Aboro Muambe Abati ku Rogo Vovo Zegino

Noa, gako aborokporo, gbiati anya arimi ku kurungba yo. Yekova akisi ngbadimo kurungba, na mai ki tona ka na. Mai ana ni bakerehe gbe kurungba ki tona ka ya rii ime. Niyangaraha, kpotosende naabaha ahi be ime. Agu aboro naadunga rogo kurungba ya ki kpiki kpäkäyä. Ono Noa na gako aborokporo adu ni bandabanda yo vuruhe yo. Ya mo mo rengbe ka berãpa gu ngbarago i adu na ni tipa giasangba Yekova?

Mai ana tipa aˈuru 40 na ayuru 40, si ki ru niyangaraha. Gu ime re augudi yeeye. Niyangaraha, gu kurungba re aru rii bagangara. Ono ime adu kindi ni bakerehe auru kpotosende naabaha, ka gene adunga be Noa na gako aborokporo ka kura kurungba yo ya.

Tooni tooni, ime augudi kusayo. Noa na gako aborokporo araki ku kurungba yo susi garã sa. Fuani Yekova ki ya fuyo i ima rengba ka kura kurungba yo ka ndu ku rogo gu rago naangera wa vovo zegino. I adu na bakere tambuahe nga Yekova batasi yo, na i ayuguhe nifu yo motumo fu Yekova.

Yekova adu na ngbarago na gu motumo re. Ko akidohe nga ko agbarasanga ahe dunduko auru kpotosende ane berewe na ime akangbii te. Ko akusi bambata wangu ariyo ni gu kpiapai nikaa yugopa gako kidohe. Ya mo mo abingo wangu?

Fuani, Yekova aya fu Noa na gako aborokporo i batika na ki hiisi kpotosende.