Tu napa donda pur ca guerra ne pur cayacaná binni

Biluxe Primera Guerra Mundial que 11 stiʼ noviembre iza 1918. Dxi que biseeguʼ binni ca negocio stiʼ ne yeguyaacaʼ lu calle. Peru chupa chonna si dxi guyuucabe nayecheʼ. Casi biluxe guerra que, nándaca sti yuubaʼ jma nadipaʼ que ti ametralladora.

Lu beeu junio iza 1918, bihuinni ti guendahuará nabé malu ndaaniʼ guidxi Francia ra gudinde ca soldadu que, laani nga ni rábicabe gripe española ne qué nindaa bihuinni pabiáʼ malu guendahuará que. Biaʼ chupa chonna beeu si maʼ biitini jma stale soldadu de Estados Unidos ni nuu Francia que cani guti lu guerra que. Ne ca soldadu ni bibiguetaʼ ra lidxi biluxe si guerra que, bicaacaʼ guendahuará que binni ne zaqué bireeche ni lu guidubi naca Guidxilayú.

Ca iza despué de guerra que laaca guca gubiña ne guizáʼ pobre biaana binni. Ndaaniʼ stale guidxi ni nuu Europa dede bibidxi binni pur gastiʼ ni gó. Lu iza 1923 maʼ qué nisaca xpueltu ca binni de Alemania. Xhoopaʼ iza despué, maʼ lu guidubi naca Guidxilayú qué nisaca xpueltu binni. Ne lu iza 1939 bizulú Segunda Guerra Mundial ne zanda guininu guca ni pur ca guendanagana bisaana Primera Guerra Mundial que. Xiñee bizaaca guiráʼ ca desgracia ca yaʼ.

SEÑA NI RUSIHUINNI NUUNU LU CA ÚLTIMU DXI

Para guiene chaahuinu xiñee bizaaca caadxi cosa lu Guidxilayú, casi Primera Guerra Mundial que la? caquiiñeʼ guidúʼyanu xi ruzeeteʼ caadxi profecía zeeda lu Biblia. Jesucristu guníʼ zadxiña dxi zadinde ca guidxi ca ne ziuu stale guendahuará ne ziaadxaʼ ni gó binni lu guidubi naca Guidxilayú (Mateo 24:3, 7; Lucas 21:10, 11). Jesús gudxi ca discípulo stiʼ zusihuinni ca desgracia ca maʼ nuunu lu ca últimu dxi. Ne lu últimu libru stiʼ Biblia, Apocalipsis cusiene cayacaná binni lu Guidxilayú purtiʼ guca ti guerra guibáʼ. (Biiyaʼ cuadru ni láʼ «Guerra ni guca lu Guidxilayú ne guerra ni guca guibáʼ».)

Libru stiʼ Apocalipsis cuzeeteʼ tapa hombre dxiʼbaʼ maniʼ. Chonna de laacabe rusihuinni ca desgracia ni maca bizeeteʼ Jesús: guerra, gubiña ne guendahuará malu. (Biiyaʼ cuadru ni láʼ «Ñee ziguxooñeneruʼ ca hombre rieeteʼ lu Apocalipsis que maniʼ sticaʼ la?».) Rihuinni dxíchica dede dxi guca Primera Guerra Mundial que bizulú cayacaná binni. Ne Biblia rusihuinni Binidxabaʼ nga napa donda (1 Juan 5:19). Ñee nuu tu zanda gucueeza laabe la?

Apocalipsis laaca cuzeeteʼ «ma huaxiéʼ dxi napa» Binidxabaʼ (Apocalipsis 12:12). Nga runi nabé cadxiichibe ne runi laabe cayacaná binni lu Guidxilayú riʼ. Guiráʼ ca guendanagana cadúʼyanu guiráʼ ladu cusihuínnicani maʼ cazaa dxi stibe.

ZABIÁ XHIIÑAʼ BINIDXABAʼ

Primera Guerra Mundial que bichaa ni modo nabani binni. Dede dxi ca bizulú guca stale guerra, guca revolución ne gudxite ca políticu binni, ne laaca bihuinni dxichi guládxicabe Binidxabaʼ de guibáʼ (Apocalipsis 12:9). Né ni biʼniʼ Binidxabaʼ ca bisihuinni zeeda gaca casi ti gobiernu nabé malu purtiʼ nanna maʼ huaxiéʼ dxi napa para guni mandar. Ora maʼ guizaa dxi stibe zaluxe guiráʼ desgracia bizulú dxi guca Primera Guerra Mundial.

Ca profecía ni zeeda lu Biblia racané cani laanu guni crenu Jesucristu, Rey ni nuu guibáʼ, nga «[z]uchiá xhiiña binidxabaʼ» (1 Juan 3:8). Dédeca yanna, millón de binni cayuni orar gueeda Reinu ca. Ñee laaca zacaca cayúniluʼ la? Reinu ca nga chiguni ni na Dios lu Guidxilayú riʼ, ne cadi ni na Binidxabaʼ, nga runi guiráʼ cani guzuubaʼ diidxaʼ zuuyacaʼ dxi gaca nga (Mateo 6:9, 10). Ora guni mandar Reinu stiʼ Dios maʼ qué zaca ninruʼ stiʼ guendaridinde lu guidubi naca Guidxilayú (Salmo 46:9). Pa guiziidiluʼ jma de Reinu ca la? zanda  guibániluʼ ora maʼ guirutiʼ tinde lu Guidxilayú (Isaías 9:6, 7).