Qué ziuu dxi gusaana Dios de gannaxhii

1, 2. ¿Xi runi sentir stale hermanu ora ridxaagalucaʼ guendanagana?

GUINÍʼ íquenu cadxaagalú ti barcu ti tormenta naroʼbaʼ. Nabé nadipaʼ ca ola que ne rucaanani barcu que ladu tiica si. Ni zanda si gúnicabe para gucueezacabe barcu ca nga gusábacabe ancla stini.

² ¿Ñee cadíʼdiluʼ lu xiixa guendanagana la? Zándaca guni sentirluʼ nuuluʼ lu ti tormenta cásica barcu que. Ca guendanagana ni cadxaagaluluʼ zanda guchaacani ni runi sentirluʼ. Zándaca yannadxí nuuluʼ seguru nadxii Jehová lii ne zacanebe lii ne guixíʼ maʼ guiníʼ íqueluʼ qué lica rizaalaʼdxiʼ Jehová ni cazaacaluʼ (Sal. 10:1; 13:1). Zándaca gabi ti xhamíguluʼ lii xiixa diidxaʼ ni cuʼ gana lii ne nga racané lii guni sentirluʼ galán ti tiempu (Prov. 17:17; 25:11). Peru despué maʼ ribiguetaʼ riníʼ íqueluʼ pa dxandíʼ nadxii Jehová lii. Zándaca dede guiníʼ íqueluʼ maʼ qué rizaalaʼdxiʼ Jehová lii. Pa nga nga ni cazaacaluʼ, ¿ximodo zanda gusábaluʼ ancla, ni caninu raríʼ nga ximodo chuʼluʼ seguru ne guni creluʼ nadxii Jehová lii ne zacanebe lii?

3. a) ¿Xi riníʼ ca diidxaʼ qué rusaana de gannaxhii? (Salmo 31:7; 136:1). b) ¿Xiñee Jehová si nga ni jma rusihuinni cualidad riʼ? (Laaca zanda gúʼyaluʼ imagen ca).

³ Ora cadídinu lu ti guendanagana ti modo zanda «gusábanu ancla» ca nga guietenaláʼdxinu qué ziuu dxi gusaana Jehová de gannaxhii (biindaʼ Salmo 31:7; 136:1). Diidxaʼ «qué rusaana de gannaxhii» rusihuínnini pabiáʼ naroʼbaʼ guendarannaxhii rapa tuuxa sti binni, dede rucaani laa cadi guixeleʼ de laabe. Guirutiʼ ruʼ rusihuinni cualidad riʼ jma que Jehová. Ne Biblia peʼ ná «qué rusaana» Jehová de gannaxhii ne guizáʼ naroʼbaʼ guendarannaxhii ni nápabe ca xpínnibe (Éx. 34:6, 7; Sal. 86:5). Guníʼ ique ni riníʼ ca diidxaʼ ca: ¡Qué ziuu dxi gusaana Jehová ca xpinni ni qué rixeleʼ de laa! Ra guietenaláʼdxiluʼ ndiʼ zacaneni lii cadi guireeluʼ gana ora guidxaagaluluʼ guendanagana ni zeeda gaca casi ti tormenta (Sal. 23:4).

TOBI DE CA COSA NI CADI NAGANA RUSIIDIʼ BIBLIA NGA GUENDARANNAXHII STIʼ JEHOVÁ

4. ¿Gunáʼ nga caadxi cosa ni cadi nagana rusiidiʼ Biblia? ¿Xiñee qué rudiʼnu lugar chuʼ tu guchaa ni runi crenu?

