Ti artículo ni zacané ca gunaa ni cayuninácabe laacaʼ

Zacá ruzulú ti artículo ni nuu lu jw.org ni láʼ «Seguridad para la mujer: ¿Qué dice la Biblia?», ne ra riluxe artículo ca zeeda ti enlace para guni descargarluʼ ni lu PDF ti ganda guni imprimirluʼ ni ne guzeechuluʼ ni. Ti hermana de Estados Unidos ni láʼ Stacy guníʼ: «Bineʼ imprimir caadxi de laani ne yeniáʼ sti hermana ti lugar ra rápacabe ca gunaa ni nuu xquendanabani lu peligru ni riaana gaxha de congregación stinneʼ para gudiʼdu ni laacaʼ».

Ti gunaa ni runi dxiiñaʼ raqué gunabaʼ xcaadxi copia para quiʼziʼ ni lu ca gunaa ni nabeza raqué. Bisaanacabe 40 de laani ne laaca bisaanacabe 30 tarjeta de contactu stiʼ jw.org. Sti biaje bibiguétacabe, gunabaʼ gunaa ni runi tender lugar que laacabe guluíʼcabe ca ni nabeza raqué ximodo ridúʼndanenu binni Biblia.

Laaca nabé galán modo bidxaagalúcabe Stacy ne xhupa hermana sti lugar ra rápacabe ca gunaa, raqué gucuaacabe gaayuʼ copia stiʼ artículo que ne gunábacabe xcaadxi. Tobi de ca gunaa ni runi dxiiñaʼ raqué guníʼ: «Guizáʼ zacané folletu riʼ ca gunaa ni nabeza raríʼ. Caquíʼñepedu ni». Sti biaje biguétacabe, guca reunir stale de ca gunaa ni nabeza raqué para gúʼyacaʼ ximodo ridúʼndanenu binni Biblia, ne chupa de laacaʼ guniʼcaʼ nápacaʼ gana checaʼ ra Yoo stiʼ Reinu fin de semana que.

Stacy guníʼ: «Guizáʼ ridxagayaadu pabiáʼ cayuulaʼdxiʼ binni artículo riʼ. Ra guni imprimirdu artículo riʼ ne guzéʼchudu ni reeda gácani ti folletu nabé sicarú ni racané ca gunaa ni cayuninácabe laacaʼ para ganda guiziidicaʼ de Reinu stiʼ Dios. Guizáʼ biéchedu ora bidúʼyadu nabé guyuuláʼdxicabe artículo riʼ, ne guizáʼ maʼ racaláʼdxidu guidúʼyadu ximodo zaguu Jehová ndaayaʼ laadu pur stipa ni cayúnidu para guidxéladu xcaadxi modo chinedu ca noticia galán ra nuu ca binni riʼ».