Ni rinabadiidxaʼ ca ni ruundaʼ
¿Xii nga ni cá ique Jehová cuʼ ndaaniʼ ladxidóʼ ca gobiernu ca huidxe si?
Ndiʼ nga ni ruzeeteʼ Apocalipsis 17:16, 17 de ora guzulú gran tribulación, nani: «Chii cachu ni bíʼyaluʼ ne bestia salvaje que, zacananaláʼdxicaʼ prostituta que ne zunduuxecaʼ laabe ne zusaanacaʼ laabe xieeládibe. Zocaʼ xpeelabe ne zuzaaquicaʼ guidubi nácabe né bele. Purtiʼ guluu Dios ndaaniʼ ladxidoʼcaʼ gúnicaʼ ni cá íquebe, laani nga guni cumplircaʼ ni maca cá íquecaʼ: gudiicaʼ reinu sticaʼ bestia salvaje que dede ora maʼ guca cumplir ca diidxaʼ stiʼ Dios». Dxiqué bisiene ca publicación stinu ni cá ique Jehová cuʼ ndaaniʼ ladxidóʼ ca gobiernu ca nga gunduuxecaʼ guiráʼ ca religión ni cadi dxandíʼ.
Peru maʼ bidiʼdu cuenta naquiiñeʼ guchaʼnu modo riénenu ni. Ni cá ique Jehová cuʼ ndaaniʼ ladxidóʼ ca gobiernu ca nga «gudiicaʼ reinu sticaʼ bestia salvaje que». ¿Ximodo zaca cumplir ca diidxaʼ riʼ yaʼ? Para guiénenu ni nabé risaca guicábinu caadxi pregunta.
¿Tuu ndiʼ ca ni riete lu profecía riʼ? Riete de ti «prostituta», ne laca laabe nga «Babilonia guidxi roʼ», xaíque stiʼ guiráʼ religión ni qué rusiidiʼ ni dxandíʼ. Laaca riete de «ti bestia salvaje color naxiñáʼ rini», runi representarni ti organización ni biasa lu iza 1919 ni ruyubi chuʼ paz lu guidubi guidxilayú ne biree lani Sociedad de Naciones ne yanna riʼ maʼ lani Organización de las Naciones Unidas (Apoc. 17:3-5). Ne últimu riete «chii cachu» ni runi representar guiráʼ xixé gobiernu ni racané bestia salvaje ca.
¿Xi runi prostituta ne bestia salvaje color naxiñáʼ rini ca? «Dxiʼbaʼ» prostituta ca deche bestia salvaje ca, ndiʼ rusihuinni racané prostituta ca laame ne ruyubi gúnime ni ná.
¿Xi zazaaca prostituta ca yaʼ? Bestia salvaje ca ne chii cachu ni racané laa «zacananaláʼdxicaʼ prostituta que». Záxhacaʼ guiráʼ ni nápabe ne zusihuínnicaʼ nezalú guiráʼ pabiáʼ qué iquiiñebe. Ne zúnicaʼ ni maʼ gudixhe ique Jehová: zunduuxecaʼ laabe (Apoc. 17:1; 18:8). Racá nga guinitilú guiráʼ ca religión ni qué rusiidiʼ ni dxandíʼ. Peru, ante guizaaca nga, zucaa Jehová ca gobiernu ca gúnicaʼ xiixa ni qué huayuu dxi guizaaca biaʼ tiempu huabani binni lu guidxilayú.
¿Xi zucaa Jehová ca gobiernu ca gúnicaʼ? Casi maʼ bidúʼyanu, zaguube ndaaniʼ ladxidóʼ chii cachu que ni cá íquebe gúnibe: gudiicaʼ «poder ne autoridad sticaʼ bestia salvaje» color naxiñáʼ rini que, ni caninu nga zudiicabe ni Naciones Unidas (Apoc. 17:13). ¿Xi riníʼ ndiʼ yaʼ? ¿Ñee de ca gobiernu ca guiale guicaacaʼ decisión riʼ la? Coʼ, purtiʼ profecía ca ná Jehová peʼ nga zucaa laacabe gúnicabe ni (Prov. 21:1; bichaaga ni né Isaías 44:28). ¿Ñee chaahuidugá zudii ca gobiernu ca poder sticaʼ la? Coʼ, nagueenda ne málasi zúnicaʼ ni . Ne casi peʼ guicaa bestia salvaje riʼ autoridad ca, zúnime ni maʼ gudixhe ique Jehová, zunitilume guiráʼ xixé religión ni qué rusiidiʼ ni dxandíʼ.
Yanna, ¿xi cabézanu guizaaca huidxe yaʼ? Cadi naquiiñeʼ diʼ cuézanu guidúʼyanu lu noticia chaahuiʼ chaahuiʼ jma maʼ cayacané ca gobiernu ca Naciones Unidas. Ni naquiiñeʼ cuézanu guidúʼyanu nga nagueendaca ne málasi zaguu Jehová ndaaniʼ ladxidóʼ ca gobiernu ca gudiicaʼ poder sticaʼ bestia salvaje ca. Ora guizaaca ndiʼ, zánnanu mayaca guzulú gran tribulación. Ne laga cabézanu guizaaca ni, «gatananu ne cuʼ xpiaaninu», ¡purtiʼ nagueenda ne málasi zuchaa ca cosa ca! (1 Tes. 5:6).