Oni Undo Akumba I Sono Rogo Toro Yo

“Mo nikazia aboro ni ungayo ku mbata yo.”​—RK. 5:10.

1, 2. (a) Wai gu akumba akaragapai kuti ga Yesu yugopai? (b) Ginipai ani ka makiaha rogo gi kekeapai re?

TI GU regbo Yesu aamanga tua nga ga tungusapai Gariraya yo na gako abawiriki, i adakpa kurungba ki ndu kurogo gu ba waawaa aadunga rogoho ya. Ono aboro ki pe fuoyo kurogo gu ba re ni nduyo. Agu aboro dunduko nandu rogo gu uru re, bangeyo adu wa ‘akumba 5000 gbiakuti adee na agude.’ (Mt. 14:21) Ti gu kura regbo, ndurumo aboro aye fuo Yesu tipa ko husi yó na ki yugupai fuyo. Dagba agi aboro re, bange ‘akumba adu nga 4000 gbiakuti adee na agude.’ (Mt. 15:38) Si ziazia tie nga, dungu akumba naaye fuo Yesu na kidu na nyemu agu apai ko aayugoho. Nirengo, Yesu nitiko aima ino gupai nga kura dungu akumba nika gia rengo agia, tifuo sako gako abawiriki i zi atĩo ngba iiriwo gene, ko agumba gupai fu Simona Petero nga: “Mo nikazia aboro ni ungayo ku mbata yo.” (Rk. 5:10) Gupai Yesu agumbaha nzunzu nga gayo sunge tungusapai nikadu wakina zio atĩo. Ko aandu ka undo yó i yugu rengo fu dungu aboro, kodihe na dungu akumba.

² Areme a, akumba nayugo nyemupai ayugo tipa gu pangbanga nga ga Ziazia Kekeapai na kini dihe kugume. (Mt. 5:3) Ono tie, badungu akumba nakaragatiyo kusayo ti manga sonakumbatayo rogo toro yo. Wai gu rengbe ani ka undo yó? Wa vura duhe nga Yesu adianga kura kparakpara regbo adia tipa kaa gbata akumba te, ko aima gbata agene tipa ka undo yó rogo gu bangiri aba i aabaka bangiriyo rogoho. Nimanga ani sunge na gako kpiapai, ani wisigingo wai rengbe ani ka undo akumba i dibe apai biata nga gu i abaka bangiriyo nani areme, agu apai re nga: (1) gbata gene raka, (2) gunde be aboro, gbiati (3) gu berã nga i arẽnga te.

Gbata Gene Raka

3, 4. (a) Gini banguapai dungu akumba abakabangiriyo tipaha areme? (b) Tipagine kura akumba amaa agu apai ti ni nga ga borose mbata fu agu apai nga ga toro?

³ Bakeapai sa agumba gupai fu Yesu nga: “Bayugupai, mi apéka ro rogo arago dunduko yo mo ka ta ni.” Ono tie, fuo Yesu gumba gupai fuko nga “Wiri boro adu nga ba be ko ka maa riko ku auru he te,” ko aria berãko. Isoke, gupai nasako ko aria berãko nga pa wari ka ko ara ni na gu he ka ko arihe. Ko adanga nipefuo Yesu te bambiko ba ho rogo Ziazia Kekeapai gumbayo ho wo rogo te.​—Mt. 8:19, 20.

⁴ Dedede, akumba namaa pa agu ahe nga ga borose mbata fu agu apai nga ga toro. Bakere wirikapai gbiati gbia gu sunge-marã i nikaa gbia wene marã ti ni nga agu apai i aperesa paha mbatayo. Ringbisihe kuti gayo berãpai, gu undo rengbeyo ka gbiaha ti manga marã, si du niipiipihe ti gu undo rengbeyo ka gbiaha ti wirika Ziazia Kekeapai gbiati zio mbembedi bakure na Mbori. Si ima rengba kadu nga gupai Ziazia Kekeapai ayugoho, si ngba angba tiyo, ono “berã pa zegino, na gu nangaahe nga ga ũkumuko” ki di nyemuhe rogo yó yo kusayo. (Mk. 4:18, 19) Oni bingo wai Yesu aundo gako abawiriki i aria gayo bipai tipa agu ahe i aperesi paha mbatayo.

