Zaquiiñenu ti dxi para gábinu binni guidúʼndanenu laa de Biblia
1 Ra guiuʼnu beeu enero la? guiráʼ ca binni ridagulisaa zaquiiñecaʼ ti sábadu o ti domingu stiʼ cada beeu para gábicaʼ binni pa zuundanécabe laa de Biblia, zanda gúnicabe ni ra guiluxe primé semana stiʼ guiráʼ beeu. Zanda gácani dxi jma riree ca binni ridagulisaa. Pa qué naʼ binni ca gúʼndaneluʼ laa de Biblia la? zanda gusaananeluʼ laabe libru Xipeʼ ndiʼ cusiidiʼ Biblia o ca revista jma nacubi. Guiráʼ ca binnigola ne ca siervu ministerial naquiiñeʼ quixhe íquecaʼ guireecaʼ dxi gácani ne gacanecaʼ guiráʼ cani rucheeche diidxaʼ para guzulú gúʼndanecaʼ tuuxa de Biblia.
2 Grupu ni Ruuyaʼ Dxiiñaʼ stiʼ ca Binni Ridagulisaa nga zaguixhe xi sábadu o xi domingu gaca dxiiñaʼ riʼ. Gatigá naquiiñeʼ gusietenaláʼdxicabe ca binni ridagulisaa chuʼcaʼ listu para gábicaʼ binni pa zuundanécabe laacaʼ de Biblia ora chigucheechecabe diidxaʼ de yoo pur yoo ne ora chigánnacabe ca binni ni racalaʼdxiʼ guiziidiʼ jma de Dios.
3 Ximodo chuʼnu listu. Zanda gúʼndaluʼ cani zeeda lu ni rizaané Xhiiñaʼ Reinu ni Rúninu stiʼ enero 2006 ne yaza 11 ne 12 stiʼ libru Razonamiento. O laaca zanda iquiiñeluʼ ti tratadu, casi Ñuuláʼdxiluʼ ñánnaluʼ xi riníʼ Biblia de cani huanabadiidxaluʼ la? Ne lu Xhiiñaʼ Reinu ni Rúninu stiʼ agosto 2007 yaza 3, zeeda caadxi de cani zanda guininu para guzulú guidúʼndanenu ca binni ni biaanané ca revista ca. Ca binnigola ne ca siervu ministerial ca zanda gúnicaʼ guendaridagulisaa riʼ ante guireeche diidxaʼ, zácani biaʼ chii o quince minutu. Zaniʼbe ximodo gácani o zutiidibe tobi o chupa modo zanda guinínenu binni para guzulú guidúʼndanenu laa de Biblia.
4 Cadi galán diʼ guiníʼ íquenu guiráʼ binni nga zaná guidúʼndanenu laa de Biblia, ne pa chuʼ tu chuulaʼdxiʼ la? galán gánnanu zándaca despué maʼ qué zaná. Peru qué riquiiñeʼ diʼ guireʼnu gana pur nga, purtiʼ Jiobá nga racané ca binni nachaʼhuiʼ ca para chuʼcaʼ ndaaniʼ xquídxibe (Juan 6:44). Laanu qué rucheechesinu diidxaʼ, sínuque laaca rigánnanu binni para gacanenu laacaʼ guiniisicaʼ lu Stiidxaʼ Dios. Nga runi, galán guidúʼndanenu guiráʼ ca binni ni nayá ladxidóʼ de Biblia. Cadi guiaandaʼ lii «tobi si runi né [n]u Dios dxiiñaʼ» ora rúninu zacá (1 Cor. 3:9).