Ndaa ra rinabadiidxaʼ
◼ Ñee zanda iquiiñenu Internet para guni predicarnu ca binni ni qué runibiaʼnu ni nabeza sti guidxi o guidúʼndanenu laacaʼ Biblia la?
Nuu publicador riquiiñeʼ Internet para gudii estudiu binni ni nabeza ndaaniʼ ca guidxi ra qué lica riná gobiernu gaca xhiiñaʼ Reinu o ndaaniʼ ca guidxi ra gástipeʼ Testigu. Ne nuu tiru huabeendúcabe stale cosa galán. Peru zándaca chuʼ ca publicador riʼ ra naxoo pa gudiicaʼ correu electrónicu sticaʼ ti binni ni qué runibiaʼcaʼ o güínecaʼ laacabe diidxaʼ lu Internet (biiyaʼ Xhiiñaʼ Reinu ni Rúninu julio 2007, yaza 11). Neca racaláʼdxinu ganna binni ni nayá ladxidóʼ xi chiguni Reinu, peru zándaca sin gudiʼnu cuenta guidxaaganu binni malu o dede né ca apóstata (1 Cor. 1:19-25; Col. 2:8). Sti cosa ni naquiiñeʼ gánnanu nga zándaca guʼyaʼ gobiernu ni cuséʼndanu ra nuu ca binni ni nabeza ndaaniʼ ca lugar ra qué lica rinácabe gaca xhiiñaʼ Reinu o ra qué rinácabe gaca caadxi de ca cosa rúninu. Ne pur nga chuʼ xquendanabani ca Testigu nabeza ndaaniʼ guidxi ca ra naxoo. Nga runi, cadi guyúbinu binni de xcaadxi guidxi lu Internet para güínenu laacaʼ ca diidxaʼ nacubi ne galán.
Pa guni predicarnu ti binni de sti ladu ni zeeda ganna xquídxinu la? cadi naquiiñeʼ gusíʼdirunu laa de Biblia ora guibiguetaʼ ra lidxi, peru zanda gúninu ni pa náʼ sucursal stinu. Jma galán gusíʼdinu binni ca iquiiñeʼ jw.org para guyubi xiixa publicación o para gucaa ra nuu sucursal ruuyaʼ dxiiñaʼ raca ndaaniʼ xquidxi. Pa gaxha riaana chupa chonna Yoo stiʼ Reinu de ra nabézabe la? zanda cuʼnu gana laabe chebe chigánnabe cani ridagulisaa ndaaniʼ cani. Pa málasi racaláʼdxibe chiganna ca Testigu laabe la? guinábanu datu stibe pa nabe ne gudiʼnu ni secretariu stinu, maʼ laa guseendaʼ ni Betel lu sitiu jw.org. Sucursal ni ruuyaʼ dxiiñaʼ raca xquídxibe jma zanda gacané laabe, purtiʼ laa nanna ximodo raca dxiiñaʼ lugar ca (biiyaʼ Xhiiñaʼ Reinu ni Rúninu junio 2014, yaza 6 ne Xhiiñaʼ Reinu ni Rúninu noviembre 2011, yaza 2).
Pa chindeza ti binni ni maca rigánnanu sti guidxi, o pa rudiʼnu estudiu ti binni de sti guidxi ne lu Internet si runibiaʼnu laa la? naquiiñeʼ gúninu casi bieeteʼ lu párrafo gudiʼdiʼ ca. Peru cadi gusaana de gacanenu ca binni riʼ dede ora chiganna ti publicador ni nabeza xquídxicaʼ laacaʼ. Ne pa nabeza binni ca ndaaniʼ ti guidxi ra qué lica riná gobiernu gaca xhiiñaʼ Reinu o ra qué rinácabe gaca caadxi de ca cosa rúninu la? naquiiñeʼ chuʼnu cuidadu pa chiguzéʼtenu xiixa tema stiʼ Biblia lu carta stinu, ora chiguininu pur teléfono o chiguséʼndanu mensaje electrónicu (Mat. 10:16).