Cadi guiaandaʼ laanu guni orarnu pur xcaadxi binni

1. ¿Ximodo nánnanu nabé risaca para Jehová ca oración ni gúninu?

NACA oración ti regalu guizáʼ sicarú stiʼ Jehová. Guiníʼ íquenu ndiʼ: Maʼ bidii Jehová dxiiñaʼ ca ángel ca ne maʼ bidiibe autoridad Xiiñibe (Sal. 91:11; Mat. 28:18). Peru neca zacá, Jehová nga «ni rucaadiaga oración»; nga nga tobi de ca dxiiñaʼ ni laasibe rúnibe (Sal. 65:2). Racaláʼdxibe gucaadiágabe cada tobi de ca oración ni gúninu laabe.

2. ¿Xi ejemplu galán bisaana apóstol Pablo chinándanu?

² Zanda gábinu Jehová guiráʼ ni riguu xizaa laanu, peru laaca naquiiñeʼ guinábanu pur xcaadxi binni. Nga nga ni biʼniʼ apóstol Pablo. Guzéʼtenu ti ejemplu, gúdxibe ca xpinni Cristu de congregación de Éfeso: «Ne dede yanna ruzeeteʼ laatu lu ca oración ni runeʼ» (Efes. 1:16). Peru laaca guyuu ora biʼniʼ orarbe pur ti binni si. Sicaríʼ bicaabe ra nuu Timoteo: «Runeʼ adorar Dios [ . . . ]. Ne cada guneʼ orar laabe ridxíʼ ne huaxhinni rinabaʼ gacanebe lii ne rudieeʼ xquixe peʼ laabe» (2 Tim. 1:3). Neca ñanda ñuni orar Pablo pur ca cosa si ni riguu xizaa laa peru guleebe tiempu para guni orarbe pur xcaadxi binni (2 Cor. 11:23; 12:7, 8).

3. ¿Xiñee ziuu biaje ziaandaʼ laanu guni orarnu pur xcaadxi binni?

³ Ziuu biaje ziaandaʼ laanu guni orarnu pur xcaadxi binni. ¿Xiñee yaʼ? Ti hermana láʼ Sabrinaa guníʼ: «Guizáʼ nuu xhiiñanu dede qué gápanu tiempu. Nga runi zándaca guicá íquenu puru ca guendanagana ni nápanu ne guinábanu Jehová ni caquiiñesinu». Pa gudiʼnu cuenta cazaacanu ni bizaaca hermana riʼ, guizáʼ zacané artículo riʼ laanu. Primé, zadúʼyanu xiñee risaca guni orarnu pur xcaadxi binni. Ne, guiropa, zadúʼyanu ximodo gúninu ni.

RISACA GUNI ORARNU PUR XCAADXI BINNI

4, 5. ¿Xiñee napa oración stiʼ ti binni nachaʼhuiʼ stipa? (Santiago 5:16).

⁴ Guni orarnu pur xcaadxi binni «purtiʼ napa oración stiʼ ti binni nachaʼhuiʼ stipa» (biindaʼ Santiago 5:16). ¿Ñee zanda gacané oración ni gúninu xcaadxi binni la? Zanda pue. Gunna Jesús qué zandaa zaníʼ apóstol Pedro qué runibiáʼ laabe, ngue runi gúdxibe laa: «Maʼ bineʼ rogar Dios pur lii ti cadi gaca fe stiluʼ débil» (Luc. 22:32). Nanna Pablo guizáʼ racané oración. Ngue runi, ora deguyoobe ndaaniʼ guidxi Roma, sicaríʼ bicaabe ra nuu Filemón: «Purtiʼ ribezaʼ gundaacabe naa pur ca oración ni rúnitu pur naa ti guibiguetaʼ ra nuutu» (Filem. 22). Ne zacá peʼ bizaacani: qué nindaa bindaacabe laabe ne bibiguetaʼ biʼniʼ predicarbe.

⁵ Peru cadi caníʼ diʼ nga zanda gucaʼnu Jehová guni ni peʼ canábanu laa. Nánnabe xi riguu xizaa laanu ne nuu biaje rúnibe ni canábanu laabe. Ndiʼ rucaa laanu guni orarnu laabe de guidubi ladxidoʼno ora nuu xiixa ni ruchiiñaʼ laanu ne despué gusaananu ni lu nabe purtiʼ laabe nga nánnabe xii nga ni jma galán para laanu (Sal. 37:5; biiyaʼ 2 Corintios 1:11 ne ca nota de estudiu).

