Oni Wirikipai Rogo Fugo Mbori Yo

Ya Mo Ziazia Kekeapai Nafura Tipa Agu Apai Du Kumbatayo?

Gi kekeapai re nasakapai tipa agu asanahe dungu aboro naamakiaha berãyo yo na si nayugobara akaragapai kuti agu asanahe re rogo Ziazia Kekeapai. ADezire Yekova nikadu na ngbarago ka wisigo agi akaragapai re na oni.

1. Ya mo agu asangbaanebi du rogo Ziazia Kekeapai nafura tipa apai na agu afutufutuhe dũ?

Kina gu Mbori Duna Tanduapai Dũ rengbe ka ino gupai du kumbatayo na agu afutufutuhe dunduko. (Amosa 3:7) Nikpiapai, bakuru kusayo, ko agumbapa gu boro naaye ka da ni Masiya watadu Kristo. Si adu nga Masiya angia tita gu ruru kumba nangia Abarayama. Masiya du si adu nga ko nikangia gu bazogo nika sa aboro giasangba i gbia gu maku nga ga raka nirengberengbe yó zanga akaza. (Bambata Pai 22:18; Yesaya 53:4, 5) Gu boro i akido pani re, si adu nga ko aye rogo gu gbata nga Betereme.—Oni gedi Mika 5:2.

Yesu du naada ni Masiya. Mbu saba kama agarã kumbatayo kindi, Ziazia Kekeapai aima gumba gupai nga ngasudee nika batika Masiya na aboro apayasi pako. Ko afu ungako tipa gu ingapai nga ga dungu aboro, na i akpisido ko na airakumuko. (Yesaya 7:14; 53:3, 9, 12) Agarã bisue kama mbata fu gipai re mangi, Ziazia Kekeapai aima takapande gupai nga ko arimo ku Yerusarema yo rii dongi na boro akitangbaanga ko tipa rukutu marã feda 30. Gu futufutuapai re dunduko naima da ti rengo.—Oni gedi Zekaraya 9:9; 11:12.

2. Ya mo Mbori rengbe ka fura tipa agarã kumbatayo?

Mbata fu agarã bisue kama kumbatayo kindi, Ziazia Kekeapai agumba sangbaanebi tipa gu garã nzunzu si adu nga Masiya nika kura rogoho. Tona ti gu regbo re kada ti gu regbo ka ko akuru rogoho, i aringbisi bagizoho kuti aposo nga agarã, du rogoyo nga “poso” sa angia agarã saba. Si adu nga aposo nikadu 7 gbiati gu kura aposo nga 62, bangehe dunduko kidu nga 69 aposo nga agarã. Bange agu agarã re dunduko angia 483. Bagizo agu agarã re aenge ti gini regbo? Ringbisihe kuti Ziazia Kekeapai, bagizo gu regbo re aenge ti gu regbo gu ga Mbori moyambu nangia Nemaya ada vuru Yerusarema tipa ka tona duaha berewe. Gu kuru pangbanga nga ga aParaso nafura tipa gu regbo re nga si atona rogo gu garã nangia 455 M.B.K. (Nemaya 2:1-5) Yesu azi bapatiza na ki da ni Masiya fuo agarã 483 kusa rogo gu garã nangia 29 F.B.K., a kina wai i aringbisihe.—Oni gedi Daniere 9:25.

3. Ya mo gu sangbaanebi nga ga Ziazia Kekeapai naringbisatihe areme?

Yesu agumbapai nisangbaanebi tipa gu nyanyakipa apai namanga ti gi gaani regbo re. Gi gako sangbaanebi re afura tipa gu wene pangbanga nga ga ga Mbori Kindo, nga gu nika ye na ongoda rogo zegino dunduko fu agu aboro nakpinyemu Mbori. Gu Kindo re nika nyasa riipa gu gbegberẽ zegino ani araka rogoho re kusayo.—Oni gedi Matayo 24:14, 21, 22.

Gu sangbaanebi nga ga Ziazia Kekeapai aima sakapai tipa wai gi zegino re nika digo. Ziazia Kekeapai afura tipa gupai si adu nga si nika manga gizo kumbatayo nga, aboro nika gbarasa kpotosende. Agu akpakarapai naye be avura, angbongi, abazigizo, na ririakaza nakio kina kumbatayo. (Ruka 21:11; Yugoti 11:18) Na aboro arakanga berewe kuti agu arugute nga ga ruru mangapai te. Si adu nga ti gu kere regbo re, apefuo Yesu nikaa tungusa gu wene pangbanga nga ga ga Mbori Kindo dagba rikaaboro dunduko.—Oni gedi Matayo 24:3, 7, 8; 2 Timoteo 3:1-5.

4. Ginipai nika manga fu aboro kumbatayo?

Gu Mbori Duna Tanduapai Dũ, ko igi weneapai fu ruru aboro kumbatayo. Yesu Kristo nga Masiya gbiati siasia aboro nika zogarago kurii kpotosende. I nikadu rogo gu zogarago nga ga Kindo nga gu nika zogarago tipa agarã kutu. I nika zingisa kpikpi aboro tipa ka sarangbanga yó wa ka i du na momu beyo tipa ka gbia nyenye unga. Kurigure, gu Kindo re nika husa agu aboro dunduko nikadu niungayo. Kaza na kpio adunga berewe te.—Oni gedi Yugoti 5:10; 20:6, 12; 21:4, 5.

Ka oni aida ka ino kura apai tipa gipai re, oni bi kpewaraga 23 dakuti 25 na kpewaraga 197 dakuti 201 nga ga gi buku re What Does The Bible Really Teach?