Wari Ani Aye ni ku Auru Kpotosende Ane?

TIPAGINE SI AIDA TI NI ANI INI GU BA ANI AYE ROGOHO? Badungu aboro i ayugo gupai fuyó nga raka atona nisaha auru kpotosende ane nimomu. I nape gupai nga, badungu apai namangi bakuru kusayo gu timburu kuraha, na si ki sa gupai nga aboro du ti ni na agu asinoyo du ti ni dunduko, na gayó atatamana, na ki rengbe ka gbata kura apai a berewe tipa raka.

Ono oni wisigingo gipai re: Ka si du nzunzu nga ani akuru nisarani nimomu, na Bakusiahe ti ni te, gure nga aboro dunduko nga awirinyaure. Ka aboro dunga na bakerepa boro beyo tipa ka gbia arugute beni te. Boro ho ka undo rani ani dibe gu fudifudiapai namanga rani te. Ka ani naakido kina kuti gu tatamana nga ga aboro tipa ka ne agu agberangbii namanga, tipa ka mbakada agu apai nga ga zogarago, na tipa si kusi rani kusayo rogo gu fudifudiapai du ani rogoho.

Ya mo agu apai re nasa roni oni zeredi berãroni yo? Ka si du nga si afunga zereda te, oni wisigingo gu kurapai dukia ti gure. Anga gipai re nafu kina ngbarago sa fu boro te, ono si a nga ndikidi rengo ka boro wisigihe.

Gupai Ziazia Kekeapai Agumbaha

Ziazia Kekeapai nayugo gupai nga, Mbori namangi aboro nibeko. Anga ani akuru mbiko momu nga guhe adunga na berã ti ni ya te. Ono tie, ani nga awiri gu Boro duna nyemuse na kingia iratatamana. Oni bingo agi apai Ziazia Kekeapai agumbaha zukazuka re.

Bambata Pai 1:27. “Mbori ki fu boro ni kpiako, kpia Mbori Mbori afu ko ni; kumba na de ko afu yo.”

Atambuahe 139:14. “Mi nafu atambuahe foro, bambiko mo ambakadi re na iiriwo banaru pai. Iiriwo ahe nga gamo mangaapai! Mo naina pa re nzunzu wenengaĩ.”

Matayo 19:4-6. “Oni ageda nga ha te? ya gu ko namangi yo ho rago aenge ni ko amangi yo ni kumba na de, ki ya, ‘Bambiko si du boro nihe bani ti ni na nani, ki ka kuti diani; i ue i ki du wa boro sa’? Si du i nadu nga ti ni ue berewe ya, i ki du adu sa. Were gu Mbori akpamia re ka boro kpara nga ha ya.”

Amokedi 17:24, 25. “Gu Mbori namangi zegino na ahe dunduko rogo yo, ko nga Gbia ngbangbaturũ na sende, ko aima nga rogo agu abambuirisa i nadua ha ni be te. I amanga nga pa ko ni be aboro wa ka zingo ahe mangi ko te, wa du ko ni tiko nafu unga fu aboro dũ, na onga na ahe dunduko.”

Yugoti 4:11. “Mo gaani Gbia nga gaani Mbori, re mo are na dia taarimo na irisa na tandu, bambiko mo nafu ahe dunduko, si adu ho mbiko sangbaro, ki du ni mangimangi he.”

Wai Ziazia Kekeapai Aye na Ndikidi Zereda ku Berãse Yo

Ho ani aino gupai ni nga “agu akporo dunduko du . . . auru kpotosende” no si kina mbiko Mbori, si naʹaria gu bipai du ani nani tipa kura aboro. (AEfeso 3:15, NW) Si naʹaria gu bipai a du ani nani tipa tirani, na agu apai nafuda rani. Si naʹaria gaani aberã ngba agi agene du kusende re.

Ho ka ani gbiatirani ni na kpakarakpakara diaberã, ani abakanga bangirani mbiko gu tagbagatagbaga aberã nga ga aboro te. Ono kuba gure, ani andu kina kuti agu arugute du rogo Ziazia Kekeapai. Tipagine? Bambiko “Ziazia Kekeapai dunduko si aye be ga Mbori Toro si ki rengbe tipa yugopai, tipa zapai, tipa ruga aboro, na tipa raba aboro rogo rurupai; ya ga Mbori boro du ziazia, aũ manga wene apai dunduko ki du be ni.”—2 Timoteo 3:16, 17.

Nirengo, tipa boro mangi agu arugute du rogo Ziazia Kekeapai, si naida ní asadi tiní aʹasada wenengai, na ki fu rugute fu tiní. Ti kura aregbo, agu arugute re rengbe ka ida ani mangipai ngba gu gene dukia ti gu du kpotoraniyo. (Bambata Pai 8:21) Ono tie, ka ani idi kuti gupai nga gu Barani nakusi rani ko nga boro nyemuse, si daada ani idi kuti gupai nga, ko ini gu gene ngbaa kisusi tipa rani. (Yesaya 55:9) Fugoko nakido rani kini yaa: “Mo kída kuti Yekova na kpotoro yo dunduko, ka mo nikída nga kuti gamo rugatinapai ya. Mo rá fu ko rogo gamo apai dunduko, Ko arúga gamo apai foro nzunzu.” (Asanza 3:5, 6) Ka ani mangi sangba gu rugute re, ani do gu bakere bakabangirise ado ani nidu nani ho du ani ni rogo fudifudiapai, na ho ani aida ka diaberã ni tipa pai.

Ho ka kura aboro asoga rani ni, ani adunga nifudifudi rani mbiko gupai nga ani nabi tirani nga kiingo parani te dagba agu aboro du ngbatungayo kia watadu du gayó raka kia te. Ono kuba gure, ani nikaa bi tirani nga kii parani akio. Tipagine? Bambiko Barani nga Yekova, ko “akpara nga aboro te; ono dagba rika aboro yo dunduko gu ni nagunde ti ko, ki nimangi rurupai, kina ni ngba ti ko.”—Amokedi 10:34, 35.

Ka ani ini gipai re, si nika undo rani a ka ani naaberãnga gbegberẽ berã kuti kura aboro mbiko wa i abi rani wa kungbohe ya. Ani nika rugatirani na gupai a nga wene ndupai ho si aida aboro naabi tiyó ti ni nga ngbatungayo ngbaa kisusi gu kura ngbatunga aboro te, bambiko Mbori ‘amangi arikaaboro dunduko wa sa i ima auru kpotosende dunduko.’—Amokedi 17:26.

Nirengo, ho ani aino gupai ni nga Boro kinaho nakusi rani, na ní naberã parani aberã, si nasa gupai nga ani zeredi berãrani yo wenengai. Ono kura apai kinaho berewe si aidaha tipa oni nye na zereda.

[Gu kpiahe du ti kpewaraga 4]

Ya mo aboro akuru nisayo watadu ti anyaa?