5, 6. Ginipai naundo Andarea, Petero, Yakoba, gbiati Yoane tipa i ini gupai si aida i peresi paha mbatayo?

⁵ Andarea gbiati wirinako nangia Simona Petero anaabaga atĩo. Kinawo a si adu tipa Yoane na gu wirinako nangia Yakoba gbiati bayo nangia Zebedayo. Gayo sunge baga atĩo aima kio sidu i atumo kura aboro atumo ti ni tipa i naamangasunge fuyo. (Mk. 1:16-20) Ti gu bambata regbo aAndarea na Yoane agi pa Yesu ni ngba Yoane Bafu Bapatiza, i aima ida kuti gupai nga Masiya du nangia ko. Tifuo gure, Andarea agumbaha fu wirinako nangia Simona Petero, isoke, Yoane aima gumbaha a fu wirinako nangia Yakoba. (Yo. 1:29, 35-41) Rogo agu adiwi nangbe tifuo gure, i dunduko biama nadi regbo na Yesu ho ko aatungusapai ni Gariraya yo, rogo ringara aYudo, na Somorona yo. Tifuo gure, i dunduko biama akaragatiyo kuti gayo sunge baga atĩo. I aduadu na nyemu agu apai nga ga toro, ono anga sunge tungusapai nangia gupai i aperesipaha mbatayo te.

⁶ Fuo bete regbo kusa, Yesu agumba gupai fu aPetero na Andarea nga i ye kadu ni apefuoko na kini zi akumba wa atĩo. Gayo karagapai angia gine? “I ki guari pati gayo apio ni ngara ki nipeke ko.” Kina gu bangisapai re naadu tipa AYakoba na Yoane. Ziazia Kekeapai nayaa: “I ki guari ni ngara pati bayo kurungba yo ki nipeke ko.” (Mt. 4:18-22) Ginipai naundo agi akumba re i tona manga sunge tungusapai ti aregbo dũ? Ya mo i amangi gu diaberã re zanga berã kuriihe? Wagusa te! Rogo agu adiwi naadu kusayo, i aima degatuyo kuti agu apai Yesu ayugoho, i aima biko ko nimangi iiriwoapai, i aima biko a wai ko adu zaaza tipa rurupai, na ki bi wai a aboro aagia gako tungusapai. Agi apai re nanyakasi gayo idapase kuti Yekova gbiati gayo kido kutiko!

7. Wai rengbe ani ka undo agu aboro ani awisigopai naayo tipa i kido kuti gu ga Yekova kidohe nga ko nika ngera angera fuoyo?

⁷ Wai gu rengbe ani ka wirika Yesu niundo ani agu aboro ani awisigo Ziazia Kekeapai naayo tipa i nyakasi gayo kido kuti Yekova? (Snz. 3:5, 6) Gu gene ani ayugopai fuyo ngbaha rengbe ka undo gbe rogo gi bangiri ba re. Ho ani ayugopai ni fuyo, ani rengbe ka nyakasa gupai fuyo nga Mbori nakidohe nga ko nika fu maku kpaima fu agu aboro naperesapa Kindo mbatayo. (Oni gedi Maraki 3:10; Matayo 6:33.) Wa vura duhe nga ani rengbe arengba ka mangasunge na dungu averesi ka nyakasa pa wai fuyo Yekova angerafuo gako aboro, gaani kpiapai rengbe ka undo yó gbe. Gumba agu apangbanga fuyo namangi rani rengbe ka undo yó i kido kuti Yekova. Ani rengbe a ka gumba agu apangbanga fuyo ani agedihe rogo gaani abuku.a

8. (a) Tipagine duhe ti ni ninyanyakipa pai nga gu boro oni awisigo Ziazia Kekeapai nani, ní ‘ía Yekova ka bi wai du ko niwene ko’? (b) Wai gu rengbe ani ka undo agu aboro ani awisigo Ziazia Kekeapai naayo i ía wai du Yekova niwene ko?

