Gu Pambori Nga ga AKristano Agbandaka ku Rogo Dungu Aringara

Amokedi agisangba ga Yesu zinahe naadu tipa gbandaka wene pangbanga auru kpotosende dũ. Rogo gu garã nangia 47 Fuo Batikayo Kristo, agu awirina naadu Andiokia yo akedi aPauro na Barunaba i ndu ka tungusapai rogo kura arago. Gu zaaza abatungusipai re ata rogo ringara Asia Minor dunduko ku rogo aba wa Derube, Rusetura, na Ikonio yo.

APauro na Barunaba atungusipai fu aboro dunduko singia airakumuko watadu airarungo na fu paranga aboro na sosono yo. Dungu aboro aima idapa gu rengo du tipa Kristo. Ho aPauro na Barunaba aatungusapai ni fu Serugio Pauro nangia gavana Kupurio, kura borongua aˈasadi ka zá yo. Pauro aya fu gu borongua re wẽ: ‘Yekova zingi kutiro.’ Nibasa, gu borongua re avurari. Ho gu Gavana Pauro abi gipai re ni, ko ada ni idipase.

APauro na Barunaba aatungusapai rogo aba dũ, kporo na kporo, ba ngbeahe yo, bangiri agene, na rogo abambutiria. Ho i ahusi gu gbarĩgbarĩ kumba ni naadu Rusetura yo, agu aboro naadu pati gi iˈiriwopai re aberẽhe nga ambori du nga yo, i ki asadi ka iriso yo. Ono aPauro na Barunaba azá yo ki ya: ‘Oni irisi kina Mbori sa! Ani gbua nga kungbo aboro.’ Fuoho, kura aYudo aye ki sa rimbasa aboro i zingi kuti Pauro. Rimbasa aboro asopo ko na mbia ki kusiko kugii ndugu gbata yo mbiko i aberẽhe tigayo nga ko ima kpi. Ono tie, Pauro adu kindi ni ungako! Nibasa, awirina aye ka batasa ko, i adiko ki karaga ko berewe ku rogo gu gbata re. Kusa, Pauro akaragatiko ku Andiokia yo.

Rogo gu garã nangia 49 Fuo Batikayo Kristo, Pauro andu gu kura tua berewe nga ga tungusapai. Fuo ko karagatiko ka ndu ka bi agu awirina naadu Asia Minor yo, ko andu na wene pangbanga berewe tuturũ ku Putu yo. Ko andu ku Atenai yo, Efesa yo, Firipoi yo, Tesaronike yo, na ku rogo gu kura aba. Sira, Ruka, gbiati gu paranga rimoko angia Timoteo adu na Pauro ti regbo gi nunguro re. I amangisunge kina sa tipa ka kusa dungurati na ka undo yo i du ngangarã. Pauro asungu Korinda yo tipa garã sa na beberehe tipa ka nyakasa agu awirina naadu yo. Ko aatungusapai, kini yugupai na kini keke awaraga fu dungu adungurati. Ko amangisunge a ni bambakadi bamburoko. Fuo bete regbo kusa, Pauro akaragatiko ku Andiokia yo.

Kusa, rogo gu garã nangia 52 Fuo Batikayo Kristo, Pauro atona gu kura biata nunguro ku Asia Minor yo. Ko andu tuturũ ku Firipoi yo ku nodiyo na ki da Korinda yo. Pauro adi dungu agarã ku Efesa yo kaa yugopai, kaa husa aboro na ka undo dungurati. Ko anaamanga gumbapai a na aˈuru dũ rogo bakere vurukporo nga ga sukuru. Dungu aboro adegetuyo na ki aria gayo agene raka. Ni yangaraha, fuo Pauro tungusi wene pangbanga rogo dungu aringara, ko andu ku Yerusarema yo.