Ani fu Motumo fu Yekova na Kpotoraniyo Dunduko

“[Agu apai dunduko oni amangaha,] oni mángi he na kpotoroni yo wa manga ha fu Gbia.”—KORO. 3:23.

ONI RENGBE KA KARAGAPAI?

Wai rengbe ani ka iriso Yekova rogo agu apai ani amangaha na’auru dũ?

Gini ngbatunga amotumo ani afuhe rogo gaani irisombori yo?

Wai rengbe ani ka fu agu ahe du berani fu Mbori?

1-3. (a) Ya mo pa kpi Yesu ri ngbunduru ngua-rungosi nayugo gupai nga Yekova aidanga na motumo berewe te? Oni sakingo rogo. (b) Gini sanahe rengbe ka kura nibipa motumo areme?

ROGO bambata sa kama agarã, Yekova ayugu gupai fu gako aboro nga ga Yesu motumo tumorii ima digiso ga Moize aNdiko. (Koro. 2:13, 14) Agu amotumo dunduko aYudo adigi nifuhe tipa dungu kama agarã aadunga na sunge ti ni berewe te watadu paha anyakanga berewe te. Ndiko aima digiso gu sunge si aamangaha nga ga “bayugu rugute ka ndu na [aboro] koyo du Kristo ni.”—Gara. 3:24.

² Gure ayugonga gupai nga sunge ti aKristano berewe na amotumo te te. Kuba gure, gu mokedi nangia Petero ape gupai nga si naida ani ‘tumo ni agu amotumo nga ga toro, du niwenehe gbe ku bangiri Mbori mbiko Yesu Kristo.’ (1 Pet. 2:5) Kurigure, gu mokedi nangia Pauro ayawee, gu Kristano naima kpara gani raka fu Yekova, gu gani raka re na agu apai du tipaha dunduko nga ‘motumo.’—Rom. 12:1.

³ Sidu, Kristano nafu motumo fu Yekova singia nifuni gu kura ahe fuko watadu nimbuni pa gu kura ahe tipa ko. Nibi gupai ini ani he tipa gupai si aaidaha be aYisaraere tipa gayo motumo ngba bangiri Yekova, wai rengbe ani ka ino singia agu amotumo ani afuhe dunduko fu Yekova si ngbaangba tiko?

NA’AURU DŨ

4. Ginipai si aida ani tingidihe tipa agu apai ani amangaha na’auru dunduko?

⁴ Si ima rengba ka kpakara furani ani ini wai rengbe agu apai ani amangaha na’auru dunduko ka du na ngbanya na pa fu motumo fu Yekova. Sunge kporo, sukuru, sunge-marã, ngbeka ahe nzengu yo gbiati gu kurapai rengbe kadu bangirani nga sunge ti ni na agu apai nga ga toro te. Ono tie, kangia ani ima kpara gaani raka fu Yekova watadu ani naberãpa mangaha wo kumbatayo, gu bipai ani amanga agu apai nani nga ga a’uru dunduko na nyanyakipa ha. Ani nga aKristano ti aregbo dunduko uru na yuru. Si naida ani mangisunge na agu arugute nga ga Ziazia Kekeapai ti aregbo dunduko rogo gaani raka yo. Sidu, Pauro azungodi rani ki yaa: ‘Ani mangihe na kpotoraniyo dunduko wa mangaha fu Gbia,’ agu apai dunduko ani amangaha.—Oni gedi AKorosaio 3:18-24.

5, 6. Wisigo ani ginipai rengbe ka duna sangbanaha kurii gaani vodatise na mangapai?

⁵ Anga agu apai Kristano amangaha na’auru dunduko nga papara gani sunge fu Mbori te. Wa vura duhe wo, pa zungodi Pauro rani ani mangisunge ‘na kpotoraniyo dunduko wa mangaha fu Gbia’ nasa rani ani berẽkurii gaani gene raka naabaha. Wai rengbe ani ka mangasunge na gipai re? Ya mo ani navoda tirani ngba wene gene ti aregbo dunduko? Watadu ho ani amanga gaani asunge ni nga ga a’uru dũ, ya mo si rengbe ka du furani nipa zee ka ya fu boro wee Dezire Yekova nga ani mbiko gu gene ani amanga apai ngbaha watadu vo ani tirani ngbaha? Ani aidanga pai du wa gure tipa rani te! Ga Yekova aboro aidanga ka manga gupai nga gu rengbe ka ye na gbarasarimo kuti rimoko te.—Yes. 43:10; 2 Kor. 6:3, 4, 9.