⁴ Sti modo «gusábanu ancla» ora cadxaagalunu guendanagana nga ra guidúʼyanu guendarannaxhii stiʼ Jehová casi tobi de ca cosa ni cadi nagana rusiidiʼ Biblia. Para lii, ¿gunáʼ nga ca cosa ni cadi nagana rusiidiʼ Biblia yaʼ? Laacani nga ca cosa ni bizíʼdinu primé ora bizulú bidúʼndanu Stiidxaʼ Dios. Guzéʼtenu caadxi ejemplu, dxi bizulú bidúʼndanu Biblia bizíʼdinu lá Dios nga Jehová, Jesús nga tobi lucha xiiñibe, laaca bizíʼdinu maʼ qué ganna ca gueʼtuʼ ca gastiʼ, zaca guidxilayú riʼ ti paraísu ne zabani binni sin qué chuʼ dxi gati (Sal. 83:18; Ecl. 9:5; Juan 3:16; Apoc. 21:3, 4). Ora maʼ nuuluʼ seguru dxandíʼ ca ni biziidiluʼ ca purtiʼ maʼ biiyaluʼ nuu prueba ni rusihuinni dxandíʼ zacá ni, ¿cadi dxandíʼ maʼ guirutiʼ zucaa lii guchaaluʼ ni runi creluʼ la? Zacaca nga pa gúʼyaluʼ guendarannaxhii stiʼ Jehová casi ti cosa ni cadi nagana rusiidiʼ Biblia, zacaneni lii para cadi guiníʼ íqueluʼ qué ganna Jehová ni cazaacaluʼ ne qué rizaaláʼdxibe lii. Yanna, guininu de ni bizéʼtenu ca.

5. ¿Ximodo randa rucaanáʼ ti binni ca cosa ni cadi jneza ni runi cré?

⁵ Dxi bizulú biʼniʼ estudiarluʼ Biblia, ¿xi gucané lii gusaana de guni creluʼ ca cosa ni cadi zeeda lu Biblia ni runi creluʼ yaʼ? Zándaca ni gucané lii nga ra bichaagaluʼ ni rusiidiʼ religión ra rieluʼ né ni rusiidiʼ Biblia. Guzéʼtenu ti ejemplu, zándaca dxiqué runi creluʼ Jesús nga Dios. Peru ra biʼniʼ estudiarluʼ Biblia, guníʼ íqueluʼ: «¿Ñee dxandíʼ nga ni runeʼ cré la?». Ngue runi biyúbiluʼ ni lu Biblia ne bidiiluʼ cuenta cadi dxandíʼ ni runi creluʼ que. Pur nga bisaana de guni creluʼ ni ne biʼniʼ creluʼ ni dxandíʼ: Jesús nga «ni bizáʼ Dios primé lade guiráʼ cosa» ne laabe nga «tobi lucha Xiiñiʼ Dios» (Col. 1:15; Juan 3:18). Zándaca guca nagana para lii gusaana de guni creluʼ caadxi cosa purtiʼ para lii zuhuaacani dxiichiʼ casi ti torre neca cadi zeedacani lu Biblia (2 Cor. 10:4, 5). Peru ora maʼ bisaana de guni crenu cani la? maʼ qué rudiʼnu lugar chuʼ xiixa ni gucaa laanu guibiguetaʼ guni crenu cani sti biaje (Filip. 3:13).

6. ¿Xiñee stale biaje riete diidxaʼ «qué ziuu dxi gusaana de gannaxhii» lu Salmo 136?

⁶ Zaqueca zanda gúniluʼ ora gudxiiluluʼ ti guendanagana ne ora guzulú guiníʼ íqueluʼ zándaca cadi nadxii Jehová lii. Galán guiníʼ íqueluʼ: «¿Ñee dxandíʼ nga la?». Despué bichaaga ni caníʼ íqueluʼ né ni rusiidiʼ Biblia de guendarannaxhii stiʼ Jehová ni riete lu Salmo 136:1, textu ra biree artículo riʼ. ¿Xiñee ná Jehová qué rirá guendarannaxhii stiʼ? Ne, ¿xiñee 26 biaje riete lu Salmo riʼ «qué ziuu dxi gusaana [Jehová] de gannaxhii»? Casi maʼ bidúʼyanu qué rusaana Dios de gannaxhii xquidxi ne nácani ti cosa risaca zeeda lu Biblia cásica risaca ca cosa ni cadi nagana ni biʼniʼ creluʼ. Nga runi, pa riníʼ íqueluʼ qué rizaalaʼdxiʼ Jehová lii nagueendacaʼ bicaanáʼ ni cásica bicaanaluʼ ca cosa ni cadi dxandíʼ zeeda lu Biblia.

