Tipagine Aboro Araka ti Ni?

TIPAGINE SI AIDA ANI INI GUPAI TI NI ABORO ARAKA TI NI? Ngenga agu apai naba bakere gberarago ti aboro fuo gu nga berãpa gupai nga ndupai ho aboro araka ti ni te te. Ono tipa gu boro duna gu ndikidi ndupai beni ní araka ti ni, ní nagbia ngbarago agbia niipo ho fudifudiapai amanga ni. Kumba nga Viktor E. Frankl nga bawisigipai tipa akaza berã, nabati ti regbo gberangbii, ko akepai ki yaa: “Mi nagunde agunde ka gumba gupai nga, pai ho rogo zegino rengbe ka sa gupai nga boro bati zavura ti regbo kerepai vurũ fuo kinagu sa nga ka ino ndu gupai ní araka ti ni te.”

Ono tie, badungu apai duho aboro agumbaha tipa gipai re natagbagatihe atagbaga. Badungu aboro nabi gupai nga, si naida kina boro sia ndu gupai ní araka ti ni. Tipa agu aboro idi kuti gupai nga ahe akuru nisaha, i nayugo gupai nga ndikidi ndupai ho aboro araka ti ni te.

Ono nirengo tie, gu ndikidi gene rengbe aboro ngbaha ka ino ndu gupai aboro araka ti ni, si nga ka sana kina Bafu-Unga nga Yekova Mbori. Oni wisigingo agu apai Fugoko nga Ziazia Kekeapai agumbaha tipa gipai re.

Agu Apai Ziazia Kekeapai Agumbaha

Ziazia Kekeapai nayugo gupai nga, ndupai adu kinaho Yekova Mbori akusi kumba ti ni na dee. Yekova arugu bambata avungurani ki yaa:

Bambata Pai 1:28. “Oni zúga azuga, ki nge ange, ki hisi kpotosende berewe ki zogo ho; ki nikindo auru agu atĩo du baime yo na auru azire ari na gu unga anya dunduko nawo awo auru kpotosende.”

Mbori aringbisi gupai nga, Adamu na Eva gbiati awiriyo sa kpotosende dunduko niparadizo. Ko aaringbisanga gupai nga aboro nigbinza kini kpiki te; ko aaidanga gupai a nga aboro gbarasi kpotosende te. Ono tie, ani adi ingapai gbiati kpio ti bambata avungurani nangia Adamu na Eva bambiko i amangi gu siapai naadunga na tatamana ya. (Bambata Pai 3:2-6; ARomo 5:12) Ono wa si avura manga wo, ga Yekova ringbisapai aʹarianga tihe te. Fuo bete regbo kumbatayo, kpotosende dunduko Mbori nika saha asa niparadizo.—Yesaya 55:10, 11.

Yekova ambakadi rani ki fu ome furani gbiati berãpai tipa ani sa gako ringbisapai si mangi. Ko aambakadanga rani ani naaraka ngba rirani zanga ko te. Oni bingo wai furayo tipa ga Mbori ringbisapai tipa rani rogo agi averesi du kusende re.

Batungusipai 12:13. “Yangara pai du re; i ima gia ha dunduko. Oni gúnde ti Mbori, ki ka kuti gako arugute; bambiko gere nga gu pai dunduko nga ga boro.”

Mika 6:8. “Gine Yekova aida be ro? a nga kina manga pai ni ruruhe, na ka kpi nyemu weneringise, na ka ta ni umbasitise na ga Mbori, te?”

Matayo 22:37-39. “Mo kpí nyemu Gbia nga ga Mbori kpotoro yo dunduko, na mbisimoro dũ, na ga berã dũ. Gu rugute nga bakumba ha susi si nga gere. Kura ha wa kina ha nga gere, nga, Mo nikpí nyemu kuaro wa mo akpi nyemu tiro.”

