WIRIKAPAI 44
Ya Mo Apumbo Dunduko Nafu Ngbarago fu Mbori?
Yekova naida ani gbia ngbarago rogo raka yo na zavura ti kura aregbo kini mangi pumbo amanga. Ono ya mo apumbo dunduko gbiati auru ongoda nafu ngbarago fu ko? Waigu rengbe ani ka yugo gaani nyemuse fu Yekova rogo gi bangiriba re?
1. Tipagine dungu apumbo asa gberãrago ti ni ti Yekova?
Kina ngbaro rengbe ka zera nga dungu apumbo adunga mburuhe ri agu ayugopai nga ga Ziazia Kekeapai ya watadu naenge ti apagano. Ngbatunga agu apumbo re rengbe ka du na kodatise dagbaha na ziree pambori. Si rengbe ka du na ngbanya dagbaha na sangbaatoro watadu mburuhe rengbe kadu rii gu bipai nga mbisimo akpingo te. Mburu kura apumbo naru rii sangbaatoro watadu gu ida nga apai namanga mbiko momu. (Yesaya 65:11) Yekova naza airisiko nga: Oni ‘kparaka, . . . ka oni zádi nga birikobiriko he ya.’—2 AKorindo 6:17.a
2. Waigu Yekova abi agu apumbo nafu gu irisa arẽnga i fuhe fu aboro ya?
Yekova naza rani nga ka ani kidongo ‘kuti boro’ ya. (Mo gedi Yeremaya 17:5.) Gu kura auru ongoda kinaho nafu irisa fu abazogo watadu abanzengere. Gu kura aboro nairisa agu ahe narukuba ringara watadu gu regbo i agbia ranirii ti ni. (1 Yoane 5:21) Agu akurayo nairiso ariigbu birĩ-zogarago watadu gu kura ariigbu angianga ga birĩ- zogarago ya. Waigu rengbe Yekova kadu ka si du nga ani nafu gu irisa arẽnga ya fu boro watadu fu riigbu, gbe gu natakapande pa agu aberãpai andunga kuti Gako ringbisapai ya?
3. Gini asino rengbe ka sa apumbo ka si dunga ni wenehe ya?
Baibiri ima zahe ti ‘kpibuda, na gbarakagbaraka pai, na apumbo buda.’ (1 Petero 4:3) Ti regbo kura apumbo, aboro namangapai zanga zatise na kini mangi wasiwasi apai. Tipa ka nye kindi ni abakurea Yekova, si aidanga ani mbedi na ngbatunga gu bibiriko mangaapai re te.
MO WIRIKI KURA DUNGU APAI
Mo bingo wai rengbe mo ka sa ngbarago ti Yekova ni manga mo agu adiaberã nga ga tatamana tipa auru ongoda gbiati apumbo.
4. Oni ka agu apumbo nasa gberãrago ti Yekova
Mo gedi AEfeso 5:10, na tifuoho, mo ki sakipai tipa agi asanahe re:
Ginipai si aida ani inihe ho ani adiaberã ni singia ani adu pati pumbo uru ongoda?
Gini auru ongoda aboro airisaha gbe rogo gu ba mo araka rogo yo?
Ya mo mo naberãha nga agu auru ongoda re nasa ngbarago ti Yekova?
Ni kpiapai, ya mo mo abakingo bangiro singia ga Mbori bipai nga gine tipa manga pumbo auru batika? Baibiri apenga pa irisi Yekova nga guni namangi pumbo uru batika ni te, ono si gumbapa auru batika ue nga gu agu aboro amangi pumbo ho naangianga airisi Yekova ya. Mo gedi Bambata Pai 40:20-22 na Matayo 14:6-10. Tifuoho mo ki sakipai tipa agi asanahe re:
Gini apai namangi ti regbo agu apumbo uru batika boro du ue re?
Ringbisihe kuti agi apangbanga nga ga Baibiri re, mo nabihe nga ga Yekova bipai nga gine tipa manga pumbo auru batika?
Mo ima rengba kaa bakabangiro kindi nga, ‘Ya mo pa manga mi apumbo uru batika watadu gu pumbo adunga mburuhe ri Ziazia Kekeapai ya, paha nyaki anyaka fu Yekova?’ Mo gedi Gate 32:1-8. Tifuoho mo bi gu VIDIO re, na mo ki sakipai tipa agu asanahe ngbefuoho.
Tipagine si aida ani inipa gupai ti ni Yekova aidaha?
Waigu rengbe ani ka mangaha wo?
Gu Gene rengbe ani ka ino ngbaha singia pumbo nasa gberãrago ti Mbori
Ya mo mburuhe ri agu ayugopai nga ga Ziazia Kekeapai? Tipa ka inoho, mo wisigipa wai si aenge.
