Masiya Nga Gene Bata!
“Bambiko wa aboro nakpi akpi dunduko rogo Adama yo, a wo rogo Kristo yo i adu adu ni ungayo dunduko.”—1 KOR. 15:22.
1, 2. (a) Ginipai Andarea na Firipo amangihe ho i abi Yesu ni? (b) Tipagine du ani ti ni na dungu agopai berani ka ida kuti gupai nga Yesu nangia ga Mbori mbedimbedi boro susi agu agopai du berani tipa agu aKristano nadu rogo bambata sa kama agarã?
“ANI bi Masiya.” Gure nga gupai Andarea apehe fu wirinako nangia Petero. Tingbafuo ida Firipo kuti gupai zanga kapa nga Yesu boro Nazareta nangia ga Mbori Mbedimbedi Boro, ko andu nibasa ka gumbaha fu gu bakureako nangia Natanaere ki yaa: “Ani bi gu ko aMose ake pako rugute yo, na anebi, nga Yesu nga boro Nazareta, nga wiri Yosefa.”—Yo. 1:40, 41, 45.
2 Ya mo oni idi kuti gupai zanga kapa nga Yesu nga gu Masiya i akido pako, nga ga Yekova ‘barumbatayo tipa bata’? (Eb. 2:10) Areme, ani na dungu agopai berani tipa ka ida kuti gupai nga Yesu nga ga Mbori mbedimbedi boro susi gu goapai du berani tipa agu apefuoko nadu rogo bambata sa kama agarã. Agu apai Ziazia Kekeapai nga Fugo Mbori agumbaha tipa Yesu tona ti gu regbo i abatikako ka da kuti gu regbo Mbori azingisiko bekpio, si nayugo gupai nga ko nangia Kristo. (Oni gedi Yoane 20:30, 31.) Gu kurapai berewe Ziazia Kekeapai ayugoho nga Yesu namanga gako sunge ngbangbaturũ yo ni Masiya. (Yo. 6:40; oni gedi 1 AKorindo 15:22.) Nibi gupai oni nawirikihe rogo Ziazia Kekeapai, oni rengbe arengba a ka yawee, “Ani bi Masiya.” Ani makianga gupai nasa agu abawiriki nadu rogo bambata sa kama agarã i gumba gupai nga i aima bi Masiya.
“Gu Gbugbu Pai” Nadu Tipa Masiya Aakura Kuyangura Tooni Tooni
3, 4. (a) Wai gu ga Yesu abawiriki nadu rogo bambata sa kama agarã arengbe ‘ka inoko’ ya Masiya nangia ko? (b) Tipagine rengbe oni ka ya ti ni wee kina Yesu sa nangia gu boro agu asangbaanebi nadu tipa Masiya adigi kuti ni?
3 Wai gu ga Yesu abawiriki nadu rogo bambata sa kama agarã arengbe ka ino ya ko nangia Masiya? Yekova amangisunge na anebi tipa i gumba agu apai narengbe ka sa aboro i ini Masiya. Wene bawiriki Ziazia Kekeapai sa aringbisi agu asangbaanebi re kuti kpia boro nga gu i akafuhe. Ani yanga wee, agu aboro naagbianga tiyó mbata ya naye na apapara gu kpia boro i akafuhe re kurogo bangisa ba, i tona ka gbiaha kuti akuraha. Ka si kusi kpia boro nzunzu, ya mo oni danga kuti gupai nga boro kinaho nakafu gu kpiahe re ki fuku apaparaha fuyó tee? Wakina agu apapara kpia boro re, agu asangbaanebi dunduko nadu tipa Masiya, si ayugu nyanyakipa apai tipa ko.
4 Ya mo kungbo momu du namangi gbua tipa agu asangbaanebi re dunduko digi kina kuti bangisa boro? Wene bawirikipai sa ayawee ‘ka pai mangingo wo nga agu asangbaanebi re digi kuti Yesu nimomu te’! Sidu, gu bawirikipai re ada kuti gupai nzunzu nga, “kina Yesu sa dagba agu aboro dunduko naraki auru kpotosende agu asangbaanebi re adigi kutiko.”