⁶ Ani wisigingo wai nyemu mangasunge na ‘kpotoraniyo dunduko wa mangaha fu Gbia’ narengbe kadu na sangbanaha kurii gu dungu apai ani amangaha rogo gaani raka yo. Wa ani kaa wisigo gipai re, ani moingo gupai ku berãrani yo nga, Yekova aaida aYisaraere nifu kina boro gu he ngbaangba kisusi nimotumo fuko.—Gate 23:19.

SANGBANAHA KURII GAANI RAKA

7. Pa kpara Kristano gani raka fu Mbori nakoda gine?

⁷ Ho ani aakpara gaani raka ni fu Yekova, ani amangihe na kpotoraniyo dunduko. Ani aya fu Yekova wee, ani nika maa ko mbata fu agu apai ani kaa mangaha rogo gaani raka yo. (Oni gedi AEbere 10:7.) Wene diaberã du naadu. Zanga kapa, ani ima bi gupai nga ho ani asana Yekova ni ko undo rani ringbisihe kuti gupai ko akpinyemuhe, sangbanaha nidu niwenehe. (Yes. 48:17, 18) Ga Mbori aboro niziazia yó na kidu na ngbarago mbiko i na’asada kaa yugo kina asinoko.—Pa Mot. 11:44; 1 Tim. 1:11.

8. Tipagine duhe ti ni ninyanyakipa pai furani ka wisigo wai Yekova anaabi agu amotumo nadumbata nga si niziaziaha?

⁸ Agu amotumo aYisaraere anaafuhe fu Yekova, si aniidu niziaziaha. (Pa Mot. 6:25; 7:1) Gu pa-Ebere sayo ho nga “ziazia,” si na gu rogoyo nga ka kparatise, watadu ka ziasitise fu Mbori. Tipa Yekova idi na gaani amotumo, si naida si du nikparakparaha ti gu gbegberẽ maapai kurii nga ga gi zegino re. Si aidanga ani kpinyemu agu ahe Yekova asogaha te. (Oni gedi 1 Yoane 2:15-17.) Gipai re nayugo gupai nga si naida ani bandatirani ti kpamiatise na rimisotise kurogo agu apai rengbe ka birikosi rani bangiri Mbori. (Yes. 2:4; Yugo. 18:4) Gure nayugo gupai a nga, si aidanga ani mbu bangirani si naabi agu ahe du nibibirikoho watadu gu du niwasiwasihe te, si aidanga ani naawakana ngbatunga apai wa gure berãrani yo te.—Koro. 3:5, 6.

9. Wai nyakipa yugo wene asino fu akuarani aKristano, na tipagine?

⁹ Pauro azungodi akurako aidipase ki yaa: “Ka bangironi gó nga ti manga wene pai na fuka ahe ya; bambiko ngbatunga gi rũhe re, si ngba ti Mbori.” (Eb. 13:16) Du na wene asino na manga weneapai fu akurase nga agu apai Yekova abihe wa gu motumo ngbaangba tiko. Gi ngbatunga baka bangirise tipa akurase re i aino ndikidi aKristano ti ni.—Yo. 13:34, 35; Koro. 1:10.

ROGO IRISO YO

10, 11. Wai Yekova abi gu gaani asunge nga ga toro gbiati irisoko, na gini sangbana pai si aida si du nani kurii rani?

¹⁰ Gene sa dagba agu agene ani amanga weneapai fu kura aboro ngbaha wangia ani aKristano nga ‘kusapa gaani maabangirise.’ Ya mo ani naamangasunge na agu amomu dunduko ani agbiaha tipa ka manga dezirepai? Pauro afura tipa gi nyanyakipa sunge nga ga aKristano re ki ya si nga “motumo tambuahe fu Mbori rogo ko yo dedede, gu zuzuhe nga ga ngbarani nakusa pa rimoko.” (Eb. 10:23; 13:15; Osea 14:2) Si naida ani berẽ aberã kurii gu bakio regbo ani adiaha kutingba sunge tungusa wene pangbanga na wai rengbe ani ka kiiso gaani inohe rogo sunge tungusapai yo. Dungu agu aDunguratise Nga ga Sunge naundo rani tipa ani mangi gipai re. Ono tie, wa duhe nga gaani sunge tungusapai gbiati manga dezirepai angianga kuti asino mangaha ya nga “motumo tambuahe” na kingia papara gaani irisombori, si naida ani mangihe nibawenehe kisusi. Wa duhe nga agu apai du tipa aboro nibakiakia, gu regbo ani adiaha kutingba takapande wene pangbanga nayugopa wai ani abi agu apai nga ga toro na nyanyakipaha.

