GU BA AWARAGA DU ROGO INTERNET nga ga Ngbaõbambu Sinziri
Ngbaõbambu Sinziri
GU BA AWARAGA DU ROGO INTERNET
Zande
ã
  • ã
  • ẽ
  • ũ
  • á
  • ö
  • ò
  • ĩ
  • ä
  • BAIBIRI
  • AWARAGA
  • ADUNGURATISE
  • w01 2/1 kpe. 18-22
  • Oni Ima Sa Rengo Ni Gaoni?

Vidio ho tipa gipai mo nasiaha re te.

Akoo, wiri ingahe ima manga ho gu vidio re naambakada tihe ka tona ni.

  • Oni Ima Sa Rengo Ni Gaoni?
  • Ngbaõbambu Sinziri Natakapande ga Yekova Kindo—2001
  • Umbariiapai
  • Awirinaha
  • Ga Satana Õkõokõ Abirĩ Nangahe
  • Ani Rengbe ka Manga Wai ka gu Kapa Re Nye Kindi?
  • Oni Banda Tironi be ga Satana Õkõokõ Abirĩ!
  • Ani Banda Guhe Du Berani
  • Anga Rimorani Ni Guhe Gbua Du Tipa Ino Rani Tini Te
  • Wai ka Diabe Akapa
    Ngbaõbambu Sinziri Natakapande ga Yekova Kindo (Wisigoho)—2024
  • Aguyo Du na Ani I Ngee ti Aguyo Du na Yo
    Raka Nga ga AKristano na Gaani Sunge—Waraga Dunguratise—2022
  • Gu Wisigopai Nisase Naundo Rani Ani Duni Abayugupai
    Ngbaõbambu Sinziri Natakapande ga Yekova Kindo—2002
  • Mo Ka fu Bakitingbanga na Gako Gbegberẽ Abirĩ
    “Oni Bánda Tironi Rogo Ga Mbori Nyemuse Yo”
Mo Bi Kuraapai
Ngbaõbambu Sinziri Natakapande ga Yekova Kindo—2001
w01 2/1 kpe. 18-22

Oni Ima Sa Rengo Ni Gaoni?

‘Oni sá tironi ni mbakada berãroni berewe, ki kpária pa guhe nga ga Mbori nga gu duni wenehe nzunzu, ni ziaziaha.’—AROMO 12:2.

1, 2. Tipagine adunga ha tini ni taatapai ka duni ndikidi Kristano areme ya?

TIPA ka duni ndikidi Kristano rogo gi yangara arame re—nga gu regbo duni ‘kpakarakpakaraha ka mangapai sani’—si ni taatapai te. (2 Timoteo 3:1) Nirengo, tipa boro pefuo gu kpiapai nga ga Kristo, ni du wa ka ni dibe zegino. (1 Yoane 5:4) Oni tingidinga gupai Yesu apehe tipa gu gene nga ga aKristano: “Oni rími rogo pangipangi ngbadimo; bambiko gu ngbadimo na gu gene nangbe koyo du kpio ni, si . . . ni kikii he, ni basisi he, dungu aboro narima koyo. . . . [Ono] gu ngbadimo na gu gene nangbe koyo du unga ni, si . . . ni pangipangi he, ni fitikiri he, aboro nabi he ni kina umba yo.” Ko agumba gupai a nga: “Gu ni nakpi nyemu peka re ni mbu gani apai, ki tumba gani wagiwagi ngua na uru, ki nipeke re.”—Matayo 7:13, 14; Ruka 9:23.

2 Fuo bi Kristano gu pangipangi gene kindi nandu sa unga, gu kura kpakarakpakarapai ni agbiaha nga pa nye ku ngba gu gene re. Tipagine du gure tini ni kpakarakpakarapai? Si wo mbiko gaani kparatise fu Mbori na gaani bapatiza namaa rani ni agu aboro Satana aida ka nanga yo, watadu ko aida ka ingisayo na gako iraira birĩ. (AEfeso 6:11) Ko nakparia agu apai du ani rogo na rungbura na kini gbata gene ka mangasunge nani rogo asada tiko ka gbarasapa gaani padu wenengai rogo toroyo. Nirengo, ko a’asadi ka ba Yesu, sidu, ya mo ndupai ho rengbe ko ka he rani tigaani tini?—Matayo 4:1-11.