5, 6. (a) Wai si adu nga Mbori nika fu mbusa fu Satana kuti gu sarangbanga i amangihe kutiko? (b) Wai Yekova atona ka yugopai tooni tooni tipa gu boro si adu nga ní nikangia ‘tita dee’?
5 Agu asangbaanebi nadu tipa Masiya angia gu “gbugbu pai” watadu okõokõpai nadu na dungu apaparaha ti ni Yekova agumbaha ati Edene yo. (Koro. 1:26, 27; Bam. P. 3:15) Gu okõokõpai re adu naapa sapangbanga Satana rogoho, “nga gu bakuru wo” nasa aboro dunduko ni aboro-ingipai na i kini kpiki. (Yugo. 12:9) Wai Mbori arengbe ka manga gu sapangbanga re? Ko afura tipa ‘tita dee’ nga guko si adu nga ko nika mbura Satana ti riko. Gu ‘tita dee’ i afura tipa ko re nika mbura Satana ti riko ki nyasi riipa agu apai naye na samungu, akakaza gbiati kpio. Ono tie, si adu nga Mbori nika mbu Satana ambu mbata ko mburu gida gu ‘tita dee’ re.
6 Yekova atona kaa yugopai tooni tooni tipa gu boro si adu nga ní nikangia gu ‘tita dee’ re. Ko azungahe fu Abarayama ki yaa: “Rogo ngbatunga ro i ka fu maku ni fu arikaaboro zegino dunduko.” (Bam. P. 22:18) Moize ayawee gu boro re adu nibakere “nebi” susi ko. (Pa Rug. 18:18, 19) I aima kido Davide nga Masiya akura dagba angbatungako na ko ki di kumbo ga Davide mbatabakindo nyeanye kindi. Kura anebi aima fura a tipa gu mokido re.—2 Sam. 7:12, 16; Yere. 23:5, 6.
Agu Apai Nayugu Yesu Ni Masiya
7. Rogo gini gene Yesu aye rogo ga Mbori ‘dee’ yo?
7 Mbori akedi Wiriko, nga gako bambata kusikusihe dagba agu aboro nga atoro du rogo gu gako riigbu du ngbangbaturũ yo duwa diako ko ye kadu nigu ‘tita dee’ re. Tipa Yesu ye ku auru kpotosende no, si aidi gupai nga ‘ko uka pa tiko’ ti gu raka nga ga ngbangbaturũ i ki vunguko nirengberengbe boro. (Frp. 2:5-7; Yo. 1:14) Pa ‘dada’ ziazia toro Maria ayugu gupai nga gu gude ri nika vunga ru re adu ni “Ziazia ko, nga Wiri Mbori.”—Ruka 1:35.
8. Wai Yesu adigisi gu sangbaanebi nadu tipa Masiya ho ko ayeni tipa Yoane bapatizi ko?
8 Agu asangbaanebi nadu tipa Masiya, si aima yugo gu ba i nika vungako rogoho na gu regbo ko nika da ni Masiya ti ni. I avungu Yesu Betereme yo a wa nebi aima gumbaha. (Mika 5:2) Rogo bambata sa kama agarã, aYuda aduna bakere maabangirise tipa Masiya. Agu akurayó asakipai tipa Yoane Bafu Bapatiza kini yaa: ‘Singia Kristo nga ko.’ Ono Yoane aya fuyó wee: ‘Guko kinaho naye nga bahe tire.’ (Ruka 3:15, 16) Ho Yesu ayugu tiko ni fu Yoane tipa ko bapatizi ko bara rogo Tanvuo rogo gu garã nangia 29 F.B.K. garãko nada nga 30, gu regbo re du ko ada ni Masiya kina boro ti gu regbo si adu nga ko nika kura ti ni. (Dan. 9:25) Tifuo gure, ko atona gako sunge tungusapai kini yaa: “Ragoho da, ga Mbori ngbi nikaye.”—Mk. 1:14, 15.
