Ñee riuuluʼ nayecheʼ ora ruundaluʼ Biblia la?
SICARÍʼ guníʼ Lorraine: «Dxi maʼ bizuluáʼ cayuundaʼ Biblia gatigá la? guizáʼ riree gana, lugar de ñuaaʼ nayecheʼ. Raca nagana para naa guieneʼ ni, ngue runi nagueendaca riuu xcaadxi cosa ndaaniʼ iqueʼ».
Stale xpinni Cristu laaca guyuucaʼ casi maʼ bizéʼtenu ca. Peru qué nireecabe gana, purtiʼ nánnacabe jneza ngue ni cayúnicabe. Marc guníʼ: «Neca maʼ gulee binni tiempu para guʼndaʼ Biblia, nuu tiru nagueendaca nga riuu xcaadxi cosa ni guni binni, ne pur laacani maʼ qué zuundaʼ Biblia ora maʼ gudixhe guni ni. Nga runi, gupa xidé bineʼ orar Jiobá stale biaje ne bineʼ stale stipa para beeda guiaaʼ guundaʼ Stiidxaʼ Dios guiráʼ dxi».
Xi zanda guʼnuʼ para gannaxhiiluʼ Stiidxaʼ Dios jma yaʼ. Xi zanda gacané lii para chuuláʼdxiluʼ gúʼndaluʼ ni yaʼ. Guidúʼyanu caadxi conseju ni zanda gacané lii.
Gudixhe xi zanda guʼnuʼ ne biyubi ximodo gaca cani
Biʼniʼ orar ante guzululuʼ ne cadi guiníʼ íqueluʼ sti cosa ora maʼ cayuundaluʼ. Gunabaʼ Jiobá gacané lii para chuuláʼdxiluʼ gúʼndaluʼ ne guiéneluʼ Biblia ne guxhélebe xquendabiaaniluʼ ne ladxidoʼloʼ para guiene chaahuiluʼ guiráʼ ni rusiidibe (Sal. 119:34). Pa qué guʼnuʼ ni la? nagueenda zadxágaluʼ ne zareeluʼ gana. Lynn guníʼ: «Nuu tiru nabé nagueenda ruundaʼ ne qué rudieeʼ cuenta de stale cosa galán ni caquiiñeʼ guiziideʼ; dede nin qué randa ruuyaʼ xii nga cani jma cuzeeteʼ tema ni cayuundaʼ. Ne riuu xcaadxi cosa lu xquendabiaaneʼ. Nga runi, rinabaʼ Jiobá gacané naa ne chinandaʼ ora gudixheʼ guundaʼ xiixa».
Bisisaca ni caziidiluʼ. Cadi guiaandaʼ ndiʼ lii, zacaaluʼ guendanabani ni qué zaluxe pa guiene chaahuiluʼ ca conseju zeeda lu Biblia ne gúniluʼ ni na cani. Nga runi naquiiñeʼ gúniluʼ stipa pur guidxélaluʼ xiixa ni zanda gacané lii lu xquendanabániluʼ. Sicaríʼ guníʼ Chirs: «Ruyubeʼ ca cosa ni zacané naa guchaa modo naa ne modo riníʼ iqueʼ. Riuuladxeʼ guidxelaʼ lu Biblia ne lu ca guiʼchiʼ ni rudii xquidxi Dios xiixa conseju ni zacané naa órapeʼ caquiiñeʼ ni. ¡Qué huayuu dxi ndaʼ gunebiaʼyaʼ ca binni ni rucaa ca guiʼchiʼ ca!».
Gudixhe guʼnuʼ xiixa ni zanda ugaanduʼ. Gudixhe ique guiziiduʼ xiixa cosa nacubi de ca hombre ne ca gunaa ni ruzeeteʼ Biblia. Zadxeʼluʼ stale cosa ni ziuuláʼdxiluʼ de laacabe lu Perspicacia para comprender las Escrituras o lu Índice de las publicaciones Watch Tower. Pa guiníʼ íqueluʼ gúcacabe binni casi lii, gannuʼ ximodo laacabe ne laaca biʼniʼ sentírcabe ni runi sentirluʼ la? jma stale cosa galán zaziidiluʼ de laacabe.
Biyubi xcaadxi razón ni rudii Biblia para gusiéneluʼ binni. Nga nga ni ricá ique Sophia guni ora maʼ cayuundaʼ: «Ruyubeʼ xcaadxi cosa nacubi ni zanda iquiiñeʼ ora maʼ chigucheecheʼ diidxaʼ ne ora maʼ nuaaʼ sti lugar. Zacá jma nayaguieʼ modo rusieneʼ cani zeeda lu Biblia. Nabé racané revista Torre stiʼ ni rapa naa para ganda guiziideʼ stale cosa» (2 Tim. 2:15).
