Oni Raba Awirina I Rẽ Tipa Amamu Sunge

“Gu ni du ni teketeke ni ni ka wira gani bayugupai.”​—RK. 6:40.

1. Ginipai Yesu amangihe tipa gu dungurati ko atonaha mbata fu ga ko ku ngbangbaturũ yo?

TI DIGIDO gu ga Yoane pangbanga ko akehe tipa Yesu, ko ayaa: “Kura dungu agu apai kina ho Yesu anamanga, nga gu ka du ni keke he dunduko, ya mi tigu kina zegino ni tihe ka si rengbe nga na agu akitabu ka du ni keke he te.” (Yo. 21:25) Dagba gu dungu apai yo Yesu amangihe vuru gu umba regbo ko adu auru kpotosende, ko agbata akumba, ki raba yó na ki mbakadi yó tipa i ngbe mbatayo rogo gu sunge ko atonaha mbata fu ga ko ku ngbangbaturũ yo. Ti gu regbo ko aga ku ngbangbaturũ yo rogo gu garã nangia 33, ko ambu umba dungurati gbua tooni, ono gu riigbu re asono kusa namba aboro kisusi akutu.​—Amo. 2:41, 42; 4:4; 6:7.

2, 3. (a) Tipagine si aida agu akumba naima zio bapatiza mangi ome ti ni ka rẽ tipa amomu sunge? (b) Ginipai ani nika fura tipaha rogo gi kekeapai re?

² Areme, bange agu aboro natungusapai rogo zegino dunduko ima susa amirioni saba rogo adungurati bangehe naima susa 100,000. Bakere zingo duho rogo agi adungurati re tipa agu awirina rengbe kaa ngbe mbatayo rogo agu apai nga ga toro. Nikpiapai, bakere zingo duho tipa abaakumba. Agu aboro namanga ome tipa ka rẽ tipa agi amomu sunge re, si naida i tambua yó atambua bambiko i “nakpi nyemu wene sunge.”​—1 Tim. 3:1.

³ Ono tie, apai kinaho si aida i mangihe tipa ka rẽ tipa agu asunge re. Kungbo wirikapai watadu inohe rogo raka yo asanga boro ní rẽ te. Tipa boro rẽ wenengai, si naida ní du wenengai rogo toro yo. Si naida ní du na agu asino tiní nga ga toro. Wai gu rengbe agu akumba du rogo dungurati ka gbia undo tipa ka rẽ tipa agu amomu re? Yesu ayaa: “Gu ni du ni teketeke ni ni ka wira gani bayugupai.” (Rk. 6:40) Rogo gi kekeapai re, ani nika wisigopai tipa wai gu Bakere Bayugupai nangia Yesu Kristo aundo gako abawiriki i rẽ tipa amomu sunge, na ani nika bi agu apai rengbe ani ka wirikaha be agu apai ko amangihe.

“Mi Yambu Roni Ni Abadiangba”

4. Wai gu Yesu adu ni ndikidi bakure fu gako abawiriki?

⁴ Yesu anaabingo tiko nga pako nakii kisusi pa gako abawiriki te, ko anaamangapai naayo wa abakureako. Ko anaadia regbo naayo, kini kido kuti yó, na kini yugu agu apai fuyo Bako anaagumbaha fuko. (Oni gedi Yoane 15:15.) Oni berẽnga pa gu ngbarago i adu nani ho Yesu akaragapai ni kuti gu sanahe i asanaha ki yaa: “Gine i ka ina pa ga ye ti ni, na pa digida rago?” (Mt. 24:3, 4) Ko anaafura afura a naayo tipa agu apai ko anaaberãha. Nikpiapai, rogo gu yuru i aandu ka zioko, Yesu andu na Petero, Yakoba, gbiati Yoane ku Getesemane yo. Yo ko andu ka manga kparakpee ni tipa wai ko adu nifudifudiko kpotoko yo. Agu amokedi re agianga gupai ko agumbaha te, ono i aima ino gupai nga ko adu nifudifudiko gbe. (Mk. 14:33-38) Gu kura regbo a ko anyakasi yó nga gu regbo ‘kpotoko asa tihe ku bangiriyo.’ (Mk. 9:2-8; 2 Pet. 1:16-18) Gu wene bakure Yesu azihe naayo angarasi yó i mangi gu nyanyakipa sunge naadu fuyo kumbatayo ngba wene gene.

