaca ca diidxaʼ ni riníʼ ti binni sin guiníʼ ique casi ora ridaabi ti espada, peru ca diidxaʼ ni riníʼ ti binni nuu xpiaaniʼ la? rusianda ni ra nuu ti herida». Pa cadi sanu guininu chisme de xcaadxi, ziuʼnu galán né ca hermanu (Prov. 20:19). w22.10 21 párr. 14; 22 párr. 16, 17

Naquiiñeʼ guiene chaahuiʼ Ezequiel mensaje ni chigudii. Naquiiñeʼ guni crebe ne chindá mensaje que ndaaniʼ ladxidoʼbe ti zacá gucaa ni laabe guni predicarbe. Ne bizaaca xiixa ni cadi cabeza Ezequiel, purtiʼ biiyabe nanaxhi rollo que «casi miel» (Ezeq. 3:3). ¿Xiñee yaʼ? Purtiʼ para laabe ti privilegiu guizáʼ galán nga guni representarbe Jehová (Sal. 19:​8-11). Guizáʼ guyuube nayecheʼ gulí Jehová laabe para gácabe profeta stiʼ. Despué, gudxi Jehová Ezequiel: «Bicaadiaga ne guluu ndaaniʼ ladxidoʼloʼ guiráʼ ca diidxaʼ ni cayabeʼ lii» (Ezeq. 3:10). Gudxi Jehová laabe guietenaláʼdxibe ca diidxaʼ ni cá lu rollo que ne guiníʼ íquebe ca ni. Pa guni Ezequiel ni la? zaguidxi fe stiʼ ne zacané ni laa ganna ti mensaje nadipaʼ ngue chigudii binni (Ezeq. 3:11). Biene chaahuiʼ si Ezequiel mensaje stiʼ Dios ne guluu ni ndaaniʼ ladxidóʼ, maʼ guyuu listu para guni predicar dede ra guiluxe dxiiñaʼ gucuaa. w22.11 6 párr. 12-14

Ora chuʼ xiixa cambiu ndaaniʼ organización, zusihuínninu pa zuzúʼbanu diidxaʼ o pa coʼ. De guidubi ladxidoʼloʼ yenanda xiixa cambiu guni organización. Dxi nuu ca israelita que lu desiertu,cada biaje guiniibi campamentu que, caadxi cohatita rinecaʼ arca stiʼ pactu que nezalú guidxi (Núm. 3:​29, 31; 10:33; Jos. 3:​2-4). ¡Guizáʼ naroʼbaʼ privilegiu ca! Peru ora guyuu ca israelita que ndaaniʼ Tierra Prometida guyuu caadxi cambiu. Maʼ cadi naquiiñeʼ guniibicabe Arca que de lugar. Ngue runi, tiempu biʼniʼ mandar Salomón, guyuu caadxi cohatita ni biʼndaʼ, ni gupa entrada stiʼ templu ne xcaadxi la? gúpacaʼ ca almacén que (1 Crón. 6:​31-33; 26:​1, 24). Qué ruzeeteʼ diʼ Biblia pa guca quejar ca cohatita o gunábacaʼ guicaacaʼ xiixa privilegiu jma risaca purtiʼ dxiqué bíʼnicaʼ dxiiñaʼ especial para guidxi que. ¿Xi rusiidiʼ ndiʼ laanu yaʼ? Pa chuʼ xiixa cambiu ndaaniʼ organización stiʼ Jehová, yenanda ni de guidubi ladxidoʼloʼ neca guchaacabe asignación stiluʼ. Biʼniʼ intiica dxiiñaʼ gudiicabe lii de guidubi ladxidoʼloʼ. Cadi guiaandaʼ lii, cadi pur xiixa asignación napa tuuxa nga risaca ndaaniʼ organización. Para Jehová la? jma risaca nga guzuubaluʼ diidxaʼ que gápaluʼ intiica asignación. w22.11 23 párr. 10, 11