Bixuiʼlú ca relatu stiʼ Biblia. Hebreos 4:12 na: «Stiidxa Dios la? rudii enda nabani laanu». Ora maʼ cayuundaluʼ ca historia zeeda lu Biblia, bixuiʼlú cayuuyaluʼ cayaca cani. Guníʼ ique cayuuyaluʼ ca binni ca, cayunadiágaluʼ laacabe ne cayuni sentirluʼ ni biʼniʼ sentírcabe. Gunabadiidxaʼ laca lii: «Ñee laaca cásica ni bizaacacabe nga ni cazaacaʼ yanna la? Ximodo zanda guneʼ casi bíʼnicabe ora tiideʼ lu xiixa guendanagana yaʼ». Pa guʼnuʼ zacá la? zacané nga lii para guiene chaahuiluʼ ca relatu ca ne guietenaláʼdxiluʼ cani.
Biindaʼ de ca tema nagana zeeda lu Biblia ne ca libru o revista ni cusiene de laani. Ora maʼ chiguundaluʼ stúbiluʼ la? biquiiñeʼ tiempu biaʼ caquiiñeʼ para cada tema. Ne ora guidxeʼluʼ xiixa ni chuulaʼdxuʼ la? biindaʼ jma de laani. Laaca zanda guyubuʼ xi riníʼ ca diidxaʼ ni qué runibiaʼluʼ, ne pa napuʼ ti Biblia ni napa nota ñee yaza ne referencia la? biquiiñeʼ cani ora maʼ cayuundaluʼ. Ora jma maʼ ziziidiluʼ ne maʼ ziyuʼnuʼ cani lu xquendanabániluʼ la? ra tiidiʼ dxi jma ziécheluʼ ora gúʼndaluʼ Stiidxaʼ Dios. Óraca maʼ zanda guni stiluʼ ca diidxaʼ gudxi salmista que Jiobá ora guníʼ: «Maʼ gucuaaʼ cani rusietenaláʼdxiluʼ naa ne qué ziuu dxi gundaa cani, purtiʼ laacani nga ni rusiecheʼ ladxiduáʼ» (Sal. 119:111).
Cadi gúʼndaluʼ nagueenda purtiʼ si nuuluʼ guilúxeluʼ. Cadi gúʼndaluʼ nagueenda, peru bietenalaʼdxiʼ laaca naquiiñeʼ cueeluʼ tiempu para gúʼndaluʼ ni ridiʼdiʼ lu ca guendaridagulisaa. Sicaríʼ guníʼ Raquel: «Nuu tiru runeʼ sentir nabé nuu stale cosa ni ruchiiñaʼ naa, ne nagueenda riuu xcaadxi cosa lu xquendabiaaneʼ. Nga runi ora guundaʼ la? qué ruundaʼ diaʼ xadxí. Zacá jma stale riziideʼ cada guundaʼ». Yanna Chirs guníʼ: «Ruchiiñaʼ xquendabiaaneʼ naa ora ruundaʼ lugu lugu, purtiʼ qué riaana gastiʼ ndaaniʼ iqueʼ ne qué rindá ni ndaaniʼ ladxiduáʼ». Yanna, xi naquiiñeʼ guʼnuʼ yaʼ. Gulee biaʼ tiempu zaquiiñeluʼ para laani.
Biyubi ximodo chuuláʼdxiluʼ gúʼndaluʼ Stiidxaʼ Dios. Apóstol Pedru bidii conseju riʼ: «Lagaca casi baʼdu deru gule, ruluiʼlaʼdxi gue leche. Zacaca laatu lauluiʼlaʼdxi ganna tu stiidxa Dios ti jma rusi guiene tu para ilá tu» (1 Ped. 2:2). Ora gale ti baʼduhuiiniʼ la? maca riuulaʼdxiʼ gueʼ niidxi stiʼ jñaa, peru laanu cadi zacá diʼ laanu, nga runi naquiiñeʼ guyúbinu ximodo chuuláʼdxinu guidúʼndanu Stiidxaʼ Dios, ni zeeda gaca casi guendaró para laanu. Pa guiaaluʼ gúʼndaluʼ neca ti yaza stini guiráʼ dxi la? chaahuiʼ chaahuiʼ zaxeleʼ ladxidoʼloʼ ne despué ziuuláʼdxiluʼ gúʼndaluʼ jma. Zándaca gácani nagana para lii ora guzululuʼ, peru qué zandaa maʼ ziécheluʼ ora guʼnuʼ ni.
Guníʼ ique lu cani ruundaluʼ. Laaca galán guiníʼ ique binni de cani ruundaʼ lu Biblia, purtiʼ zacaneni laa guchaaga ni maca biziidiʼ né xcaadxi ni deruʼ caziidiʼ. Ra zidiʼdiʼ dxi zaziidiluʼ stale cosa nabé sicarú ni zacané lii gánnaluʼ jma, ne zeeda gácani casi ora ñapuʼ ti bigáʼ de perla chaʼhuiʼ (Sal. 19:14; Pro. 3:3).