5. Gini bete apai rengbe abaakumba ka mangaha tipa ka fu tiyo fu kura aboro?

⁵ Wakina Yesu, agu abaakumba nga aKristano du areme, i nazio bakure na akurayo na kini undo yó. I nazio gi dawedawe pagume re nidia yó regbo na agu akurayo aidipase re tipa ka yugo gupai nga i na ndikidi nyemu yó tiyo. Wa vura duhe nga gu kura apai kinaho si aidanga i gumbaha fu kura aboro ya, i agbunga na apai ti awirinayo te. I nakido kuti awirinayo na kini gumba agu apai fuyo i awirikaha rogo Ziazia Kekeapai. I abingo pa agu amoundo abaakumba du garãyo ti gayo kusende na umbapa yó te. Kuba gure, i nabi yó ni agu aboro du wenengai rogo toro yo, na ni agu aboro namanga nyanyakipa sunge fu dungurati.

‘Mi Yugu kpiapai Furoni’

6, 7. Gini kpiapai Yesu amoihe fu gako abawiriki na gini ome si adu nani kuriyo?

⁶ Wa si avura nga ga Yesu abawiriki aabi agu apai nga ga toro na nyanyakipaha, kura aregbo kinaho gayo bipai aanidu ni aria ariaha mbiko wai i asono na wai i araki gayo raka. (Mt. 19:9, 10; Rk. 9:46-48; Yo. 4:27) Ono tie, Yesu anaabiranga yó watadu ka zingo naayo te. Ko anaafunga sunge a fuyo susi omeyo watadu ka rugayo i niimangi gupai kia ono ko kini mangi gu kuraha kia te. Kuba gure, Yesu anaayugopai fuyo na kpiapai.​—Oni gedi Yoane 13:15.

⁷ Gini ngbatunga kpiapai Yesu ambuhe fu gako abawiriki? (1 Pet. 2:21) Ko abanda gako raka taata tipa wa ka ko tungusapai fu aboro zanga he duho ka ká na gene beko. (Rk. 9:58) Yesu adu niboro umbasitise na aregbo dunduko ko anaamaa mburu gako yugopai kina rii Ziazia Kekeapai. (Yo. 5:19; 17:14, 17) Si aanidu taata fu aboro tipa i mbedi naako na ko aanidu niwene sino boro. Nyemuse naafõ ko ko niimangi agi apai re dunduko. (Mt. 19:13-15; Yo. 15:12) Ga Yesu kpiapai adu na wene sangbanaha kurii gako abawiriki. Nikpiapai, Yakoba agundenga bekpio te, ko amangisunge fu Yekova niruruko da ku ho i aimi ko ni. (Amo. 12:1, 2) Yoane apekefuo ga Yesu wene kpiapai na ki mangi sunge niruruko tipa agarã naima susa 60.​—Yugo. 1:1, 2, 9.

8. Gini kpiapai abaakumba amaaha fu paranga akumba na gu kura aboro?

⁸ Agu abaakumba nambupa kura gayo apai, kidu na umbasitise na ki moi wene kpiapai, i nga wene kpiapai fu gu paranga akumba du rogo dungurati. (1 Pet. 5:2, 3) Kurigure, agu abaakumba namaa wene kpiapai rogo idapase, yugopai, gu raka nga ga aKristano na rogo sunge tungusapai yo, i nagbia ngbarago ho i abi gupai ni nga kura aboro nawirika gayo wene kpiapai.​—Eb. 13:7.

Yesu Aruguyo Ki Kedi Yó Gene Tungusapai Yo

9. Wai gu ani aino gupai nga Yesu aima raba gako abawiriki tipa sunge tungusapai?

⁹ Tifuo Yesu tungusipai kakaka tipa agarã ue, ko akiisi sunge tungusapai nikeda ko gako abawiriki 12 i ndu ka tungusapai. Ono mbata fu i ndu, ko afu arugute fuyo. (Mt. 10:5-14) Ho Yesu aida ka riga gu rimbasa aboro ni bangeyo aima susa akutu, ko agumba wai fu gako abawiriki ko aida i sungusi yó na wai ko aida i kparaka riahe tiyo. (Rk. 9:12-17) Si ziazia nga, Yesu aima yugupai fu gako abawiriki ngba wene gene nifuko zukazuka arugute fuyo. Gi wene rabahe re gbiati gu ome nga ga ziazia toro angarasi agu amokedi re kusa tipa i mbakadi gu bakere sunge tungusapai i amangihe rogo gu garã nangia 33 F.B.K. na tifuoho.

