Agu Aboromotumo nga Abakindo Nika Ye na Amaku fu Aboro Dunduko
“Oni nga siasia ngbatunga aboro, nga ga bakindo aboromotumo [“aboromotumo nga abakindo,” “NW”] nga ziazia rika aboro.”—1 PET. 2:9.
ONI RENGBE KA SAKAROGOYO?
Gini regbo Mbori akidopa agu aboromotumo nga abakindo re ti ni mbata?
Wai vovo mozunga akusi agu aboromotumo nga abakindo?
Gini amaku agu aboromotumo nga abakindo nika ye nani fu aboro?
1. Tipagine i ayamba “ga Gbia riahe” ti ni a nga Tingida Pakpio Yesu na ndu mangaha nga gine?
RO GO gu nyemu naadu rogo Nisana 14 rogo gu garã nangia 33 F.B.K., Yesu na gako amokedi 12 amangi gu Pumbo Susiri aYudo anaamangaha niyangaraha. Fuo ya Yesu fu Yuda Keriota nga gu boro naandu ka kusa pako wee ko guari dagbayo, ko agumbapa gu kura pumbo berewe du kia, i nayamba gu pumbo re nga “ga Gbia riahe.” (1 Kor. 11:20) Mbiko wa Yesu aya bara ue wee, “oni ta manga gere nitingidi pa re,” i nayamba gu pumbo re a nga Tingida Pakpio Yesu, nga gu nanyakasapa kpio Kristo. (1 Kor. 11:24, 25) ADezire Yekova rogo zegino dunduko naairisa gi sangbako re nitingida yó pakpioko na agarã dunduko. Rogo gi garã nga 2012 re, Nisana 14 nga gu ramediwi nga ga Ziazia Kekeapai nika tona fuo ti uru Rago Biama Sunge rogo Zerekpe ti rameru nga 5.
2. Ginipai Yesu agumbaha tipa gu kpakuto na imekakue ko amangisunge nani?
2 Gu bawiriki nangia Ruka ape gupai Yesu amangihe na gu ko agumbaha rogo averesi gbua ue ki yaa: “Ko ki di kpokuta, ho ko afu tambuahe ni tipa ha, ko ki kuadi he, ki fu he fu yo, niya, ‘Borore nga gere du ni fufu he tipa roni. Oni mangi gere nitingidi pa re.’ Ko ki di inga kina wo fuo riahe, niya, ‘Gi inga re, si nga vovo ndika rogo kurere, nga kina gu nauka tipa roni.’” (Rk. 22:19, 20) Agu amokedi re agi rogo agi afugo re wai?
3. Wai amokedi agirogo gupai Yesu agumbaha tipa kpakuto na imekakue?
3 Wa agu amokedi re angia aYudo, i aima rugutiyo wenengai naapa agu anya aboromotumo anaafura nimotumo fu Mbori rogo gu yekaru naadu Yerusarema yo. Aboro anaafu ngbatunga agi amotumo re tipa Mbori idi naayo, na badungu agu akuraha adu tipa ka dada ingapai. (Pa Mot. 1:4; 22:17-29) Sidu, ho Yesu aya ni wee ko nika fu kpotoko tipa yó na kureko tipa yó, agu amokedi agirogoyo nga ko nika fu rengberengbe kpotoko tipa yó nimotumo. Pa gu motumo re anyaki kisusi agu amotumo nangia ga anya.
4. Ginipai Yesu aaida ka gumbaha ho ko ayani wee: “Gi inga re, si nga vovo ndika rogo kurere”?
4 Na ginipai du tipa agu afugo Yesu nga “gi inga re, si nga vovo ndika rogo kurere”? Agu amokedi re aima ino gu sangbaanebi nafura tipa vovo mozunga rogo Yeremaya 31:31-33. (Oni gedihe.) Afogo Yesu nayugo gupai nga ko aagumbapa gu vovo mozunga si adu nga si nika diaba gu mozunga nangia ga aNdiko Yekova amangihe na aYisaraere vurube Moize. Ya mo wiri wiratise aduho dagba agi amozunga du ue re?
