Dxiiñaʼ ni zanda guni Jesús si lu cani naguixhe ique Dios guni
«Naa nga neza ca, ne rusiide ni dxandíʼ ne rudiee enda nabani ni qué zaluxe. Iruti zie ra nuu Bixhoze pa cadi pur naa.» (JUAN 14:6.)
1, 2. Xiñee naquiiñeʼ guidúʼyanu xi dxiiñaʼ risaca chiguni Jesús lu cani naguixhe ique Dios guni.
L U CA iza maʼ gudiʼdiʼ ca, stale binni huaguixhe ique guisaca jma lu dxiiñaʼ stiʼ, peru huaxiéʼ si tu huagaanda ni. Caadxi si binni nga zanda guiníʼ nabé risaca ni huayúnicaʼ ne guirútiruʼ tu huayuni ni casi laacaʼ. Peru Jesucristu, Xiiñiʼ Dios la? laasibe nga zanda gúnibe stale cosa ni guirutiʼ zanda guni.
2 Xiñee naquiiñeʼ guiduʼndaʼ chaahuinu de dxiiñaʼ ni zanda guni Jesús si yaʼ. Purtiʼ pa qué gúninu ni zándaca maʼ cadi chuʼnu galán ne Jiobá. Jesús guníʼ ca diidxaʼ riʼ: «Naa nga neza ca, ne rusiide ni dxandíʼ ne rudiee enda nabani ni qué zaluxe. Iruti zie ra nuu Bixhoze pa cadi pur naa» (Juan 14:6; 17:3). Yanna, guidúʼyanu xiñee Jesús si nga zanda guni dxiiñaʼ ni gucuaa para gaca cani naguixhe ique Dios guni, purtiʼ zacá ziénenu cani ne zusisácanu cani.
Jesús nga «tobi lucha Xiiñi» Dios
3, 4. 1) Xiñee zanda guininu Jesús nga tobi lucha Xiiñiʼ Dios. 2) Xiñee gástiruʼ stobi casi Jesús.
3 Cadi naca si Jesús xiiñiʼ Dios, sínuque «tobi lucha Xiiñi» Dios laabe (Juan 3:16, 18). Lu diidxaʼ griegu biquiiñecabe ti diidxaʼ para bitíxhicabe diidxaʼ «tobi lucha» ca. Ne laani riniʼni «gástiruʼ stobi casi laabe». Yanna, cumu napa Jiobá stale ángel ne laaca xiiñibe laacaʼ la? xiñee zanda guininu gástiruʼ stobi casi Jesús yaʼ.
4 Gástiruʼ stobi casi Jesús purtiʼ Bixhózepebe bizáʼ laabe. Laabe «maca nuu[be] ante cha irá xixé ni nuu», ne despué «de laa[be] zeeda irá ni bizáʼ Dios» (Col. 1:15; Apo. 3:14). Laaca guirútiruʼ stobi casi Jesús purtiʼ neca Jiobá nga ruzáʼ guiráʼ xixé cosa la? biquiiñeʼ laabe ora bizáʼ cani (biindaʼ Juan 1:3). Apóstol Pablu bicaa ca diidxaʼ riʼ: «Peru para laanu la? tobi lucha si Dios nuu ne nga nga Dios Bixhoze nu, ne de laa beeda irá xixé cosa, ne para laa nabani nu. Ne zaqueca tobi lucha si Señor Jesucristu, ne pur laa nuu irá xixé cosa, ne pur laa nabani nu» (1 Cor. 8:6).
5. Ximodo cusihuinni Stiidxaʼ Dios gastiʼ stobi casi Jesús.
5 Peru nuuruʼ stale cosa ni rusihuinni gástiruʼ stobi casi Jesús. Stiidxaʼ Dios riquiiñeʼ stale título ni rusihuinni Jesús si nga ni zanda iquiiñeʼ Dios para gaca cani naguixhe ique. Guidúʼyanu gaayuʼ de laacani lu Stiidxaʼ Dios ni gucuá lu diidxaʼ griegu.