9. Wa si avura du nga ga Yesu abawiriki ainongo gu futufutuapai dunduko nadu tipa Yesu te, ginipai i aidi kuti ni?
9 Gu maabangirise aboro adu nani, si aidi i ariaha aʹaria. Yesu arẽarẽ aboro sambuoko ni Bakindo. Ono tie, i aainongo nga gako zogarago nikadu kumbatayo gizo na si nika ye ngbangbaturũ yo te. (Yo. 12:12-16; 16:12, 13; Amo. 2:32-36) Ho Yesu asanahe ni ki yaa, ‘Oni naya da nga mi?’ Petero akaragapai zanga tiko ki yaa: “Kristo nga mo, nga Wiri gu Mbori du ni ungako.” (Mt. 16:13-16) Petero afu gu karagapai nawiri kina gure ho dungu aboro ambu Yesu ni mbiko gu gako yugopai naadanga bangiriyo ya.—Oni gedi Yoane 6:68, 69.
Giasangba Masiya
10. Tipagine Yekova anyakasi gupai ti ni nga ani gisangba Wiriko?
10 Bangisa Wiri Mbori aduna tandu beko ngbangbaturũ yo. Bako nakediko ku sende no. (Yo. 16:27, 28) Ko ayaa: “Gi yugopai nga gimi te, ono si nga ga gu ko nakedi re.” (Yo. 7:16) Tipa ka yugo nani nga Yesu nangia Masiya, Yekova aya ti regbo sa kpoto Yesu tihe wee: “Oni gi pako.” (Ruka 9:35) Oni gi sangba gi Siasia Ko re. Tipa ka giasangba Yesu, si aidi idapase na wene mangaapai. Agu apai ue re dunduko na nyanyakipaha tipa ka fu ngbarago fu Mbori na ka gbia nyenye unga.—Yo. 3:16, 35, 36.
11, 12. (a) Gini apai nasa agu aYuda nadu rogo bambata sa kama agarã ka i idinga pa Yesu ni Masiya ya? (b) Ada naidipa Yesu?
11 Wa dungu apai avura duho nayuguhe nga Yesu nangia Masiya, badungu agu aYuda nadu rogo sa kama agarã aaidanga pako te. Tipagine? Gupai i aaidanga pako ti ni ya nga i adu na kura abipai kia tipa Masiya. I aaberã gupai ngawee Masiya nikadu nigu boro nika ye ka so vura ka kusa goyo be gu mbusa nangia ga aRomo. (Oni gedi Yoane 12:34.) I aaidanga naapa gu boro anebi aya tipa ní wee aboro nika payasi pani, ki gindigo ní na ní kidu nirungorungo boro na ki idi pa imisiripai te. (Yes. 53:3, 5) Kura ga Yesu abawiriki adu kinaho a rago aangbanga tiyó naako ya mbiko gupai nga ko asonga vura tipa ka batasa yó te. Ono i anye niruru yó, tifuo bete regbo, i ki gbia ndikidi inohe nga gu narugusi apai bangiriyo.—Ruka 24:21.
12 Gu kura ndupai berewe aboro aaidanga pa Yesu ti ni ni Masiya ya nga gako yugopai aarunga bangiri kura aboro te. Ko ayugupai ki yawee tipa aboro rimi kurogo ga Mbori Kindo, si naida i ‘mbu gayó apai,’ i ‘ri pasioko,’ i ‘mbiri kureko,’ i ‘vungu yó berewe,’ na ka i adunga ‘ni aboro gi zegino re ya.’ (Mk. 8:34; Yo. 3:3; 6:53; 17:14, 16) Agu aboro nangia airarukö, airakumuko, gbiati aguyo naadunga na nyemuse tiyó ya abi agu apai re nikpakarakpakaraha tipa ka mangaha. Ono agu aYuda nadu na umbasitise aima idapa Yesu ni Masiya, zavura aboro Somorona a, bambiko i ayaa: “Gi kumba re nga Batasi aboro zegino ni rengo.”—Yo. 4:25, 26, 41, 42; 7:31.