5. Gini maabangirise gu mozunga nga ga aNdiko afuhe fu aYisaraere?
5 Ii, gaha aringbisapai awiri tihe awira. Yekova afura fu aYisaraere ho ko agumbapa gu mozunga nga ga aNdiko ni ki yaa: “Wa du he were, ka oni gí sangbare ni rengo, ki nika kuti gi zungahe, oni adú ni gimi wene ũkumuko dagba kura rika aboro zegino dunduko; bambiko kpotosende dunduko gimi nga ha, oni ki du ni ga bakindo aboromotumo [“aboromotumo nga abakindo,” NW] tipa re, ni kparakpara ziazia rikaaboro.” (Gate 19:5, 6) Rogo agi afugo re angia gine fu aYisaraere?
GU KIDOHE NAADU TIPA AGU ABOROMOTUMO NGA ABAKINDO
6. Gine si adu nga gu mozunga nga ga aNdiko nika digisoho?
6 AYisaraere aima giarogo gu fugo yo nga “mozunga,” mbiko Yekova aima manga ngbatunga gu mozunga re na agu atitayo nangia aNoa na Abarayama. (Bam. P. 6:18; 9:8-17; 15:18; 17:1-9) Yekova amangi mozunga na Abarayama, na ki kido ko nga: “Rogo ngbatunga ro i ka fu maku ni fu arikaaboro zegino dunduko.” (Bam. P. 22:18) Gu mozunga nga ga aNdiko re adu tipa ka undo gi kidohe re si digisi tihe. Rii mburuhe du ka aYisaraere arengbe kada niga Yekova “[kparakpara] ũkumuko dagba kura rika aboro zegino dunduko.” Tipa gini ndupai? Tipa i da nigu ga Yekova ‘aboromotumo nga abakindo.’
7. Gu fugo nga ‘aboromotumo nga abakindo’ aayugo gine?
7 AYisaraere aima ino agu aboro nangia abakindo na aboromotumo, ono kina Marekisedeke sa nangia gu boro Yekova aidihe funi ní du niboromotumo na nibakindo. (Bam. P. 14:18) Yekova afu gu momu fu aYisaraere nga i kusi ‘aboromotumo nga abakindo.’ A wa Ziazia Kekeapai nayuguhe, gi momu re ayugu gupai nga i nikangia agu aboromotumo nga abakindo, nga agu abakindo nika mangasunge amanga ni aboromotumo.—1 Pet. 2:9.
8. Gini asunge Mbori anaafuhe fu boromotumo i nimangihe?
8 Nirengo, sunge bakindo ningia zogarago. Ono ginipai boromotumo naamangaha? AEbere 5:1 nasakapai tipaha niyaa: “Agbiamotumo ni ba sa sa, wa i arogo yo dagba aboro yo, i asia yo tipa aboro sa agu apai nga ga Mbori, i tumo ni agamunihe na aũmotumo tipa ingaapai.” Gu boromotumo Yekova anisia ní, ní anaarukuba ingiingi aboro barabangiri Mbori tipa ka fu motumo tipa yó na tipa ka zungodi Yekova ko mbupai fuyo. Boromotumo anaaru a kuba Yekova bangiri aboro, ka yugopai fuyo tipa gako andiko. (Pa Mot. 10:8-11; Mara. 2:7) Rogo gi gene re, gu boromotumo Yekova anisia ní, ní anaamangasunge tipa ka mbakadapai dagba aboro na Mbori.
9. (a) Ginipai si aaida aYisaraere mangihe tipa gu kidohe naadu tipa du ni ‘aboromotumo nga abakindo’? (b) Tipagine Yekova asia aboromotumo ti ni dagba aYisaraere? (c) Gini he nasa gupai nga ka aYisaraere dunga ni agu ‘aboromotumo nga abakindo’ ya?
