Gu gire i naavo kurungba nani nasa kurungba ka si naawo nga ti regbo bavugumo ya
FU AROGOTISE
1 Futise
GUPAI SI AYUGOHO
Agu akumbakuadee gbiati dereakumba du futiyo tipa gayo rogatise i nabihe ni gupai nyeanye kindi na gipai re nasayo i nabi tiyo ni bandabanda yo. I nibasasa dunduko na gu kido nga, i nika nyeanye kindi kurogo gayo rogatise zavura ti regbo akpakarapai.
Gu kura arogotise naraka kina sa mbiko gupai nga abakureayo watadu agumeyo du nasosoda yo i naraka. Gu ngba gbe kisusi tie nga, ho nyemuse gbiati irisa adu ni ni mburu gupai nasa aboro i naaraka kina sa.
BANGUA RENGO NGA GA BAIBIRI: “Ka kumba mbu nga diako a ya.”—1 AKorindo 7:11.
“Ka si du nga mo fu tiro tipa gamo rogatise, si aidanga mo du ni gu boro rago nikaa gberã tini niipo te. Si naida mo du regerege ka mbupai na ki du regerege ka ho mbupai. Mo naabi akpakarapai ni mbia kota, ono angianga gupai rengbe ka ye na kparaka ya.”—Micah.
NDU GUPAI DUHE TINI NA NYANYAKIPAHA
Ho agu arogotise nga aguyo afunga tiyo tipa gayo rogatise ya agbiatiyo ni na akpakarapai, si nawira wa i ima rengba ka da kuti gu digisopai nga, ‘Ani arẽnga tipa ka roga tirani te’ na i nagbata gene tipa ka kura rogo gu rogatise re kusayo.
“Dungu aboro narimo kurogo rogatise yo na gu berã nga ‘ka apai andunga wenengai ya’—i nika mbutiyo ambu. Ho aboro arimo ni ku rogo rogatise ono ki ima du na gu berã riyo yo nga ga mbutise gure nga i afunga tiyo tipa gayo rogatise ti tonatonaha te.”—Jean.
GUPAI RENGBE MO KA MANGAHA
MO ASADI TIRO
Ho du oni ni rogo paya . . .
Ya mo mo naabira tiro tipa manga rogatise na gu ga badia rogatise re?
Ya mo mo naaberã pa du na gu kura boro kia?
Ya mo mo naagumba agu apai du wa “Mi namburo” watadu “Mi nandu ka gbata gu boro nikaa bire na nyanyaki pare”?
Ka si du nga mo karagapai nga ii kuti sanahe sa watadu kuti dungu agu asanahe re, awere nga regbo mo nyakasi gamo futise.
n MO FURA NA GAMO BADIAROGATISE
Ya mo bakio wai ani nafu tirani tipa gaani rogatise ima zorã kusende? Ka si dunga wo duhe, be gine?
Gini adiandue rengbe ani ka mangaha awere ka nyakasa gaani futise?
ABERÃPAI
Mo naakeka gu wiri apai dedede nga ga nyemuse fu gamo badiarogatise
Mo yugu gamo futise ni maa mo sura gamo badiarogatise basunge yo rii gamo mbisa
Mo niyambu gamo badiarogatise na auru dũ ho du mo ni basunge yo watadu ho adunga oni ni sa ya
BANGUA RENGO NGA GA BAIBIRI: “Gu Mbori akpamia re ka boro kpara nga ha ya.”—Matayo 19:6.