Zinga Asako Ko Da ni Baimiboro

Fuo guari Adamu na Eva ati Edene yo, i abatika dungu agude. Bambata wiriyo nga Kaina ada ni basopobino, na ue wiriyo nga Ebere ada ni babanda akandoro.

Rogo uru sa, aKaina na Ebere afu motumo fu Yekova. Mo ini guhe nga motumo? Si nga kparakpara gamahe. Rago angba ti Yekova na ga Ebere motumo, ono rago aangbanga tiko na ga Kaina te. Gupai re asa Kaina ko zingi ni kerehe. Yekova aza Kaina nga gu gako zinga re nika sako ko mangi gbegberẽpai. Ono Kaina aagianga pai te.

Kuba gure, Kaina aya fu Ebere: ‘Mo ye fuore ku ati no.’ Baraho i adu ni nisayo ati yo, Kaina azubo wirinako na ki imiko. Ginipai Yekova amangihe tipa gipai re? Yekova afu mbusa fu Kaina na ki kedi ko tuturũ ti agumeko. Kaina arengbanga ka karagatiko berewe kusayo a te.

Ya mo ani rengbe ka wirikapai ane? Ani ima rengba ka zinga ka si du nga apai andunga furani wai ani naaida si du te. Ka ani bi gupai nga ani na zinga—watadu ka kura aboro za rani mbiko i bi gupai nga ani ima zinga—si naida ani mangi ariapai ni ipo na ki zatirani mbata fu zinga moipai tirani.

Mbiko Ebere akpinyemu Yekova na kini mangi gupai du ni ruruhe dedede, Yekova nikaa tingidapa ko ti aregbo dũ. Yekova nika zingisa Ebere be kpio ho ko nika sa kpotosende ni ni paradizo.