Ga Satana Õkõokõ Abirĩ Nangahe

3. Waigu Satana arũ tunga nga ga kapa kuberã Eva yo?

3 Gene sa nga gu Satana amangasunge nani nga ka maa kapa tipa apai kuberãraniyo. Ko nangereka tipa gu rago anyakanga gaani rokovura nga ga toro rogo ya. Ti kina tonatonaha, ko amangi Eva na gu biri̇̃ re, kini sanahe niyaa: “Ya mo si nirengo nzunzu nga Mbori ayaa ka oni ringa agu angua du atiyo dunduko ya?” (Bambata Pai 3:1, NW ) Ka pehe rogo kura afugo, Satana aagumba gupai furi nga, ‘Ya mo si rengbe ka manga nzunzu nga Mbori fu zahe fu roni wa ngbatunga gure? Ko rengbe ka ka na bawene he wa gure beroni? Oni ngere, Mbori ini gupai nga, ni kina boro gu uru oni ka ri zuzu gu ngua re, bangironi aza oni ki du wa kina Mbori, niini wenepai na gbegberepai!’ Nimangaha were, Satana arũ tunga nga ga kapa kuberãriyo, kini pidihe si terẽ.—Bambata Pai 3:5.

4. Gini akapa rengbe ka duna ome areme kurii kura aboro?

4 Waigu Satana amangasunge na gi birĩ re areme? Ka ani basapa gaani geda Baibiri, gaani wisigopai nisarani, gaani akparakpee, na gaani sunge nga ga aKristano na kini basapa gaani adunguratise, ani rengbe ka mbu tirani tipa agu akapa aboro agumbaha rimi kuberãraniyo. Ni kpiapai: “Waigu ani aino gupai nga ani rogo gu rengo Yesu anayugoho?” “Ya mo ani nzunzu rogo yangara arame? Na wai tie, ani aima da rogo 21 kama agarã.” “Ani mbedi awere gbe na Aramegido, watadu si kindi kumbatayo tuturũ?” Ka ngbatunga agu akapa re kuru, ginipai rengbe ani ka mangaha ka diaha kusayo?

5, 6. Ginipai du ani wa ka ani mangihe ka ani tona kaa duna kapa kuti apai?

5 Yakoba afu wene rugute ho ko akepai ni ki ya: “Ka zingo tatamana amanga gu ni dagba roni yo, ni sána Mbori, ninafu he gbe fu aboro dunduko, azinga nga fu boro ya; ko ki fu he afu fu ni. Ono ni sána he ni idapase, ka ni sáki nga pa ko ya; bambiko gu ni nasaka pai ni wiri gu ngiri baime, yuge nita danda ha nituka ha ku sa yo. Si du ka gu borore berẽ nga ha ya ni adia he be Gbia ya. Boro berãpai ue du, ni rungburarungbura ni rogo gani apai dunduko.”—Yakoba 1:5-8.

6 Ginipai tie si aida ani mangihe? Si naida ani ‘nisana Mbori kindi’ rogo kparakpee tipa idapase na tipa giarogopaiyo na ki nyakasi gaani asadatise kaa wisigopai nisarani tipa ka rugatise na agu asanahe watadu akapa ka du berãraniyo. Ani rengbe a ka sana aguyo nyaki rogo idapase yo tipa undo, zanga kapa, kini kido ya Yekova asongoda rani asongoda. Yakoba agumba gupai a nga: “Oni fú tironi fu Mbori; ono oni ká fu bakitingbanga, ko ki oro be roni. Oni mbédi na Mbori, ko ki mbedi na oni.” Ii, gaani akapa agbandaka kusayo ka ani aambeda na Mbori rogo wisigopai na rogo kparakpee.—Yakoba 4:7, 8.

7, 8. Gini bambata apai rengbe ka undo rani ani ruho ka ino gu ngbatunga irisombori Yesu anayugoho, na ada namanga agi apai re?

