Mo Sia Gamo Abakure na Tatamana

Mbembedi abakure nakiiso gaani ngbarago ti wene aregbo na kini nyakasi rani ti kpakarakpakara aregbo. Ono Baibiri naza rani nga anga ai boro nga wene bakure te. Sidu, waigu rengbe mo ka sia wene abakure? Mo bingo agi asanahe re.

1. Mo bingo wai rengbe agu abakure mo nika siayo kadu na maapai kuriro?

Ani nada wakina agu aboro ani asia ka dia regbo na yo. Si rengbe kadu ni wenehe watadu ni gbegberẽhe—na gipai re nga rengo singia ani sia ka dia regbo kaa sungo na yo watadu rogo Internet. Baibiri naya, ‘gu boro nata na boro tatamana ni adú ni iratatamana a, ono gu badiata nga ga mumungo aboro [agu yo akpingo nyemu Yekova ya] ima azía yo wa sa.’ (Asanza 13:20) Agu abakure nakpinyemu Yekova na kini irisiko ima rengba ka undo ro mo du mbembedi na ko na ki mangi wene adiaberã. Ono gu mbembedi abakure akpingo nyemu Yekova ya ima rengba ka sarani ani turũ ku sayo ti ko. Sidu nga ndu gupai Baibiri angarasa rani ti ni nga ani sia gaani abakure na tatamana! Ho du abakurea rani ni ni agu aboro nakpinyemu Mbori, ani dunduko na yo nagbia undo. Ani nika du na rengba ka “zúngadi tirani na akuarani, ki ninyakasi tirani dagba rani.”—1 ATesaroniko 5:11.

2. Waigu gamo siapai nga ga abakure nika du na maapai kurii Yekova?

Yekova nasia gako abakure na rubangirise. ‘Ruru boro du rogo gako pa du zukazuka.’ (Asanza 3:32) Waigu rengbe Yekova kadu ka si du nga ani sia agu abakure akpingo nyemu ko ya? Ko rengbe kadu na bakere gberãrago! (Mo gedi Yakoba 4:4.) Ono tie, Yekova nika du na ngbarago na ani na ki sia rani ni abakureako ka ani ka gbegberẽ kpamiatise na ki mbedi na ko gbiati agu aboro nakpinyemuko.—Atambuahe 15:1-4.

MO WIRIKI KURA DUNGU APAI

3. Mo du na rubangirise ti gbegberẽ kpamiatise

Agu aboro akpingo nyemu Yekova na gako rugute ya, i nga gbegberẽ kpamiatise. Mo bi gu VIDIO re, na tifuoho, mo ki sakipai tipa gu sanahe ngbefuoho.

VIDIO: Oni Wiriki Wai ka ne Gbegberẽ Kpamiatise (6:17)

• Waigu rengbe ani ka rimiso tirani ku rogo gbegberẽ kpamiatise yo zanga inoho?

Mo gedi 1 AKorindo 15:33, na tifuoho, mo ki sakipai tipa agi asanahe re:

• Gini ngbatunga boro rengbe kadu ni gbegberẽ kpamiatise foro? Tipagine?

Mo gedi Atambuahe 119:63, na tifuoho, mo ki sakipai tipa gi sanahe re:

• Ginipai si aida mo ngere tipaha ti bakure?

4. Agu aboro du apai tipa yo kia ima rengba kadu ni wene abakurearani

Baibiri nasakapai tipa Davide na Yonatana nga akumba ue naraki rogo gu ringara aYisaraere nadu mbata. Garã yo adu ni bakiakia na agu apai nadu tipa yo adu a ni bakiakia; ono wa si avura du wo, i adu ni wene abakure. Mo gedi 1 Samuere 18:1, na tifuoho, mo ki sakipai tipa gi sanahe re:

• Tipagine si aidanga abakurearani du ti ni de- dede nga agu aboro du na garã yo wakina gaani watadu abaworimo ya?

Mo gedi ARomo 1:11, 12, na tifuoho, mo ki sakipai tipa gi sanahe re:

• Waigu rengbe agu abakure nakpinyemu Yekova ka ngarasa tiyo?

Rogo gi vidio re, mo bingo wai paranga wirina sa azi bakure rogo gu rago ko aainongo nga ka ko zi bakure rogoho ya. Mo bi gu VIDIO re, na tifuoho, mo ki sakipai tipa agu asanahe ngbefuoho.

VIDIO: Mo Zi Abakure Rogo gu ba Mo Ainongo Ho Ya (5:06)

• Rogo gi vidio re, tipagine avungu Akil aabakabangiriyo ti ni tipa abakureako sukuru yo?

• Ti tonatonaha, gini apai nasa agu abakureako re i ngba tiko?

• Waigu ko arengbe ka diabe gako du nisase?

5. Wai ka sonosa wene pabakure

VIDIO: Ndikidi Bakure Nga Gine? (4:14)

Mo gedi Asanza 18:24 na 27:17, na tifuoho, mo ki sakipai tipa agi asanahe re:

• Waigu ndikidi abakure aundo tiyo?

• Ya mo ndikidi abakure wa gure bero? Ka singia i te, waigu rengbe mo ka gbia beteyo?

Mo gedi AFiripoio 2:4, na tifuoho, mo ki sakipai tipa gi sanahe re:

• Tipa kadu na wene abakure, si naida mo du ni wene bakure a. Waigu rengbe mo ka manga gipai re?

GINIPAI MO NAWIRIKIHE?

Ho ani asia gaani abakure ni na tatamana, ani nasa ngbarago ti Yekova na ani kini gbia undo ni tirani.

Fugöpai

• Tipagine du gaani siapai nga ga abakure ti ni na nyanyakipaha fu Yekova?

• Gini ngbatunga abakure si aida ani ne yo?

• Waigu rengbe mo ka sonosa nyanyakipa bakure na gu boro rẽarẽ?

MO WETEKE GU KURA APAI

Mo bingo wai wene abakure narengbe ka undo rani ti regbo asada.

“Oni Nyakasi Gaoni Pabakure Mbata fu Digido Zegino Da” (Ngbaõbambu Sinziri, Ngbangba 2019)

Mo bingo agu adiandue rengbe mo ka mangaha tipa ka manga wene abakure.

“Wai Rengbe Mi ka Zio Wene Abakure?” (Questions Young People Ask—Answers That Work, Volume 1, kapita 8)

Ginipai si aida mo inihe tipa gu pabakure du rogo Internet?

Mo Mangisunge na Aũfugo Dagbase na Tatamana (4:12)

Rogo gu pangbanga du riihe nga “Mi Adu na Nyemu kadu na Buba,” mo bingo gupai nasa gu kura kumba sa ko wisigi pa agu abakure ko asia yo.

“Ziazia Kekeapai Rengbe Arengba Ka Aria Gaoni Raka” (Ngbaõbambu Sinziri, Zerekpe 1, 2012)