ARTÍCULO DE ESTUDIU 42
CANCIÓN 44 Jiobá, gundisaʼ naa
Guizíʼdinu guni orarnu Jehová de guidubi ladxidoʼno
«De guidubi ladxiduáʼ cucaariʼdxeʼ lii. Bicabi naa, Jehová» (SAL. 119:145).
TEMA
Ora guidúʼndanu ne guiníʼ íquenu ca oración ni zeeda lu Biblia zacaneni laanu guizíʼdinu guni orarnu Jehová de guidubi ladxidoʼno.
1, 2. a) ¿Xi zándaca gucaa laanu guininu ngueca ca ngueca ora guni orarnu? b) ¿Ximodo nánnanu rucaadiaga chaʼhuiʼ Jehová ni gábinu laa?
¿ÑEE runi sentirluʼ ora runi orarluʼ Jehová ngueca ca ngueca nga rábiluʼ laa ne cadi ni peʼ cayuni sentirluʼ la? Guiranu zanda guizaacanu ni. Zándaca purtiʼ guizáʼ nuu xhiiñanu ne pur nga huaxiéʼ tiempu riquíʼñenu para guni orarnu. O zándaca riníʼ íquenu cadi caquiiñeʼ gábinu Jehová guiráʼ ni runi sentirnu.
2 Ruzeeteʼ Biblia ni jma risaca para Jehová nga guinínenu laa de guidubi ladxidoʼno ne gácanu humilde. Nga runi ora guni orarnu cadi naquiiñeʼ guiníʼ íquenu caquiiñeʼ iquíʼñenu diidxaʼ nagana o guininu sin guchee ruaanu. Rucaadiaga Jehová «oración stiʼ ca binni nadóʼ» (Sal. 10:17). Rucaadiágabe guiráʼ ni gábinu laabe purtiʼ dxandíʼ peʼ rizaaláʼdxibe laanu (Sal. 139:1-3).
3. ¿Xi pregunta zacábinu lu artículo riʼ?
3 Lu artículo riʼ zacábinu ca pregunta riʼ: ¿Xiñee cadi naquiiñeʼ guidxíbinu gábinu Jehová ni runi sentirnu ne ni riníʼ íquenu?, ¿ximodo zanda guni orarnu Jehová para guidxíñanu jma gaxha de laa?, ¿ximodo racané ca oración ni zeeda lu Biblia guizíʼdinu guni orarnu Jehová de guidubi ladxidoʼno? ne ¿xi zanda gúninu pa nabé nuunu xizaa dede qué randa riree diidxaʼ ruaanu para gábinu Jehová ni runi sentirnu?
CADI GUIDXÍBILUʼ GUNI ORARLUʼ JEHOVÁ
4. ¿Xi zacané laanu guxhélenu ladxidoʼno nezalú Jehová? (Salmo 119:145).
4 Qué zaca nagana para laanu gábinu Jehová ni riníʼ íquenu ne ni runi sentirnu pa guidúʼyanu laabe casi ti xhamígunu ni qué rixeleʼ de laanu ni racalaʼdxiʼ guibáninu galán. Guiníʼ íquenu hombre ni bicaa Salmo 119, nabé bidxaagalube stale guendanagana. Guzéʼtenu ti ejemplu, guyuu tu guníʼ cosa ni cadi dxandíʼ de laabe (Sal. 119:23, 69, 78). Ne laaca guyuu biaje biʼniʼ sentirbe triste purtiʼ bicheebe (Sal. 119:5). Neca zacá gudixhe íquebe chuʼbe gaxha de Jehová, ne qué nidxíbibe nuxhélebe ladxidoʼbe nezalú (biindaʼ Salmo 119:145).
5. ¿Xiñee cadi naquiiñeʼ gudiʼnu lugar chuʼ xiixa ni gucueeza laanu de guni orarnu Jehová? Bizeeteʼ ti ejemplu.