9 Gu mozunga nga ga aNdiko afu gu momu fu aYisaraere nga i du ni aboromotumo nga abakindo fu “kura rika aboro zegino dunduko.” Gi iiriwo momu re aadunga gbua te, Mbori ayaa fuyo wee: “Ka oni gí sangbare ni rengo, ki nika kuti gi zungahe.” Ya mo i arengbe ka giasangba Mbori nirengberengbehe? I arengbe arengba ka giasangba Mbori ku gene ono angianga nirengberengbehe ya. (Rom. 3:19, 20) Mbiko gipai re, Yekova asia aboromotumo ti kina gu bangisa regbo re dagba aYisaraere, nikparakpara yó ti abazogo dunduko, tipa i naafu motumo tipa gu ingapai aYisaraere anaamangaha. (Pa Mot. 4:1–6:7) Agi aingapai re aakoda agu aingapai akoda nangia ga aboromotumo. (Eb. 5:1-3; 8:3) Yekova anaaida aida na agi amotumo re, ono si arengbanga ka dia ingapai nibasa ti agu aboro re te, i agbinza kindi na kini kpiki. Boromotumo aarengbanga ka mbakadapai dagba agu aYisaraere naadu niruruyo na Mbori rogo apai yo dunduko te. Gu mokedi nangia Pauro afura tipaha nga: “Kure abaabagara na ameme arengba nga na dia ingaapai ku sa yo te.” (Eb. 10:1-4) Mbiko ga aYisaraere basasangba andiko, i ada nitiwatiwa yó. (Gara. 3:10) I aarengbanga ka du ni aboromotumo nga abakindo fu zegino dunduko te.
10. Ginipai gu mozunga nga ga aNdiko amangihe?
10 Ya mo gure nga gu kidohe Yekova akido yó nani nga i nika du ni agu ‘aboromotumo nga abakindo’ angia kungbopai? Oó. Ka i amangi ome tipa ka giasangbako, ka i aduadu berewe na gu momu re beyo, ono angianga tii gu mozunga nga ga aNdiko ya. Tipagine? (Oni gedi AGaratio 3:19-25.) Agu aboro naamanga ome tipa ka iriso aNdiko, agu aNdiko re adu tipa ka undoyo i banda ndikidi irisombori. Si asa aYudo a i rugutiyo naapa gayo tindiko na ki sayo i bi gupai nga i naida na gu motumo du nibakerehe ti gu gbiamotumo anaafuhe. Si adu a nibayugu pa rugute ka ndu naayo koyo du Kristo ni, watadu Masiya, du rogoyo nga “Mbedimbedi Boro.” Si adu nga ho Masiya kada ni, ko nika gumbapa gu vovo mozunga nga gu Yeremaya agumbapaha. Agu aboro naidipa Kristo, i ada nipapara gu vovo mozunga re na ki da nirengo ni agu ‘aboromotumo nga abakindo.’ Ani bingo wai gupai re amangi.
VOVO MOZUNGA AKUSI AGU ABOROMOTUMO NGA ABAKINDO
11. Wai Yesu ada nitonatona mburu agu aboromotumo nga abakindo?
11 Rogo gu garã nangia 29 F.B.K., Yesu nangia boro Nazareta ada ni Masiya. Ho garãko ada ni nga 30, ko afu tiko fu Yekova nizioko bapatiza tipa ka manga gu kparakpara sunge Yekova afuhe fuko. Yekova aidi naako na ki ya, “Wire du re, nyemuko namanga re” na ki mbedi ko nitoro angianga ninzeme ya. (Mt. 3:13-17; Amo. 10:38) Pa mbeda yó ko nitoro asa gupai nga ko da ni Gbiamotumo na ni Bakindo kumbatayo fu agu aboro dunduko du na idapase. (Eb. 1:8, 9; 5:5, 6) Ko nangia tonatona mburu gu ndikidi agu aboromotumo nga abakindo.
12. Gini he ga Yesu motumo asaha si mangi?
12 Nidu Yesu ni Gbiamotumo, gini motumo ka ko afuhe nga gu narengbe ka dada gu ingapai nga ga aidipase? A wa ko ayuguhe ti gu regbo ko asigira pa Tingida Pakpioko, gu motumo re angia gu kpotoko ingapai aadunga ti ni ya. (Oni gedi AEbere 9:11, 12.) Tona ti gu regbo ko azi bapatiza rogo gu garã nangia 29 F.B.K. fuo da ko ni Gbiamotumo, ko ambu tiko fu a’asada na rabahe da ti kpioko. (Eb. 4:15; 5:7-10) Fuo zingako bekpio, ko aga ku ngbangbaturũ yo na ki yugu pa nyaka gu motumo ko afuhe fu Yekova. (Eb. 9:24) Fuo gure, Yesu arengbe ka zungodi Yekova tipa agu aboro du na idapase kuti gako motumo tipa ka undo yó i irisi Yekova na gu maabangirise nga ga nyenye unga. (Eb. 7:25) Gi gako motumo re asa gupai a nga gi vovo mozunga re mangisunge.—Eb. 8:6; 9:15.