Ya mo si nafu gu irisa arẽnga ya fu aboro, riigbu, watadu agu abendeere naru kuba ringara? Kina Yekova sa ani airisoko kisusi ahe dũ, na ani ima kido kutiko nga ko nika mbakada agu akpakarapai du rogo zegino.
Ya mo gaha asino na mangaapai natagbagatihe na agu arugute nga ga Baibiri? Ani naida ka nye gigiri rogo mangapai yo.
5. Mo undo aboro i yugu irisa tipa gamo aidaha
Si ima rengba ka du ni kpakarakpakaraha ho ka aboro asosoda ro ni tipa mo koditiro na yo oni mangi agu apumbo nasa gberãrago ti Yekova. Mo sakipa gamo adiaberã fuyo na zerangbaduse na rogo birĩ yo. Tipa ka bi kpiapai tipa wai ka manga gipai re, mo bi gu VIDIO re.
Mo gedi Matayo 7:12, na tifuoho, mo ki sakipai tipa agi asanahe re:
Ringbisihe kuti gi veresi re, ya mo mo rengbe ka gumba gupai fu agu agumero angia aidipase ya nga si aidanga i mangi pumbo uru batika te?
Ginipai rengbe mo ka mangaha ka yugo gupai fu gamo aborokporo nga wa vura duhe nga mo amanganga pumbo na yo te, mo ima kpinyemuyo na mo nabiyo abi na kikiipa yo?
6. Yekova naida ani du na ngbarago
Yekova naida ani gbia ngbarago ti gu regbo ani adiaha na gaani aborokporo gbiati abakurearani. Mo gedi Batungusipai 8:15, na tifuoho, mo ki sakipai tipa gi sanahe re:
Waigu gi veresi re ayugo gupai nga Yekova naida ani du na ngbarago?
Yekova naida gako aboro nazambuasi tiyo na kini di regbo kaa gbia ngbarago kina sa. Mo bi gu VIDIO re ka bi wai gipai re adu ni yuguyuguhe ti regbo gaani kikindigi adunguratise nga ga dungu aringara.
Mo gedi AGaratio 6:10, na tifuoho, mo ki sakipai tipa agi asanahe re:
Ya mo si naida ani mangi gu pumbo auru ongoda amanga mbata aboro naamangaha gbe tipa ka manga gu pai “ngba angba” fu aboro?
Gini ngbatunga fu gamahe rengbe ka sa ngbarago ti boro—gu ni afuhe ti uru ongada watadu gu ni narengbe ka fuhe ti ai regbo?
Badungu aDezire Yekova ti kura aregbo ni naambakada kparakpara gamahe fu awiriyo na zavura ti kura aregbo ka tunguo yo atunguo na ni. Ka singia agude bero, gini ngbatunga kparakpara ambakadapai rengbe mo ka mangaha tipa yo?
GU KURA ABORO NAPE GUPAI NGA: “Anga gupai nyakipaha nga pa wai uru ongoda aenge te. Si gbua tipa ka dia wene regbo ka sungo na aborokporo gbiati abakure.”
Gamo karagapai nga gine?
GINIPAI MO NAWIRIKIHE?
Yekova naida ani di regbo ka sungo na gaani aborokporo gbiati abakurearani. Ono ko naida a ani ne agu apumbo rengbe ka sa gberãrago tiko.
Fugöpai
Gini asanahe rengbe ani ka sanaha ka ino singia pumbo nasa gberãrago ti Yekova?
Waigu rengbe ani ka undo gaani aborokporo gbiati abakurearani i rugutiyo na pa gaani adiaberã nibi pa auru ongoda?
Waigu ani ainoho nga Yekova naida ani du na ngbarago na kini zambuasi tirani?
MO WETEKE GU KURA APAI
Mo bingo gu bete kparakpara auru ongoda aKristano namanganga ha ya.
Mo bingo nduapai biama nga gu nasarani ani idi kuti gupai nga manga apumbo auru batika nasa gberãrago asa ti Mbori.
Mo bingo wai rukutu agude narengbe ka sa ngbarago ti Yekova ti regbo ongoda.
Amirioni aKristano ima diaberã ka zanga manga pumbo Krisimasi. Waigu i abi gi gayo diaberã re?
“I Agbia Guhe Nangba Kisusi” (Ngbaõbambu Sinziri, Banduru 1, 2012)
a Mo bi 5 Rukutu Kekeapai Du Ti Digido Gi Buku Re ka wirika wai ka mangapai kuti kura auru ongoda.