Jesús nga «Diidxa»
6. Xiñee jneza nga guininu naca Jesús «Diidxa».
6 (Biindaʼ Juan 1:14.) Xiñee rábicabe Jesús «Diidxa» o Logos yaʼ. Pur dxiiñaʼ ni huayúnibe dede dxi bizulú Dios bizáʼ ca ángel. Jiobá biquiiñeʼ Xiiñiʼ para gabi xcaadxi ángel que xi naquiiñeʼ gúnicaʼ ne para gabi ca binni guidxilayú ni na Dios gúnicaʼ. Rihuinni Jesús nga diidxaʼ, o ni riníʼ pur Dios, lu ca diidxaʼ ni gúdxibe caadxi judíu: «Cadi naa diaʼ gudixhe ni rusiideʼ, sínuque rusiide ni gudixhe ni biseenda naa. Cani racalaʼdxi guni ni na Dios la? zanna pa dxandí stiidxa Dios cusiide o pa stinneʼ» (Juan 7:16, 17). Neca bibiguetaʼ Jesús guibáʼ la? náparube título «Stiidxa Dios» ca (Apo. 19:11, 13, 16).
7. Jesús qué nudxiibaʼ laca laa, ximodo zanda chinándanu ejemplu stibe.
7 Guiníʼ íquenu xi riníʼ título ca. Neca Jesús nga ni jma nuu xpiaaniʼ lade cani bizáʼ Jiobá la? qué rusiidibe ni nabe. Laabe rusiidibe ni gabi Bixhózebe laabe. Ne rusisácabe Jiobá ne cadi laaca laabe (Juan 12:50). ¡Guizáʼ galán chinándanu ejemplu stibe! Laaca bisaanané Dios laanu ti dxiiñaʼ nabé sicarú: gucheechenu ca diidxaʼ nacubi ne galán ca (Rom. 10:15). Jesús qué nudxiibaʼ laca laa ne nga naquiiñeʼ gucaa laanu guidúʼyanu xi guininu. Ora gusíʼdinu binni Stiidxaʼ Dios la? naquiiñeʼ gusíʼdinu laacabe ni cá si ndaanini ne cadi ni na íquenu (1 Cor. 4:6, NM).
Jesús nga «Amén»
8, 9. 1) Xi riníʼ diidxaʼ «Amén», ne xiñee rábicabe Jesús zacá. 2) Ximodo bisihuinni Jesús laa nga «Amén».
8 (Biindaʼ Revelación 3:14, NM.) Xiñee rábicabe Jesús «Amén» yaʼ. Diidxaʼ «amén» ca hebreu ni ne riniʼni «zacá gácani, dxandipeʼ». Diidxaʼ riʼ zeedani de sti diidxaʼ hebreu ni riníʼ «tuuxa ni qué rusaana, ni dxandíʼ zuni ni riníʼ». Ne de ra zeeda diidxaʼ hebreu ca laaca riquiiñeni ora guieeteʼ qué rusaana Jiobá cani runi ni na (Deu. 7:9; Isa. 49:7). Peru, xiñee rihuinni gastiʼ stobi casi Jesús pur rábicabe laa «Amén» yaʼ. Lu 2 Corintios 1:19, 20 guníʼ Pablu xiñee, nabe: «Byuí du stiidxa Cristu Jesús Xiiñi Dios lade tu. Ximodo ñanda ñabi du laatu zuni du xiixa pa nanna du qué zuni du ni, nanna nda du qué ñuu dxi ñuni Cristu zacá. Sínuque laape be beda guni be irá ni ma bidii stiidxa Dios gacaʼ. Ngue runi ora riní né nu Dios riní nu “Amén” purti nanna nu zaca ni, casi guca stiidxa Dios dxi beeda Cristu, ne zacá rusisaca nu Dios».