13. Gini maabangirise naadu fu agu aboro i ayambu yó i ye ka du rogo vovo mozunga?
13 Agu aboro nagbia yambahe kurogo vovo mozunga, si naida i mbediyo na ziazia toro. (2 Kor. 1:21) Gu yambahe re adu mbata fu ruru aYudo na kusa fu aGendiria. (Ef. 3:5, 6) Gini maabangirise agu aboro du rogo vovo mozunga adu nani? Nibambataha, i nambupai fuyo ti gayo ingapai. Yekova agumba sangbaanebi nga: “Mi avú yo ti gayo irairaapai, ka mi atíngida nga pa gayo ingapai berewe ya.” (Yere. 31:34) Fuo mbuyo pai fuyo ti gayo ingapai, i rẽarẽ tipa ka da ni ‘aboromotumo nga abakindo.’ Petero afura fu mbedimbedi aKristano ki yaa: “Oni nga siasia ngbatunga aboro, nga ga bakindo aboromotumo [“aboromotumo nga abakindo,” NW] nga ziazia rika aboro, nga aboro du ni kina ga Mbori yo, ya oni yugu gu wene sino gbayaga nga ga gu ko nayambu roni bitimo yo ku rogo gako iiriwo imarago yo.” (1 Pet. 2:9) Petero adi gipai re rogo agu afugo Yekova ko agumbaha fu aYisaraere ti gu regbo ko afu aNdiko fuyo na ki mangasunge nani tipa agu aKristano du rogo vovo mozunga.—Gate 19:5, 6.
AGU ABOROMOTUMO NGA ABAKINDO NAYE NA UNDO FU ABORO DŨ
14. Wari agu aboromotumo nga abakindo re nika mangasunge ni?
14 Agi aboro du rogo vovo mozunga re nika mangasunge wari? Nibambataha, i namangasunge auru kpotosende ane. Wa du yó nibadona, i nga aboromotumo. I narukuba Yekova fu aboro dunduko ‘niyugo yó gako wene sino gbayaga’ na nifuyo gu riahe nga ga toro. (Mt. 24:45; 1 Pet. 2:4, 5) Fuo kpi yó na ki zingi bekpio, i narẽ tipa ka manga agu asunge dunduko du ue re na Kristo ngbangbaturũ yo nga sunge abakindo gbiati aboromotumo. (Rk. 22:29; 1 Pet. 1:3-5; Yugo. 1:6) Gu mokedi nangia Yoane aima ida kuti gipai re rogo gu yuguyugupai naadu tipa dungu agu amaraika nasungu pati ga Yekova mbatabakindo ngbangbaturũ yo. Ko aya i abi “vovo bia” fu “Wiri Kandoro” niyaa: “Mo angbe aboro ni kurero fu Mbori dagba angbatungayo, na angbatunga afugoyo, na aboro, na arikaaboro dunduko, ki sa yo ni abakindo na aboromotumo tipa gaani Mbori; i ki nizogo rago auru kpotosende.” (Yugo. 5:8-10) Rogo gu yuguyugupai Yoane abihe kusa, ko afura tipa agi abazogo re ki yaa: “I adú ni aboromotumo nga ga Mbori yo, na ga Kristo yo, i azóga rago na ko agarã ki du 1000.” (Yugo. 20:6) I dunduko na Kristo nga agu aboromotumo nga abakindo tipa ka undo aboro.
15, 16. Gini amaku agu aboromotumo nga abakindo nika ye nani fu aboro?