6. Ora guni orarnu pur xcaadxi binni, ¿xi rucaani laanu guni sentirnu? (1 Pedro 3:8).

⁶ Guni orarnu pur xcaadxi binni racaneni laanu guianu laacaʼ (biindaʼ 1 Pedro 3:8). Ti binni ni riá ruuyaʼ pabiáʼ racaná xcaadxi binni ne racalaʼdxiʼ guni xiixa para gacané laacabe (Mar. 1:40, 41). Ti ancianu ni láʼ Michael guníʼ: «Ora guneʼ orar pur xcaadxi ne guinabaʼ ni caquiiñecaʼ, rudieeʼ cuenta xi ca guendanagana cudxiilúcabe ne nga rucaa naa gannaxhieeʼ laacabe jma. Neca laacabe qué gánnacabe ni, peru runeʼ sentir nuaaʼ jma gaxha de laacabe».

7. Guni orarnu pur xcaadxi binni, ¿ximodo racaneni laanu cadi guiníʼ íquepenu ca guendanagana ni nápanu? (Filipenses 2:3, 4; laaca zanda gúʼyaluʼ ca imagen ca).

⁷ Guni orarnu pur xcaadxi binni racaneni laanu cadi guiníʼ íquepenu ca guendanagana ni nápanu (biindaʼ Filipenses 2:3, 4). Cumu nabáninu ndaaniʼ guidxilayú ni naaze Binidxabaʼ la? guiráʼ xixenu ridídinu lu guendanagana (1 Juan 5:19; Apoc. 12:12). Pa gatigá guni orarnu pur xcaadxi binni zusietenaláʼdxini laanu laaca cayuni sufrir guiráʼ ca hermanu stinu «ni nuu lu guidubi guidxilayú» cásica cayuni sufrirnu (1 Ped. 5:9). Ti precursora láʼ Katherine guníʼ: «Guneʼ orar pur xcaadxi rusietenalaʼdxiʼ ni naa cadi naa siaʼ nga cadideʼ lu xiixa guendanagana. Nga rucaa naa cadi puru si pur ca guendanagana ni napaʼ nga guneʼ orar».

TU PUR CAQUIIÑEʼ GUNI ORARNU

8. ¿Tu pur zanda guni orarnu?

⁸ ¿Tu pur zanda guni orarnu? Zanda gúninu ni pur gadxé gadxé binni. Guzéʼtenu ti ejemplu, zanda guni orarnu pur ca ni huará, pur ca joven ni cudxiilucaʼ xiixa guendanagana ra scuela o pur ca binni ni maʼ huaniisi. Stale de ca hermanu stinu cucaalúcabe laacaʼ, nuu de laacaʼ cucaalú familia sticaʼ laacaʼ ne xcaadxi cucaalú gobiernu laacaʼ (Mat. 10:18, 36; Hech. 12:5). Nuu de ca hermanu stinu maʼ bisaanacaʼ lídxicaʼ purtiʼ nuudinde ca gobiernu ne nuu de laacaʼ cayacanacaʼ pur xiixa desastre natural. Zándaca qué runibiaʼnu ca hermanu stinu purtiʼ zitu nuucabe. Peru ora runi orarnu pur laacabe rusihuínninu rinándanu ni ná Jesús, gannaxhiisaanu (Juan 13:34).

9. ¿Xiñee naquiiñeʼ guni orarnu pur ca hermanu ni zániru ndaaniʼ xquidxi Jehová ne zaqueca pur xheelacabe?

⁹ Laaca zanda guni orarnu pur ca hermanu ni napa xiixa dxiiñaʼ ndaaniʼ organización stiʼ Jehová casi: Grupu ni Zániru ne ca ni racané laacaʼ, ca Comité de Sucursal, ca hermanu ni napa xiixa departamentu ndaaniʼ ca sucursal ca, ca superintendente de circuito, ca ancianu ni nuu ndaaniʼ ca congregación ca ne zaqueca ca siervu ministerial. Stale de laacabe laaca nápacabe guendanagana laga cayúnicabe dxiiñaʼ pur gápacabe cada tobi de laanu (2 Cor. 12:15). Guzéʼtenu ti ejemplu, sicaríʼ guníʼ Mark, nácabe superintendente de circuito: «Ti cosa ni raca nagana para naa nga cadi nuaaʼ gaxha de bixhozeʼ ne jñaaʼ. Maʼ huaniisicabe ne huarácabe. Nanna cayapa bizanaʼ ne xheelaʼ laacabe né stale cariñu peru guizáʼ riuaaʼ triste purtiʼ cadi nuaaʼ gaxha de laacabe para gacaniáʼ laacabe». Neca qué gánnanu xi peʼ nga cadiʼdiʼ ca hermanu riʼ, peru galán guni orarnu pur laacabe (1 Tes. 5:12, 13). Laaca galán guinábanu Jehová pur xheelacabe, purtiʼ racanécabe ca hermanu riʼ para ganda gúnicaʼ dxiiñaʼ ndaaniʼ congregación.