13. Wai Satana amburu gido Yesu?
13 Yesu aima gumbapai tipa tiko ki yawee agbiamotumo nika sarangbanga ko sa kpio na aGendiria ki kenge ko, ono Mbori azingisiko bekpio rogo biama uru. (Mt. 20:17-19) Ho ko ayani barabangiri ga aYuda agbiangbanga wee ko nga ‘Kristo Wiri Mbori,’ i ayawee ko ima gberã ngbako yo. (Mt. 26:63-66) Pirato aabingo gupai ti Yesu ‘narengbe na kpio te,’ ono mbiko gupai nga aYuda agumba ziree kutiko a ki yawee ko nga basamungu kuti irangbii, Pirato “afu Yesu kuti sangbayo.” (Ruka 23:13-15, 25) Gure nga i ‘aoro rimo’ “Iraunga” na ki taburõ ko i imiko, wa si avura du vurũ nga badungu agopai naduho nayugu gupai nga kina Mbori nakediko. (Amo. 3:13-15) I ‘adi’ Masiya kusayo a wa nebi agumbaha, ki kenge ko kuti ngua rago Pumbo Susiri rogo gu garã nangia 33 F.B.K. (Dan. 9:26, 27; Amo. 2:22, 23) Gi kere kpio ko akpihe re angia gu ‘mbura gidoko’ i aima gumbapaha rogo Bambata Pai 3:15.
Tipagine Si Aidi Masiya Kpi Akpi ti Ni?
14, 15. (a) Gini meme nduapai ue Yekova ambu Yesu ti ni ko kpi? (b) Ginipai Yesu amangihe fuo zingako bekpio?
14 Yekova ambu Yesu ko kpi mbiko nyanyakipa nduapai ue. Bambata ndupai nga, pa nye Yesu niruruko dati kpio arugusi gupai bangiri aboro du tipa gu “gbugbu pai” nga ga Mbori. Yesu ayuguhe gbaiga nga rengberengbe boro rengbe arengba ka kakuti “sinombori” na kuti ga Mbori bakere pagbia Satana ki vura ka asada ní wai vuru. (1 Tim. 3:16) Ue ndupai nga, “Wiri boro aye . . . ka tumo dungu yo ni ungako.” (Mt. 20:28) Gi “motumo” re angbe aboro be ingapai nga gu i adihe be Adamu na ki sa aboro i gbia nyenye unga nga aguyo di Yesu kugume.—1 Tim. 2:5, 6.
15 Kristo amangi arame biata ku muro yo Mbori ki zingisiko bekpio rogo biama uru. Tipa Yesu yugu gupai fu gako abawiriki nga ko aima zinga bekpio, ko ayugu tiko fuyó tipa aʹuru 40 kini fu arugute fuyó. (Amo. 1:3-5) Fuo gure, ko aga ku ngbangbaturũ yo ka fu gu undo nadu ti kureko fu Bako na ki pidi gu regbo ko nika da ni Bakindo. Mbata fu ko da ni Bakindo, bakere sunge duho ko amangaha.
Agu Apai Yesu Amangaha Ni Masiya
16, 17. Gini apai Yesu amangihe fuo ga ko ku ngbangbaturũ yo?
16 Tona ti gu regbo Yesu azingi bekpio ka da ku awere, ko nangerakurii agu asunge nga ga agu adungurati nga ga aKristano nga gu ko azogarago kuriihe ni Bakindo. (Koro. 1:13) Si adu nga ko nika tona zogarago ni Bakindo rogo ga Mbori Kindo. Agu asangbaanebi du rogo Ziazia Kekeapai nayugoho nga gako zogarago atona rogo gu garã nangia 1914 nga kina ti gu regbo “digida rago” atona ti ni. (Mt. 24:3; Yugo. 11:15) Ngbutuko fuo gure, ko angbembatayo fu ruru amaraika tipa i bafu Satana na gako adaimona ngbangbaturũ yo kusayo.—Yugo. 12:7-10.