⁸ Tipa boro du na nyanyaki idapase, anga si gbua nga ní naageda pa agu aboro Yekova afu maku fuyo na kini gi pa yó te. Si naida aida a bawiriki Ziazia Kekeapai ía ga Yekova wene asino nitini. Bake papara Atambuahe abibia ki yaa: “Ako, oni ía Yekova ka bi ko ko du ni wene ko! Boro maku nga gu ni ninafu tini ku be ko!” (Tam. 34:8) Wai gu rengbe ani ka undo gu boro ani awisigo Ziazia Kekeapai nani ní ini gupai nga Yekova niwene ko? Ka si du nga gu boro oni awisigo Ziazia Kekeapai nani nabaka bangirini tipa marã na kini mangi ome a tipa ka diabe gu gbegberẽ apai duwa vu gundö, baake, watadu bakere mbira buda. (Snz. 23:20, 21; 2 Kor. 7:1; 1 Tim. 6:10) Ya mo yugopai funi tipa ní kpari tipa ga Mbori undo ka diabe gu gbegberẽ mangaapai re arengbanga ka undo ní ní ía ga Yekova wene asino te? Gu kurapai berewe rengbe ka undo gbe nga ka ngarasa ní tipa ní peresi pa agu apai mbatayo duwa geda Ziazia Kekeapai dedede na mbakadatise tipa adungurati rogo aposo dunduko na kini ndu tipaha. Wa ní nikaa bi wai Yekova afu maku kurii gani asadatise, gani idapase nikaa nyaka kina kumbatayo kuti Yekova!

Gunde Be Aboro

9, 10. (a) Tipagine aNikodemo na Yosefa aayugongo tiyo ti ni gbaiga niga Yesu abawiriki ya? (b) Tipagine kura akumba adindiko adindiko ti ni areme ka pekafuo Yesu wenengai?

⁹ Mbiko gu soapai naye be akurase, kura akumba rengbe kaa dindiko adindiko ti pekafuo Kristo wenengai. ANikodemo na Yosefa agumbanga gupai fu aboro gbaiga nga ga Yesu abawiriki nangia yó te mbiko i aagunde agunde be gupai ka aboro agumbaha. (Yo. 3:1, 2; 19:38) Gi gunde re aadunga nigupai i aberãha aberã gbua te. I aagunde mbiko gupai nga abarumbatayo rogo pambori aima soga Yesu bakere gbe ki da ti gupai nga gu boro naanigumba gupai nga ní na idapase kuti Yesu, i aanido ní nibasa kusayo bambutiria yo.​—Yo. 9:22.

¹⁰ Rogo gu kura aba areme, ka kumba du na bakere nyemu Mbori, Ziazia Kekeapai, watadu pambori, gani abadiasunge, agumeni, watadu abakureani rengbe ka tona kaa wia ní. Rogo gu kura aba, ga boro raka rengbe kadu ngba kerepai ka ní fura tipa aria gani pambori. Gu soapai naye be akurase rengbe kadu na bakere maapai ka si du nga gu kumba re nga sekere, boro birĩ-zogarago, watadu ko ni nyanyakipa boro rogo gako dagbarago. Nikpiapai, kumba sa rogo gu ringara nga Germani agumba gupai nga: “Oni nga aDezire Yekova, gupai oni ayugoho tipa Ziazia Kekeapai, kina boro rengo du. Ono ka mi da areme nidezire Yekova, gba re, aboro dunduko ka inihe. Gini apai kaa ta ngba aboro basunge yo, ngba gimi amurakporo, na ngba gimi aborokporo? Ka mi rẽnga na agu apai re dunduko te.”

11. Wai gu Yesu aundo gako abawiriki i dibe gunde be aboro?

¹¹ Wa vura duhe nga ga Yesu abawiriki adu na ngara, kura aregbo kinaho i agunde agunde be agu apai aboro arengbe ka gumbaha. (Mk. 14:50, 66-72) Wai gu Yesu aundo yó i mangi sonakumbatayo i ki vura kaa gbiatiyo na soapai be akurayo vurũ? Yesu aima manga apai tipa ka undo yó tipa agu apai naaye ka gbiayo kumbatayo. Ko ayaa: “Aboro maku nga oni, ho aboro ka soga roni ni, na ho i ka kpara roni ni ti yo, ki nisenge roni, ki ba rimoroni ku sa yo wa gbegberẽ he, tipa rimo Wiri boro.” (Rk. 6:22) Yesu agumba gupai fu apefuoko nga i agbarasa rimoyo agbarasa. Ko agumba gupai nga agu agbarasa rimo re dunduko adu “tipa rimo Wiri boro.” Ko agumba gupai a fuyo nga Mbori aduadu naayo ka i akido kindi kutiko tipa undo na ngara. (Rk. 12:4-12) Kurigure, Yesu anaayamba aboro i niiye fuo gako abawiriki kaa kodatiyo naayo na kini zi bakure naayo.​—Mk. 10:29, 30.