Biyubi Onesíforo apóstol Pablo ne ora bidxélabe laa gucanebe laa. ¡Guluube xquendanabánibe ra naxoo para gacanebe Pablo! ¿Xi rusiidiʼ ejemplu riʼ laanu yaʼ? Cadi gudiʼnu lugar pur cadxíbinu binni gucueezani laanu de gacanenu ca hermanu ni canazanándacabe laacaʼ. Gúninu stipa pur gacanenu laacabe ne guni defendernu laacabe (Prov. 17:17). Caquiiñeʼ ca hermanu riʼ gusihuínninu nadxiinu laacaʼ ne nuunu para gacanenu laacaʼ. Guníʼ ique ni runi ca hermanu ne ca hermana de Rusia ora ruseguyoocabe ca hermanu sticaʼ. Ora rinécabe ca hermanu riʼ nezalú juez, rié stale hermanu ra tribunal para gacanecaʼ laacabe. ¿Xi rusiidiʼ ndiʼ laanu yaʼ? Pa guiníʼcabe cosa ni cadi dxandíʼ, guinaazecabe o sanándacabe ca hermanu ni zániru ndaaniʼ organización, cadi guidxíbiluʼ. Biʼniʼ orar pur laacabe, gupa familia stícabe ne biyubi modo gacaneluʼ laacabe (Hech. 12:5; 2 Cor. 1:​10, 11). w22.11 17 párr. 11, 12

Ti dxiiñaʼ nabé risaca napa ca ancianu nga iquiiñecaʼ Biblia para cuʼcaʼ gana ca hermanu ni cadiʼdiʼ lu ti guendanagana (1 Ped. 5:2). Ora guizaaca ti desastre, naquiiñeʼ gúʼyacabe pa nazaaca nuu cada hermanu, pa nápacaʼ ni gocaʼ, ni gácucaʼ ne ti lugar ra guiaanacaʼ. Peru zándaca naquiiñeʼ cúʼcabe gana ca hermanu ni bizaaca ca cosa riʼ neca tidiʼ tiempu (Juan 21:15). Harold nga ti hermanu ni nuu lu ti Comité de Sucursal ne huaníʼnebe stale hermanu ni gudiʼdiʼ lu ti desastre. Sicaríʼ guniʼbe: «Ridiʼdiʼ tiempu para guibiguetaʼ chuʼ ca hermanu riʼ nayecheʼ sti biaje. Zándaca guzulú ca hermanu riʼ gúnicaʼ ca cosa ni bíʼnicaʼ ante, peru zándaca guietenaláʼdxicabe familia stícabe ni gutiʼ, xiixa cosa risaca ni biníticabe o guendanagana ra gudíʼdicabe. Ne nga zanda gucaa ni laacabe guiuubaʼ ladxidóʼcabe sti biaje. Peru qué riníʼ ndiʼ qué gápacabe fe, normal nga guni sentírcabe zacá». Nga runi, nabé risaca chinanda ca ancianu conseju riʼ: «Laguunané ca ni cayuunaʼ» (Rom. 12:15). w22.12 22 párr. 1; 24, 25 párr. 10, 11

Nachaʼhuiʼ Jehová ne rudii laanu espíritu santu stiʼ para gúninu ni jneza. Ora runi estudiarnu Stiidxaʼ Dios, rudiʼnu lugar gacané espíritu ca laanu. Laaca ricaanu espíritu riʼ ora riuunu reunión. Lu ca reunión ca ridúʼyanu ca hermanu stinu, ne cumu laaca cayúnicabe stipa para gúnicabe ni jneza la? riguu ni gana laanu (Heb. 10:​24, 25; 13:7). Ne ora runi orarnu Jehová de guidubi ladxidoʼno ne guinábanu laa gacané laanu gudxíʼlunu xiixa debilidad, rudiibe espíritu santu stibe laanu para gápanu stipa ne cadi gusaana de gudxíʼlunu. Zándaca neca gúninu ca cosa ni bizéʼtenu riʼ, qué zaree gá ca deseu malu ni nápanu, peru zudii ca ni stipa laanu para cadi gúninu ni ná ca deseu ca. Ora maʼ biaʼnu gúninu cosa ni ruchiña laanu gaxha de Jehová, nabé risaca cadi gusaana de gúninu ni para gápanu deseu de gúninu ni jneza. w23.01 11 párr. 13, 14