10, 11. Ngba gini agene rengbe abaakumba gbiati kura aboro ka raba vovo boro?

¹⁰ Areme, i natona fu agu arugute nga ga toro fu boro ho ní atona wisigo Ziazia Kekeapai ni. Si rengbe kadu nga si naida ani undo ní ní ini gedapai wenengai. Wa ani kaa wirikapai nani, si nika ida gupai nga ani naaundo ní aundo kindi. Tifuo ní tona kaa ye tipa agu adunguratise nga ga aKristano, gani sonakumbatayo rogo toro yo nika sona fuo tona ní manga agumbapai rogo Gu Sukuru Nga ga Siokrasia gbiati gu kura apai. Tifuo zio ní bapatiza, gani sonakumbatayo rengbe ka koda agu apai duwa ngerafuo Bambu Kindo. Fuo bete regbo kusa, i rengbe ka undo ní ní ini gupai si aida ní mangihe tipa ka da nimoundo abaakumba.

¹¹ Ho abaakumba afu sunge ni rogo dungurati fu gu wirina naima zio bapatiza, si naida i undo ní ní mangihe wenengai. Si naida i gumba wai funi i naamanga gu sunge re rogo dungurati na wai si aida ní mangihe. Ka si du nga gu sunge re kpakara akpakara funi, agu abaakumba duna nyemuse agunga nibasa kuti gu digisopai nga ní arẽnga te te. Kuba gure, i nagumba gupai berewe funi ngba wene gene si aida ní mangihe. Ho abaakumba abi ní ni ní nidi agu arugute re kugume na ki gbia gu ngbarago naye ti mangasunge fu kura aboro rogo dungurati, i nadu na ngbarago.​—Amo. 20:35.

“Iratatamana Nadega Tuni Sa Rugapai”

12. Ginipai nanaasa ga Yesu arugute si du niwenehe?

¹² Yesu araba gako abawiriki nifuko agu arugute fuyo nga gu si aidaha aida tipa yó. Nikpiapai, ho aYakoba gbiati Yoane aida we zoro ni ariyo kurii agu aboro Somorona naaidanga pa Yesu ya, ko aza yó ki ya gu bipai re arunga te. (Rk. 9:52-55) Ho navungu aYakoba na Yoane ayeni fuo Yesu ki ya fuko guni sungu ku kumbabeko yo guni kidu ku garebeko yo, ko aye ki fura fuyo gbaiga ki yaa: “Sunga ku kumbabere, na ku garebere, gi gamahe nga ha te, ono si tipa agu yo Buba ambakadi he tipa yo.” (Mt. 20:20-23) Ti aregbo dunduko, Yesu anaafu gu rugute naanidu ziazia, na undo ti ni, na mburuhe kidu rii Ziazia Kekeapai. Ko aida gako abawiriki wiriki wai kaa berã na kini mangiapai dunduko ringbisihe kina kuti Fugo Mbori. (Mt. 17:24-27) Yesu aima inopa gu zanga rengba a nangia ga gako abawiriki, ko anaagumbanga agu apai fuyo i aarengbanga ka mangaha ya te. Ndikidi nyemuse nanaafõngbadu Yesu yo ko naafu agu arugute re.​—Yo. 13:1.

13, 14. (a) Ada si aida i fu rugute fuyo? (b) Oni gumbanga ngbatunga agu arugute rengbe bakumba ka fuhe fu gu boro amanganga sonakumbatayo rogo toro yo ya.

¹³ Agu akumba dunduko narẽ tipa amomu sunge rogo dungurati duwa ka i gbia rugute gbiati agu aberãpai du rogo Ziazia Kekeapai ti kura aregbo. Asanza 12:15 nagumba gupai nga: “Iratatamana nadega tuni sa rugapai.” Paranga wirina sa agumba gupai nga: “Mi abi gupai nga gu he si akpakara fere gbe tipa mi dibehe angia gimi zangarengba, ono gu rugute kura bakumba sa afuhe fere aundo re mi du na ruru bipai tipa tire.”