7. ¿Gunáʼ nga caadxi textu ni rusihuinni dxandíʼ nadxii Jehová laanu?

⁷ Lu Biblia zeeda xcaadxi textu ni rusihuinni dxandíʼ peʼ nadxii Jehová laanu. Guidúʼyanu chupa de laacani. Gudxi Jesús ca discípulo stiʼ: «Jma risácatu que stale gorrión» (Mat. 10:31). Qué niníʼ diʼ Jesús: «Zándaca jma risácatu que stale gorrión». Ne Jehová peʼ gudxi xquidxi: «Zudieeʼ stipa lii. Ya, naa zacaniáʼ lii. Dxandíʼ peʼ zanaazeʼ dxicheʼ lii né nayaʼ ladu derechu ni runeniaʼ ni jneza» (Is. 41:10). Qué niníʼ diʼ Jehová: «Zándaca zacaniáʼ lii». Casi ridúʼyanu guiropaʼ textu riʼ cadi caníʼdicani zándaca nadxii Jehová lii, sínuque cayábicani lii nadxii Jehová lii. Nga runi ora gudxiiluluʼ xiixa guendanagana ne guzulú guiníʼ íqueluʼ pa nadxii Jehová lii, ca textu riʼ zacanécani lii guni sentirluʼ galán purtiʼ zaguucani gana lii ne zanna dxíchiluʼ nadxii Jehová lii. Guníʼ ique lu ca textu riʼ ne gudxi Jehová ni runi sentirluʼ. Pa gúniluʼ ni la? zanda guiniʼluʼ ni guníʼ ca xpinni Cristu de primé siglu que: «Nánnanu nadxii Dios laanu ne runi crenu ni» (1 Juan 4:16).a

8. ¿Xi zanda gúninu pa dede yanna runi crenu cadi nadxii Jehová laanu?

⁸ Pa dede yanna cadi nuuluʼ seguru nadxii Jehová lii la? bichaaga ni runi sentirluʼ ne ni nánnaluʼ. Neca guni sentirluʼ cadi nadxii Jehová lii peru nánnaluʼ cadi dxandíʼ ni purtiʼ rusiidiʼ Biblia nadxii Jehová laanu. Cadi guiaandaʼ laanu dxandíʼ guiráʼ ni zeeda lu Biblia, peru nuu biaje ni runi sentirnu zanda quíteni ladxidoʼno pa guni crenu cadi nadxii Jehová laanu. Pa guiníʼ íquenu cadi nadxii Jehová laanu, casi ñaca nininu cadi dxandíʼ ni rusiidiʼ Biblia ra ná: «Dios nga guendarannaxhii» (1 Juan 4:8).

GUINÍʼ ÍQUENU NADXII BIXHÓZENU LAANU

9, 10. ¿Xii ngue caníʼ Jesús ora gudxi ca discípulo stiʼ: «Bixhozeʼ piaʼ nadxii laatu»? (Juan 16:26, 27; laaca zanda gúʼyaluʼ ca imagen).

⁹ Sti cosa ni zacané laanu chuʼnu seguru nadxii Jehová laanu nga guiníʼ íquenu ni gudxi Jesús ca discípulo stiʼ: «Bixhozeʼ piaʼ nadxii laatu» (biindaʼ Juan 16:26, 27). ¿Xiñee guniʼbe zacá yaʼ? ¿Ñee guniʼbe ni para guni sentircaʼ galán la? Coʼ, pa guidúʼndanu caadxi diidxaʼ ni zeeda ante, zudiʼnu cuenta cadi caníʼdibe ni runi sentir ca discípulo stibe, sínuque caniʼbe de oración.