10, 11. ¿Ñee riuulaʼdxiʼ Jehová ca oración ra rinábanu pur xcaadxi hermanu la?

¹⁰ Stale biaje runi orarnu pur stale hermanu. Peru nuu biaje qué rininu lácabe, zándaca rábinu Jehová gacané ca hermanu ni nuu ndaaniʼ cárcel o quixhedxibe ladxidóʼ ca ni gutiʼ ti binni ni nadxii. Ti ancianu ni láʼ Donald guníʼ: «Stale hermanu ne hermana cadíʼdicaʼ lu xiixa guendanagana nga runi nuu biaje runi orarnu para guiráʼ xixécabe peru qué ruzéʼtenu lá cada tobi».

¹¹ ¿Ñee riuulaʼdxiʼ Jehová guni orarnu zacá la? ¡Riuuláʼdxibe pue! Purtiʼ qué gánnanu xi peʼ cazaaca cada tobi de ca xpínnibe. Nga runi galán nga guni orarnu pur ca hermanu stinu (Juan 17:20; Efes. 6:18). Rusihuinni ca oración riʼ dxandíʼ peʼ nadxiinu guiráʼ xixé ca hermanu stinu (1 Ped. 2:17).

¿XI GÚNINU ORA GUNI ORARNU PUR TUUXA?

12. Ora guiduʼyaʼ chaahuinu xi cazaaca ¿ximodo racaneni laanu guni orarnu pur tuuxa peʼ?

¹² Guiduʼyaʼ chaahuinu xi cazaaca. Neca jneza nga guni orarnu pur guiráʼ ca hermanu stinu peru laaca galán nga guni orarnu pur tuuxa peʼ. ¿Ñee nuu tuuxa ndaaniʼ congregación ni huará la? ¿Ñee nuu ti joven ni nuu triste ne qué guidxela xi guni purtiʼ rucaalúcabe laa ra scuela la? ¿Ñee nuu tuuxa ni cusiniisi xiiñiʼ stubi «casi ná Jehová ne casi ná ca conseju stiʼ» la? (Efes. 6:4). Pa guiduʼyaʼ chaahuinu xi cazaaca zacaneni laanu guni sentirnu ni runi sentir xcaadxi ne zacaneni laanu guni orarnu pur ca hermanu stinu (Rom. 12:15).b

13. ¿Ñee zanda guni orarnu pur ca hermanu ni qué runibiaʼnu la?

¹³ Galán guzéʼtenu lácabe. Nga nga ti cosa ni zanda gúninu dede né ora qué runibiaʼnu ca hermanu ca. Guiníʼ íquenu ca hermanu ni nuu ndaaniʼ cárcel ndaaniʼ guidxi Crimea, Eritrea, Rusia ne Singapur. Zadxélanu lácabe lu jw.org.c Ti superintendente de circuito ni láʼ Brian guníʼ: «Ora rucaaʼ lá ca hermanu ni nuu ndaaniʼ cárcel ne despué guinieeʼ ni en voz alta la? qué raca nagana para naa guietenaladxeʼ lácabe ne guinabaʼ pur laacabe lu ca oración ni runeʼ».

14, 15. ¿Xi zacané laanu ganda guni orarnu pur tuuxa?

¹⁴ Gábinu Jehová ni peʼ racaláʼdxinu. Michael, hermanu ni bizéʼtenu lu párrafo xhoopaʼ que, cayabi laanu xi runi: «Ora guundaʼ lu jw.org ca experiencia stiʼ ca hermanu ni nuu ndaaniʼ cárcel, runeʼ stipa guiníʼ iqueʼ ximodo ñuneʼ sentir pa nizaacaʼ ni cazaacacabe que. Nannaʼ ñuaaʼ xizaa pur xheelaʼ ne niníʼ iqueʼ pa nuube nazaaca. Nga racané naa guinabaʼ lu ca oración stinneʼ pur ca hermanu ni nuu ndaaniʼ cárcel ni maʼ bichaganáʼ» (Heb. 13:3, nota).