7 Ni kpiapai, ani di nga gu sanahe nga: Waigu ini ani gupai nga ani namanga ngbatunga gu irisombori Yesu anayugoho? Ginipai si aida ani wisigihe kini ruho ka karagapai sa gi sanahe re? Baibiri nayugu gupai nga ndikidi aKristano du wa ka i duna ndikidi nyemuse dagba tiyo. (Yoane 13:34, 35) I du wa ka i sa rimo Mbori, nga Yekova, si du gigirii. (Yesaya 12:4, 5; Matayo 6:9) Na i du wa ka i aayugo gu rimo re gbayaga fu kura aboro.—Gate 3:15; Yoane 17:26.

8 Gu kura apai nayugopa ndikidi irisombori nga duna irisa tipa Fugo Mbori, nga Baibiri. Si nga gu bangisa buku nayugo asino Mbori na gako ringbisaapai fu rani. (Yoane 17:17; 2 Timoteo 3:16, 17) Kurii gure, ndikidi aKristano natakapande ga Mbori Kindo ni gu yangara maabangirise du fu aboro tipa nyenye unga rogo paradiso nga ga kpotosende. (Marako 13:10; Yugoti 21:1-4) I nakpara tiyo ti ga gi zegino re iraira birĩ zogarago na gaha bibiriko gene raka. (Yoane 15:19; Yakoba 1:27; 4:4) Ada nzunzu areme namanga agi apai re? Rengo nasigira gupai nga karagapai ho tipaha gbua sa—nga kina aDezire Yekova namangaha.

Ani Rengbe ka Manga Wai ka gu Kapa Re Nye Kindi?

9, 10. Ginipai rengbe ani ka mangaha ka dia agu akapa kusayo nye kindi berãraniyo?

9 Ginipai ka mangi ka ani bi tirani ngba gu gene nga ga kapa? Ginipai si aida ani mangihe fuo gure? Gu tatamanatatamana Bakindo nangia Soromo nafu karagapai niyaa: “Ako wire, ka mo agia gimi apai ki niigi sangbare ku ngbaduro yo, ki ye turo sa pa tatamana nifu ngbaduro yo tipa rugatinapai; ii, ka mo akpara ku ari tipa inahe ki nitumba fugoro ku ari tipa rugatinapai, ka mo agbata ha wa feda ki nita tipa ha wa okooko ũkumuko; si du mo ka ruga tiro ti ni na pa gunde ti Yekova, ki bi gu inahe nga ga Mbori.”—Asanza 2:1-5, pigipigi kekeapai nga gaani.

10 Anga gure ni iiriwo berã tee? Ka ani duna nyemu degaturani wenengai kuti ga Mbori tatamana, ani “[“abi kina boro,” NW ] gu inahe nga ga Mbori.” Ii, ani rengbe arengba ka duna gu inohe nga ga Gbia Bakindo nga ga haurago ko ka ani duna nyemu dia sangba ko kugume na kini bandaha. Gure nayugo gupai nga ani sa tirani koyo du Yekova ni rogo kparakpee na rogo wisigopai nisarani. Gu okõokõ akumuko du rogo Fugo ko rengbe ka gbandaka agu akapa dunduko kusayo du berãraniyo na si ki undo rani ani bi gu timarago nga ga rengo.

11. Waigu ga Erisa moyambu aduni fudifudi ko be kapa?

11 Gu ziazia kpiapai nayugo wai kparakpee aundo gu ga Mbori moyambu nadu na gunde ki duna kapa gudu rogo 2 Abakindo 6:11-18. Ga Erisa moyambu azanga bipai nga ga toro. Ko aarengbanga ka ino gupai nga rimbasa abanzengere nga ga ngbangbaturũ yo aduho tipa ka undo ga Mbori nebi te, nga guko gu riivura nga ga aSurio aima ru nguru pati ko kirikiri. Rogo gunde, gu moyambu re akpari kuari ki ya: “Ako, bairare! Ani amánga waĩ?” Waigu Erisa akaragapai fuko? “Ka mo gúnde nga ya, bambiko agu yo du na ani i ngee ti agu yo du na yo.” Ono waigu ka Erisa asa gu moyambu re ko idi gupai re, wa ko arengbanga ka bi gu rimbasa aborovura nga ga ngbangbaturũ yo ya?

12. (a) Waigu i adi ga moyambu kapa kusayo? (b) Waigu rengbe ani ka dia agu akapa kusayo ka du berãraniyo?

