Oni Yugu Gipai Re Fu Awironi

Yeremaya Aambunga Gako Sunge Te

YA MO rago aagberẽnga tironi na oni ki idi ka mbu gu gaoni sunge oni naamangaha?​—a Wo si naamanga dungu aboro. Gupai re nadu tipa gu paranga nangia Yeremaya. Ono ko aambunga gupai aboro agumbaha watadu gu i amangaha si sako ko mbu gupai ko aamangaha te. Ani furanga tipa wai Yeremaya adu nikparakpara boro fu Mbori, ono wa si avura du wo, ko aberẽpa mbu manga gu sunge ko aamangaha.

Gu ndikidi Mbori nga Yekova, ko aima sia Yeremaya mbata fu i vunguko tipa ko du nigu nebi nika bira aYisaraere ti gu gbegberẽ apai i aamangaha naangbanga ti Yekova ya. Ya mo oni iningo gupai Yeremaya agumbaha fu Yekova fuo agarã kusa?​— Yeremaya ayaa: “Mi aina nga waĩ ka fura te, bambiko mi nga kina paranga [gbua].”

Ginipai mo aberãha nga si Yekova akaragaha fu Yeremaya kuti gupai ko agumbaha re?​— Yekova akaragapai fuko rogo weneringise ki yaa: ‘Ka mo yanga, “Mi nga kina paranga ya,” bambiko mi naida ka keda ro mo ndu koyo du agu aboro ni dunduko mi ka keda ro koyo du yó ni, gupai mi ka ruga ro nani mo ki gúmba kinaha. Ka mo gúndenga beyo ya.’ Tipagine si aaidanga ti ni Yeremaya gunde ya? Mbiko Yekova aya fuko: “Mi du na mo ka batasa ro.”—Yeremaya 1:4-8.

A wa ani niima fura tipaha mbata, rago agbere ti Yeremaya na gako sunge. Gipai re amangi wo mbiko aboro aasawiako asawia tipa mangako sunge fu Mbori. Ko ayaa: “Mi sa tire ni ũmongo na uru pitipiti; aboro dunduko namoma re.” Sidu, si asako ko diberã tipa ka mbu gu sunge ko aamangaha. Yeremaya ape gu kurapai nga: “Mi apé nga pa [Yekova] te, watadu gumba pai berewe ti rimoko te.” Ya mo ko ambu mangaha nirengo?

Ko ayaa: ‘Fugo Yekova kpotore yo wa ka i ya we du kisi yo ho kurogo amemere yo, na mi ima mbu be zada ha koyo.’ (Yeremaya 20:7-9) Wa si avura du nga, Yeremaya aagunde agunde ti kura aregbo, gu nyemuse ko adu nani tipa Yekova aasanga ko ko mbu manga ga Yekova sunge te. Ani bingo wai Yekova abanda Yeremaya mbiko gupai nga, ko aambunga manga gu sunge ko amangaha te.

Yekova aya fu Yeremaya wee ko za aboro mbiko Ko nika gbarasa Yerusarema ka i asanga gayó berã ya. Ho Yeremaya agumba gupai re ni fu aboro, i azingi kutiko na ki tona ka yaa: “Gi kumba re [ko] re na [kina gu] mbusa nga ga kpio.” Nirengo, Yeremaya azungodi yó tipa i gi “sangba Yekova.” Ko ape gu kurapai berewe fuyó nga: ‘Oni inihe nirengo nga, ka oni imi re, oni ye na kure boro-wenesa kurironi na kurii gi bakporo re na araki rogoho, bambiko Yekova kedi re mi gumba agi apai dunduko re ku turoni yo.’ Ya mo oni ini gupai namangi fuani?​—

Ziazia Kekeapai nayaa: “Abazogo na aboro dunduko ki ya fu aboromotumo na anebi, ‘Gi kumba re are nga na mbusa nga ga kpio te, bambiko ko agumba pai fu rani na rimo Yekova gaani Mbori.’ ” Yekova aima banda Yeremaya wa ko ambunga gunde si sako ko mbu gu sunge ko aamangaha ya. Ani bingo gupai namangi tipa gu kura ga Yekova nebi nangia Uria nga guko namangi gupai nadu kia ti ga Yeremaya.

Ziazia Kekeapai nayaa: ‘Uria agumba pai kuti Yerusarema wakina gu Yeremaya agumbaha.’ Ya mo oni ini gupai Uria amangihe ho gu Bakingo nangia Yoyakima azingi ni kutiko?​— Gunde aziko, na ko ki mbu manga gu sunge Mbori afuhe fuko, na ki oro ku Ezipeta yo. Bakindo akedi aboro i ndu ka gbatako na ki yego naako. Oni ini gupai gu gbegberẽ bakindo re amangiko nani ho i biko ni?​— Ko aimi Uria nibasape!—Yeremaya 26:8-24.

Tipagine Yekova abanda Yeremaya ti ni ono ka ko abandanga Uria ya?​— Yeremaya avura kaa gunde agunde a wa si adu tipa Uria, ono Yeremaya ambunga mangasunge fu Yekova ki oro te. Ko ambunga gako sunge te. Ginipai mo aberãha nga si wiriki ani he be gu kpiapai nga ga Yeremaya?​— Gupai wiriki ani he behe nga, ti kura aregbo, si rengbe arengba kadu furani nikpakarapai tipa ani mangi gupai Yekova nagumbaha furani, ono si naida ani kido kuti kinako kini irisi gupai ko agumbaha.

[Gu rukutu kekeapai du bandu kpewaraga yo]

[Gu kpiahe du ti kpewaraga 23]

Asanahe:

○ Gini sunge Yekova afuhe fu Yeremaya?

○ Tipagine Yeremaya aaida ka mbu gu sunge ti ni Yekova afuhe fuko?

○ Tipagine Yekova abanda Yeremaya ti ni ono ka ko abandanga Uria ya?

○ Ginipai wiriki ani he ti gu kpiapai nga ga Yeremaya?