LECCIÓN 15
¿Tuu nga Jesús?
Jesús nga ti binni ni jma runibiáʼcabe lu guidubi naca Guidxilayú. Neca stale nanna tu labe ne ni bíʼnibe, peru huaxiéʼ si tu runibiáʼ chaahuiʼ laabe ne gadxé gadxé nga ni riníʼ ique binni de laabe. ¿Xi rusiidiʼ Biblia de Jesús yaʼ?
1. ¿Tuu nga Jesús?
Guibáʼ nga nabeza Jesús ne nácabe ti espíritu ni napa poder. Bizáʼ Jehová laabe ante guzáʼ guiráʼ xixé cosa. Nga runi, Biblia ruzeeteʼ «laabe nga ni bizáʼ Dios primé lade guiráʼ cosa» (Colosenses 1:15). Lu Biblia riete Jesús nga «tobi lucha Xiiñiʼ» Dios, purtiʼ guirutiʼ tu ñacané Jehová para bizáʼ laabe (Juan 3:16). Gucané Jesús Bixhoze para guyáʼ guiráʼ xixé cosa. Ngue runi, nabé guyuube gaxha de Bixhózebe (biindaʼ Proverbios 8:30). Runibiáʼcabe Jesús casi «Diidxaʼ», purtiʼ laabe nga rinebe mensaje stiʼ Bixhózebe ne dede yanna runinebe Bixhózebe dxiiñaʼ ne xhamígucabe (Juan 1:14).
2. ¿Xiñee beeda Jesús ndaaniʼ Guidxilayú riʼ?
Raca biaʼ 2,000 iza, biquiiñeʼ Jehová espíritu santu stiʼ para guni ti milagru, dede guibáʼ bitiidibe xquendanabani Jesús, ti ángel ni guizáʼ napa poder, ndaaniʼ ti baʼdudxaapaʼ láʼ María. Zacá beeda gale Jesús casi ti binni (biindaʼ Lucas 1:34, 35). Beedabe ndaaniʼ Guidxilayú riʼ para gácabe Cristu o Mesías ni maca nexheʼ gueeda gulá binni guidxilayú.a Guca cumplir guiráʼ profecía ni ruzeeteʼ de Mesías riʼ luguiáʼ Jesús. Zacá gunna binni laabe nga «Cristu, Xiiñiʼ Dios ni nabani» (Mateo 16:16).
3. ¿Paraa nuu Jesús yanna?
Despué de guti Jesús, bisibani Dios laabe casi ti espíritu ne bibiguétabe guibáʼ. Raqué «bidii Dios laabe ti puestu ni jma risaca» (Filipenses 2:9). Yanna riʼ napa Jesús ti puestu guizáʼ risaca, peru cadi laadibe nga ni jma napa poder, sínuque Jehová.
GUIZÍʼDIRUNU JMA
Guidúʼyanu tu peʼ nga Jesús ne xiñee nabé risaca gunibiaʼnu laabe.
4. Cadi Jesús nga Dios ni jma napa poder
Neca naca Jesús ti espíritu ni nuu guibáʼ ne napa poder, Biblia ná ruzuubabe stiidxaʼ Jehová, Dios stibe ne Bixhózebe. ¿Xiñee rininu zacá ni yaʼ? Laguuyaʼ VIDEU riʼ para gánnatu xiñee rusiidiʼ Biblia jma napa Dios poder que Jesús.
Guidúʼyanu caadxi textu ni zacané laanu guiénenu xiñee gadxé peʼ nga Jehová ne Jesús. Laguundaʼ cada textu zeeda raríʼ ne laiquiiñeʼ ca pregunta riʼ para güitu diidxaʼ:
Laguundaʼ Lucas 1:30-32.
Casi ná textu riʼ, ¿ximodo bisihuinni ángel ca tuu nga Jesús ne tuu nga Jehová, «Dios ni nuu guibáʼ»?
Laguundaʼ Mateo 3:16, 17.
¿Xi ridxi biree guibáʼ ora guyuunisa Jesús?
¿Tu rábiluʼ stiʼ ridxi que?