9 Jesús nga «Amén» purtiʼ pur laabe raca guiráʼ ni maʼ bizabiruaa Dios guni. Pur qué nucheené Jesús Dios ora bibani lu Guidxilayú riʼ ne pur bidiibe xquendanabánibe nga bihuinni guca guiráʼ cani bizabiruaa Dios. Cumu qué nucheené Jesús Dios la? bisihuinni cadi dxandíʼ ni guníʼ Binidxabaʼ ora na qué zuni binni ni na Dios pa qué guni xiixa ni racalaʼdxiʼ ne pa gapa guendanagana (Job 1:6-12; 2:2-7). Lade guiráʼ ca xiiñiʼ Dios la? baʼduʼ primé stibe nga ni jma jneza gusihuinni cadi dxandíʼ ni guníʼ Binidxabaʼ. Ne laaca laabe nga ni jma jneza gusihuínnibe napa Bixhózebe derechu guni mandar, ne nga nga ni jma risaca gúnibe.
10. Ximodo zanda chinándanu ejemplu stiʼ Jesús, ni rábicabe «Amén» ca yaʼ.
10 Ximodo zanda chinándanu ejemplu stiʼ Jesús, ni rábicabe «Amén» ca yaʼ. Zúninu ni pa guzúʼbanu stiidxaʼ Jiobá ne gusihuínninu laabe nga nápabe derechu guni mandarbe. Ne ora gúninu zacá la? zusihuínninu zinándanu ni na Proverbios 27:11: «Guluu xpiaanuʼ xiiñehuiineʼ ne bisiecheʼ ladxiduáʼ, ti ganda guicabeʼ ni cucaalú ne cuxidxi naa».
Dios biquiiñeʼ Jesús para biʼniʼ ti pactu cubi
11, 12. Xiñee gástiruʼ stobi casi Jesús para guiniʼné Dios pur laanu yaʼ.
11 (Biindaʼ 1 Timoteo 2:5, 6.) Jesús si nga «zanda iníʼ né [Dios] pur laanu», ne laabe nga biquiiñeʼ Dios para biʼniʼ ti pactu cubi ne binni (Heb. 9:15; 12:24). Moisés laaca biquiiñeʼ Dios laa para biʼniʼ ti pactu ne xquidxi ora bidiibe laacaʼ ley stibe, peru, xiñee zanda guininu gástiruʼ stobi casi Jesús para guiniʼné Dios pur laanu yaʼ (Gál. 3:19).
12 Lu diidxaʼ griegu ora riníʼcabe de tuuxa ni riníʼ pur sti binni la? riquiiñecabe ni ora ruzeetecabe de ti abogadu. Ne nga nga ni runi Jesús, purtiʼ laa nga biquiiñeʼ Dios para biʼniʼ ti pactu cubi ne ti guidxi cubi, «Israel stiʼ Dios» (Gál. 6:16, NM). Ne guidxi ca nga ca xpinni Cristu ni bibí pur espíritu ne chigácacabe «sacerdote para guni[cabe] xhiiña rey stinu ni nuu ibáʼ» (1 Ped. 2:9; Éxo. 19:6). Yanna, neca biquiiñeʼ Dios Moisés para biʼniʼ ti pactu ne xquidxi la? qué ñacadícabe ti guidxi casi guninu ca.
13. Jesús nga ni zanda guiniʼné Dios pur laanu, nga runi, xi guiráʼ zanda gaca yaʼ.
13 Yanna, cumu zanda guiniʼné Jesús Dios pur laanu, xi guiráʼ zanda gaca yaʼ. Pur rini ni bixhiibe dxi gútibe la? maʼ napa Dios derechu guiníʼ maʼ nachaʼhuiʼ cani chichuu lu pactu cubi ca (Rom. 3:24; Heb. 9:15). Ne maʼ zanda gácacabe rey ne ni ruzaaquiʼ guʼxhuʼ guibáʼ. Ne Jesucristu, ni zanda guiniʼné Dios pur laanu ca, racané laacabe chúʼcabe nayá nezalú Dios (Heb. 2:16).