12. Wai gu rengbe ani ka undo vovo aboro i dibe gunde?

¹² Si naida ani undo agu aboro aundo ani awisigo Ziazia Kekeapai naayo tipa i dibe gunde be aboro. Dedede, boro rengbe ka diabe kpakarapai ho ní naima ino gupai ni nga si nika gbia ní. (Yo. 15:19) Nikpiapai, oni rengbe ka undo ní ní mbakadi taata karagapai du mburuhe rii Ziazia Kekeapai kuti agu asanahe gbiati akango rengbe gani abadiasunge watadu akurani ka sanaha. Kupati du ani ni abakureani, si naida ani yugu ní a fu gu kura aboro rogo dungurati, gbe aguyo duna kina gu bangisa nyemuapai du tiní. Gu kura nyanyakipa pai si aida ani yuguhe funi nga ní naakpara fu Mbori dedede na ngbaduni yo. Si rengbe ka undo ní ní mbedi na Yekova na ki sako ni gani mbia na gani bagbuko.​—Oni gedi Atambuahe 94:21-23; Yakoba 4:8.

Gu Berã nga I Arẽnga Te

13. Wai gu berãpai nga boro arẽnga te narengbe ka gbe kura aboro kusayo ti manga sonakumbatayo?

¹³ Gu kura akumba naka ka manga sonakumbatayo mbiko i ainongo gedapai watadu fura wenengai te watadu i nga aboro zee. Agu akurayo kinaho angbanga rago tiyo kaa peka gayo aberãpai dagba aboro ya. Agu akurayo naberã nga gupai nga i mbakaditiyo, kini fu karagapai ba agu adunguratise yo nga ga dungurati, watadu kaa gumbapa gayo idapase fu kura aboro, si ima fu rii omeyo. Gu kura wirina sa agumba gupai nga ho ko anidu ni niparanga, ko anindu niipo sa ga boro ngbadimo gene tungusapai yo ki mangi tiko nga ko ima ngoka ha ki guari patini yee kaa ndu tipa ka boro bingo ko ya. Ko agumba gupai nga: “Sunge tungusapai kini tanga nani ti akporo anaaye na kina boro kaza fere.”

14. Tipagine ga Yesu abawiriki arengbanga ti ni ka danda daimona ti gude ya?

¹⁴ Oni berẽnga pa wai rago agbere ti ga Yesu abawiriki ho i arengbanga ni ka husa gu gude naadu na adaimona tiko ya. Ba gu gude re aye fuo Yesu ki ya fuko: “[Wire] na imawirianya ti ko, ko naima be he gbegberẽ; bambiko ko natiwa ku we yo dedede, ki nitiwi ku ime yo a dedede. Mi ki ndu na ko fuo gamo abawiriki, ka si adu nga wa ka i husi ko ya.” Yesu adandi adaimona ti gu gude re ki husi ko. Gako abawiriki aye fuoko kusa ki sanako nga: “Tipagine ani arengba nga ka danda ru ti ni ya?” Ko akaragapai ki yaa: “Bambiko gaoni idapase toni. Bambiko ya mi fu roni ni rengo, ka gaoni idapase du wa tunga musutada, oni ayá fu gi bagangara re, ‘Mo gúari erẽ koyo re;’ si ki guari; a nga pai sa ka gasi roni te.” (Mt. 17:14-20) Idapase kuti Yekova nga gu he si aidaha tipa diabe gu kpakaraapai duwa kina gangara. Ginipai rengbe ka manga ka bangiri boro go ti kido kuti Yekova, ní ki tona kaa berã kina kurii gani zangarengba? Si rengbe ka sa ní ní berẽ gupai nga ní arengbanga ka mangasunge fu Yekova wenengai te.