¹⁴ Ka abaakumba bi gupai nga ga boro sino mangaapai du naka nani ti manga ní sonakumbatayo, i naasada ka undo ní ngba zereda. (Gara. 6:1) Ti kura aregbo, i nafu rugute fu boro tipa ní mangi ariapai. Nikpiapai, ka si du nga wirina natungusapai gbua tooni baraho rengbe ní arengba ni ka tungusapai tipa gbanga regbo, bakumba rengbe ka undo ní ki gumba gupai funi nga Yesu angia kakaka batungusipai na ko agumba gupai fu gako abawiriki nga i sa aboro ni abawiriki. (Mt. 28:19, 20; Rk. 8:1) Ka si du nga wirina naida gupai nga aboro niibi ní na kiki pani, bakumba rengbe ka undo ní na ki gumba gupai funi nga Yesu aza gako abawiriki ti berã padu ni bahe. (Rk. 22:24-27) Ka si du nga wirina ni gu boro avungo akurani ti pai ya, bakumba rengbe ka gumba gu pangbanga funi nga ga gu kanga naka ka mbupai fu gu boro naadu na gako bape beni gbua tooni wa si avura du nga kura boro ambupai fuko tigako tipa gu gani bape naadu beko nibakerehe. (Mt. 18:21-35) Ho si aida i fu rugute ni fu boro, si naida abaakumba fuhe mbata fu regbo susi.​—Oni gedi Asanza 27:9.

“Mo Rúgu Tiro”

15. Wai rengbe aborokporo ka undo gayo bariikporo tipa ko mangisunge rogo dungurati?

¹⁵ Abaakumba nangbembatayo rogo undo aboro i rẽ tipa amomu sunge, ono kura aboro rengbe arengba a ka undo yó. Nikpiapai, aborokporo ima rengba na si naida aida i undo gayo bariikporo ko rẽ tipa amomu sunge rogo dungurati. Ka si du nga ko nga bakumba, ko rengbe ka gbia undo gbe ka diako gbiati awiriko asongoda ko tipa ko naundo dungurati. Si naida i ini gupai aino nga si naida ko mangi sunge amanga na bete gako regbo gbiati omeko tipa agu apai nga ga dungurati. Manga yó ho wo nika ye na bakere ngbarago fuko na kura aboro.​—Snz. 15:20; 31:10, 23.

16. (a) Da si aida ní mangi nyanyaki asadatise tipa ka rẽ tipa mamu sunge? (b) Gini apai rengbe kumba ka mangaha rogo dungurati tipa ka rẽ tipa mamu sunge?

¹⁶ Wa vura duhe nga kura aboro ima rengba ka undo ní na ki songodi ní, kina kumba nitini si aida ní mangi nyanyaki asadatise tipa ka rẽ tipa mamu sunge. (Oni gedi AGaratio 6:5.) Rengo ngaha nga, anga si naida boro duadu mbata nimoundo abaakumba watadu nibakumba tipa ka undo kura aboro na kini mangisunge tungusapai na omeni dunduko te. Ono tie, ka wirina aida ka rẽ tipa amomu sunge rogo dungurati, ní duwa ka ní mangi ome tipa ka da ti agu apai Ziazia Kekeapai agumbaha. (1 Tim. 3:1-13; Tito 1:5-9; 1 Pet. 5:1-3) Sidu tie, ka si du nga kumba naida ka mangasunge nimoundo abaakumba watadu nibakumba ono ní ata gbianga gu mamu re te, si naida ní wisigi tiní na ki mangi sonakumbatayo rogo toro yo. Tipa ní mangi gipai re, si naida ní nigedi Ziazia Kekeapai ti aregbo dunduko, kini mangi wisigopai nisase wenengai, kini berẽkurii agu apai ní agedaha, kini mangi kparakpee ngbaduni yo, na kini tungusipai wenengai. Ka ní amangaha wo, ní nikaa mangapai kuti gu rugute Pauro afuhe fu Timoteo ki yaa: “Mo rúgu tiro rogo sinombori yo.” ​—1 Tim. 4:7.