14. Xiñee naquiiñeʼ gusisácanu ni chiguni Jesús ca neca guibáninu guibáʼ o lu Guidxilayú yaʼ.
14 Peru xi zaca ne cani cadi nuu lu pactu cubi ca, cani chiguibani lu Guidxilayú riʼ sin qué chuʼ dxi gáticaʼ yaʼ. Neca dxandíʼ nga cadi nuucabe lu pactu cubi ca la? laaca racaneni gutiidilaʼdxiʼ Dios stóndacabe ne guiníʼ nacháʼhuicabe ne xhamigu laacabe (Sant. 2:23; 1 Juan 2:1, 2). Dios biquiiñeʼ Jesús para biʼniʼ pactu cubi ca, nga runi, naquiiñeʼ gusisácanu ni cayúnibe ca neca guibáninu guibáʼ o lu Guidxilayú.
Xaíque stiʼ cani ruzaaquiʼ guʼxhuʼ
15. Xiñee gadxepeʼ Jesús de xcaadxi xaíque stiʼ cani ruzaaquiʼ guʼxhuʼ.
15 Nécapeʼ dxiqué guyuu stale xaíque ni ruzaaquiʼ guʼxhuʼ la? guirútiruʼ sti ni ruzaaquiʼ guʼxhuʼ casi Jesús. Xiñee rininu zacá yaʼ. Apóstol Pablu na sicaríʼ: «Adxé laabe para ca sacerdote ni uyuu chiqué, purti ca ngue la? irá dxi gupa ca xidé biiti ca tuuxa maniʼ, ne binéʼ ca rini stime lu altar para usigaʼde ca Dios. Nirudóʼ runi cabe ni para guiaxa xpecadu pe cabe, ne óraque ru guni cabe ni para sti binni. Peru Cristu la? ti tiru si bisigaʼde rini stiʼ Dios pur irá nu, dxi guti be que, ne ma cadi naquiiñe guni ru be ni sti tiru. Cani uca sacerdote gola purti cá lu ley sti Moisés aca ca ni la? bichee caʼ, purti binni guidxilayú laacaʼ. Peru biʼni Dios ti juramentu ra gudixhe aca Xiiñi sacerdote gola. Nga nuu jlugar ley yanna. Ne qué ñuu dxi nuchee Xiiñi be que» (Heb. 7:27, 28).a
16. Xiñee guirútiruʼ tu ñanda ñati pur binni casi Jesús.
16 Jesús qué ñalené donda cásica Adán ante gucheené Dios (1 Cor. 15:45). Nga runi laasibe nga ni zanda gati pur laanu ti tiru si purtiʼ laabe qué ñálenebe donda. Lu Ley ni gucuaa Moisés que na naquiiñeʼ guuti cani ruzaaquiʼ guʼxhuʼ que tuuxa maniʼ guiráʼ dxi. Peru cani bíʼnicabe ca la? bisihuínnicani ni chiguni Jesús (Heb. 8:5; 10:1). Pur guiráʼ modo chigacané guendaguti stiʼ Jesús binni la? rihuinni gástiruʼ sti Xaíque ni ruzaaquiʼ guʼxhuʼ casi laabe.
