WIRIKAPAI 45
Gupai Kparatise Ti Zegino Ayugoho
Yesu ayugu gupai nga si aidanga apefuoko du ni “aboro zegino” te. (Yoane 15:19) Kparatise ti zegino nakoda zanga rimisotise ku rogo gu poritiki nga ga gi zegino re gbiati avura. Ka pe rengo, si taata ti a regbo dũ ani kpara tirani ti zegino te. Ani ima rengba ka gbiatirani na sawiahe mbiko manga ani he wo. Waigu rengbe ani ka nye ni kparakpara rani ti zegino na ki nye ni ruru rani fu Yekova?
1. Waigu ndikidi aKristano abi gu zogarago nga ga aboro?
AKristano nairisa gu zogarago nga ga aboro airisa. Ani namangaha kina wai Yesu apehe, na kini fu ‘agu ahe nga ga Kaisara fu kina Kaisara’—naida ka ya ani nagiasangba agu andiko nga ga ringara agia, wa gu du tipa fu marã ngbeti. (Marako 12:17) Baibiri nayugo gupai nga agu azogarago nga ga aboro ho mbiko gupai nga Yekova du mbu gene fuyo i ni zogorago. (ARomo 13:1) Sidu, ani ima ino gupai nga agu azogarago nga ga aboro na kina bete pagbia gbua beyo ringbisihe kuti gu nga ga Mbori. Ani nangera koyo du gaani Mbori ni gbiati gu gako Kindo du ngbangbaturũ yo si ye ka nyasariipa gu kpakarapai nga ga aboro.
2. Waigu rengbe ani ka yugoho nga ani ni kparakpara rani ti zegino?
Wakina Yesu, ani arimisongo tirani ku rogo poritiki te. Ho aboro abi gu kura ga Yesu iiriwo mangapai ni sa, i aasadi ka maa ko ni gayo bakindo auru kpotosende ane, ono ko aambunga gene fuyo i moi ko te. (Yoane 6:15) Tipagine? Mbiko gupai ko agumbaha kusa nga, ‘gi ngbi aenga nga rogo gi zegino te re.’ (Yoane 18:36) Nidu ani ni ga Yesu abawiriki, ani nayugo gaani kparatise ti zegino rogo dungu agene yo. Ni kpiapai, ani andunga ka sovura te. (Mo gedi Mika 4:3.) Ani nayugo irisa ayugo tipa agu ahe narukuba ringara wagu nga abendeere, ono ani afunga gu iriso fuhe ani afuhe fu Mbori te. (1 Yoane 5:21) Na ani angbenga nakura riigbu birĩ-zogarago watadu gu kura boro nga gu ni naru tipa bawaraga te. Rogo agi agene re gbiati agu akuraha, ani nayugo ho nga ani ni ruru rani sa fu kina ga Mbori Zogarago—nga gako Kindo.
MO WIRIKI KURA DUNGU APAI
Mo wisigingo agu abangiriba rengbehe ka du rogoho ni kpakarakpakaraha ani kpara tirani ti zegino, na ki bingo wai rengbe mo ka manga agu adiaberã rengbe ka sa ngbarago ti Yekova.
3. Ndikidi aKristano ni kparakpara yo ti zegino
Yesu gbiati apefuoko aima maa wene kpiapai furani. Mo gedi ARomo 13:1, 5-7 na 1 Petero 2:13, 14. Tifuoho, mo bi gu VIDIO re, mo ki sakipai tipa agu asanahe ngbefuoho.
Tipagine si aida ani yugu irisa ti ni fu gu zogarago nga ga aboro?
Gini kura agene ani ayugoho rogoho nga ani nara ni rirani fuyo?
Ti regbo vura, gu kura aringara ima rengba ka ya i arimisongo tiyo ku rogoho te, ono i kini songodi gu kura aboro asongoda nga aguyo nasovura. Ginihe nzunzu nga kparatise kusayo ti zegino? Mo gedi Yoane 17:16. Tifuoho, mo bi gu VIDIO re mo ki sakipai tipa gu sanahe ngbefuoho.
Rogo gupai yo nga ka kparatise kusayo ti zegino nga gine?
Na ka si dunga airangbii naida ani mangi gupai natagbaga tihe na ga Mbori ndiko? Mo gedi Amokedi 5:28, 29. Tifuoho, mo bi gu VIDIO re na mo ki sakipai tipa agu asanahe ngbefuoho.
Ka si dunga tagbagapai gu duho bangbanda agu ndiko nga ga aboro na gu nga ga Mbori, gada andiko si aida ani giasangba ha?
Ya mo mo rengbe ka berãnga pa kura bangiriba nga gu aKristano arengbanga ka giasangba airangbii rogoho ya?
4. Mo kpara tiro ti zegino rogo berã na rogo mangaapai yo
Mo gedi 1 Yoane 5:21. Tifuoho, mo bi gu VIDIO re na mo ki sakipai tipa agu asanahe ngbefuoho.
Rogo gu vidio re, tipagine Ayenge nidi berã ti ni ka zanga rimo riigbu poritiki watadu ka zanga rimiso tiko ku rogo agu apumbo nabipa taasarimo ringara, wa gu nga de masa fu bendeere?
Ya mo mo nabihe nga ko nimangi diaberã na tatamana?
Gini kura abangiriba rengbe ka asada gaani pa kparatise ti zegino? Mo bi gu VIDIO re, mo ki sakipai tipa agu asanahe ngbefuoho.
Waigu rengbe ani ka kpara tirani ti zegino ho daha ni ti agu ambaro nakoda dungu aringara?
Waigu rengbe ani ka kpara tirani ti zegino ka si dunga ani gbiatirani na gbegberẽ sangbanapai mbiko agu adiaberã nga ga aboro poritiki?
Waigu rengbe agu apai ani agiaha watadu agu aboro ani akoda tirani na yo kadu na maapai kurii gaani pa kparatise ti zegino?
Rogo gini abangiriba si aida Kristano nye ni kparakpara ni ti zegino ngbaha rogo berã yo na rogo mangaapai yo?
KURA BORO RENGBE KA SANAHE NGA: “Tipagine oni adenga masa ti ni fu bendeere watadu ka bi bia sambuo rimo ringara ya?”
Waigu rengbe mo ka karagapai?
GINIPAI MO NAWIRIKIHE?
AKristano namanga ome nyanyaki ka zanga rimiso tiyo ku rogo agu apai nga ga poritiki rogo gayo aberã, afugo na mangaapai.
Fugöpai
Gini apai si aida aida ani mangihe fu agbia-ngbii?
Ginipai si aidanga ani rimisi tirani ti ni ku rogo poritiki ya?
Gini apai rengbe ka asada gaani pa kparatise ti zegino?
MO WETEKE GU KURA APAI
Gini kura apai si aida ani mbu paha ambu tipa ka kpara tirani ti zegino?
Ginipai rengbe aborokporo ka mangaha tipa ka mbakada tiyo tipa agu aasada rengbe ka gbia yo nibipa kparatise kusayo ti zegino?
Oni Banda Gaoni Kparatise ti zegino ti Regbo Agu Adunguratise Nga ga Ringara (4:25)
Tipagine adunga pa songoda boro pai ku bara gani ringara yo ti ni ni gu bakere pa irisa rengbe boro ka gbiaha ya?
Mo bingo wai rengbe mo ka nye ki zanga du ni boro zegino ho mo amanga adiaberã ni nibipa gu sunge mo aida ka mangaha.
“Boro Nakpida Kina Gani Pai” (Ngbaõbambu Sinziri, Zerekpe 1, 2006)