Agu Agberãngbi Naadu 10

MO BINGO agu asura re. Agu asura re ni basasa nayugo agu agberãngbi naye kurii Ezipeta. Rogo gu bambata sura, Arona nanarã gu di nga Nire na gako ngbondo. Ko anarĩhe ime ki satihe ni kure. Atĩo akpiki, na gu di re ki tona ka fũ.

Fuo gure, Yekova asa azaĩ ami kuru Nire yo. Ami adu rogo arago dunduko​—⁠rogo aakoro, rogo angbadi, rii aba, na rogo kura aba dunduko. Ho agu azaĩ re akpiki ni, aEzipeto adungura ra ku rogo agugudo ra, na ringara kini fũ gbegberẽ.

Fuo gure, Arona ki narĩ sende na gako ngbondo, nvutu ki sa tihe ni rukutu agbiro duwa kina azari ono ami na apupora. Gu rukutu agbiro re nangia gu biata gberãngbi naye kurii Ezipeta.

Agu agberãngbi naye fuo gure amangi kina aEzipeto, angianga aYisaraere ya. Gu biama gberãngbi angia badungu kikindigi azii arimi ku rogo agu abambu nga ga aEzipeto. Gu bisue gberãngbi aye kuti anya. Badungu agu abagara na akandoro gbiati ameme nangia ga aEzipeto ra akpiki.

Fuo gure, aMoize na Arona adi kuke ki mihe ku wege yo. Si aye na ikiiki ahe nga anzia kuti kpoto aboro na anya. Gure nangia gu sita gberãngbi.

Fuo gure, Moize aya gako ngbondo ku ariyo, Yekova ki kedi gumba na morogumba. Morogumba ho nana kurii Ezipeta wa gure mbata te.

Gu muambe gberãngbi angia bakere rimbasa ayere. Ayere ho naye ku rogo ringara mbata wa gure te, na fuo gure a te. Ami ariti agu ahe dunduko morogumba aagberesanga ha ya.

Gu ribua gberãngbi angia bitimo. Bakere bitimo ati ku rogo ringara tipa arame biata, ono aYisaraere adu na kina imarago rogo agu arago i adu rogoho.

Ni yangaraha, Mbori aya fu gako aboro i migidi kure paranga wiri meme watadu wiri kandoro ti gayo angua ngbadimo. Fuo gure, ga Mbori maraika asusi rii Ezipeta. Agu akporo gu maraika re abi kure rogoho ti angua ngbadimo, ko aaimongo boro rogoho te. Ono rogo agu akporo kure aadunga ti angua ngbadimo ya, ga Mbori maraika aimi abambata vungu nga ga aboro na anya dunduko. Gure gu nangia gu bawe gberãngbi.

Fuo gi yangara gberãngbi re, Faro aya fu aYisaraere i guari ka ndu. AYisaraere aima mbakadatiyo tipa nduge, na i aguari Ezipeta yo ni kina gu yuru re.