Cadi pur gana si tiempu iquiiñeluʼ
Nagana para guiaa binni guʼndaʼ ne guiene Biblia, peru galán cani ribeendú binni ora rúnini. Tobi de laacani nga: jma ziéneluʼ cani rusiidiʼ Dios laanu (Heb. 5:12-14). Ne laaca jma ziéneluʼ ne zapuʼ guendabiaaniʼ ni caquiiñeʼ para chuʼluʼ nayecheʼ, ne gatadxí ladxidoʼloʼ. Bietenalaʼdxiʼ, guendabiaaniʼ rudii Stiidxaʼ Dios zeeda gácani casi «ti yaga ni rudii guendanabani» para cani qué rixeleʼ de laani ne runi ni na ca conseju stini (Pro. 3:13-18).
Pa cueeluʼ tiempu para gúʼndaluʼ Stiidxaʼ Dios ne guiéneluʼ ni la? zácaluʼ ti binni ni napa ti ladxidóʼ nuu xpiaaniʼ (Pro. 15:14). Zacá zannuʼ lu Biblia nga zeeda guiráʼ conseju gudiiluʼ binni. Ora quixhe íqueluʼ gúniluʼ xiixa biquiiñeʼ ca conseju ni zeeda lu Stiidxaʼ Dios ne cani zeeda lu ca guiʼchiʼ rudii «mozo ni nuu xpiaaniʼ ne ni runi jneza». Pa guʼnuʼ zacá la? zatadxí ladxidoʼloʼ ne xquendabiaaniluʼ pur guiráʼ ni guiziidiluʼ de lu Stiidxaʼ Dios (Mat. 24:45). Ne zeeda gácaluʼ ti binni ni ruuyaʼ ximodo jma jneza gaca xiixa ne ziuuláʼdxiluʼ gúniluʼ ni na Dios. Ne ni jma galán, zabeenduluʼ stale cosa ora gúniluʼ xhiiñaʼ Jiobá (Sal. 1:2, 3).
Ora nabé nadxii binni Jiobá la? rucaani laa guiníʼ de ni runi cré. Dxiiñaʼ riʼ laaca ruchani ladxidóʼ binni de guendanayecheʼ. Shopia maʼ gudixhe ique guietenalaʼdxiʼ ne iquiiñeʼ caadxi versículo para gucaa binni chuulaʼdxiʼ gucaadiaga laa ora maʼ zigucheeche diidxaʼ; yanna jma maʼ galán modo rucheechebe diidxaʼ ne rusiécheni laabe. Laabe guniʼbe: «Nabé riecheʼ ora ruuyaʼ runi sentir binni galán ora ruundaʼ Biblia».
Yanna, xii nga ni jma galán zabeenduluʼ pa chuuláʼdxiluʼ gúʼndaluʼ Biblia yaʼ. Jma zaca xhamíguluʼ Jiobá. Ora gúʼndaluʼ Biblia jma zacaneni lii guiéneluʼ cani racalaʼdxiʼ Dios gúniluʼ ne jma zunibiaʼluʼ ca guenda stibe, casi guendarannaxhii, modo riuuláʼdxibe gudiibe ne modo rúnibe jneza. Gastiʼ sti cosa ni jma gusiecheʼ binni que laani. Nga runi, gulee tiempu para gúʼndaluʼ ne guiéneluʼ Stiidxaʼ Dios. Laani nga tobi de cosa ni jma galán guʼnuʼ lu xquendanabániluʼ (Sal. 19:7-11).
[Cuadro ne dibuju/foto ni zeeda lu yaza 5]
CANI ZANDA QUIXHE ÍQUELUʼ ORA GÚʼNDALUʼ BIBLIA NE MODO GUʼNUʼ NI
▪ Biʼniʼ orar ante guzululuʼ ne cadi guiníʼ íqueluʼ sti cosa ora maʼ cayuundaluʼ.
▪ Bisisaca ni caziidiluʼ.
▪ Gudixhe guʼnuʼ xiixa ni zanda ugaanduʼ.
▪ Biyubi xcaadxi razón ni rudii Biblia para gusiéneluʼ binni.
▪ Bixuiʼlú ca relatu stiʼ Biblia.
▪ Biindaʼ de ca tema nagana zeeda lu Biblia ne ca libru o revista ni cusiene de laani.
▪ Cadi gúʼndaluʼ nagueenda purtiʼ si nuuluʼ guilúxeluʼ.
▪ Biyubi ximodo chuuláʼdxiluʼ gúʼndaluʼ Stiidxaʼ Dios.
▪ Guníʼ ique lu cani ruundaluʼ.
[Dibuju/foto ni zeeda lu yaza 4]
Bixuiʼlú nuuluʼ ra guca xiixa relatu ni zeeda lu Biblia