5 Racalaʼdxiʼ Jehová dede né ca binni ni maʼ biʼniʼ xiixa pecadu grave guni orarcaʼ laabe (Is. 55:6, 7). Nga runi, cadi gudiʼnu lugar chuʼ xiixa ni gucueeza laanu guni orarnu Jehová. Para guiene chaahuinu ni, guiníʼ íquenu ti hombre ni rusá avión, málasi qué ñánnabe xi bíʼnibe ne gucuaa avión que sti ruta. Nánnabe zanda gacané ca binni ni ruuyaʼ ruta stiʼ ca avión ca laabe. ¿Ñee zaníʼ íquebe qué zanábabe gacanécabe laabe purtiʼ rituílube laa? ¡Coʼ, xa! Zaqueca nga rizaaca né laanu neca ziuu biaje zucheʼnu o zaree cueenu de lu neza stiʼ Jehová, peru cadi naquiiñeʼ guidxíbinu ne guituílunu guinínenu Jehová (Sal. 119:25, 176).
XIMODO ZANDA GUNI ORARLUʼ JEHOVÁ PARA GUIDXÍÑALUʼ JMA GAXHA DE LAA
6, 7. ¿Ximodo zanda guni orarnu Jehová para guidxíñanu jma gaxha de laa? Bizeeteʼ ti ejemplu (laaca zanda gúʼyaluʼ nota ca).
6 Ora guinínenu Jehová sin guituílunu rábinu laabe ni riníʼ íquenu ne ni runi sentirnu, ne nga racané laanu guidxíñanu jma gaxha de laabe. Yanna, guidúʼyanu ximodo zanda guni orarnu Jehová para guidxíñanu jma gaxha de laa.
7 Guiníʼ íquenu ca cualidad ni napa Jehová.a Ora jma guiníʼ íquenu ca cualidad ni napa Jehová qué zaca nagana para laanu guxhélenu ladxidoʼno nezalube (Sal. 145:8, 9, 18). Ne nga nga ni biʼniʼ Kristine, ti hermana ni nabé naduxhuʼ bixhoze. Sicaríʼ guniʼbe: «Guca nagana para naa guneʼ cré naca Jehová Bixhozeʼ ni nadxii naa ne zanda guneʼ orar laabe. Bineʼ sentir zusaana de gannaxhiibe naa ra gúʼyabe ca cosa ni cadi jneza guneʼ». Yanna, ¿xi cualidad napa Dios gucané laabe yaʼ? Sicaríʼ bisiénebe: «Ra guníʼ iqueʼ qué rusaana Jehová de gannaxhii gucaneni naa chuaaʼ segura dxandíʼ nadxiibe naa. Nannaʼ naaze Jehová nayaʼ ne pa guiaba nuucabe para guindísabe naa né stale cariñu. Ra guiníʼ iqueʼ pabiáʼ nadxii Jehová naa racaneni naa gabeʼ laabe guiráʼ ni rusiecheʼ naa ne zaqueca ca cosa ni riguu naa triste».
8, 9. Guiníʼ íquenu dede ante xi guininu lu ca oración stinu, ¿ximodo zanda gacaneni laanu? Bizeeteʼ ti ejemplu.
8 Guiníʼ íquenu dede ante xi guininu. Ante de guni orarnu, zanda guiníʼ íquenu ca pregunta riʼ: «¿Xi guendanagana cudxieeluáʼ? ¿Ñee nuu tuuxa ni caʼruʼ guneʼ perdonar la? ¿Cadideʼ lu xiixa guendanagana ne caquiiñeʼ gacané Jehová naa la?» (2 Rey. 19:15-19). Laaca zanda chinándanu ejemplu stiʼ Jesús ne guinábanu guisaca lá Jehová, gueeda Reinu stibe ne gaca ni nabe lu guidxilayú riʼ (Mat. 6:9, 10).
