Nagueendaca chuunu ra nuu binni riuulaʼdxiʼ guiziidiʼ

Dede dxi biʼniʼ chaahuicabe sitiu ni nápanu lu Internet, jma stale binni gunabaʼ gúʼndanenu laa Biblia. Ca modo nacubi nexheʼ gucheechenu diidxaʼ ra nuu stale binni laaca huayacanécani chuulaʼdxiʼ binni guiziidiʼ de Dios. Ora chindá xiixa solicitud Betel, nagueendaca runi tendércabe ni. Pa chindá cani lu sitiu jw.org la? rindaa Betel chupa si gubidxa para guiniʼné binnigola stiʼ congregación ni naquiiñeʼ guni tender ni. Peru nuu tu huaníʼ nuu biaje ridiʼdiʼ chupa chonna semana para chiganna ca Testigu tuuxa binni ni gunabaʼ guiziidiʼ de Biblia. Xi zanda gúninu para chiganna tuuxa ca binni ca nagueendaca ante guireecaʼ gana guiziidicaʼ de Dios yaʼ (Mar. 4:14, 15).

Pa guidxaagaluʼ ti binni ni cadi nabeza neza ra rucheecheluʼ diidxaʼ peru riuulaʼdxiʼ guiziidiʼ de Dios la? nagueendaca naquiiñeʼ guchaluʼ formulario ni láʼ Sírvase visitar (S-43) ne gudiiluʼ ni secretariu stiluʼ, pa ganda sti reunión cheluʼ ca. De racá, biaʼ chupa si gubidxa, laabe zudiibe ni congregación ni naquiiñeʼ chiganna binni ca o guseendabe ni Betel lu sitiu jw.org lu pestaña ra na Congregación. Ne ca binnigola ca naquiiñeʼ gatigá chuʼcaʼ lu sitiu ca. Pa gabi Betel laacabe nuu tuuxa ni cabeza chiganna ti Testigu laa la? nagueendaca naquiiñeʼ chigánnacabe binni ca. Ne publicador chiganna binni ca naquiiñeʼ guizaalaʼdxiʼ laabe. Pa qué guidxela laabe ra lídxibe, zanda gusaana ti guiʼchihuiiniʼ ra ca tu láʼ, númeru de teléfono o correu stiʼ para guiníʼnebe laa ora ganda.