¹¹ AKristano naadia regbo dedede tipa ka irisombori ho du yó ni nisayo watadu ho du yó ni na akurayo. Wo du Yekova aida ani mangihe. Kina rengo tigu ngaha nga si aidanga ani irisi agu aNdiko nangia ga Rago Sabiti watadu kaa ndu anunguro tipa apumbo ku Yerusarema yo berewe te. Ono tie, agu apumbo naadu bakuru kusayo re, si wakina agu apai du areme tipa aKristano. Mbori nakpinyemu gupai nga ani mangisunge na bete gu regbo du berani tipa ka wisigo Fugoko, ka kpara fuko, na ka ndu tipa agu adunguratise nga ga aKristano. Agu aKristano nga abairakporo nangbembatayo tipa ka nungusa gu irisombori nga ga aborokporo na gayo aborokporo. (1 Tesa. 5:17; Eb. 10:24, 25) Nibipa gu gaani asunge nga ga toro, si naida ani sana tirani nga, ‘Ya mo si naida mi mbakadi gimi irisombori?’

12. (a) Ani rengbe ka ringbisa pa guzuguzu fuõngua rogo gu irisombori nadumbata kuti gine areme? (b) Gini sangbanapai rengbe gi ringbisapai re kadu nani kurii gaani kparakpee?

¹² Bakindo Davide abibia fu Yekova ki yaa: “Gi kpetambuahe dú wa wene fuõngua bara bangiro.” (Tam. 141:2) Ani berẽnga kurii agu akpee ani naamangaha, gu ngbatunga agu afugo ani apehe rogoho, gbiati bara wai ani naamangaha. Gu kitabu nga Yugoti naringbisa “agu akpe nga ga ga Mbori aboro” kuti guzuguzu fuõngua mbiko gu kparakpee du niwenehe nandu koyo du Yekova ni wakina wene fuõngua. (Yugo. 5:8) Rogo gu ringara aYisaraere nadumbata, gu guzuguzu fuõngua i anaazoho rii bamotumo, si aniidi i mbakadihe ambakada wenengai. Yekova aniidi nani kina gu ka i anifuhe ringbisihe kuti agu arugute ko aya i nimangihe kutini. (Gate 30:34-37; Pa Mot. 10:1, 2) Ka ani kpari ringbisihe kuti wai Yekova nayugupai furani tipa kparakpee na kini bi kparakpee wa gu he du niziaziaha, ani rengbe arengba kadu na kido nga Yekova nika gia rani agia.

ANI FU HE I KI FU HE FURANI A

13, 14. (a) Ginipai Epafuradita gbiati agu awirina naadu rogo gu dungurati naadu Firipoi yo amangihe fu Pauro, na gini bipai naadu ti Pauro tipa gi gayo gamahe re? (b) Wai rengbe ani ka pekafuo gu kpiapai nangia ga Epafuradita gbiati agu awirina re?

¹³ Gu marã ani afuhe tipa ka songoda gu sunge tungusapai namanga rogo zegino dunduko, ani rengbe ka ringbisaha kuti motumo, ka si vura du nikikiihe watadu niwiri umbaha vurũ. (Mk. 12:41-44) Rogo bambata sa kama agarã, gu dungurati naadu Firipoi yo akedi Epafuradita ku Roma yo ko ndu ka ngerafuo agu azingo nga ga borose Pauro adu nani. Si nawira wa Epafuradita aima dia bete marã rogo dungurati tipa ka ndu nani fu Pauro. Anga bambata regbo nangia gure fu agu awirina naadu Firipoi yo i ngerefuo Pauro te. Mbiko gu wene sino naadu tiyo, i aidanga Pauro du na bakabangirise tipa zingo marã te tipa wa ka ko futiko nyanyaki sa sunge tungusapai. Pauro abi gi gayo gamahe re wai? Ko aya wee si “nga guzuguzu fuõ he, na wene motumo nangba ti Mbori.” (Oni gedi AFiripoio 4:15-19.) Pauro aima du na ngbarago tipa gi gayo gamahe re, na kinawo Yekova adu na ngbarago a.

¹⁴ Wakina gure areme, Yekova na ngbarago be agu agamahe ani afuhe tipa ka songoda sunge tungusapai rogo zegino dunduko. Kurigure, ko nakido rani nga, ka ani amaa agu apai nga ga toro mbatayo rogo gaani raka yo, ko nika ngera angerafuo agu azingo dunduko du ani nani rogo borose na rogo toro yo.—Mt. 6:33; Rk. 6:38.

ANI YUGU GAANI TAMBUAHE

15. Gini bete apai si aida ani atambua Mbori tipaha?

¹⁵ Ka ani tona tangara gu nduapai si aida ani tambua Yekova ti ni, uru ti rani ati ka ani anyasanga ha ya. Ya mo si aidanga ani naatambua ko na’auru dunduko tipa fuko unga furani te? Ko nafu agu ahe dunduko ani aidaha tipa gaani raka—riahe, arokoo, kporo, kodihe na gu wege ani agbidaha nibasasa dunduko. Kurigure, gu gaani idapase du mburuhe rii ndikidi inohe nafu maabangirise furani. Si rẽarẽ tie nga ani irisi Yekova na ki fu agu amotumo nga ga tambuahe fuko mbiko ko nakusi rani na gu weneapai ko amangaha furani.—Oni gedi Yugoti 4:11.