15, 16. Wai gu rengbe ani ka undo gu boro nabi tiní nga ní arẽnga te?

¹⁵ Gu wene gene rengbe ani ngbaha ka undo gu boro nabi tiní nga rẽnga ní te nga ka undo ní ní nikido kuti Yekova angianga kaa berã kina pa tiní ya. Petero akepai ki yaa: “Oni úmbasi tironi tie tii gu nyanyaki be yo nga ga Mbori ya ko tumba roni ho ragoho ka rengba ni. Oni bá agu apai nafuda roni ku auru ko yo.” (1 Pet. 5:6, 7) Tipa ani undo agu aboro ani awisigopai naayo i mangi gipai re, si naida ani undo yó i du wenengai rogo toro yo. Gu boro du wenengai rogo toro yo, ní nabi agu apai nga ga toro na nyanyakipaha. Ní na nyemu Fugo Mbori tiní na kini yugu “zuzu Toro” rogo gani raka yo. (Gara. 5:22, 23) Ní nga gu boro namanga kparakpee dedede. (Frp. 4:6, 7) Kurigure, ní nakido kina kuti Mbori tipa ko fu ngara gbiati ome funi ní dibe agu apai ní agbia tiní nani watadu ní mangisunge fuko wenengai.​—Oni gedi 2 Timoteo 1:7, 8.

¹⁶ Si rengbe kadu a nga si naida oni undo yó aundo i ini gedapai, fugo, watadu fugodagbase wenengai. Agu akurayo rengbe ka bi gupai nga i arẽnga ka mangasunge fu Yekova te mbiko gu gbegberẽ apai i amangihe mbata fu ye yó kurugo rengo. Rogo agi apai re dunduko, si naida ani yugu nyemuse gbiati zerangbaduse fuyo. Yesu ayaa: “Agu aboro nyaki anyaka i aida nga na munganga te, ono kina agu yo du na kaza.”​—Mt. 9:12.

Oni ‘Zi’ Dungu Akumba

17, 18. (a) Ginipai rengbe ani ka mangaha tipa ka tungusapai fu dungu akumba? (b) Ginipai ani nika wirikaha rogo gu kekeapai naye fuo gere?

¹⁷ Ani na gu nyemupai nga dungu akumba di gu rengo adia kugume du sa kina rogo Ziazia Kekeapai. (2 Tim. 3:16, 17) Ono tie, wai gu rengbe ani ka gbia dungu akumba gene sunge tungusapai yo? Ani rengbe ka gbiayo kaa ani adia regbo kaa tungusapai nyemu, ti digido aposo, na rogo uru-ongoda. Ho ani adani rogo kporo, ani ima rengba ka sanahe tipa ka fura na bairakporo ka gene du. Ka gene du, ani tungusipai fu gu gaani abadiasunge nga akumba gbiati akumbaku awirina rogo dungurati nga aguyo angianga aidipase ya.

¹⁸ Wa ani kaa tungusapai fu agu aboro dunduko ani agbiayo, ani nikadu adu na gu kido nga agu aboro dunduko duna wene ngbaduyo yo, i nika diaha adia kugume. Ani undo agu aboro dunduko nayugo nyemu rengo na zerangbaduse. Ono tie, wai gu rengbe ani ka undo agu akumba rogo dungurati naima zio bapatiza i rẽ tipa amamu sunge rogo ga Mbori riigbu? Gu kekeapai naye tifuo gere nika karagapai sa gu sanahe re.

[Gu rukutu kekeapai du bandu kpewaraga yo]

Gaoni Karagapai Nga Gine?

• Wai rengbe ani ka undo akumba i peresipa agu apai nga ga toro mbatayo?

• Wai rengbe ani ka undo vovo aboro i dibe gu soapai naye be akurase?

• Ginipai rengbe ka undo kura aboro i dibe gu berã nga i arẽnga te?

[Gu sura du ti kpewaraga 25]

Ya mo oni naagbata amomu tipa ka tungusa wene pangbanga fu akumba?

[Gu sura du ti kpewaraga 26]

Wai rengbe oni ka mbakada gu boro oni aawisigo Ziazia Kekeapai nani tipa ní dibe asada?