Qué rusiáʼndanu laacabe neca nuucabe zitu de laanu

APÓSTOL Pablu gudxi ca biʼchiʼ ni naca xpinni Cristu gúnicaʼ ni na ca diidxaʼ riʼ: «Ora tiica ganda acané nu binni la? guni nu ni, peru jma pe naquiiñe guni nu ni lade ca hermanu» (Gál. 6:10). Ca dxi stinu riʼ laaca cayúninu ni na ca diidxaʼ ca ne ruyúbinu modo gacanenu ca bíʼchinu ne ca bizánanu ni zinanda Cristu. Cani jma naquiiñeʼ gacanenu ne gusihuínninu nadxiinu laacaʼ nga ca xpinni Cristu ni maʼ huaniisi ni nabeza ndaaniʼ ca yoo ra rápacabe binnigola.

Nuu guidxi riuulaʼdxiʼ ca familia ca gápacaʼ bixhózecaʼ ne jñaacaʼ ni maʼ nagola ralídxicaʼ. Peru ndaaniʼ xcaadxi guidxi la? ca binni huaniisi ca napa xidé chindézacaʼ ndaaniʼ ca yoo ra rápacabe binnigola purtiʼ racá nga nuu tu gacané laacaʼ. Yanna, xi guendanagana ridxaagalú ca xpinni Cristu ni nabeza ndaaniʼ ca yoo ca yaʼ. Ximodo zanda gudxiilúcabe cani pa qué racané ca binnilídxicabe laacabe yaʼ. Ximodo zanda gacané ca binni ridagulisaa laacabe yaʼ. Xi zabeendunu pa chigánnanu laacabe gatigá yaʼ.

Ca guendanagana ni ridxagalúcabe ndaaniʼ ca yoo ca

Ora chindeza ca xpinni Cristu ni maʼ nagola ndaaniʼ ca yoo ca la? zándaca gadxé neza binni ridagulisaa ni qué runibiáʼcabe nga rucheeche diidxaʼ neza ra nuucabe ca. Nga runi, zándaca qué zigánnapeʼ ca Testigu stiʼ neza binni ridagulisaa ca laacabe ra nuucabe. Ndaaniʼ ca yoo ca laaca ridxaaga ca binnigola huiiniʼ ca binni ni napa gadxé religión, ndiʼ laaca zándaca gácani nagana para laacabe.

Ndaaniʼ chupa chonna de ca yoo ca raca stale cosa ni runi binni ra yuʼduʼ. Ti enfermera ni runi dxiiñaʼ ndaaniʼ tobi de ca yoo ca guníʼ: «Cumu nuu de ca binnigola huiiniʼ ni naca Testigu ca qué randa riníʼ chaahuiʼ la? nuu biaje riné ca binni ca laacabe lu silla de rueda para gúnicabe ni raca ra yuʼduʼ, sin guinabadiidxacaʼ laacabe pa racaláʼdxicabe gúnicabe ni o pa coʼ». Cani runi dxiiñaʼ ndaaniʼ ca yoo ca rinecaʼ laacabe ora rusaa tuuxa iza, ora rúnicaʼ Navidad o Pascua ti gúnicabe gadxé cosa neca ti dxi. Xcaadxi dede huadiicabe laacaʼ guendaró ni nánnacaʼ cadi jneza gocaʼ (Hech. 15:29). Pa chigánnanu ca binnigola huiiniʼ riʼ gatigá la? zanda gacanenu laacabe gudxiilúcabe ca guendanagana riʼ.

Zanda gacané ca binni ridagulisaa

Ca primé xpinni Cristu que nabé gucanecaʼ ca binni huaniisi ni qué gapa tu guʼyaʼ laa (1 Tim. 5:9). Zaqueca yanna, cani naca binnigola lade ca binni ridagulisaa laaca racanecaʼ cani maʼ nagola ni nabeza ndaaniʼ ca yoo ni nuu neza ra rucheechecaʼ diidxaʼ ti cadi guni sentírcabe nuucabe stúbicabe.a Robert, ti Testigu ni naca binnigola lade ca binni ridagulisaa guníʼ: «Galán niguuya cani naca binnigola ca ximodo nabeza ca binnigola huiiniʼ ca ne ñuni orarnecaʼ laacabe. Ca binni ridagulisaa laaca zanda chiguuyacaʼ xi caquiiñecabe». Ora cueenu tiempu para chigánnanu ca binni huaniisi ca la? cusihuínninu riénenu pabiáʼ risaca para Jiobá gácanenu cani caquiiñeʼ laanu (Sant. 1:27).