Laguundaʼ Juan 14:28.
¿Tuu nga jma huaniisi ne napa derechu de guni mandar, ti padre la? o xiiñiʼ?
¿Xiñee gudxi Jesús Jehová «Bixhozeʼ»?
Laguundaʼ Juan 12:49.
¿Ñee guníʼ ique Jesús laaca laa nga Jehová la? ¿Lii xi rábiluʼ?
5. Jesús nga beeda gaca Mesías
Lu Biblia zeeda stale profecía ni racané laanu gánnanu tuu nga Mesías o tuu nga gulí Dios para gulá guiráʼ binni guidxilayú. Laguuyaʼ VIDEU riʼ, cusiéneni caadxi profecía ni guca cumplir luguiáʼ Jesús dxi guyuu lu Guidxilayú riʼ.
Laguundaʼ ca profecía riʼ ne laiquiiñeʼ ca pregunta riʼ para güitu diidxaʼ:
Laguundaʼ Miqueas 5:2 ne laguuyaʼ paraa chigale Mesías.b
¿Ñee guca cumplir profecía riʼ luguiáʼ Jesús dxi gule la? (Mateo 2:1).
Laguundaʼ Salmo 34:20 ne Zacarías 12:10 ne laguuyaʼ xi profecía guca cumplir luguiáʼ Mesías que dxi gutiʼ.
¿Ñee guca cumplir ca profecía riʼ la? (Juan 19:33-37).
¿Ñee biyubi Jesús modo gaca cumplir ca profecía riʼ luguiáʼ la?
¿Xi rusiidiʼ guiráʼ ndiʼ lii de Jesús yaʼ?
6. Risaca nga gunibiaʼnu Jesús
Biblia cayabi laanu risaca nga guizíʼdinu de Jesús ne gánnanu xi racalaʼdxiʼ Dios gúnibe. Laguundaʼ Juan 14:6 ne 17:3, ne laiquiiñeʼ pregunta riʼ para güitu diidxaʼ:
¿Xiñee nabé risaca nga gunibiaʼnu Jesús?
Bixheleʼ Jesús ti neza para ganda gaca xhamígunu Dios ne bisiidibe ni dxandíʼ de Jehová. Ne pur ni bíʼnibe laaca zanda gápanu guendanabani ni qué zaluxe.
NUU TU NÁ: «Qué runi cré ca testigu stiʼ Jehová Jesucristu».
¿Lii xi rábiluʼ yaʼ?
XI BIZÍʼDINU
Naca Jesús ti espíritu ni napa poder, laabe nga Xiiñiʼ Dios ne Mesías.
Xi biziidiluʼ
¿Xiñee ruzeeteʼ Biblia Jesús nga «ni bizáʼ Dios primé lade guiráʼ cosa»?
¿Xi biʼniʼ Jesús guibáʼ ante gueeda lu Guidxilayú?
¿Ximodo nánnanu Jesús nga Mesías?
BIIYAʼ XIRUʼ ZANDA GUIZIIDILUʼ
Biiyaʼ xcaadxi razón ni cusihuinni Jesús nga Mesías.
«¿Ñee rusihuinni ca profecía zeeda lu Biblia Jesús nga Mesías la?» (Tema ni zeeda lu jw.org)
Biiyaʼ pa rusiidiʼ Biblia gupa Dios Jesús casi rapa binni xiiñiʼ.
«¿Xiñee rábicabe Jesús Xiiñiʼ Dios?» (Tema ni zeeda lu jw.org)
Biiyaʼ xiñee qué rusiidiʼ Biblia de trinidad.
«¿Ñee Jesús nga Dios la?» (Tema ni zeeda lu Torre stiʼ ni rapa)
Biiyaʼ ximodo bichaa xquendanabani ti gunaa ora biʼndaʼ ni rusiidiʼ Biblia de Jesús.
«Cusiene ti gunaa judía xiñee bichaa ni runi cré» (¡Gutaná! mayo de 2013)
a Lu lección 26 ne 27 cusiene xiñee caquiiñeʼ chuʼ tu gulá laanu ne ximodo beeda gulá Jesús laanu.