Korunerio Agbia Ziazia Toro

Kura nyanyakipa sekere adu kina Kaisaria yo ni boro Romo rimoko angia Korunerio. Wa si avura du nga ko aangianga Yudo te, aYudo anaairisa ko airisa. Ko anaaundo rungorungo aboro gbiati agu aboro zingo anaamanga yo. Korunerio aima ida kuti Yekova na ko anaakpara fuko dedede. Rogo kura uru sa, maraika akuru fuo Korunerio ki ya fuko: ‘Mbori ima gia gamo kpee. Awere mo kedi aboro ku rogo gu gbata nga Yapo, yo Petero asungo ni ki ya fuko ko ye fuo ro.’ Nibasa, Korunerio akedi akumba biata ku Yapo yo nga gu baturuho adu nga akirometere 30 ku sudiyo.

Ti kina gu bangisa regbo re, Petero abi yuguyugupai Yapo yo. Ko abi agu anya si anaaidanga aYudo ri ra ya, na ki gi fugo boro si ni ya fuko ko ri ra. Petero aká ki ya: ‘Ono mi aaringa birikobiriko anya mbata rogo gimi raka yo te.’ Gu fugo re ki ya fuko: ‘Ka mo yanga ti agu anya re birikobiriko anya ya. Mbori ima sa ra ni gigiri ra.’ Ni aya fu Petero berewe wẽ: ‘Akumba biata gu du ti gamo ngbadimo. Oni ndu na yo.’ Petero andu ku ngbadimo yo ki sana agu akumba re tipa ndu gupai du yo ho ti ni. I akaragapai ki ya: ‘Korunerio nga barukurii abanzengere kedi rani. Ko naida mo ye ku kpuko Kaisaria yo.’ Petero adi agu akumba re kugume i ki ra kpuko ho rogo gu yuru re ni gako agino. Rogo gu wiso nangbe fuani, Pauro gbiati gu kura awirina Yapo yo andu na agu akumba re ku Kaisaria yo.

Niyangaraha, ho Korunerio abi Petero ni, ko akuku sande ngba rukusiko. Ono Petero aya: ‘Mo guari kuari! Mi nga kina boro wa mo. Mbori aya fere mi ye ku kpuro no wa vura duhe nga, aYudo naandunga ku rogo gu kporo nga ga aGendiria te. Awere mo gumbanga ndu gupai mo akedi sunge ti ni fuore.’

Korunerio aya fu Petero: ‘Arame biama kusayo, mi aakpara fu Mbori, maraika ki gumba gupai fere nga mi kedi sunge fuoro. Ani nazungodi ro mo yugu ga Yekova apai furani.’ Petero aya: ‘Mi ima ino gupai nga Mbori akparanga boro te. Ko nadia agu aboro dunduko kugume naida ka irisoko.’ Petero ayugu dungu apai fuyo tipa Yesu. Sidu, ziazia toro aye kurii Korunerio na agu aboro dunduko naadu na ko, i dunduko ki zi bapatiza.