Tipagine si Aida Ani Kpari ti ni ti Rimo Yesu?

YESU anaayugo pai dedede tipa kparakpee. Ti rago ko, agu abarumbatayo rogo pambori nga ga aYudo yo anaamanga kparakpee “ngboso agene.” Tipagine? Tipa “aboro bi yo.” Si ziazia nga, i aaida gupai nga aboro naabi yo na nyanyakipa yo tipa wai i aabi gayo pambori. Badunguyo nanaape gbangagbanga akparakpee kini dogodihe, si ki du wa ka i ya “gumba ha ni badungu he” angia gupai si aidaha tipa gupai nga Mbori gi kparakpee. (Matayo 6:5-8) Yesu ayugu gupai nga ngbatunga gu mangaapai re si gbua, na ko ki undo agu aboro naadu na wene ngbaduyo yo i ini agu apai si aida i nehe ho i amanga kparakpee ni. Ono tie, ko aima manga gu kurapai kisusi gu gbua nga ka yugo wai fuyo si aidanga i mangi kparakpee ya.

Yesu ayugu gupai nga si naida gaani akparakpee yugu gupai nga ani naida rimo Mbori du ni ziaziaha, Gako Kindo ye, na Gupai Ko akpinyemuhe mangi. Yesu ayugu gupai a nga si rẽarẽ ani sana Mbori ko undo na agu apai nambusa rani rogo gaani raka yo. (Matayo 6:9-13; Ruka 11:2-4) Yesu amangisunge na akpiapai tipa ka yugo gupai nga ka ani aida Yekova gi gaani akpee, si naida ani du na zerangbaduse, idapase, gbiati umbasitise. (Ruka 11:5-13; 18:1-14) Na kupati afugo ko, ko ayugu nyanyakipa pai na gako kpiapai.​—Matayo 14:23; Marako 1:35.

Zanga kapa, gi rugapai re aima undo ga Yesu abawiriki i naamanga agu akpee du na rogo yo ti ni. Wa si avura duwo, Yesu asungudi da ti gu yangara yuru nangia ga gako raka auru kpotosende tipa ka ruga gako abawiriki na nyanyakipa pai.

“Bakere Ariapai Rogo gu Pangbanga Yo Nga ga Kparakpee”

Yesu adi bakere regbo rogo gako yangara yuru tipa ka ngarasa gako ruru amokedi. Si angia gu regbo narẽarẽ tipa ka yugu vovopai fuyo. Yesu aya: “Mi nga gene, nga rengo, nga unga a; a nga boro sa ka ye koyo du Buba ni gbua te, kina mbiko re.” Kusa ko afu gu kido nga ga ngarasaro fuyo nga: “Gu he oni ka nikpari pa ha ni rimore, mi animangi gu amanga re, Buba du ni taasitaasi ko rogo Wiriko yo. Ka oni kpari pa gu he fere ni rimore, mi mangi gu amanga re.” Mbembedi kuti digido gako sakapai yo, ko aya: “Oni akpara nga pa he ni rimore mbata wa sa te; oni kpári pa he, oni adía ha adia, gaoni ngbarago moi pai.”​—Yoane 14:6, 13, 14; 16:24.

Agi afugo re aima du na ba nyanyakipaha. Kura buku sa nga gu nasakarogo agu apai yo du rogo Baibiri afura tipa gipai re ki ya si angia “bakere ariapai rogo gu pangbanga yo nga ga kparakpee.” Anga gupai Yesu aaida ka gumbaha nga aboro naamanga kparakpee fuko kuba gupai nga fu Mbori te. Kuba gure, ko aazaka vovo gene nga ga fura na Yekova Mbori.

Rengo ngaha nga, Mbori ninaadega tuko kuti agu akparakpee nga ga Gako ruru amoyambu ti aregbo dunduko. (1 Samuere 1:9-19; Atambuahe 65:2) Ono tie, ho Mbori amangi gu mozunga nga ga aNdiko na aYisaraere ni, si aaida agu aboro naaida gupai nga i naagia gayo akparakpee ini gupai nga aYisaraere angia ga Mbori siasia rikaaboro. Na kusa, tona ti rago Soromo, si aaida i inipa yekaru ni ga Mbori siasia ba tipa motumo. (Pa Fu Rugute ni Ue he 9:29; 2 Pekapai 6:32, 33) Ono tie, gi gene ngbatunga irisombori re adu gbua tipa bete regbo. A wa gu mokedi nangia Pauro akepai tipaha, agu aNdiko i afuhe fu aYisaraere gbiati agu amotumo i anaafuhe yekaru yo angia “kirima gu wene apai nikaye, angia nga ndikidi kpiaha ya.” (AEbere 10:1, 2) Si adu nga gu kirima he re mbugene fu ndikidipai. (AKorosaio 2:17) Naatona rogo 33 Fuo Batikayo Kristo, ga boro pagume na Yekova arunga berewe riipa kakuti ga Moize aNdiko te. Kuba gure, si naruriipa giasangba gu boro aNdiko aayugo pani​—nga Yesu Kristo.​—Yoane 15:14-16; AGaratio 3:24, 25.

Gu Rimo “Zogo Arimo Dũ”

Yesu asigira bawene gene nga ga fura na Yekova, ki yugu tiko ni gu bakure du na ome tiko nga guko nazaka gene tipa Mbori gi gaani akparakpee na ki karagapai kutini. Ginipai nasa Yesu ko naamanga pai wa gere tipa rani?