12 “Erisa ki ta kpara, niya, ‘Ako Yekova, mi nakpara foro, mo zá bangiriko, ko bi agi apai re.’ Yekova ki za bangiri gu paranga re; ko ki bi he, nga afarasi na angbagidavura nga ga we ki du kirikiri pati Erisa ri bagangara ni badungu ra.” Rogo gu gene re, Yekova asa gu moyambu re ko bi gu riivura nga ga ngbangbaturũ nga gu naabanda Erisa. Ono tie, si aidanga ani moibangirani areme tipa Mbori undo rani kina ngba gu bangisa gene re tipa ani nibi apai te. Ani tingidi gupai nga, gu ga nebi moyambu re adunga na Baibiri beko nabaha tipa kaa wisigoho si nyakasi gako idapase te. Ani tigaani duna Baibiri berani. Ka ani mangisunge nani wenengai, gaani idapase rengbe a ka nyaka wa kina gako. Ni kpiapai, ani rengbe ka berãkurii gu dungu tangaratangaraapai nga gu naringbisapa Yekova rogo gako basungo ngbangbaturũ yo. Agi apai re ambunga ba tipa kapa ya Yekova zanga gu riigbu nga ga ngbangbaturũ nga gu nasongoda gako amoyambu areme rogo gayo sunge yugopai nga gu namanga rogo zegino dunduko te.—Yesaya 6:1-4; Yezekere 1:4-28; Daniere 7:9, 10; Yugoti 4:1-11; 14:6, 7.

Oni Banda Tironi be ga Satana Õkõokõ Abirĩ!

13. Gini agene Satana a’asada ka rungburasi rani rogo ka ani kanga kuti rengo ya?

13 Gini kura bete agene duho nga ga Satana tipa rungburasi rani rogo toroyo na pa ka ani kuti rengo? Gu sa dagbaha nga wasiro, rogo angbatungaha nibakiakia dunduko. Rogo gi zegino nga gu ima rätä fuo kodaba re, gupai i ayambaha nga badia watadu kodaba tipa yuru gbua sa, si da ni gupai namanga na auru dunduko tipa gu rikaaboro nyakasi tiyo tipa gbia ngbarago, ka sangbanaha vurangia kina gine vurũ. Asinima, terevizioni, na avidio nazugasi gi sino raka re. Aũyugo kpia kundiri aboro watadu fura tipaha rogo aũgbandaka pangbanga ima gbandaka rogo arago yasika, gbe nga rogo Internet. Asada napido agu aboro duna nyemu bi agu apai re tiyo.—1 ATesaroniko 4:3-5; Yakoba 1:13-15.

14. Tipagine kura aKristano azi tini ti ga Satana okõokõ abirĩ?

14 Gu kura aKristano ambu gayo nyemu ino kuraapai si ingisi yo na ki birikosi aberãyo na ngbaduyo yo ni bi yo kpia agu aboro namanga kodaba watadu ni bi yo gu gbere ti gure. I ambu tiyo ka zio ti ga Satana gbina nga gu ko azomia aboro ku bangirihe yo. Pa manga yo ho wo andu dedede na yo sa gupai nga gayo kurungba nga ga toro gburuwa. Ngbatunga aguyo re azanga nye ni ‘fogo agude rogo manga gbegberepai.’ I ‘adanga ni sosono aboro rogo berã’ te. (1 AKorindo 14:20) Rogo agarã nibasasa, dungu akutu aboro nambu ni sangbana zanga kakuti agu andika nga ga Fugo Mbori. I ima basapa ukaditiyo na ‘ga Mbori ũvura nabaha.’—AEfeso 6:10-13; AKorosaio 3:5-10; 1 Timoteo 1:18, 19.