17. Xiñee naquiiñeʼ gusisácanu dxiiñaʼ ni runi Jesús casi Xaíque stiʼ cani ruzaaquiʼ guʼxhuʼ, ne ximodo rusihuínninu ni.
17 Para ganda chuʼnu galán ne Dios la? caquiiñenu dxiiñaʼ ni runi Jesús casi Xaíque stiʼ cani ruzaaquiʼ guʼxhuʼ. ¡Ne gástiruʼ sti Xaíque ni ruzaaquiʼ guʼxhuʼ casi laabe! Pablu bicaa sicaríʼ: «Beda gaca sacerdote gola [o, Xaíque stiʼ cani ruzaaquiʼ guʼxhuʼ] stinu binni guidxilayú ne udiʼdi irá ni rididi nu. Xi si la? qué nuchee be. Zanda guiá be laanu purti nanna pe be xii nga nagana para laanu, ne zanda acané be laanu ora ma qué ganda sa nu» (Heb. 4:15). Ca xpinni Cristu ni runi cré zacá ni la? maʼ qué ribánicaʼ para laacaʼ, sínuque para Cristu (2 Cor. 5:14, 15; Luc. 9:23).
Ni za de gunaa que
18. 1) Xi bizabiruaa Dios zaca bichee si Adán. 2) Xi bieeteʼ de ni za de gunaa que despué.
18 Dxi bichee Adán que la? ruluíʼ si maʼ qué zanda chuʼ binni galán ne Dios, ne maʼ qué zanda guibani sin qué chuʼ dxi gati nin guibani nayecheʼ ndaaniʼ ti paraísu, peru nagueendaca bizabiruaa Jiobá zuseendaʼ tobi ni gulá binni ne laabe nga «ni za de gunaa que» (Gén. 3:15). Stale iza ante gánnacabe tuu nga ni za de gunaa que la? nabé bizeeteʼ ca diidxaʼ riguixhená que de laabe. Ne maca cá zálebe lade cani za de Abrahán, Isaac, Jacob ne rey David (Gén. 21:12; 22:16-18; 28:14; 2 Sam. 7:12-16).
19, 20. 1) Tuu nga zeeda gaca ni za de gunaa ni bizabiruaa Dios que. 2) Xiñee zanda guininu cadi Jesús si nga ni za de gunaa que.
19 Tuu nga beeda gaca ni za de gunaa ni bizabiruaa Dios que yaʼ. Zadúʼyanu tu laabe lu Gálatas 3:16. (Biindaʼ ni.) Peru, lu sti versículo stiʼ capítulo ca gudxi Pablu ca xpinni Cristu ni bibí que: «Ne pa ma naca nu xpinni Cristu la? dxandí za nu de Abraham, ne zacaa né nu laa ni bidii stiidxa Dios udii laa que» (Gál. 3:29). Xiñee guníʼ Pablu Jesús nga ni za de gunaa ca ne despué guniʼbe maʼ ca xpinni Cristu ni bibí que nga ni za de gunaa que yaʼ.
20 Ca dxi stinu riʼ, stale binni riéchecaʼ purtiʼ zacaʼ de Abrahán. Ne nuu caadxi religión nacaʼ de Abrahán za cani riguixhená sticaʼ. Peru ñee laacabe nga ni na Dios za de gunaa que la? Coʼ. Casi guníʼ Apóstol Pablu pur espíritu que la? cadi guiráʼ diʼ cani za de Abrahán zanda guiniʼcaʼ zacaʼ de gunaa que. Nécapeʼ gupa Abrahán stale xiiñiʼ la? de Isaac si nga zeeda ni za de gunaa que, ni chiguiquiiñeʼ Dios para uguu ndaayaʼ guiráʼ binni guidxilayú (Heb. 11:18). Ne tobi si ni za de Abrahán nga jma risaca ne laabe nga Jesucristu purtiʼ zacá cá ni lu Biblia.b Ca xpinni Cristu ni bibí ca beeda gácacaʼ xcaadxi binni ni za de Abrahán. Nga runi, guirútiruʼ tu ñanda ñuni dxiiñaʼ ni biʼniʼ Jesús para guca ni na ca primé diidxaʼ riguixhená rieeteʼ lu Biblia.
21. Ra maʼ biiyaluʼ xi dxiiñaʼ chiguni Jesús para gaca cani naguixhe ique Dios guni, xii nga ni jma ridxagayaaluʼ chigúnibe yaʼ.