Cadi naca diʼ Biblia ti libru de medicina, ninca ti libru ni rabi laanu xi guidoʼno ne xi cadi guidoʼno, peru rusiidini laanu ximodo ruuyaʼ Jehová ca cosa riʼ. Rudiini laanu conseju riʼ: «Bixeleʼ de ca cosa ni zándaca guniná cuerpu stiluʼ» (Ecl. 11:10). Lade ca cosa ni zanda cuʼ xquendanabáninu ra naxoo ne ni ruzeeteʼ Biblia cadi jneza nga guidoʼ xhaatanu ne xhúdxinu (Prov. 23:20). Nga runi, ora guiníʼ íquenu pabiáʼ chiguidoʼno ne chiguideʼnu, ribeza Jehová gucueezanu laca laanu (1 Cor. 9:25). Naquiiñeʼ guiníʼ íquenu jneza ora guicaanu xiixa decisión purtiʼ zacá zusihuínninu cudiʼnu xquixe peʼ Dios pur guendanabani ni bisigaʼdeʼ laanu (Sal. 119:​99, 100; Prov. 2:11). Guzéʼtenu ti ejemplu, ora guiníʼ íquenu xi guidoʼno naquiiñeʼ gácanu binni nuu xpiaaniʼ, casi pa riuuláʼdxinu ti guendaró peru nánnanu runinani laanu, ni jma jneza nga cadi guidoʼno ni. Laaca nácanu binni nuu xpiaaniʼ ora rúninu stipa pur guiziiláʼdxinu biaʼ caquiiñeʼ, gúninu ejerciciu, gusianu cuerpu stinu ne gusianu ra lídxinu. w23.02 21 párr. 6, 7

¿Ximodo zanda guidxélanu ca tesoro ni gaʼchiʼ ni zeeda lu Biblia yaʼ? Guidúʼyanu xi ná 2 Timoteo 3:​16, 17. Racá ná «guiráʼ ni cá lu Stiidxaʼ Dios» nuu ni para gusiidini, para gábini laanu paraa cucheʼnu, guni corregirni guiráʼ cosa ne para gusiidini binni. Dede ca libru ni zeeda lu Biblia ni huaxiéʼ riete zanda gacané ca ni laanu lu guidapaʼ cosa ca. Guyúbinu gánnanu xi rusiidiʼ ni cadúʼndanu ca laanu de Jehová, ni maʼ gudixhe guni o ca principiu ni zacané laanu. Yanna, ¿ximodo zanda gabi Biblia laanu paraa cucheʼnu yaʼ? Ora maʼ cadúʼndanu ca versículo ca, naquiiñeʼ guidúʼyanu pa nuu cosa ni cadi jneza cayúninu ne guchaʼnu purtiʼ zacanécani laanu cadi guixélenu de Jehová. Guiníʼ íquenu ximodo zacané relatu ca laanu guni corregirni xiixa cosa ni cadi jneza, zándaca ni gúdxicabe laanu lu predicación. Ne, ¿xi naquiiñeʼ gúninu para gusiidiʼ Biblia laanu yaʼ? Guyúbinu gánnanu xi riníʼ ique Jehová. Pa qué guiaandaʼ ca cosa riʼ laanu, zacanécani laanu guidxélanu jma tesoro ne cueendunu ni galán ora guidúʼndanu Biblia. w23.02 11 párr. 11

Ti profecía ni zeeda lu libru stiʼ Daniel bizeeteʼ zuzulú Jesús guni mandar lu Reinu stiʼ Dios ra maʼ ziluxe gadxe tiempu. Guidúʼyanu ximodo zanda gánnanu padxí bizaaca ni. (Dan. 4:​10-17). Runi representar «gadxe tiempu» que 2,520 iza. Bizulú cagabaʼ ca dxi riʼ lu iza 607 ante ca dxi stiʼ Jesús, dxi gulee ca babilonio últimu rey ni gurí lu trono stiʼ Jehová ni guyuu Jerusalén. Biluxe tiempu riʼ lu iza 1914 ora biʼniʼ Jehová Jesús Rey lu Reinu stiʼ, purtiʼ Jesús si nga napa derechu gaca Rey (Ezeq. 21:​25-27). ¿Ximodo racané profecía riʼ laanu? Guiénenu profecía ni caníʼ de «gadxe tiempu» zacaneni laanu chuʼnu seguru runi cumplir Jehová ca ni maʼ guníʼ ora peʼ naguíxhebe gúnibe ni. Maca gudíxhebe padxí zuzulú Reinu stibe zuni mandar. Ne ora bedandá dxi ca la? bíʼnibe ni. Zaqueca nga zuni cumplir Jehová guiráʼ ca profecía ni maʼ guníʼ, zaca ca ni ora maʼ gudíxhebe gaca ca ni. Nga runi zedandá dxi stiʼ Jehová, «qué zandaa ni» (Hab. 2:3). w22.07 3 párr. 3-5