Ndaa Ra Rinabadiidxaʼ

◼ Tuu nga cani naquiiñeʼ guinabaʼ chigánnacabe laa o guinabaʼ xiixa libru o revista pur Internet o guchá ti cupón ra canabaʼ cani

Stale de ca guiʼchiʼ ni ribee xquidxi Jiobá nápacani ti cupón ni zanda guchá binni para guinabaʼ xiixa libru ne revista o cheʼ ti testigu stiʼ Jiobá chiganna laa. Laaca zanda guinábacabe lu sitiu www.watchtower.org cheʼ tu guʼndané laacabe de Biblia. Pur laacani stale binni maʼ biziidiʼ de Dios. Peru zándaca chuʼ guendanagana ora guchá tuuxa de cani rucheeche diidxaʼ guiʼchiʼ riʼ ne gucaacaʼ ni lá tuuxa xhamígucaʼ o binnilídxicaʼ.

Casi ora chindá ca libru ne ca revista ca ra nuu binni ni qué ninabaʼ cani la? stale de laacaʼ riniʼcaʼ nabé riziñe xquidxi Jiobá laacaʼ ne riníʼ íquecaʼ nuu ti lista ra cá pa neza ralídxicaʼ, ngue runi rindá ca guiʼchiʼ ca ra nuucaʼ. Ne chupa chonna de cani rucheeche diidxaʼ ni huayuni tender ca guiʼchiʼ ra canabaʼ binni chigánnacabe laa, huaxiéʼ galán runi sentircaʼ ora gúʼyacaʼ guidxiichi ca binni ni qué ninabaʼ chigánnacabe laacaʼ. Nga runi, nin tobi de cani rucheeche diidxaʼ cadi naquiiñeʼ guchá xiixa cupón o guinabaʼ xiixa pur Internet lu lá sti binni; binni si ni riuulaʼdxiʼ guiziidiʼ ca nga naquiiñeʼ gúnini. Galán gánnanu qué ricabi diʼ Betel ca guiʼchiʼ ra canábacabe xiixa ora rihuínnica canábacabe ni lu lá sti binni.

Yanna, xi zanda gúniluʼ para gacaneluʼ tuuxa binnilídxiluʼ o tuuxa binni ni runibiaʼluʼ para chuʼ gaxha de Dios yaʼ. Pa racaláʼdxiluʼ guicaabe xiixa libru o revista la? jma galán guseendaluʼ cani ra nuube cásica rúniluʼ ora rusigáʼdeluʼ laabe xiixa. Pa riuulaʼdxiʼ binni ca guiziidiʼ jma de Dios ne racalaʼdxiʼ chiganna ti Testigu laa la? biyubi ca binnigola ni nuu ndaaniʼ ca neza binni ridagulisaa ni rucheeche diidxaʼ neza ra nabeza binni ca. Ne pa qué ganda guidxélaluʼ ca binnigola ca, galán guchaluʼ guiʼchiʼ ni láʼ Sírvase visitar (S-43-S) ne bidiini secretariu stiʼ ca binni ridagulisaa, laa zuuyaʼ pa jneza gúcani ne zuseendaʼ ni Betel. Cadi galán diʼ iquiiñeluʼ lá tuuxa binni ni nuu ndaaniʼ cárcel para gucaaluʼ xiixa carta Betel, o ni nuu xiixa lugar ra racanécabe binni gusaana xiixa viciu o ni nuu ndaaniʼ ti hospital. Jma galán gábiluʼ binni ca guiniʼné ca xpinni Cristu ni riganna ca lugar ca o laapebe gucaabe Betel.