Ca binnigola ni nuu lade ca binni ridagulisaa riguíxhecaʼ ximodo gacanecaʼ de guidubi ladxidoʼcaʼ ca Testigu ni nuu ndaaniʼ ca yoo ra rápacabe binnigola ni nuu neza ra nabézacaʼ. Robert guníʼ paraa zaquiiñeʼ ca binnigola huiiniʼ ca laanu, nabe: «Naquiiñeʼ uguʼnu gana ca binni huaniisi ca para checaʼ ca guendaridagulisaa ni rápanu pa guidúʼyanu zanda chécabe». Peru ora maʼ qué ganda chécabe ra Yoo stiʼ Reinu la? zanda guyubi binnigola ni nuu lade binni ridagulisaa ximodo gucaadiágacabe ni rieeteʼ lu ca guendaridagulisaa ca. Jacqueline, ti gunaa Testigu ni napa jma de 80 iza ne huará de osteoartritis la? rucaadiágabe cani ridiʼdiʼ lu ca guendaridagulisaa ca pur teléfono. Laabe guniʼbe: «Guizáʼ galán riuaa ora maʼ cucaadiagaʼ cani cayeeteʼ lu ca guendaridagulisaa ca. ¡Qué ziuu dxi gusaana de gucaadiagaʼ cani!».

Pa ti xpinni Cristu ni maʼ huaniisi qué ganda gucaadiaga cani ridiʼdiʼ lu ca guendaridagulisaa pur teléfono la? ca binnigola ni nuu lade ca binni ridagulisaa zanda guni grabarcaʼ guirani. Binni ni chiné ni guca grabar ca ra nuu binnigola huiiniʼ ca la? zanda guiaana ti ratu ra nuube para guiníʼneruʼ laabe. Sicaríʼ guníʼ tobi de cani naca binnigola lade ca binni ridagulisaa: «Ora guinínenu ca binnigola huiiniʼ ca de xcaadxi xpinni Cristu ni ridagulisaanenu la? rucaani laacabe guni sentírcabe nacarúcabe tobi de ca binni ni nuu ndaaniʼ xquidxi Dios».

Cadi gusaananu de guinínenu laacabe

Stale binnigola nabé riuucaʼ triste ne qué ridxélacaʼ xi gúnicaʼ ora chindézacaʼ ndaaniʼ ca yoo ra rápacabe binni huaniisi. Nga runi caadxi de laacaʼ maʼ qué rinápecaʼ guiníʼnecaʼ binni. Peru pa chigánnanu laacabe cásipeʼ chindácabe racá ne gábinu laacabe nuunu para gacanenu laacabe la? zaguixhedxí nga ladxidóʼcabe ne ziuucabe nayecheʼ (Pro. 17:22).

Zándaca chuʼ tu guiníʼ ique zuniti si tiempu stiʼ ora chiganna tuuxa binni maʼ huaniisi pa binni ca maʼ qué runadiágapeʼ, maʼ nayaʼndaʼ ique o napa sti guendanagana. Peru, pa gúninu stipa pur chigánnanu laacabe neca gaca nagana para guiénenu laacabe la? zusihuínninu cayúninu ni na ca diidxaʼ riʼ: «Cada tobi usisaca stobi ne cadi laca laa» (Rom. 12:10). Pa maʼ riaandaʼ binnigola ca xi gúdxinu laa raca chupa chonna gubidxa la? jma galán gábinu laabe gábibe laanu xi bizaacabe dxi gúcabe nahuiiniʼ o zanda gábibe laanu ximodo guyuube ndaaniʼ xquidxi Jiobá. Yanna, xi zanda gúninu pa qué guidxélagabe xi diidxaʼ naquiiñeʼ guiniʼbe yaʼ. Cadi guireʼnu gana, ne pa ganda la? guzéʼtenu chupa chonna diidxaʼ ni rábinu rápabe gana guiniʼbe o guininu ca diidxaʼ ni maca guniʼbe ne gábinu laabe guiníʼrube. Pa maʼ qué ridxélabe xi gábibe laanu o pa nápabe sti guendanagana ni qué rudii lugar guiníʼ chaahuibe la? naquiiñeʼ gucaadiaga chaahuinu laabe ti guiénenu xi nuube gábibe laanu.

