Gamo Aborokporo Rengbe Arengba Kadu Na Ngbarago

1, 2. Ginipai Yekova aidaha tipa aborokporo?

YEKOVA MBORI naenge mburu rogatise. Baibiri nagumba gupai furani nga ko akusi bambata dee “ki ye na ri fu kumba.” Adamu adu na bakere ngbarago ko ki ya: “Gere nga gu meme dagba amemere yo nga pasio rogo pasiore yo.” (Bambata Pai 2:22, 23) Gere nayugo gupai furani nga Yekova naida arogotise du na ngbarago.

² Si nafu kina gberãrago nga, badungu aboro agbianga ngbarago rogo gayo ramukporo te. Wa vura duhe wo, Baibiri na wene arugute rogoho rengbe ka undo aborokporo dunduko tipa i du na diabese rogo gayo raka yo na kini gbia ngbarago ti du yo kina sa.—Ruka 11:28.

GUPAI YEKOVA AIDAHA BE AKUMBAKUADEE

3, 4. (a) Wai du si aida kumbakudee mangi fu diako? (b) Tipagine nyaki gupai ti ni nga kumbakudee na diakumba nimbupai dagbatiyo?

³ Baibiri naya si naida wene kumbakudee nimangipai na diani rogo nyemuse yo na irisa. Mo gedi AEfeso 5:25-29. Si naida kumbakudee nimangipai na diako dedede rogo nyemuse yo. Si naida ko nibanda ri, ningerefuo ri, na ka ko imisinga ri ya.

⁴ Ginipai si aida kumbakudee mangihe ho diani na ingipai ni? I nape gupai fu kumbakuadee nga: ‘Oni nikpínyemu adiaroni ka ngbaduroni ími nga fuyo ya.’ (AKorosaio 3:19) Akumbakuadee, oni tingidi gupai nga oni naamanga aingahe amanga a. Na ka oni aaida Yekova mbupai furoni, oni duwa ka oni mbupai fu adiaroni. (Matayo 6:12, 14, 15) Ho kumbakudee na diako ambupai dagbatiyo ni, si na undoyo i du na ngbarago rogo gayo rogatise yo.

5. Tipagine si aida kumbakudee irisi diani ti ni?

⁵ Yekova nakpinyemu kumbakudee nikpinyemu diako. Si naida kumbakudee niberẽ wenengai tipa gu nyemuapai nga ga diani. Nyanyakipa pai du nga gipai re. Ka kumba amanganga pai na diani wenengai ya, Yekova agianga gako akparakpee te. (1 Petero 3:7) Gupai nasa aboro i du na nyanyakipa yo bangiri Yekova nga i nakpinyemuko. Ko abingo akumba na nyanyakipa yo ti adee te.

6. Rogo gupai yo nga kumbakudee na diani nga borose “sa” nayugo ginipai?

⁶ Yesu asaki gupai nga kumbakudee na diako nga aboro ‘ue berewe te, [ono] i ki du adu sa.’ (Matayo 19:6) I niruru yo fu tiyo na i aidanga pai gbarasipa gayo du ni ruruse dagbatiyo te. (Asanza 5:15-21; AEbere 13:4) Si naida kumbakuadee na dereakumba moi berãyo fuo gu nyemupai nga ga kodaba du ti gayo badiarogatise. (1 AKorindo 7:3-5) Si naida kumbakudee tingidi gupai nga ‘a nga boro sa nasoga boroni te, kina mbu ti ni na banda ha.’ Sidu, si naida ko nikpinyemu diako na kini bi ri na nyanyakipa ri. Gu susi asusa gbe nga, diakumba nakpinyemu gupai nga kumbari du na weneringise na kini kpinyemu ri.—AEfeso 5:29.

GUPAI MBORI AKPINYEMUHE BE DEREAKUMBA

7. Tipagine du si aida aborokporo duadu ti ni na bariikporo beyo?

⁷ Aborokporo dunduko naida bariikporo, gu boro nikaa ngbembatayo fu aborokporo tipa i nimangipai wenengai kina sa. Baibiri naya rogo 1 AKorindo 11:3 wẽ: “Ri akumba dunduko nga Kristo; ri de ki ngia kumba; ri Kristo ki ngia Mbori.”

