Gu Kura Ambusa Sita

Moize na Arona andu ka pe gupai Mbori akedi yo na ni fu Faro nga: ‘Ka mo ambunga gimi aboro i ndu ya, mi nika keda dungu azii ku rogo gamo ringara.’ Dungu azii aye ki hi agu akporo nga ga aEzipeto, airakumuko na airarungo. Ringara naabaha ahi be azii. Ono rogo gu rago nangia Gosene, yo aYisaraere aaraka ni, azii aadunga yo te. Tona ti biama mbusa ka ndu kumbatayo, kina aEzipeto naarungo behe. Faro azungodi he nga: ‘Oni furanga na Yekova ko di agi azii re kusayo. Gaoni aboro rengbe arengba ka ndu.’ Ono ho Yekova adi azii ni kusayo, Faro aˈaria berãko. Ya mo Faro awirikipai be gupai re?

Yekova aya: ‘Ka Faro ambunga gimi aboro i ndu ya, agu anya nga ga aEzipeto nika woka na ki kpiki.’ Fuo girarago, anya atona ka kpi. Ono ka ga aYisaraere anya akpingo ya. Si ki vura du wo, Faro adu kindi na nyakarii, ka ko azakanga gene fuyo ya.

Fuani, Yekova ki ya fu Moize ko karagatiko koyo du Faro ni na ki mi kuke kuari yo. Gu kuke re ki satihe ni nvutu na si ki rengbe na aEzipeto dunduko. Gu nvutu re akusi aro ti kpoto aEzipeto dunduko gbiati gayo anya. Wa si avura du wo, Faro aká ka mbu aYisaraere i ndu.

Yekova akedi Moize berewe koyo du Faro ni na agi afugo du re: ‘Mo kindi na ká nga mo aidanga gimi aboro ndu te? Gba, morogumba nika kusuko kurii gi ringara re.’ Fuo girarago, Yekova akedi morogumba, gumba, na we. Gure angia kere bavugumo naamanganga mbata vuru Ezipeta ya. Angua akuadi dunduko, pa rukuruku ahe ki gberẽ, ono zanga si mangi Gosene yo. Faro ki ya: ‘Oni zungodi Yekova ko rugusi gipai re! Fuani oni ki ndu.’ Ono ho mai akati ni na ka morogumba atiwanga berewe ya, Faro aˈaria berãko.

Fuani, Moize ki ya: ‘Awere ayere nika rita gu yangara aũati morogumba nambuhe.’ Amirioni ayere ki riti agu ahe dunduko nanye ati yo. Faro ki ya: ‘Oni zungodi Yekova ko do agi ayere re kusayo.’ Ono zavura ho Yekova adi ayere ni kusayo, Faro adu kindi na nyakarii.

Yekova ki ya fu Moize: ‘Mo tai bero kuari yo.’ Nibasa, ariyo naabaha ki du nga bitimo. Tipa aˈuru biata, ka gene adunga be aEzipeto i ngere wenengai ya. Kina aYisaraere rago aha fuyo.

Faro aya fu Moize: ‘Mo na gamo aboro rengbe ka ndu. Ono oni mbu gaoni anya kina ane.’ Moize ki ya: ‘Ani ima rengba ka dia gaani anya tipa wa ka ani fu ra ni motumo fu Mbori.’ Faro ki zingi ni bakerehe. Ki ta ngbako nga: ‘Oni guari ti re kusayo! Ka mi bironi abi ane berewe, mi nika imo roni.’