15 Gini aundo i nika ye nani fu agu aboro du auru kpotosende? Yugoti kapita 21 nafura tipa yó wa gu bakporo du ngbangbaturũ yo nga Vovo Yerusarema, i ayambaha nga “dia Wiri Kandoro.” (Yugo. 21:9) Veresi 2 dakuti 4 nayaa: “Mi ki bi gu ziazia bakporo, nga vovo Yerusarema, si nizorõ ngbangbaturũ yo yo du Mbori ni, i ambakadi he wa gu de i afongo ri nikadia kumbari. Mi ki gi bakere fugo yo du mbatabakindo ni, naya, ‘Oni ngére, ga Mbori banye du na aboro, ko anyé na yo, i adú ni gako aboro, Mbori anyé na yo tigako, ki du ni gayo Mbori. Ko awéga aume ti bangiriyo ku sa yo dunduko. Kpio adú nga berewe te, rungo adú nga yo na akpe na ima a te, bambiko bambata apai aima nyasa.’” Nairiwo gu iiriwo amaku re! I nika dia kpio kusayo nga gu he ninaaye na aume, arungo, akpe na ima. Gure nika sa gupai nga ruru aboro da berewe nirengberengbeyo na ki mbakadipai dagbayo na Mbori rogo apai yo dũ.
16 Yugoti 22:1, 2, nafura berewe tipa agu amaku agu aboromotumo nga abakindo re nika ye nani niyaa: “Ko ki yugu di fere, nga ga ime unga, si ki du ni kurẽkurẽ he, nigbadi tii gu mbatabakindo yo nga ga Mbori na ga Wiri Kandoro, ku rogo gene bakporo. Gu ngua ki du nga ga unga ti ngba di kono na ku mbiti yo a, si nazuka rindihe bawe na ue na diwi na adiwi; akpehe ki du tipa husa arikaaboro.” Agi akpiapai re nayugo wai i nika husa “arikaaboro” be gayo zangarengba nga gu i adihe ti Adamu. Nirengo, bambataapai nika nyasa anya kusayo.
WAI AGU ABOROMOTUMO NGA ABAKINDO NIKA NYASA GAYO SUNGE
17. Gini sunge agu aboromotumo nga abakindo re nika digisoho?
17 Ti digido agarã kutu nga ga sunge, agu aboromotumo nga abakindo re nika sa gayo azogo auru kpotosende ane nirengberengbe yó. Nidu Yesu Kristo ni Gbiamotumo na ni Bakindo, ko nika karaga rengberengbe aboro dunduko fu Yekova. (Oni gedi 1 AKorindo 15:22-26.) Fuo gure, agu aboromotumo nga abakindo ki digisi gayo sunge.
18. Fuo nyasa aboromotumo gayo sunge, wai Yekova nika mangasunge naayo?
18 Wai Yekova nika mangasunge na agi abakurea Yesu re fuo gure berewe? Ringbisihe kuti Yugoti 22:5, si nagumba gupai nga “I azóga rago nye anye kindi.” Ada i nika zogarago kuriyo? Ziazia Kekeapai afuranga tipaha te. Ono gu ngbatunga raka du yó nani na gu inohe i agbiaha tipa ka undo aboro zangarengba nani nika undo yó i digisi ga Yekova ringbisapai nyeanye kindi.
19. Gine Tingida Pakpio Yesu nika tingida aboro nani?
19 Ho ani ka dungura tirani ni tipa ka Tingida Pakpio Yesu Rago Biama Sunge rogo Zerekpe ti rameru 5, 2012, si naida ani tingidipa agi ayugopai nga ga Ziazia Kekeapai re atingida. Gu yangara mbedimbedi aKristano du auru kpotosende ane nika ri gu kpakuto adunga agbooro rogoho ya na ki mbiri imekakue nga gu nayugopa du yó nipapara gu vovo mozunga re. Gu kpakuto na imekakue narukuba gu motumo Kristo afuhe re, si nika tingida yó naapa gu bakere momu na gu tindiro du yó nani rogo ga Mbori nyenye ringbisapai. Ani dunduko, ani yengo aye tipa ka yugo gaani tambuahe tipa gu gamahe Mbori nafuhe nga ga agu aboromotumo nga abakindo re wa ka aboro gbia undo behe.
[Gu sura du ti kpewaraga 30]
Agu aboromotumo nga abakindo re nika ye na nyenye amaku fu aboro