¹⁰ Casi biluxe gudxi Jesús ca discípulo stiʼ naquiiñeʼ guni orarcaʼ lu lá peru cadi guni orarcaʼ laabe (Juan 16:23, 24). Nabé risaca ganna ca discípulo ni. ¿Xiñee yaʼ? Purtiʼ cumu nabé guca xhamígucabe Jesús, zándaca despué de guiásabe de lade gueʼtuʼ zacaalaʼdxiʼ ca discípulo stibe guni orarcaʼ laabe ne cadi lu labe, zándaca guiníʼ íquecabe cumu guizáʼ nadxii Jesús laacabe la? ngue zucaa laa gucaadiaga ni guinábacabe laa ne maʼ laa gabi ni Bixhoze. Peru ne ni guníʼ Jesús riʼ, bisihuinni cadi jneza nga pa guiníʼcabe zacá ne gudxi laacabe: «Bixhozeʼ piaʼ nadxii laatu». Zacá ni, guizáʼ nadxii Jehová laanu ne laapebe nga rucaadiágabe ca oración stinu. Ne ndiʼ nga tobi de ca cosa ni cadi nagana rusiidiʼ Biblia de oración. Guni ique xiñee risaca gánnaluʼ ni. Ra biʼniʼ estudiarluʼ Biblia laaca binibiaʼluʼ Jesús ne gunnaxhiiluʼ laa (Juan 14:21). Peru, cásica ca discípulo de primé siglu que naquiiñeʼ gápaluʼ confianza zucaadiaga Jehová ca oración stiluʼ ne nadxiibe lii. Guiráʼ biaje guni orarluʼ Jehová cusihuínniluʼ dxandíʼ runi creluʼ nadxii Bixhózeluʼ ni nuu guibáʼ lii (1 Juan 5:14).

XI RUCAA LII GUINÍʼ ÍQUELUʼ CADI NADXII JEHOVÁ LII

11. ¿Xiñee riecheʼ Binidxabaʼ ora riníʼ íquenu cadi nadxii Jehová laanu?

¹¹ ¿Tu rucaa laanu guiníʼ íquenu cadi nadxii Jehová laanu? Zándaca nagueenda beeda ndaaniʼ íquenu Binidxabaʼ, ne dxandíʼ ni. Canayubi Binidxabaʼ guxuuxe cada tobi de laanu ne racaláʼdxibe guiníʼ íquenu cadi nadxii Jehová laanu (1 Ped. 5:8). Cadi guiaandaʼ laanu, cumu guizáʼ nadxii Jehová laanu la? bidii Xiiñiʼ para gatiʼ pur laanu, peru Binidxabaʼ racalaʼdxiʼ guni sentirnu cadi para laanu regalu ca o qué runi merecernu ni (Heb. 2:9). Yanna, ¿tuu nga riecheʼ ora guni sentirnu cadi nadxii Jehová laanu yaʼ? Binidxabaʼ. ¿Ne tuu nga riecheʼ ora runi sentirnu qué zanda gudxíʼlunu ca guendanagana ca yaʼ? Laaca Binidxabaʼ. Racaláʼdxibe guiníʼ íquenu cadi nadxii Jehová laanu ne qué zanda gusiéchenu laa peru cadi zacá ni ne laani nga tobi de ca trampa ni riquiiñebe para guxhélebe ca xpinni Cristu de Jehová (Efes. 6:11). Ra gudiʼnu cuenta xi racalaʼdxiʼ Binidxabaʼ rucaani laanu quixhe íquenu gucáʼlunu laabe (Sant. 4:7).

12, 13. ¿Xiñee ziuu biaje zucaa guendaruchee ca laanu guiníʼ íquenu cadi nadxii Jehová laanu?

¹² Cadi Binidxabaʼ si nga rucaa laanu guiníʼ íquenu cadi nadxii Jehová laanu. Laaca zanda guiníʼ íquenu ni purtiʼ gulenenu donda o binni ruchee laanu (Sal. 51:5; Rom. 5:12). Ne laani nga rucaani laanu guixélenu de Dios ni bizáʼ laanu, ne laaca maʼ bininani xquendabiaaninu, ladxidoʼno ne cuerpu stinu.