Ani Banda Guhe Du Berani

15. Tipagine rengbe gu kurayo tini ka bihe nikpakarakpakarapai ka duna tambuahe tipa gayo ũkumbo nga ga toro?

15 “Oni aina rengo aína, ki ra ni rironi be rengo,” wogu Yesu agumbaha. (Yoane 8:32) Dungu aDezire si aidi i mbu gu gayo gene raka nadu mbata na kodatise na gayo kuru pambori. Sidu tie, i rengbe ni kina ipo ka duna tambuahe tipa gu ranirii rengo naye nani fuyo. Ngba kura gene, gu kura paranga aboro agu avunguyo du rogo rengo asonosi yo, i rengbe ka bihe nikpakarakpakarapai ka duna tambuahe tipa gu gayo ũkumbo nga ga toro. I aadunga mbata ni papara zire pambori watadu ni papara gi zegino nanyakasa pa kina gbata ngbarago, pa mangasunge na gu kere angua nazio baha ti boro, na pa wasiwasi kodaba te. Ni sangbanaha, i rengbe ka kpa ti bi gu bakere kparakparapai du dagba gaani paradiso nga ga toro na gu iraira zegino nga ga Satana. Gu kurayo rengbe a ka zera fu asada tipa ka hia gu kere apai nga ga zegino tipa ka bi guhe i azangaha!—1 Yoane 2:15-17; Yugoti 18:1-5.

16. (a) Gini asanahe rengbe ani ka sana tirani nani? (b) Ginipai i ayugoho fu rani na kini ngarasi rani ani mangihe?

16 Ya mo si naida nzunzu ani zo awirinzaga rani ni we mbata ka inopa ima na rungo? Ani arengbanga ka wirikapai ti gu gbegbereapai namangi kura aboro tee? Ya mo si naida ani karaga tirani kurogo gu “dogoro” nga ga gi zegino re tipa ka ino kangia he yo ani nazangaha? (2 Petero 2:20-22) Petero atingidi agu aKristano nadu mbata ni papara ga Satana zegino rogo bambata kama agarã na gupai nga: “Agu arago nasusi . . . [si a]rengbe tipa manga gu nyemuahe nga ga aGendiria, na tipa ta rogo wasiro, na agu apai borose akpi nyemu he, na kpibuda, na gbarakagbaraka pai, na apumbo buda, na gbegberẽ irisa kpiahe.” Nirengo, si aidanga gupai mbata nga ani hia gu “bakere bau” nga ga zegino tipa ka ruho ka ino wai gberehe gbe te. (1 Petero 4:3, 4) Kuba gure, i nayugo ga Yekova tumbatumba andika mangapai fu rani tii Abambu Kindo yo, nga agu aba du tipa wirika Baibiri. Na i nangarasa rani ani mangisunge na gaani ome berãkuriipai tipa ka ruga tirani na gupai nga ani na rengo berani na rogo gi gene re, ani kini saha ni gaani.—Yosua 1:8; ARomo 12:1, 2; 2 Timoteo 3:14-17.

Anga Rimorani Ni Guhe Gbua Du Tipa Ino Rani Tini Te

17. Waigu rengbe ani ka duni zaza aDezire nga ga Yekova yo?

17 Ka ani sa rengo ni gaani, ani kaa gbata gene tipa kaa fura fu kura aboro tipaha ti agu aregbo dunduko daada. Gere ayugonga gupai nga ani kaa asada tirani ka gumbaha ngbaome fu agu aboro aidanga ha ya te te. (Matayo 7:6) Kuba gure, ani adunga na zee ti yugo tirani ni aDezire Yekova te. Ka boro yugu mboimboi nyemupai ni sana ni ruru sanahe watadu ni dia ni gu buku du mburuhe rii Baibiri, ani adu mbembedii ki ima mbakada tirani ka fura na ni tipa gaani maabangirise. Rengo ngaha, gere aida gupai berani nga ani du dedede na ngbatunga bete abuku berani rogo agu arago dunduko rengbe ani ka du rogo—singia kpurani yo, basunge yo, sukuru yo, bambu baga ahe yo, watadu ba ngimbaro yo.—1 Petero 3:15.

18. Waigu rengbe pa yugo ani tirani ziazia ni aKristano ka duna bakere undo rogo gaani raka yo?

18 Ho ani ayugo tirani ni wenengai ni aKristano, ani nanyakasa gaani ome kuti ga Satana azubohe ni biriki. Kangia i namanga pumbo uru batika boro watadu Kirisimasi watadu baake biroo yo, dedede, gaani abadiasunge anigumba gupai nga, “Ka oni fudinga ri ya. Ri nga guni sa dagba aDezire Yekova.” Tipa kina gu bangisa ndupai re, aboro rengbe ka mbupa gumba gbegbere abuga ho du ani ni. Sidu, yugo ani gaani aberã nga ga aKristano tipa pai nafu undo ni bakerehe rogo gaani raka yo, a wa gu mokedi nangia Petero ayuguhe: “Da nga gu ni nikarungosi roni ka oni du ni apeke wenepai? Ono ka oni vura hi apai ahi mbiko rurupai, airamaku nga oni.”—1 Petero 3:13, 14.

