Ga Mbori Kindo Nga Gine?

GINE nangia gu memepai Yesu anaatungusaha? Kuti Yesu nitiko, si angia pa ga Mbori Kindo, watadu ga Mbori ngbii. (Ruka 4:43) Ho aboro anaadegatuyo ni kuti gupai ko anaagumbaha, i anaagia ko dedede ko nifura tipa Kindo. Ya mo si airiwo tiyó? Ya mo i asanako tipa gu Kindo re? Oó. Pai ho du rogo abuku wene pangbangaa wa gure te. Ya mo si adu tie wo mbiko agu aboro re aima inopai tipa ga Mbori Kindo?

Nirengo, gu Ziazia Kekeapai aYuda anaamangasunge nani aima ringbisapai tipa gu Kindo re wenengai gbe na ki yugu gupai si nika mangaha. Areme a, ani rengbe ka wirika dungu apai tipa gu Kindo re a wa aYuda awirikihe ka ani ageda Ziazia Kekeapai. Ani wisigingo apai saba nga arengo nga gu Ziazia Kekeapai ayugoho furani tipa gu Kindo re. Agu aYuda nadu ti rago Yesu na mbata fu gu regbo re, i aima duna gu bambataha du biata beyo. Gu kuraha biata Yesu ayugupai tipaha na gako abawiriki rogo bambata sa kama agarã. Yangaraha tigaha, si da ziazia ti gi gaani regbo re.

1. Ga Mbori Kindo nga ndikidi zogarago, nga gu nika nyeanye kindi. Gu bambata sangbanebi nga ga Ziazia Kekeapai, si ayugu gupai nga, Mbori akeda batasi akeda tipa ruru aboro. Si nayamba gu batasi re nga ‘tunga’ watadu ‘tita dee’ nga gu Ko nika dia gu kere gbegberẽ apai naye mbiko gu samungu nga ga Adamu, Eva, gbiati Satana. (Bambata Pai 3:15) Fuo gbanga regbo kusa, i ayugu wenepai fu gu ruru Bakindo nangia Davide tipa gi ‘tita dee’ re, nga Masiya, ya ko nika zogarago nibakindo rogo gu Kindo re. Si adu nga gu zogarago re nikadu kia ti kura azogarago dunduko. Si adu nga gu Kindo re nika nyeanye kindi.—2 Samuere 7:12-14.

2. Ga Mbori Kindo nika nyasa riipa agu azogarago nga ga aboro naabaha dunduko. Gu nebi nangia Daniere abi yuguyugupai tipa agu aringara nadu na bakere ome kisusi rogo zegino gu nikuru tifuo gu kuraha rogo gu pangbangaa nga ga boro dati gi gaani regbo re. Oni kparianga digisidigisi gu yuguyugupai re: “Rago agu abakindo re Mbori ngbangbaturũ amáa gu ngbi nga gu ka i agbárasa nga ha wa sa ya, ka i afú nga pa zoga ha fu kura aboro a ya. Si akúadi agi angbi re rukutu ki digisi he dunduko, si ki nye anye kindi.” Agu angbii re dunduko watadu agu azogarago nga ga gi zegino re na gaha avura, arungosi, na gaha iraira mangapai, i agbarasaha nyeanye kindi. A wa gu sangbanebi nga ga Daniere ayugoho, ga Mbori kindo nika zogarago bambeda ku auru kpotosende naabaha dunduko. (Daniere 2:44, 45) Anga si nikina ndikidi zogarago gbua te, ono si nikangia gu bangisa zogarago nikadu auru kpotosende ane.a

3. Ga Mbori Kindo nika nyasa avura kusayo, akaza, angbongi, na kpio a. Gu wene asangbanebi nga ga Ziazia Kekeapai nayugo gupai ga Mbori Kindo nika mangaha auru kpotosende ane. Gu zogarago re nika manga gupai gu zogarago nga ga aboro arengbanga ka mangaha ya. Oni berẽnga kina gupai nga aũvura naabaha i nika zoho kusayo! “Ko namanga pai, vura nyasi digida kpotosende no.” (Atambuahe 46:9) Amunganga, abambungua, akaza ngba arikoho dunduko, si adunga ho berewe te. “A nga boro kporo sa ayá, ‘Mi nawoka’ te.” (Yesaya 33:24) Angbongi adunga berewe te. Zingo riahe adunga te. Boro ho nikaa koba be gomoro te. “Zende ahe zúku rogo ringara kpaima.” (Atambuahe 72:16) Kparaboro, ba amurö, agu abambu i aigo kangba rogoho, na rungo a, si adunga berewe te. I adia kpio kusayo nga gu vurarani naima digo nirungosi rani. Mbori “adígisa pa kpio nye anye kindi, Gbia Mbori awéga aume ti bangirise ku sa yo dunduko.”—Yesaya 25:8.