9 Ti hermana láʼ Aliska ora gunna napa xheelaʼ cáncer ndaaniʼ ique ne maʼ qué gápani remediu, guizáʼ guca nagana para laabe guni orarbe. Sicaríʼ guniʼbe: «Guizáʼ nuaaʼ xizaa dede qué randa riníʼ iqueʼ ne qué ridxelaʼ diidxaʼ gabeʼ Jehová». ¿Xi gucané laabe guni orarbe yaʼ? Laaca laabe guniʼbe: «Ante guzuluáʼ guneʼ orar, riníʼ iqueʼ xi zanda gabeʼ Jehová. Nga racané naa cadi guinabaʼ puru para naa ne cadi guinieeʼ puru si ca guendanagana ni napaʼ, ne laaca racaneni gatadxí xquendabiaaneʼ ne chuaaʼ tranquila ora guinieniáʼ Jehová».
10. ¿Xiñee galán cadi nagueenda nagueendaca guni orarnu? (Laaca zanda gúʼyaluʼ ca imagen ca).
10 Cadi nagueenda nagueendaca guni orarnu. Dxandíʼ ne chupa chonna si diidxaʼ zanda guidxíñanu gaxha de Jehová, peru pa quixhe íquenu guinínenu laabe jma tiempu zándaca nga zacané laanu gábinu laabe xi peʼ ndiʼ cayuni sentirnu.b Elijah, xheelaʼ Aliska náʼ: «Runeʼ stipa guneʼ orar stale biaje ti dxi, ne maʼ bidieeʼ cuenta ora guinieniáʼ Jehová xadxí jma runeʼ sentir nuaaʼ gaxha de laabe, nannaʼ cadi cayuuyadxídibe pabiáʼ tiempu ziniaʼ de canieniáʼ laabe ne nga rucaa naa guiníʼ iqueʼ cadi nagueenda nagueendaca guneʼ orar laabe». ¿Xiñee qué quixheʼ íqueluʼ gúniluʼ ndiʼ yaʼ? Galán guyúbiluʼ ti lugar ne ti hora ra zanda guni orarluʼ biaʼ tiempu caquiiñeluʼ sin chuʼ xiixa o tuuxa gucueeza lii.
Biyubi pora zanda guni orarluʼ ne ti lugar ra zanda gúniluʼ ni sin chuʼ xiixa o tuuxa gucueeza lii ti zacá ganda guni orarluʼ xadxí. (Biiyaʼ párrafo 10).
GUNÍʼ IQUE CA ORACIÓN NI BIʼNIʼ CA XPINNI JEHOVÁ
11. ¿Ximodo racané laanu guiníʼ íquenu lu ca oración ni biʼniʼ ca xpinni Jehová? (Laaca zanda gúʼyaluʼ cuadru ni láʼ «¿Ñee nga ca nga ni runi sentirluʼ la?»).
11 Ora guiníʼ íqueluʼ de modo biʼniʼ orar ca xpinni Jehová de guidubi ladxidoʼcaʼ ne modo biindacaʼ canción para gusisácacaʼ Jehová zacaneni lii guiziidiluʼ guni orarluʼ. Ra gúʼyaluʼ ximodo gunda gúdxicabe Jehová ni riníʼ íquecabe ne ni nuu ndaaniʼ ladxidóʼcabe zacaneni lii guxhéleluʼ ladxidoʼloʼ nezalú Jehová. Laaca zándaca zaziidiluʼ caadxi diidxaʼ ni zanda iquiiñeluʼ para gusisácaluʼ Jehová. Ne zándaca zadxélaluʼ xiixa oración ni biʼniʼ ti xpinni Jehová ni biʼniʼ sentir cásica ni cayuni sentirluʼ.
12. ¿Xi pregunta zanda guiníʼ íquenu ora guidúʼndanu ti oración zeeda lu Biblia?
12 Ora gúʼndaluʼ xiixa oración ni zeeda lu Biblia, galán guiníʼ íqueluʼ ca pregunta riʼ: «¿Tu cayuni orar? ¿Xi cazaaca lu xquendanabánibe? ¿Ñee laaca ni cayuni sentirbe, nga ca nga ni cayuneʼ sentir la? ¿Xi zanda guiziideʼ de oración ni bíʼnibe riʼ yaʼ?». Zándaca caquiiñeʼ guni investigarluʼ ti ganda guicábiluʼ ca pregunta ca, ne zabeenduluʼ ni galán pa gúniluʼ ni. Guidúʼyanu chupa chonna ejemplu.