8. Wai du rengbe diakumba ka yugo dudunguro irisa fu kumbari?

⁸ Akumbakuadee dunduko namanga aingahe. Ono ho dee asongoda ga kumbari adiaberã ni na kidu na kodatise na ko, aborokporo dunduko nagbia undo. (1 Petero 3:1-6) Baibiri naya: “Dia boro nigunde agunde ti kumbani.” (AEfeso 5:33) Na ka sidu nga Kumbakudee rogo idapase yo sa na diani te? Si naida ri du kindi na iriso koyo du ko ni. Baibiri naya: ‘Kina a wo dere akumba, oni rá fu kina akumbaroni; ya ka ngia agu yo aida nga sangba Mbori ya, i aye ka ida pa ko mbiko gaoni mangaapai. Si arengba nga oni gumba fugo te; wa i nabi gaoni rurupai du na gunde ti ni.’ (1 Petero 3:1, 2) Gu wene kpiapai nga ga diakumba ima rengba ka sa kumbari ko rugutiko na gari idapase na kini irisihe.

9. (a) Ginipai si aida diakumba mangihe ho zangagiatise akura ni dagbari na kumbari? (b) Gini arugute Tito 2:4, 5 afuhe fu dereakumba?

⁹ Ginipai rengbe diakumba ka mangaha ho zangagiatise akura ni dagbari na kumbari? Si naida ri gumba gari abipai rogo irisa yo. Ni kpiapai, Sara agumba gupai nga gu naangbanga ti Abarayama ya, ono Yekova aya fuko wẽ: “Mo ídi he ki mangi kina [ha].” (Bambata Pai 21:9-12) Ho kumbakudee amanga gu diaberã ni nga gu atagbaganga tihe na gupai Baibiri agumbaha ya, si naida diako songodi gako diaberã asongoda. (Amokedi 5:29; AEfeso 5:24) Si naida wene diakumba ni ngere angera fuo gari aborokporo. (Mo gedi Tito 2:4, 5.) Ho kumbari gbiati awiiri abi wai ni ri amangasunge nyanyaki tipa kaa ngerafuo yo, gure nika sa gayo irisa koyo du ri ni si ni kii kina kumbatayo.—Asanza 31:10, 28.

10. Ginipai Baibiri agumbaha tipa kparaka gbiati mbutise?

¹⁰ Ti gu kura aregbo arogotise nadiaberã ni ipo tipa ka kparaka watadu ka mbutiyo. Ono tie, Baibiri naya “ka de guari nga pati kumbari ya” na “ka kumba mbu nga diako a ya.” (1 AKorindo 7:10, 11) Gu kura nyanyaki nduapai kinaho nga gu naima fu rii ome rengbe ka sa arogotise i kparaka, ono gipai re naida nyanyaki diaberã. Ginipai du tipa mbutise tigaha? Baibiri nayugo gupai nga gu yangada ndupai duho tipa mbutise nga ka kumbakudee watadu diakumba mangi kodaba na gu boro angianga gani badia rogotise ya.—Matayo 19:9.

GUPAI YEKOVA AIDAHA BE AVUNGUAGUDE

11. Ginipai agude aidaha susi kura apai du?

¹¹ Avunguagude, si naida oni di bakere regbo na awironi. Awironi naida kadu na oni, na gu susi asusa tie gbe nga i naida oni yugupai fu yo tipa Yekova.—Pa Fu Rugute ni Ue he 6:4-9.

12. Ginipai si aida avunguagude mangihe tipa ka banda awiriyo?

¹² Gi ga Satana zegino re nagberã kina kumbatayo na gu kura aboro kinaho naida ka imisa awirani, singia ka manga wasiwasi kodaba nayo ngbaome. Si fu kura avunguagude ni kpakarakpakarapai ka fura tipa ngbatunga gi riipai re. Ono si naida avunguagude za awiriyo ti ngbatunga agu aboro re na ki yugu wai fuyo rengbe yo ka ne yo. Avunguagude, oni du wa ka oni banda awironi.a—1 Petero 5:8.