4. Ga Mbori Kindo na kina Bazogo behe Mbori nasiako. Anga Masiya asia tiko nisako tipa kadu nibazogo te, na anga aboro ingapai nasiako a te. Kina boro Yekova Mbori nitiko nasiako. Gu rimoko nga Masiya na Kristo, si nayugoho nga kina boro Mbori nasiako. Agu arimoko du ue re, rogoyo nga “Mbedimbedi Boro.” Sidu, Yekova nambedi gi Bakindo re watadu nasiako tipa gako kparakpara sunge. Mbori aya tipa ko wee: “Oni bi gi moyambu, nga gu ko songodi mi ko, gimi siasia ko, rago nangba ti mbisimore mbiko ko; mi moi Torere ku riko, ko akusa ruru sarangbanga fu arikaaboro.” (Yesaya 42:1; Matayo 12:17, 18) Da inipai tipa gu Bazogo rẽ ka zoga rani ki susi Bakusirani?

5. Gu Bazogo nga ga ga Mbori Kindo aima yugotiko fu aboro dunduko nga ko rẽarẽ tipa ka zoga aboro. Yesu nga boro Nazareta angia gu Masiya i aima gumba pako kumbatayo. I abatika ko kina boro rogo gu ngbatunga Mbori asiaha. (Bambata Pai 22:18; 1 Pekapai 17:11; Matayo 1:1) Ho ko aduni auru kpotosende, badungu gu sangbaanebi i agumbaha akama agarã kusayo aima ringbisatihe kutiko. Fugo aye ngbangbaturũ yo ki yawee ko nga Masiya. Rogo gini gene? Mbori afura ngbangbaturũ yo ka yugoko ni Wiriko; na amaraika ayugu Yesu ki ya ko nga gu Masiya i akidohe tipa ko. Yesu nitiko amangi iiriwoapai kubangiri badungu adezire nga akama watadu akutu nga gu nayugu gupai ngawee ga Mbori ome du ko aamangaha nani.b Yesu aima yugo gini ngbatunga Bazogo ko nikangia ní bara dunguhe. Anga kina tandu nadu tiko tipa ka husa aboro sa te, ono ko aima duna nyemuhe tiko a. (Matayo 8:1-3) Gbangbati aadunga tiko te, ko angia boro nunga, boro wingbaduse, na nibayee ko. Agu apai naabaha dunduko ko amangihe, si rogo Ziazia Kekeapai fu aboro dunduko tipa i gedihe.

6. Ga Mbori Kindo na aboro rogoho nga 144,000 nika zogarago na Kristo. Yesu ayawee gu kura aboro kinaho, kodihe na gu gako amokedi nadu ti gu regbo re, nika zogorago naako. Ko aya tipa gi badona aboro re wee i nga “umba rika aboro.” (Ruka 12:32) Kusa, i agumba gupai fu gu mokedi nangia Yoane ya gi umba rika aboro re, bange yó nikadu nga 144,000. I adu na bawene sunge beyo ka mangaha ngbangbaturũ yo, nga ka zogarago ni abakindo na kini mangisunge ni agbiamotumo na Kristo.—Yugoti 5:9, 10; 14:1, 3.

7. Ga Mbori Kindo nazogarago awere ngbangbaturũ yo, na si nambakadatihe tipa ka sigira gaha zogarago auru kpotosende naabaha dunduko. Gi yangara saba rengo re nga gu bawenepai rengbe ani ka wirikapai tipaha. Ziazia Kekeapai nayugo gu gopai nga i aima fu pagbia fu Yesu ngbangbaturũ yo ni Bakindo. Ko nazogarago yo awere ti gi gaani regbo re, na regbo koyo ngbutuko tipa ko tona ka zogarago ku auru kpotosende no na tipa ko digisi agu asangbanebi fura ani tipaha re. Ono wai rengbe ani ka inoho nga ga Mbori Kindo nazogarago azoga awere? Na gini regbo si nika tona zogarago ku auru kpotosende no?

[Gu rukutu kekeapai du bandu kpewaraga yo]