¹⁵ Ora guiníʼ íquenu guiráʼ ni ridiʼdiʼ ca hermanu stinu ni nuu ndaaniʼ cárcel, jma nagueenda ridxélanu xi zanda guinábanu pur laacabe lu ca oración stinu. Guzéʼtenu ti ejemplu, zanda guinábanu Jehová gaca ca binni ni rapa ndaaniʼ cárcel nachaʼhuiʼ né laacabe o gudii ca xaíque stícani lugar guni adorárcabe Dios (1 Tim. 2:1, 2). Laaca zanda guinábanu lu ca oración stinu cuʼ ejemplu stiʼ ca hermanu riʼ gana ca congregación ni nuu gaxha de ra deguyoocaʼ ne zaqueca para gucaani ca ni cadi naca Testigu gucaadiágacaʼ mensaje ni zinenu (1 Ped. 2:12). Guionnaʼ cosa ni bizéʼtenu riʼ (guiduʼyaʼ chaahuinu xi cazaaca, galán guzéʼtenu lácabe ne gábinu Jehová ni peʼ racaláʼdxinu) racanécani laanu guni orarnu pur ca hermanu ni nuu ndaaniʼ cárcel peru laaca zanda gacanécani laanu ora guni orarnu pur tuuxa hermanu. Zacá zusihuínninu nadxiisaanu ne nadxiinu guiráʼ binni (1 Tes. 3:12).

GÁNNANU XI ZANDA GUINÁBANU LU CA ORACIÓN STINU

16. ¿Xi cadi naquiiñeʼ guiaandaʼ laanu ora guni orarnu? (Mateo 6:8).

¹⁶ Casi maʼ bidúʼyanu guizáʼ risaca nga guni orarnu pur xcaadxi binni purtiʼ racaneni laacabe. Peru naquiiñeʼ guidúʼyanu ni modo ruuyaʼ Jehová ni. Ora guni orarnu cadi cayábinu laabe xiixa ni qué gánnabe. Laaca cadi naquiiñeʼ gábinu Jehová ximodo peʼ guni chaahuiʼ xiixa guendanagana. Laabe nánnabe xi peʼ nga caquiiñeʼ cada tobi de ca xpínnibe dede ante gudiʼnu cuenta xi cazaaca (biindaʼ Mateo 6:8). Yanna, ¿xiñee naquiiñeʼ guni orarnu pur xcaadxi binni yaʼ? Lu artículo riʼ maʼ bidúʼyanu chupa chonna razón. Peru nuuruʼ stiʼ razón: nga nga ni runi ca binni ni dxandíʼ peʼ rizaaláʼdxicaʼ xcaadxi binni. Runi orarnu pur ca hermanu stinu purtiʼ nadxiinu laacaʼ. Ne guizáʼ riecheʼ Jehová ora guʼyaʼ rúninu stipa chinándanu ejemplu stiʼ ra gannaxhiinu binni.

17, 18. Bizeeteʼ ti ejemplu para gusiéneluʼ xiñee nánnanu rucaadiaga Jehová ca oración ni rúninu.

¹⁷ Neca ruluíʼ qué racané ca oración ni rúninu xcaadxi binni, peru rusihuínnicani guizáʼ nadxiinu ca hermanu, ne rucaadiaga Jehová cani. Guininu de ti hombre ni napa chupa xiiñiʼ, ti dxaapahuiiniʼ ne ti hombrehuiiniʼ. Huará hombrehuiiniʼ stibe, ne dxaapahuiiniʼ stibe qué rusaana de gabi laabe: «Apá, biiyaʼ bizanaʼ gupa laabe. Guizáʼ huarabe». Neca nanna hombre que ximodo gacané xiiñiʼ, nadxiibe laa ne cayápabe laa, peru neca zaqué guizáʼ riéchebe ora gúʼyabe nadxii dxaapahuiiniʼ stibe bizaʼnaʼ ne canabaʼ laabe guyúbibe modo gacanebe bizaʼnaʼ.

¹⁸ Zacaca nga racalaʼdxiʼ Jehová guizaaláʼdxinu xcaadxi binni ne guni orarnu pur laacaʼ. Ra gúninu ni zusihuínninu cadi puru si laanu nga rizaaláʼdxinu, laaca rizaaláʼdxinu ca hermanu stinu, ne rucaadiaga Jehová ni rinábanu pur laacabe (2 Tes. 1:3; Heb. 6:10). Casi maʼ bidúʼyanu nuu biaje ca oración ni rúninu zanda gacaneni tuuxa. ¡Nga runi, qué chuʼ dxi guiaandaʼ laanu guni orarnu pur ca hermanu stinu!