13. Wai du rengbe avunguagude ka yugopai fu awiriyo?

¹³ Avunguagude na gu tindiro riyo nga ka yugo wai fu awiriyo rengbe yo kaa mangapai. Wai du rengbe mo ka yugopai fu awiro? Awiro naida na rabahe, ono ka mo rugu nga yo gbegberẽ watadu kaa gumba gbegberẽ afugo fuyo ya. (Yeremaya 30:11) Sidu tie, ka mo fu nga rugute fu awiro ho du mo ni na zinga ya. Si aidanga gamo afugo du “wa kina baso sa rũ he” ka imisa yo te. (Asanza 12:18) Mo yugupai fu awiro tipa i rugutiyo na ndu gupai si aida i du na giasangba ti ni.—AEfeso 6:4; AEbere 12:9-11; mo bi gu 30 rukutu kekeapai du ti digido gi buku re.

GUPAI YEKOVA AIDAHA BE AGUDE

14, 15. Tipagine du si aida agude ni gisangba avunguyo ti ni?

¹⁴ Yesu anaagiasangba Bako agia ti aregbo dũ, zavura ti gu regbo si anaadunga taata ya vurũ. (Ruka 22:42; Yoane 8:28, 29) Yekova naida gupai a nga agude ni gi sangba avunguyo agia.—Aefeso 6:1-3.

¹⁵ Agude, ka oni vura kaa bihe nga si ni kpakarakpakaraha furoni ka giasangba avunguroni, oni tingidi gupai nga oni ho oni ni na giasangba, rago nangba angba ti Yekova gbiati avunguroni na oni.b—Asanza 1:8; 6:20; 23:22-25.

16. (a) Wai du Satana aasada ka sosoda paranga aboro tipa i mangi gupai du ni gbegberẽhe? (b) Tipagine duhe ti ni ni nyanyakipa pai mo gbata agu abakure nga aguyo nakpinyemu Yekova?

¹⁶ Bakitingbanga ima rengba ka manga sunge na abakureamo watadu gu kura paranga aboro tipa i sosodi ro mo mangi gupai du ni gbegberẽhe. Ko ima ino gupai nga gi sosodahe re ima kpakara tipa boro sovura kuti ni. Ni kpiapai, gu wiri Yakobo nangia Dina adu na agu abakureari nga aguyo naakpingo nyemu Yekova ya. Gipai re aye na kere kpakarapai furi na gari aborokporo. (Bambata Pai 34:1, 2) Ka si du nga abakureamo akpingo nyemu Yekova te, i ima rengba ka sosoda ro mo mangi gupai Yekova asogaha, nga gu rengbe ka ye na kere imisiri foro, fu gamo aborokporo, na fu Mbori a. (Asanza 17:21, 25) Gere nga ndu gupai duhe ti ni ni nyanyakipa pai mo gbata agu abakure nga aguyo nakpinyemu Yekova.—1 AKorindo 15:33.

GAMO ABOROKPORO RENGBE ARENGBA KADU NA NGBARAGO

17. Gini tindiro du kurii aborokporo ni basasa dunduko?

¹⁷ Ho aborokporo apekafuo agu arugapai ni nga ga Mbori, si nasayo i ne kereapai watadu badungu fudifudiapai. Sidu, ka singia kumbakudee nga mo, mo nikpinyemu diaro kini mangipai na ri rogo nyemuse yo. Ka singia diakumba nga mo, mo du na irisa na ki rá ni goro fu kumbamo na ki ni wiriki gu kpiapai nga ga gu diakumba furayo tipa ri rogo Asanza 31:10-31. Ka si du nga avunguagude nga oni, oni yugupai fu awironi i kpinyemu Yekova. (Asanza 22:6) Ka si du nga ba gude nga mo, mo ngbembatayo fu gamo aborokporo “wenengai.” (1 Timoteo 3:4, 5; 5:8) Na agude, oni gi sangba avunguroni. (AKorosaio 3:20) Oni tingidi gupai nga aborokporo dunduko ni basasa rengbe arengba ka manga ingahe, sidu, mo du na zerangbaduse na ki ho mbupai. Nirengo, Baibiri na ga Yekova arugapai rogoho tipa aborokporo ni basasa dunduko.