17 Gu sunge tungusapai nga gu Yesu atonaha rogo gu garã nangia 29 F.B.K. nambeda ka digo. Barambeda, ko nika sarangbanga rakiraki aboro. Fuo gure, ko nika yamba agu aboro duwa avusende nga aguyo diiko yó kugume tipa i ‘dí kumbo gu ngbii du nimbakadimbakadihe tipa yó ho rago aenge ni.’ (Mt. 25:31-34, 41) Agu aboro adianga Yesu kugume ya, ko nika gbarasayo dunduko ho ko nika ngbe ni mbatayo fu agu asovura nga ga ngbangbaturũ yó ka so vura kuti gbegberẽ aboro. Fuo gure, Yesu nika vo Satana na gako adaimona ki bako kurogo “gu due zanga mburuhe.”—Yugo. 19:11-14; 20:1-3.
18, 19. Gini apai Yesu nika mangaha wangia ko Masiya, na sangbanaha nikangia gine fu aboro giasangba?
18 Ti regbo gu ga Yesu Zogarago Nikadu Tipa Agarã Kutu, ko nika mangapai ringbisihe kuti agu arimoko nga ‘Baiiriwo Barugupai, Mbori duna tandu apai, Nyenye Baa, Gbia Zereda.’ (Yes. 9:6, 7) Gako zogarago nika karaga aboro berewe nirengberengbe yó kodihe na agu aboro dunduko i nika zingisayo bekpio. (Yo. 5:26-29) Yesu nika ngbembatayo fu aboro koyo du “agugaabi aime unga ni” ki sa yó i duna zezeredi pagume na Yekova (Oni gedi Yugoti 7:16, 17.) Fuo gu yangara asada nika manga ti digido ga Kristo Zogarago Tipa Agarã Kutu, abasamungu dunduko gbiati Satana kodihe na gako adaimona, i nika bayo “ku rogo gu ngirimo we nagbi na baruti,” na si nikangia gu mbura rii ‘woo’ i agumbapaha.—Yugo. 20:10.
19 Nangbaa gu gene Yesu amanga gako sunge ngbaha ni Masiya! Paradizo nika hi be agu aboro nika bata nga agu aboro nika raka rengberengbe raka na ngbarago. Rimo Yekova nika da niziaziaha mbiko boro ho berewe nika gberesa rimoko te na boro ho berewe nika tikango gako Bakere Pagbia te. Nairiwo gu wene apai du kumbatayo fu agu aboro nairisa fugo ga Mbori Siasia Boro re!
Ya Mo Oni Bi Masiya?
20, 21. Gini apai nasa rani ani fura na akuarani tipa Masiya?
20 Natona ti gu garã nangia 1914 ka da ku awere, ani naraka ti gu regbo du Kristo na ome kindo beko. Wa vura duhe nga ani abingo gu ome du Yesu nani rogo gu Kindo nga ga Mbori te, ani nainoho be agu asangbaanebi nadigisotihe. (Yugo. 6:2-8) Ono tie, wakina agu aYuda nadu rogo bambata sa kama agarã, aboro kinaho areme aidanga kuti gupai nga Yesu nga Masiya ya. Gu boro i aaida ni angia gu Masiya nika sovura tipa yó watadu guní nika zogarago na agu abazogo nga ga zegino yó. Ono oni ima inoho nga Yesu awere nazogarago ngbangbaturũ yo ni Bakindo rogo ga Mbori Kindo. Ya mo rago angba tironi ka ino gupai re? Wakina agu aKristano nadu rogo bambata sa ka agarã, gu inohe re aima sa roni oni yaa: “Ani bi Masiya.”
21 Ho oni atungusapai ni, ya mo oni naanyakasapa ga Yesu sunge ni Masiya? Pa manga oni he wo nika sa roni oni bi gupai ko namangihe furoni, gupai ko amangaha awere, na gupai ko nika mangaha barambeda kumbatayo, si na nyanyakipaha. Isoke wakina Andarea na Firipo, oni ima gumbapa Masiya fu agumeroni. Si naida oni mangi nyanyaki ome tipa ka yugo nani fuyó nirengo nga Yesu Kristo nga Masiya nga gene bata.
Oni Rengbe ka Sakarogoyo?
• Wai gu ga Yesu abawiriki nadu rogo bambata sa kama agarã arengbe ka ino ya Yesu nangia Masiya?
• Tipa gini meme nduapai ue Yesu akpi ti ni?
• Ginipai Yesu nika mangaha kumbatayo wangia ko Masiya?