17, 18. Ginipai rengbe wirina ka mangaha ka si du nga bakabangirise, gu berã nga ní arẽnga te, watadu zanga nyemu mangasunge naka nani ti manga ome ka rẽ tipa amomu sunge?

¹⁷ Ono na ka si du nga ní amanganga sonakumbatayo te mbiko bakabangirise watadu gu berã nga ní arẽnga te? Gupai rengbe ka undo ní nga berã ní kuriipa wai rengbe Yekova Mbori gbiati Yesu Kristo ka undo rani. Nirengo, Yekova nga “gu ko natinda gaani tindiro na auru.” (Tam. 68:19) Sidu, gu Barani du ngbangbaturũ yo ima rengba ka undo wirina ní mangi gani sunge rogo dungurati. Gu wirina amanganga sunge nimoundo abaakumba watadu nibakumba ya, si naida ní berẽ gupai aberã a nga bakere zingo gu duho tipa agu aboro si aida i naangbe mbatayo rogo adungurati rogo ga Mbori riigbu. Si angba angba a ka ní kpari fu Yekova tipa ziazia toro mbiko si rengbe ka undo ní ní du na zereda gbiati zatise. Si rengbe a ka undo ní ní mbu gu berã nga ní arẽnga te. (Rk. 11:13; Gara. 5:22, 23) Na ní ima rengba kadu na gu kido nga Yekova nafu maku afu fu agu aboro naida ka rẽ tipa amomu sunge rogo dungurati na wene nduhe.

¹⁸ Na ka si du nga nyemu mangasunge rogo dungurati du adunga ti boro ya, si du ní amanganga ome ti ni ka rẽ tipa amomu sunge ya? Ginipai rengbe ka undo ní? Gu mokedi nangia Pauro akepai ki yaa: “Bambiko Mbori nga gu ko namanga pai rogo roni yo, sa ida pai na manga ha mbiko wene sangbako.” (Frp. 2:13) Mbori du nafu gu nyemupai re ku kpoto boro yo, sidu, gako ziazia toro ima rengba ka fu ome fu boro tipa ní mangi ziazia sunge. (Frp. 4:13) Kurigure, Kristano rengbe ka sana Yekova rogo kpee yo tipa ka manga gupai du niruruhe.​—Tam. 25:4, 5.

19. Gini kido gu sangba Ziazia Kekeapai nga Yekova nakusa “ababanda akandoro saba kuti yo na abazogo aboro muambi” afuhe furani?

¹⁹ Yekova nafu maku afu kurii gu ome abaakumba amangaha tipa kaa raba akumba. Ko nafu maku afu a fu agu aboro nadia agu arabahe re kugume na kini rẽ tipa asunge rogo dungurati. Ziazia Kekeapai nakido rani nga akumba nikadu adu ho kaa ngbembatayo rogo adungurati. Si nagumba gupai nga Yekova nakusa “ababanda akandoro saba kuti yo na abazogo aboro muambi.” (Mika 5:5) Areme badungu akumba duho nga aboro umbasitise du na nyemu ka mangasunge fu akurayo na i araba yó tipa i naamangasunge rogo dungurati. Gipai re naye na bakere taarimo fu Yekova na badungu amaku furani.

Gaoni Karagapai Nga Gine?

• Wai gu Yesu aundo gako abawiriki i rẽ tipa asunge rogo dungurati?

• Wai gu rengbe abaakumba ka wirika Yesu wa i aundo akumba i rẽ tipa kaa ngbembatayo rogo dungurati?

• Wai gu rengbe aborokporo ka undo gayo bariikporo ko rẽ tipa amomu sunge?

• Ginipai rengbe kumba ka mangaha nitini ka rẽ tipa amomu sunge rogo dungurati?

[Gu sura du ti kpewaraga 31]

Gini ngbatunga rabahe rengbe oni ka fuhe fu gu boro oni awisigo Ziazia Kekeapai nani wa ní amanga sonakumbatayo?

[Gu sura du ti kpewaraga 32]

Wai gu rengbe akumba ka yugo gupai nga i ima rẽ tipa amomu sunge rogo dungurati?