19. Waigu ani aino gupai nga ani awere dudunguroo rogo yangara arame?

19 Gu kura undo nga gu naye be sa ani rengo ni gaani nga ani aida gupai zanga kapa nga ani awere rogo yangara arame nga ga gi sinoraka re. Ani aino gupai nga dungu gu sangbaanebi nga ga Baibiri nadigo ti gi gaani regbo re.a Gu kere apai namangi rogo gu kama agarã susi nasa gu ga Pauro zahe ni parengo nga gu nayaa, rogo yangara arame ‘gbegbere aregbo nikpakarakpakaraha ka mangapai sani adu herẽ.’ (2 Timoteo 3:1-5; Marako 13:3-37) Papara kekeapai rogo gu waraga pangbanga nakuru bambeda kusayo, nga gu naafura tipa 20 kama agarã aduna riihe nga, “I Nikaa Tingidapaha Ni gu Garã nga ga Kereapai.” Gu papara kekeapai re ayaa: “Gu garã nangia 1999 angia gu garã i aimi aboro rogo kisusi rogo gu ue bebere nga ga gu kama agarã i aimi aboro rogo kisusi.”

20. Awere nga regbo tipa gini sunge?

20 Anga awere nga regbo tipa kaa kapa tipa apai te. Ani nabi ga Yekova maku ziazia kurii gu babakere sunge yugopai nga ga Baibiri nga gu i amangaha rogo zegino dunduko ni dezirepai fu rikaaboro. (Matayo 24:14) Oni sa rengo ni gaoni, ki fura fu kura aboro tipaha. Pa raka oni kumbatayo nyeanye kindi narurii gupai oni amangaha awere. Nyomoro asanga gupai nga boro gbia ga Yekova maku te. (Ruka 9:62) Kuba gure, si nga regbo ka “dú nyanyaki, zanga wo, nimángi ga Gbia sunge zaza dedede, bambiko oni ini ya gaoni sunge adu nga gbua rogo Gbia yo te.”—1 AKorindo 15:58.

[Gu rukutu kekepai du bandu kpewaraga yo]

a Oni bi gu Ngbaõbambu Sinziri nga ga Wegebe ti rameru 1, rogo 2000, akpewaraga 6-7 (rogo pa-Zande). Genewaraga 13-18 nafugö gene apai sita nga gu nafu nyanyaki gopai tipa gupai nga ani aima digo niraki rogo yangara arame natona rogo 1914.

Oni Natingidaha?

• Waigu rengbe ani ka do akapa kusayo berãraniyo?

• Ginipai rengbe ani ka wirikaha ti gu kpiapai nga ga ga Erisa moyambu?

• Gini wasiwasi mangaapai si aida ani banda tirani behe zanga piriga?

• Tipagine si aida tini ani yugu tirani ziazia ni aDezire Yekova?

[Gu kpiaahe du ti kpewaraga 19-21]

Geda Baibiri dedede na kparakpee rengbe ka undo rani ani do akapa kusayo berãraniyo

I adi kapa kusayo berã ga Erisa moyambu yo ni kusa yo yuguyugupai fuko

I nayugo gu tumbatumba andika ruru mangaapai nga ga Yekova fu rani tii Abambu Kindo yo, wa gi du Benin yo re

    Agu Awaraga Nga ga Zande (2000-2025)
    Mo Kuru
    Mo Rimi
    • Zande
    • Mokedihe
    • Wai mo aida apai du
    • Copyright © 2025 Watch Tower Bible and Tract Society of Pennsylvania
    • Agu Andiko du Tipa Mangasunge na Ni
    • Pa Banda Agu Apai du Tipa Boro
    • Privacy Settings
    • JW.ORG
    • Mo Rimi
    Mokedihe