13. ¿Xi rizíʼdinu de oración ni biʼniʼ Ana? (1 Samuel 1:10, 11; laaca zanda gúʼyaluʼ imagen ca).
13 (Biindaʼ 1 Samuel 1:10, 11). Ora guniné Ana Jehová nápabe chupa guendanagana: primé, qué ganda gápabe xiiñibe ne guiropa, nabé runiná sti xheelaʼ Elcaná laabe (1 Sam. 1:4-7). Pa cudxiiluluʼ xiixa guendanagana ni qué ganda gaca chaahuiʼ, ¿xi zanda guiziidiluʼ de oración ni biʼniʼ Ana yaʼ? Laabe bixhélebe ladxidoʼbe nezalú Jehová ne gúdxibe laa guiráʼ ni riguu xizaa laabe, ne despué biʼniʼ sentirbe galán ne maʼ qué ñuube triste (1 Sam. 1:12, 18). Zanda gúniluʼ ni bíʼnibe ca «bilaa ni nualuʼ luguiáʼ Jehová», ni caninu raríʼ nga, gudxi laabe guiráʼ ni riguu xizaa lii ne ximodo runi sentirluʼ (Sal. 55:22).
Bixheleʼ Ana ladxidóʼ nezalú Jehová ne gúdxibe laa pabiáʼ racanabe purtiʼ qué ganda gápabe xiiñibe ne purtiʼ runi burla sti xheelaʼ Elcaná laabe. (Biiyaʼ párrafo 13).
14. a) ¿Xiruʼ rizíʼdinu de ejemplu stiʼ Ana? b) ¿Ximodo zanda guizíʼdinu guni orarnu Jehová ora guiníʼ íquenu lu ca oración ni zeeda lu Biblia? (Laaca zanda gúʼyaluʼ nota ca).
14 Chupa chonna iza despué de gule, Samuel, yené Ana laabe ra nuu sumo sacerdote Elí (1 Sam. 1:24-28). Lu ti oración ni bíʼnibe Jehová de guidubi ladxidoʼbe bidiibe xquixe peʼ laa purtiʼ biiyabe rapa ca xpinni ni qué rixeleʼ de laa (1 Sam. 2:1, 8, 9).c Zándaca cudxiilurube guendanagana, peru gudixhe íquebe gúʼyabe ximodo guluu Jehová ndaayaʼ laabe. ¿Xi rizíʼdinu de ndiʼ yaʼ? Qué zaca nagana para laanu gudxiilunu ca guendanagana stinu pa guiníʼ íquenu ximodo cayacané Jehová laanu.
15. ¿Xi rizíʼdinu de oración ni biʼniʼ Jeremías? (Jeremías 12:1).
15 (Biindaʼ Jeremías 12:1). Biʼniʼ sentir profeta Jeremías triste purtiʼ biiyabe ruluíʼ si galán nabani ca binni ni qué runi ni ná Jehová ne purtiʼ runi burla ca israelita que laabe (Jer. 20:7, 8). Laaca zanda guni sentirnu ni biʼniʼ sentir profeta riʼ purtiʼ runi burla binni laanu ne ruluíʼ si nayecheʼ nabani ca binni ni runi cosa malu. Rudiʼnu cuenta neca guníʼ Jeremías ni runi sentir ne ni ruchiichi laa, peru qué ñuu dxi niniʼbe cadi jneza ni runi Jehová. Ora biiyabe ximodo guluu jneza Jehová xquidxi, gunna dxíchibe qué ziuu dxi guni Jehová ni cadi jneza (Jer. 32:19). Laanu laaca zanda gúninu ni biʼniʼ Jeremías ne gábinu Jehová ni runi sentirnu, ni ruchiichi laanu ne gápanu confianza zuni chaahuibe ca cosa ni cadi jneza rizaaca lu xquendanabáninu.