Peru pa maʼ qué riníʼ binnigola ca la? zanda gúninu sti cosa pur laabe. Ti precursora ni láʼ Laurence nabé rigánnabe ti gunaa ni láʼ Madeleine, binnigola riʼ napa 80 iza ne maʼ qué randa riníʼ. Laurence cayabi laanu ximodo riníʼnebe binnigola ca, nabe: «Rigapeʼ naʼ Madeleine ora maʼ cayuni orardu. Ne laabe riguié huiinibe nayaʼ ne riguibilágabe para gudiibe xquíxepeʼ naa pur nuaa raqué ne laabe». Pa guinaazenu naʼ ca bíʼchinu o bizánanu ni maʼ nagola ne quiidxinu laacabe la? zaguixhedxini ladxidóʼcabe.

Nabé risaca nga chigánnanu laacabe

Pa qué gusaananu de chigánnanu ca binni huaniisi ca la? cani cayapa laacabe jma zacanecaʼ laacabe. Danièle nga ti gunaa ni riganna ca Testigu ni nuu ndaaniʼ ca yoo ra rápacabe binnigola. Laabe maʼ zinebe biaʼ gande iza de rúnibe zacá, ne guniʼbe ca diidxaʼ riʼ: «Ora ruuyaʼ cani runi dxiiñaʼ ndaaniʼ ca yoo ca nuu tu riganna tuuxa binnigola gatigá la? jma galán rápacaʼ laacabe». Robert, ni guninu luguiáʼ que guníʼ: «Jma rucaadiaga cani runi dxiiñaʼ ndaaniʼ ca yoo ca ti binni ni riganna tuuxa binnigola gatigá. Peru tuuxa ni qué riepeʼ la? zándaca huaxiéʼ zucaadiágacabe laa». Cumu nabé ridxagalú cani runi dxiiñaʼ ndaaniʼ ca yoo ca binni ni qué rudii xquíxepeʼ laacabe pur racanécabe ca binnilidxi la? nga runi jma rusisácabe cani riganna binnilidxi ne rudii xquíxepeʼ laacabe pur ni rúnicabe. Ne pa guinínenu laacabe casi rinínenu ti xhamígunu la? zuni respetárcabe cani riziidiʼ ne ni runi cré binnigola Testigu ni cayápacabe ca.

Laaca zanda gábinu cani runi dxiiñaʼ ndaaniʼ ca yoo ca pa nuu ra zanda gacanenu laacaʼ. Ndaaniʼ stale de ca yoo ca nabé huaxiéʼ binni nuu, nga runi qué rándapeʼ racanécabe ca binnigola ca galán. Ti enfermera ni láʼ Rébecca guníʼ xi zanda guni binni: «Nabé stale dxiiñaʼ nga raca ora maʼ chitócabe. Nga runi galán gueeda gánnacabe tuuxa xhamígucabe óraca ti gacanécabe laa gó». Cadi guiníʼ íquenu qué zanda guinabadiidxanu cani runi dxiiñaʼ ndaaniʼ ca yoo ca ximodo zanda gacanenu laacaʼ.

Ora qué gusaananu de chigánnanu ti binnigola la? zudiʼnu cuenta xi caquiiñebe para chinenu cani ra nuube. Zanda guzuhuaʼnu xiixa foto sti ca binnilídxibe ra nuube o xiixa dibuju ni guni tuuxa baʼduʼ ti guihuinni ra nuube que nayecheʼ. Para ganda chuʼ binnigola ca jma galán la? zanda chinenu ti lari gácube o ti nisa rindáʼ naxhi guidxá ládibe, xabú o sti cosa ni zanda iquiiñebe para chuʼbe nayá. Yanna pa nuu jardín ndaaniʼ yoo ra nuube ca la? zanda cueenu laabe ti ratu para igaandabe. Laurence, gunaa ni maca bizéʼtenu que guníʼ: «Nayecheʼ riuu Madeleine ora maʼ cabeza naa guiráʼ semana. Ora riniáʼ ca baʼduhuiiniʼ ca ra nuube ruxídxibe ne riuube nayecheʼ». Guiráʼ ni gúninu zusiécheni ca binnigola ni nuu ndaaniʼ ca yoo ca (Pro. 3:27).