Wai agu Akaragapai Ziazia Kekeapai Afuhe Asa Boro Ní Zeredi Berãni yo Nzunzu

Tipa masini mangisunge wenengai, si naida i niimangi kina gu sunge nani i ambakadihe tipaha, na kini mangisunge nani kina ngba gu gene bambakadihe aringbisihe. Wakina gure a, ka ani aida ka zanga gbarasa tirani rogo toroyo, berãrani yo, watadu ti kpotorani, si naida ani naaraka kina ngba gu gene Bakusirani aringbisihe. Ani wisigingo wai pa ino ani ga Mbori ringbisapai narengbe ka fu zereda furani rogo agu abangiriba nga ga raka du paha kusende re.

Ho aboro aida ka peresapa kura apai ni mbatayo, badunguyo nafutiyo sa kina dungura aũkumuko. Ono tie, Ziazia Kekeapai nayawee “agu yo nakpi nyemu ka kumuko i atiwa ku rogo asada na gbina na dungu mumungo gbegberẽ nyemuahe.”—1 Timoteo 6:9, 10.

Ono tipa agu aboro nawirika wai ka kpinyemu Mbori kuba kpinyemu marã, i ima ino wai rengbe boro ka rengba be agu ahe du beni. (1 Timoteo 6:7, 8) I ima rugatiyo naapa wai nyakipa mangasunge kakaka, na i ima ino a nga gayó sunge du nga kaa ngerafuo tiyó. (AEfeso 4:28) Ono wa vura duhe wo, i nadia gu fugo Yesu kugume nayaa: “A nga boro sa ka ra fu abaira ue te; bambiko ni asóga gu ni sa, ki kpi nyemu gu ni; watadu ni aká kuti gu ni sa, ki payasi pa gu ni. Ka oni ata ra nga fu Mbori nira fu ũzegino a te.”—Matayo 6:24.

Sidu, kuba gupai nga ka peresapa sunge-marã watadu aũkumuko mbatayo, agu aboro nakpinyemu Mbori naperesapa manga gupai ko akpinyemuhe mbatayo rogo gayó raka yo. I ini gupai nga, ka i peresipa manga gupai Mbori akpinyemuhe mbatayo rogo gayó raka, Mbori ngere angera fuoyo. Nirengo, Yekova nabihe nigupai du nidingisoro fuko ko mangihe.—Matayo 6:25-33.

Ho aboro amangapai ni na akurayó, badunguyo naperesa kina patiyo mbatayo. Areme, zereda rogo zegino gbua tooni bambiko badungu aboro ‘nakpi kina nyemu tiyo, kidu ni airasakparakpa.’ (2 Timoteo 3:2, 3) Ho boro aba gberarago ni tiyó, watadu ka zanga ida na gayó pai, i nadu “na zinga, na erã, na paa, [na kini gumba] gbegberẽ fugo.” (AEfeso 4:31) Kuba gupai ga boro gbia zereda, gu mangapai adunga na rugatise re ya “nazingisa kpata.”—Asanza 15:18.

Agu aboro namanga gu ga Mbori rugute nga boro kpinyemu kurani wa ní akpinyemu tiní, i ngbá ‘ringiyo fu akurayo, du yee kpotoyo yo, nivú akurayo avu.’ (AEfeso 4:32; AKorosaio 3:13) Zavura ho akurayó amanga yó ni gbegberẽe, i naʹasada tiyó ka pekafuo Yesu. Ho aboro aagberã ni ngbayo yo fuko, “ko agberã nga ngbako yo fu yo te.” (1 Petero 2:23) Wakina Yesu, i ima rugatiyo na gupai nga, ho boro amangasunge ni tipa si undo akurani, zavura aguyo afunga tambuahe tipa gu sunge re ya, si nasa bakere ngbarago ti boro. (Matayo 20:25-28; Yoane 13:14, 15; Amokedi 20:35) Yekova nafu gako toro fu agu aboro napekafuo Wiriko, na gi toro re nasa yó i du na zereda rogo gayó raka.—AGaratio 5:22.

Wai rengbe gupai oni aberãha nga si nika manga kumbatayo ka sa roni oni du na zereda?