16. ¿Xi rizíʼdinu de oración ni biʼniʼ ti levita? (Salmo 42:1-4; laaca zanda gúʼyaluʼ ca imagen ca).
16 (Biindaʼ Salmo 42:1-4). Lu canción riʼ bicaa ti levita ni runi sentir purtiʼ qué ganda guni adorar Jehová ndaaniʼ templu né ca israelita. Zándaca guni sentirnu cásica biʼniʼ sentirbe pa nápanu xiixa guendahuará o qué zanda guireʼnu de ra lídxinu o zándaca nuunu ndaaniʼ cárcel pur ni runi crenu. Ziuu biaje zuni sentirnu galán peru laaca ziuu biaje zuni sentirnu triste, ora guizaacanu ni ni jma galán gúninu nga guinínenu Jehová ne gábinu laa ximodo runi sentirnu. Nga zacané laanu gunibiáʼ chaahuinu laca laanu ne guidúʼyanu ca cosa ca modo ruuyaʼ Jehová cani. Guzéʼtenu ti ejemplu, bidii levita que cuenta zedandá dxi zabiguetaʼ zusisácabe Dios (Sal. 42:5). Ne laaca guníʼ íquebe ximodo cayapa Jehová laabe (Sal. 42:8). Guxhélenu ladxidoʼno nezalú Jehová zanda gacaneni laanu gánnanu xiñee cayuni sentirnu zacá, zaguixhedxini ladxidoʼno ne zápanu stipa para guni huantarnu.
Bixhele levita ni bicaa Salmo 42 que ladxidóʼ nezalú Dios. Pa gábinu Jehová modo runi sentirnu, qué zaca nagana para laanu guidúʼyanu ca cosa ca modo ruuyaʼ Jehová ni. (Biiyaʼ párrafo 16).
17. a) ¿Xi rizíʼdinu de oración ni biʼniʼ Jonás? (Jonás 2:1, 2). b) ¿Ximodo zanda gacané caadxi diidxaʼ ni zeeda lu ca Salmo ca laanu ora cadídinu lu xiixa guendanagana? (Laaca zanda gúʼyaluʼ nota ca).
17 (Biindaʼ Jonás 2:1, 2). Guniʼné profeta Jonás Jehová laga nuu ndaaniʼ benda que. Nanna dxíchibe zucaadiaga Jehová laabe neca qué nuzuubabe stiidxaʼ. Ora guníʼnebe Jehová biquiiñebe caadxi diidxaʼ ni riete lu caadxi Salmo, nga rusihuinni guizáʼ runibiáʼ chaahuibe cani.d Ra bietenaláʼdxibe ne guníʼ íquebe lúcani gunna dxíchibe zacané Jehová laabe. Zaqueca nga zazaaca pa gúninu stipa guizíʼdinu caadxi textu ni zeeda lu Biblia, zándaca guietenaláʼdxinu cani ne quixhedxícani ladxidoʼno ora guni orarnu purtiʼ cadídinu lu xiixa guendanagana.
CADI GUSAANA DE GUNI ORARLUʼ JEHOVÁ PARA CHUʼLUʼ JMA GAXHA DE LAA
18, 19. ¿Ximodo racané ni riete lu Romanos 8:26, 27 laanu pa qué randa riree diidxaʼ ruaanu para gábinu Jehová ximodo runi sentirnu? Bizeeteʼ ti ejemplu.
18 (Biindaʼ Romanos 8:26, 27). Zándaca ziuu biaje nabé nuunu xizaa dede qué randa riree diidxaʼ ruaanu para gábinu Jehová ximodo cayuni sentirnu. Peru ora guizaacanu ni, espíritu santu stiʼ Dios zacané laanu ne «maʼ espíritu que riníʼ pur laanu nezalú Dios». ¿Xi riníʼ ndiʼ yaʼ? Riniʼni biquiiñeʼ Jehová espíritu santu stiʼ para gucuá ca oración stiʼ ca xpinni lu Biblia. Nga runi, ora qué guidxélanu ximodo gábinu Jehová ni caníʼ íquenu, zanda guicaa Jehová ca oración riʼ casi xa ñaca laapenu bíninu cani ne despué zacábibe laanu.