¹³ Laaca rucaa pecadu ca laanu guni sentirnu nápanu donda, qué guidxélanu xi gúninu, guidxíbinu ne guituílunu. Runi sentirnu guidapaʼ cosa riʼ ora gueeda gucheʼnu. Peru laaca zándaca guni sentirnu cani purtiʼ nácanu binni ruchee ne nánnanu cadi zacá diʼ nga bizáʼ Dios laanu (Rom. 8:20, 21). Cásica ti carru ni maʼ biete bi ti llanta stiʼ maʼ qué ruxooñeʼ galán zaqueca nga laanu cumu nácanu binni ruchee maʼ qué zanda gúninu biaʼ gudixhe ique Jehová ñúninu dxi bizáʼ binni guidxilayú. Nga runi ziuu biaje zaníʼ íquenu cadi nadxii Jehová laanu. Ora guiníʼ íquenu zacá cadi guiaandaʼ laanu naca Jehová ti «Dios nandxóʼ ni naquiiñeʼ guidxibi binni ne guni respetar [ . . . ] ne ni nadxii ca ni nadxii laa ne ca ni rinanda ca mandamientu stiʼ» (Neh. 1:5).

14. Ora guiníʼ íquenu bidii Jehová xiiñiʼ gatiʼ pur laanu, ¿ximodo racaneni laanu cadi guiníʼ íquenu cadi nadxii Jehová laanu? (Romanos 5:8; laaca zanda gúʼyaluʼ cuadru ni láʼ «Biiyaʼ cadi quiteʼ poder stiʼ pecadu lii»).

¹⁴ Zándaca ziuu biaje zuni sentirnu qué runi merecernu gannaxhii Jehová laanu. Ne pa guiníʼ ique chaahuinu ni la? qué runi merecernu ni, ne pur nga nabé risaca guendarannaxhii ni nápabe laanu. Ne neca qué zanda gúninu xiixa para guni ganarnu guendarannaxhii stiʼ Jehová la? laabe guizáʼ nadxiibe laanu, ngue runi bidiibe xiiñibe beeda gati pur laanu para ganda guixiá ca pecadu stinu (1 Juan 4:10). Cadi guiaandaʼ laanu beeda Jesús ndaaniʼ guidxilayú riʼ cadi para gulá binni sin donda, sínuque guti para ca binni ruchee (biindaʼ Romanos 5:8). Qué rinabaʼ diʼ Jehová laanu gúninu guiráʼ ca cosa ca biaʼsi peʼ purtiʼ nánnabe qué zanda gúninu cani. Ora guiene chaahuinu pur nácanu binni ruchee nga riníʼ íquenu cadi nadxii Jehová laanu la? nga rucaa laanu quixhe íquenu gudxíʼlunu ni riníʼ íquenu (Rom. 7:24, 25).

QUIXHE ÍQUENU CADI GUSAANANU JEHOVÁ

15, 16. Pa cadi guixélenu de Jehová, ¿xi de zanda chuʼnu seguru ne xiñee? (2 Samuel 22:26).

¹⁵ Ora guidxaagalunu xiixa guendanagana racalaʼdxiʼ Jehová guicaanu decisión jneza ne cadi guixélenu de laa (Deut. 30:19, 20). Ra cadi guixélenu de Jehová ziuʼnu seguru laaca qué zaxélebe de laanu ne qué zusaanabe laanu neca tídinu lu intiica si guendanagana (biindaʼ 2 Samuel 22:26).

¹⁶ Casi maʼ bidúʼyanu, ora guidxaagalunu guendanagana ni jma galán gúninu nga: cadi guiaandaʼ laanu nadxii Jehová laanu ne nuucabe listu para gacanebe laanu. Ne pa chuʼ biaje guiníʼ íquenu cadi nadxiibe laanu, galán guietenaláʼdxinu gadxé nga ni runi sentirnu ne gadxé nga ni nánnanu. Qué chuʼ ora gusaana de guni crenu ni ná Biblia: «Qué ziuu dxi gusaana de gannaxhii» Jehová laanu.