Wa duhe nga ani dunduko i avungurani na ingapai, asunge ho ani amangaha watadu amotumo ho ani afuhe rengbe ka giriso rani be ingapai watadu ka fu rengo furani nga ga du na pagume na gaani ziazia Mbori nga Yekova te. (ARomo 3:20, 24; AEbere 1:3, 4) Ono tie,Yesu afu ungako nga gu naadu ni rengberengbehe tipa agu aingapai nga ga aboro tipa gupai nga i du na wene pagume dagbayo na Mbori. (ARomo 5:12, 18, 19) Agu aboro dunduko awere naida kadu gigiri be aingapai na gu momu beyo nga ga du na gigiri pagume dagbayo na Yekova na kadu “zukazuka”watadu kadu na ranirii nga ga fugo koyo du Mbori ni​—na gipai re rengbe ka manga kina gu sa ka i du na idapase kuti ga Yesu motumo tumorii na kini kpari ti rimoko.​—AEfeso 3:11, 12.

Ho ani amanga kparakpee ni ti rimo Yesu, ani nayugo idapase kuti gu rengo nga ko namangasunge rogo abangiriba biata tipa ka digiso gupai Mbori akpinyemuhe: (1) Ko nga “Wiri kandoro nga ga Mbori ru,” nga guko gako motumo asa gupai nga i mbupai fu aboro ti gayo aingapai. (2) Yekova azingisi ko be kpio na ko namangasunge awere ni “gbiamotumo” ni fuko agu aundo naye mbiko motumo tumorii. (3) Kina ko sa nga “gene” koyo du Yekova ni rogo kparakpee yo.​—Yoane 1:29; 14:6; AEbere 4:14, 15.

Manga kparakpee ti rimo Yesu nafu irisa fu Yesu. Ngbatunga gu irisa re rẽarẽ, bambiko gupai Yekova akpinyemuhe nga ‘arukusue ninugadi ni rimo Yesu dunduko, na mirãahe kusihe dunduko ya Yesu Kristo nga Gbia, sa ga Mbori taarimo nga Ba.’ (AFiripoio 2:10, 11) Ono tie, gu nyakipaha gbe nga, kpara ti rimo Yesu nafu taarimo fu Yekova, nga guko naafu Wiriko tipa gaani undo.​—Yoane 3:16.

Tipa gupai nga ani gitirani na bakio wai du ga Yesu bangiriba, Ziazia kekeapai namangasunge na dungu arimo tipa ka sakapai tipa ko. Agi arimo re naundo rani ani rugutirani na pa gu dungu aundo naye furani mbiko gupai Yesu namangihe, gupai ko amangaha, na gupai ko nika mangaha tipa rani. (Oni bi gu sanduki nga “Ga Yesu Nyanyakipa Bangiriba” .) Nirengo, i ima fu “gu rimo fu [Yesu] zogo arimo dũ.”a I asia pa ahe dunduko ngbangbaturũ yo na auru kpotosende fuko.​—AFiripoio 2:9; Matayo 28:18.

Si Aidanga Kparakpee ti Rimo Yesu du Gbua ni Sino Mangapai Te

Nirengo, si naida ani naamanga gaani akparakpee ti rimo Yesu ka ani aida gupai nga Yekova degetuko kutini. (Yoane 14:13, 14) Ono si aidanga ani naadogoda gu fugo nga “ni rimo Yesu” bambiko gupai gbua nga si nga sino rani te. Tipagine si aidangaha ti ni wo ya?

Oni bingo gi kpiapai re. Ka mo gbia keke waraga be babagiahe, gu waraga re ima rengba ka nyasa na gu sino kekepai nga, “kina re du nga bakureamo.” Ya mo mo nabihe nga gipai re nayugo gupai nzunzu nga gu babagiahe re nabi gu boro re ni bakureani, watadu ni mangisunge gbua na agu afugo si aidaha rogo gu keke awaraga nga ga sunge bagaahe? Nirengo, si naida pa mangasunge na rimo Yesu rogo gaani akparakpee duadu na bakere rogoyo ti ni kisusi wai i amangasunge na afugo ti digido keke waraga nga ga sunge bagaahe. Wa vura duhe nga ani ‘apirigongo’ ti kparakpee te, si naida ani naamanga kparakpee na ‘kpotoraniyo dunduko,’ angianga ni kungbo sino mangapai ya.​—1 ATesaroniko 5:17; Atambuahe 119:145.

Waigu rengbe mo ka ne mangasunge na gu fugo nga “ni rimo Yesu” ni kungbo sino mangapai? Si angba gbe ka mo berẽkurii gu wene asino nga ga Yesu. Mo berẽpa gupai ko naima mangaha foro na gupai du ko na nyemu ka mangaha foro. Ho mo amanga kparakpee ni, mo fu tambuahe fu Yekova na ki tambua ko tipa gu bawene gene ko namangisunge na Wiriko ngbaha. Wa mo nika mangaha wo, mo nika du na kido kuti gu ga Yesu kidohe nga: “Gu he oni ka nikpari pa ha fu Buba, ko afu he afu fu roni ni rimore.”​—Yoane 16:23.