21 Yanna, ra maʼ bidúʼyanu Jesús si nga ni zanda iquiiñeʼ Dios para gaca ni naguixhe ique guni, xi rusiidiʼ nga laanu yaʼ. Ni rizíʼdinu nga dede dxi bizáʼ Dios, Jesús que la? qué huayuu stobi casi laabe. Neca zacá la? qué rusaanabe de gúnibe ni na Dios ne qué ruyúbibe gusisaca binni laabe (Juan 5:41; 8:50). ¡Nabé galán ejemplu bidiibe! Nga runi, naquiiñeʼ chinándanu ejemplu stiʼ Jesús ne gúninu stipa pur gusisácanu Dios lu guiráʼ ni gúninu (1 Cor. 10:31).
[Cani cá ñee yaza]
a Ti hombre ni nabé biindaʼ de Biblia na diidxaʼ griegu ni bitiixhicabe casi «ti tiru si» ca cusihuínnini ti cosa nabé risaca rusiidiʼ Biblia: «Ti biaje si guti Jesús ne guirútiruʼ tu zanda gati casi laabe».
b Neca gunna ca judíu de primé siglu que zacaʼ de Abrahán ne nácacaʼ guidxi ni zaguu ndaayaʼ Dios que la? laaca gúnnacabe ti binni si zaree ládecabe ni zabí Dios para gaca Mesías que (Juan 1:25; 7:41, 42; 8:39-41).
Rietenalaʼdxuʼ la?
• Xi zanda guizíʼdinu de ca título ni cusihuinni Jesús si nga zanda iquiiñeʼ Dios para gaca ni naguixhe ique guni yaʼ. (Biiyaʼ cuadru ni zeeda lu sti yaza ca).
• Ximodo zanda chinándanu ejemplu stiʼ Xiiñiʼ Dios.
[Cuadro ne dibuju/foto ni zeeda lu yaza 15]
Ca título ni rusihuinni dxiiñaʼ ni zanda guni Jesús si lu cani naguixhe ique Dios guni
◼ Jesús nga «tobi lucha Xiiñi» Dios (Juan 1:3). Bixhózepeʼ Jesús nga bizáʼ laa.
◼ Jesús nga «Diidxa» (Juan 1:14). Jiobá biquiiñeʼ Xiiñiʼ para gabi xcaadxi ángel que xi naquiiñeʼ gúnicaʼ ne para gabi ca binni Guidxilayú ni na Dios gúnicaʼ.
◼ Jesús nga «Amén» (Rev. 3:14, NM). Jesús qué nucheené diʼ Dios dxi bibani lu Guidxilayú riʼ ne pur bidiibe xquendanabánibe nga bihuinni guca guiráʼ cani bizabiruaa Dios.
◼ Dios biquiiñeʼ Jesús para biʼniʼ ti pactu cubi (1 Tim. 2:5, 6). Jesús nga zeeda gaca casi ti abogadu, nga runi biquiiñeʼ Dios laabe para biʼniʼ ti pactu cubi ne ti guidxi nacubi, «Israel stiʼ Dios». Ne guidxi ca nga ca xpinni Cristu ni bibí pur espíritu ne chigácacabe «sacerdote para guni[cabe] xhiiña rey stinu ni nuu ibáʼ» (Gál. 6:16, NM; 1 Ped. 2:9).
◼ Xaíque stiʼ cani ruzaaquiʼ guʼxhuʼ (Heb. 7:27, 28). Jesús nga ni zanda gati pur laanu ti tiru si, ne maʼ qué zúnibe ni sti biaje. Laabe zanda guxhabe stóndanu ne gulabe laanu de guendaguti.
◼ Ni za de gunaa que (Gén. 3:15). Jesucristu nga ni jma risaca za de Abrahán. Ne ca xpinni Cristu ni bibí ca beeda gácacaʼ xcaadxi binni ni za de Abrahán (Gál. 3:29).