WIRIKAPAI 23
Bapatiza—Nga gu Wene Sásá Si Aida Boro Moihe!
Yesu ayugu gupai nga bapatiza nga gupai si aidaha be aKristano. (Mo gedi Matayo 28:19, 20.) Ono ginihe nga bapatiza? Na ginipai rengbe boro ka mangaha tipa ka da ti gu sásá re?
1. Ginihe nga bapatiza?
Gu fugo nga “bapatiza” i adihe rogo gu pa-Giriki du rogoyo nga ka “rindosi he” kutii ime yo. Ho i abapatiza Yesu ni, i arindosi ko rogo gu Di nga Yaradene, na tifuoho ko ki ‘guari ime yo.’ (Marako 1:9, 10) Wakina gure a, ndikidi aKristano nazio bapatiza ni rindosi yo yo dũ kutii ime yo.
2. Ginipai bapatiza ayugoho?
Ho boro azio bapatiza ni, ni nayugo gupai nga ni ima kpara tini fu Yekova Mbori. Waigu boro amanga kparatise? Mbata fu zio ni bapatiza, rogo gani kparakpee yo nisani, ni nape gupai fu Yekova nga ni naida ka iriso Ko nyeanye kindi. Ni namanga kidohe ka iriso kina Yekova sa na kini peresi pa manga gupai ni bambatapai rogo gani raka yo Mbori akpinyemuhe. Ni nasia ka ‘mbú gani apai . . . ki ni pekefuo’ ga Yesu ayugopai gbiati gako kpiapai. (Matayo 16:24) Pa gani kparatise na ki zi bapatiza nasa gupai nga ni du na wene mbembedi pabakure na Yekova gbiati akurani airisimbori.
3. Waigu rengbe boro ka manga sonakumbatayo tipa ka zio bapatiza?
Mo rengbe ka mbakada tiro tipa bapatiza ni wirika mo pai tipa Yekova na kini sonosi gamo idapase kutiko. (Mo gedi AEbere 11:6.) A wa gamo inohe gbiati idapase nikaa sona, kina wo a gamo nyemuse tipa Yekova nikaa kio. Zanga kapa, mo nika duadu na nyemu ka tungusapai tipa ko na kini raka ringbisihe kuti gako arugute. (2 Timoteo 4:2; 1 Yoane 5:3) Bara sa kindi boro natona kaa raka ‘kini mangipai na ngbanyaa na gupai Yekova akpinyemuhe tipa ka sa ngbarago tiko wenengai’ ni ima rengba ka diaberã tipa ka kpara gani raka fu Mbori na ki zi bapatiza.—AKorosaio 1:9, 10, NW.a
MO WIRIKI KURA DUNGU APAI
Mo bingo gupai rengbe ani ka wirikaha ti ga Yesu bapatiza na wai rengbe boro ka mbakada tini tipa gi nyanyakipa diandue re.
4. Ani ima rengba ka wirikapai ti ga Yesu bapatiza
Mo gedi Matayo 3:13-17 tipa ka wirika kura dungu futufutuapai tipa ga Yesu bapatiza. Na tifuoho, mo ki sakipai tipa agi asanahe re:
Ya mo Yesu angia fogo gude ho i abapatiza ko ni?
Waigu i abapatiza ko? Ya mo i akusuko kina ime gbua ku riko yo?
Yesu atona gako kparakpara sunge nga gu Mbori afuhe fuko ho ko azi bapatiza ni. Mo gedi Ruka 3:21-23 gbiati Yoane 6:38, na tifuoho, mo ki sakipai tipa gi sanahe re:
Tifuo Yesu zi bapatiza, gini sunge ko aperesipa ha ni bambata pai rogo gako raka yo?
5. Bapatiza nga gu sásá rengbe mo arengba ka da ti ni
Gupai nga kparatise gbiati bapatiza rengbe kaa ngera ti tonatonaha wa gupai ka ome ro arẽnga na ni ya. Ono tie, mo ima rengba ka manga sonakumbatayo si ki da ti gupai nga mo du adu na kido tipa ka manga ngbatunga gu nyanyakipa diaberã re. Tipa ka bi gu bete aboro namangi gupai re, mo bi gu VIDIO re.
Mo gedi Yoane 17:3 gbiati Yakoba 1:5, na tifuoho, mo ki sakipai tipa gi sanahe re:
Ginipai rengbe ka undo boro ni du nga regerege tipa bapatiza?
Ani namanga kparatise nigumba ani gupai fu Yekova nga ani naida ka irisoko nyeanye kindi
Ti regbo gaani bapatiza, ani nayugo gupai fu aboro nga ani ima manga kparatise fu Mbori
6. Ho ani azio bapatiza ni, ani nada nga papara ga Yekova aborokporo
Ho ani azio bapatiza ni, ani nada ni papara agu aborokporo du ni kodikodi yo rogo zegino dunduko. Wa vura duhe nga ani rogo aba ni bakiakia, apai tipa rani ni bakiakia, ani dunduko na bangisa aida sa na ani dunduko naraka kuti bangisa arugute. Mo gedi Atambuahe 25:14 gbiati 1 Petero 2:17, na tifuoho, mo ki sakipai tipa gi sanahe re:
Waigu du bapatiza na maapai kurii ga pagume na Yekova gbiati gu kura aboro nairiso Ko?
GU KURA ABORO NAPE GUPAI NGA: “Mi ata dunga nga regerege tipa ka zio bapatiza te.”
Kangia wo mo abihe, ya mo mo naberãha nga bapatiza nga gu sásá si aida aida mo da ti ni?
GINIPAI MO NAWIRIKIHE?
Yesu ayugu gupai nga si naida aKristano zi bapatiza azio. Tipa ka da ti gu sásá re, si naida boro sonosi nyanyaki idapase kuti Yekova, kini raki ringbisihe kuti ga Ko arugute, na ki kpara ti ni fu Yekova.
Fugöpai
Ginihe nga bapatiza, na tipagine duhe ti ni na nyanyakipaha?
Waigu du kparatise gbiati bapatiza na ngbanya dagbaha?
Ginipai si aida boro mangihe mbata fu ni rengbe ka manga kparatise na ki zi bapatiza?
MO WETEKE GU KURA APAI
Mo wirikipai tipa ginihe nga bapatiza na ginihe angianga bapatiza ya.
“Ginihe Nga Bapatiza?” (Gu kekeapai du rogo gaani bangiriba nga ga Internet)
Mo fugupai tipa agu agene rengbe boro ka manga sonakumbatayo ngbaha tipa ka zio bapatiza.
Mo gedinga pai tipa gupai nafõ ngbadu kumbayo ko zi bapatiza.
“I Aida Mi Ini Gupai Nitire Ziazia Kekeapai Ayugoho” (Ngbaõbambu Sinziri, Wegebe 1, 2013)
Mo makianga ndu gupai rẽhe arẽ ti ni mo moi gu sásá nga ga bapatiza na wai rengbe mo ka mbakada tiro tipaha.
“Ya Mo si Naida Mi zi Bapatiza?” (Questions Young People Ask—Answers That Work, Volume 2, kapita 37)
a Ka si du nga boro aima zio bapatiza mbata kusayo rogo kura kanisa, si nika ida aida ni zi bapatiza berewe. Tipagine? Si wo mbiko gu pambori re aayugongo gu rengo du rogo Baibiri yo te.—Mo bi Amokedi 19:1-5 gbiati Wirikapai 13.