Gu Kumba Naagundenga Ya

MO BINGO wai aboro asawia gi kumba re. Mo ini gi kumba re nga da? Rimoko nga Yeremaya. Ko angia banyanyakipa nebi.

Ngbutuko fuo tona Bakindo Yosiya ka kuadi akpiahe kusayo rogo ringara, Yekova asia Yeremaya ko du ni gako nebi. Ono Yeremaya abi tiko nga ko arengbanga kadu ni nebi te bambiko ko angia kina kungbo gude. Ono Yekova aya fuko ko nika undo ko aundo.

Yeremaya aya fu aYisaraere i mbu manga gbegberẽ apai. Ko aya: ‘Agu ambori kura arikaaboro airisoyo nga kungbo ambori.’ Ono dungu aYisaraere asia gupai nga kaa iriso akpiahe kuba iriso ndikidi Mbori nga Yekova. Ho Yeremaya aya ni fuyo Mbori nika fu mbusa fuyo, i aamoma ko amoma.

Dungu agarã asusi. Yosiya akpi, na fuo adiwi biata, wiriko nangia Yoyakima ki da ni bakindo. Yeremaya aape gupai kindi fu aboro nga: ‘I nika gbarasa Yerusarema kusayo ka oni ambunga gaoni gbegberẽ apai ya.’ Aboromotumo azi Yeremaya ki tangbayo ki ya: ‘Si naida i imiro kusayo tipa gupai mo apehe re.’ Fuoho, i ki ya fu agu agbia nga ga aYisaraere yo: ‘Si naida i imi Yeremaya kusayo, bambiko ko gumba gbegberẽpai kuti gi bakporo re.’

Yeremaya nika manga wai awere? Ko adu na bakere gunde! Ko ki ya fuyo dunduko: ‘Yekova kedi re mi gumba agi apai re furoni. Ka oni ambunga gaoni gbegberẽ apai ya, Yekova nika gbarasa Yerusarema kusayo. Ono ka oni imi re, gure nga oni imi gu kumba amanganga gbegberẽpai ya.’

Agu agbia nga ga Yerusarema yo ambu Yeremaya ni ungako, ono ka aYisaraere ambunga gayo gbegberẽ apai ya. Kusa, Nebukadenesara nangia bakindo Babera aye ki sovura kuti Yerusarema. Ni yangaraha, ko ki sa aYisaraere ni gako amoyambu. Ko aga na badungu akutu aYisaraere ku Babera yo. Mo bingo wai gberẽ gupai nga aboro ye ka zio ro nga aguyo mo ainongo yo ya ki ga na mo ku rogo gu ringara mo ainongo ho ya!