19 Ni bizéʼtenu riʼ guizáʼ gucaneni ti hermana de guidxi Rusia ni láʼ Elena, gunaazecabe laabe purtiʼ runi orarbe ne ruundabe Biblia. Pur ni bizaacabe riʼ guizáʼ nuube xizaa ne cayaca nagana para laabe guni orarbe. Sicaríʼ bisiénebe: «Bietenalaʼdxeʼ, pa nuu xiixa ni nabé riguu xizaa naa ne qué ganda gabeʼ Jehová ni runeʼ sentir zanda guicaa Jehová ca oración ni biʼniʼ xcaadxi xpínnibe, ni zeeda lu Biblia, casi ñaca naa cayuneʼ cani». Ne guníʼrube: «Ngue gudixhedxí ladxiduáʼ ora cadideʼ guendanagana que».
20. ¿Xii ndiʼ zacané laanu guni prepararnu xquendabiaaninu ante guni orarnu maruʼ si pa nuunu xizaa o nápanu estrés?
20 Ora nabé nuunu xizaa o nápanu estrés, zándaca gaca nagana para laanu guni orarnu purtiʼ nuu stale cosa ndaaniʼ íquenu. Para guni prepararnu xquendabiaaninu ti ganda guinínenu Jehová la? zanda gucaadiáganu ca audio stiʼ ca Salmo o gúninu cásica biʼniʼ rey David ne gucaʼnu ni cayuni sentirnu (Sal. 18, 34, 142 ne encabezamiento). Dxandíʼ, cumu maʼ gadxé gadxé naca cada tobi de ca xpinni Cristu la? maʼ de laa riaana guuyaʼ xii nga ni jma zacané laa para guni preparar xquendabiaaniʼ ante guni orar (Sal. 141:2). Gudixhe ique gúniluʼ ni rábiluʼ zacané lii.
21. ¿Xiñee zanda guxhélenu ladxidoʼno nezalú Jehová?
21 Guizáʼ ratadxí ladxidoʼno purtiʼ riene Jehová ni runi sentirnu ne rúnibe ni dede ante gábinu ni laabe (Sal. 139:4). Peru guizáʼ riuuláʼdxibe gucaadiágabe laanu ne gúʼyabe pabiáʼ nápanu confianza laabe. Nga runi cadi gusaana de guni orarnu Bixhózenu ni nuu guibáʼ. Iquíʼñenu diidxaʼ ni riete lu ca oración ni zeeda lu Stiidxabe. Guxhélenu ladxidoʼno nezalube ne guinínenu laabe ora nuunu triste ne ora nuunu nayecheʼ. Naca Jehová xhamígunu ne qué ziuudxí guixélebe de laanu.
CANCIÓN 45 Riníʼ iqueʼ de Dios de guidubi ladxiduáʼ
a Guyé lu libru Textos bíblicos para la vida cristiana, biyubi tema: «Jehová» de raca guyé ra ná «Algunas cualidades sobresalientes de Jehová».
b Qué rindaa ca oración ni raca lu ca reunión ni rápanu.
c Rihuinni dxíchica gulee Ana tiempu para guiníʼ ique lu Stiidxaʼ Dios, ca diidxaʼ ni biquiiñebe lu oración stibe ruluíʼcani ca diidxaʼ ni bicaa Moisés (Deut. 4:35; 8:18; 32:4, 39; 1 Sam. 2:2, 6, 7). Gudiʼdiʼ si iza, biquiiñeʼ María, jñaa Jesús, caadxi diidxaʼ casi ca ni guníʼ Ana para gusisaca Jehová (Luc. 1:46-55).
d Guzéʼtenu ti ejemplu, zanda guchaagaluʼ ni ná Jonás 2:3-9 né Salmo 69:1; 16:10; 30:3; 142:2, 3; 143:4, 5; 18:6, y 3:8 (zeeda ca versículo riʼ né orden modo guníʼ Jonás cani).