Stiidxaʼ Dios nuu para gusiidiʼ laanu
1. Xi láʼ guendaridagulisaa de chupa gubidxa stiʼ iza dxiiñaʼ 2014, ne xi guendarinabadiidxaʼ zacábicabe luni.
1 Jiobá nga maestru «Ni jma nanna gusiidiʼ» ni nuu guibáʼ ne lu guidubi naca Guidxilayú (Is. 30:20, 21). Ximodo rusiidiʼ Jiobá laanu yaʼ. Laabe bisaanabe Biblia, ti libru ni qué liica zanda guchaaganu né xcaadxi libru para gusiidibe laanu. Ximodo zanda gacané cani rusiidiʼ ni laanu para chuʼnu nazaaca, guiníʼ íquenu ni zacané laanu chuʼnu nayecheʼ, guni sentirnu galán ne chuʼnu gaxha de Jiobá yaʼ. Zacábicabe guendarinabadiidxaʼ ca lu guendaridagulisaa de chupa gubidxa ni zápanu lu iza dxiiñaʼ 2014, ni láʼ «Stiidxaʼ Dios nuu para gusiidiʼ laanu», tema ca biree ni lu 2 Timoteo 3:16.
2. Xi guendarinabadiidxaʼ zanda gacané laanu gánnanu gunáʼ nga cani jma chiguieeteʼ lu guendaridagulisaa riʼ.
2 Cani jma chiguieeteʼ lu guendaridagulisaa riʼ. Ca guendarinabadiidxaʼ zeeda raríʼ zacanécani laanu gánnanu xii nga cani jma chiguieeteʼ lu guendaridagulisaa riʼ:
• Ximodo racané cani rusiidiʼ Dios laanu lu xquendanabáninu (Is. 48:17, 18).
• Xi zacaanu pa gúninu stipa pur guchaʼnu modo nabáninu ti gúninu jma lu xhiiñaʼ Jiobá (Mal. 3:10).
• Xi naquiiñeʼ gúninu pa chuʼ tu gusiidiʼ laanu gadxé de ni rusiidiʼ Stiidxaʼ Dios (Heb. 13:9).
• Xi zanda gúninu para gusíʼdinu «modo bisiidi» Jesús (Mat. 7:28, 29).
• Xiñee naquiiñeʼ gusiidiʼ cani rusiidiʼ ndaaniʼ neza binni ridagulisaa laca laacaʼ (Rom. 2:21).
• Xi para riziidiʼ binni Stiidxaʼ Dios (2 Tim. 3:16).
• Xi ndaayaʼ ricaa binni guidxilayú pur cuniibi dxacha Dios guiráʼ guidxi roʼ (Hageo 2:6, 7).
• Xi nanna Jiobá zanda gúninu (Efes. 5:1).
• Xiñee naquiiñeʼ gúninu stipa pur chinándanu guiráʼ ni rusiidiʼ Jiobá laanu (Luc. 13:24).
3. Xiñee nabé risaca gucaʼdiáganu guiráʼ xixé libana chitiidiʼ lu guendaridagulisaa riʼ.
3 Ca diidxaʼ ni cá ante de versículo ra biree lá guendaridagulisaa riʼ, cusiene cani ximodo zabani binni lu ca últimu dxi riʼ. Ne de ca dxi riʼ nga caníʼ Pablu ora bicaa ca diidxaʼ riʼ: «Peru cani canauchee ne canausiguii la? ze dxi jma rusi zinitilú caʼ. Caguite ca binni ne caguite binidxaba laacaʼ» (2 Tim. 3:13). Pa qué racaláʼdxinu chuʼ tu quiteʼ laanu la? naquiiñeʼ gucaʼdiáganu Dios ne gúninu ni na. Nga runi galán gúninu stipa pur gucaʼdiáganu guiráʼ xixé libana chitiidiʼ lu guendaridagulisaa riʼ.