Zabeendunu ni galán ne zaqueca laacabe

Ora chigánnanu ca binni huaniisi ca gatigá la? óraca nga zusihuínninu «pa dxandí nadxii [n]u ca hermanu» (2 Cor. 8:8). Ximodo nga yaʼ. Zándaca ziuubaʼ ladxidoʼno ora guidúʼyanu jma maʼ zirá stipa stiʼ ti xhamígunu purtiʼ maʼ zigola. Laurence guníʼ: «Primé que la? guizáʼ riuubaʼ ladxiduáʼ dede ruunaʼ cada chigannaʼ Madeleine ne guuyaʼ modo ziguiráʼ stipa stibe. Peru biziideʼ pabiáʼ naquiiñeʼ guneʼ orar de guidubi ladxiduáʼ para cadi guidxibeʼ ne gacaniáʼ xcaadxi binni». Robert maʼ napa iza de riganna Larry, ti xpinni Cristu ni napa ti guendahuará ni láʼ Parkinson. Robert guníʼ: «Maʼ qué randa diʼ rieneʼ ni riníʼ Larry purtiʼ nabé maʼ bininá guendahuará ni nápabe ca laabe. Peru ora runeʼ orarniáʼ laabe rudiéʼ cuenta náparube fe».

Ora chigánnanu ca binni huaniisi ca cadi zacané si ni laacabe, sínuque laaca zacaneni laanu. Ora guidúʼyanu naguixhe iquerúcabe chúʼcabe gaxha de Jiobá neca nuucabe lade stale binni ni napa gadxé religión la? racaneni laanu gápanu fe ne gácanu nadxibalú. Cumu racalaʼdxirúcabe guiziidicabe de Dios neca qué ruuyaʼ chaahuicabe o qué runadiaga chaahuicabe la? rusihuinni ni «cadi pan si nga ibani né binni sínuque irá ca diidxa ni iree de ruaa Dios» (Mat. 4:4). Nuu stale cosa huiiniʼ ni zanda gusiecheʼ ca binni huaniisi ca, casi ora gúʼyacabe guxidxi ti baʼduhuiiniʼ, ora gonécabe ca xhamígucabe, ne nga rusietenalaʼdxiʼ laanu naquiiñeʼ chuʼnu nayecheʼ né cani nápanu. Ora guidúʼyanu pabiáʼ nadxiicabe cani rizíʼdinu de Dios la? racaneni laanu quixhe íquenu gúninu ca cosa ni jma risaca.

Dxandipeʼ nga ribeendú guiráʼ ca binni ridagulisaa stale cosa galán ora gacanenu ca binni huaniisi ca. Ximodo yaʼ. Guiráʼ cani maʼ cará stipa stiʼ nabé caquiiñecaʼ gannaxhiinu laacaʼ, ne ora gúninu zacá rusihuínninu pabiáʼ rilaseláʼdxinu laacabe. Nga runi naquiiñeʼ gápanu laacabe neca qué gánnanu pabiáʼ dxi zúninu ni, zacá zusihuínninu cayacanésaanu (1 Ped. 4:10, 11). Pa primeca guiráʼ cani naca binnigola lade ca binni ridagulisaa guni ndiʼ la? zacanecaʼ xcaadxi binni ridagulisaa guiénecaʼ pabiáʼ naquiiñeʼ gacanésaanu casi xpinni Cristu (Eze. 34:15, 16). Pa gacanenu de guidubi ladxidoʼno ca binni huaniisi ca ne gusihuínninu nadxiinu laacabe la? zánnacabe cadi cusiáʼndanu laacabe.

[Cani cá ñee yaza]

[Ni caníʼ yaza 28]

«Ora ruuyaʼ cani runi dxiiñaʼ ndaaniʼ ca yoo ca nuu tu riganna tuuxa binnigola gatigá la? jma galán rápacaʼ laacabe»

[Dibuju/foto ni zeeda lu yaza 26]

Ora guni orarnu de guidubi ladxidoʼno  la? zacaneni ti Testigu ni maʼ huaniisi para gatadxí ladxidóʼ

[Dibuju/foto ni zeeda lu yaza 26]

Pa gábinu ca binnigola huiiniʼ ca diidxaʼ ni uguu gana laacaʼ la? zudiini stipa laacabe