16. Wai si aida ani mangipai kuti gu motumo tumorii Kristo afuhe tipa rani?

¹⁶ A wa ani abihe rogo gu kekeapai naaye mbata fu gere, gu bawene gamahe Mbori afuhe fu awiri aboro nga ga Kristo motumo tumorii. Gure nayugo gu bakere nyemuse du Mbori nani koyo du ani ni. (1 Yo. 4:10) Ginipai rengbe ani ka mangaha tipa gi gako gamahe re? Pauro ayaa: “Nyemu Kristo nasoda rani; bambiko ani naya wẽ, boro sa akpi tipa yo dunduko, . . . ko akpi tipa yo dunduko, ya agu yo du ni ungayo ka i du nga ni ungayo fu tiyo ya, ono fu gu ko nakpi tipa yo ki zingi berewe.” (2 Kor. 5:14, 15) Gure wa Pauro aaya furani wee, ka ani du na tambuahe tipa gu ga Mbori weneringise arẽnga aboro tipaha ya, si adu niwenepai ani mangisunge na gaani raka tipa ka iriso Ko na Wiriko. Ani nayugo gaani nyemuse na tambuahe fu Mbori na Kristo rogo giasangba yó yo gbiati ndu kaa tungusapai na kini sa aboro ni abawiriki.—1 Tim. 2:3, 4; 1 Yo. 5:3.

17, 18. Rogo gini gene gu kura aboro akiiso gayo motumo tambuahe fu Yekova ngbaha? Oni funga kpiapai.

¹⁷ Ya mo si arengbanga kadu taata tipa ani mbakadi gu gaani motumo tambuahe ani afuhe fu Mbori te? Fuo berã kura awirina kurii gu weneapai dunduko Yekova amangihe fuyo, si afõngbadu badunguyo yo i mangi ariapai rogo gayo regbo na asunge tipa ka kiiso gayo sunge tungusapai watadu agu asunge nga ga siokrasia. Si aima undo aguyo i mangisunge ni amoundo abazakigene tipa diwi sa watadu tipa dungu adiwi vuru agarã yo, na ki sa aguyo i mangisunge ni abazakigene. Aguyo namangasunge dudua aBambu Kindo. Anga agi pai re nga gu weneapai rengbe ani ka yugo gaani tambuahe rogoho te? Ka ani aamangaha na gu wene nduhe nga ka yugo gaani tambuahe, rago nika ngbaangba ti Mbori na gaani sunge.

¹⁸ Badungu aKristano abihe nga si naida i yugu gayo tambuahe ayugo fu Yekova. Morena nga boro sa dagbayo yo. Ri a’asadi ka gbata akaragapai kuti agu asanahe ri adu nani rogo gu pambori i asonosi ri rogoho nga ga aKatoriko na rogo gu dudunguro wisigopai nga ga aboro Asia. Ono ruru karagapai ho ri agbiaha te. Ri agbia ruru karagapai kuti gari asanahe kina fuo tona ri wisigo Ziazia Kekeapai na aDezire Yekova. Morena adu na bakere tambuahe tipa wai Yekova aundo ri ri gbia karagapai kuti gari asanahe rogo Ziazia Kekeapai. Nibipa gu undo agu akaragapai re aye nani kurogo gari raka, ri nagasa tambuahe fuko nimanga ri sunge na gu ome du tiri rogo gako sunge. Ri atona kaa mangasunge nimoundo abazakigene nibasa fuo zio ri bapatiza, na fuoho aturõngo te ri ki da ninazakigene. Agarã ima susa awere wa 30 wa ri atona gipai re, na ri namangaha a kindi.

19. Wai rengbe ani ka kiiso gaani motumo tambuahe fu Yekova?

¹⁹ Kina rengo ngaha nga, agu apai du tipa dungu ga Yekova amoyambu, si arengbanga ka mbugene fuyo i mangisunge ni abazakigene te. Ka si vurangia gini ngbatunga sunge ani amangaha fu Yekova vurũ, ani dunduko rengbe arengba ka fu gu motumo ngbaangba. Rogo gaani mangapai yo, si naida ani mangisunge na rubangirise kuti gako arugute, na kini moi gupai ku berãrani yo nga ani namangasunge fu Mbori ti aregbo dunduko. Rogo idapase yo, si naida ani du naa kido kuti ga Mbori ringbisapai na ngbaduraniyo dunduko. Rogo wene mangapai yo, ani nagbandaka wene pangbanga. Nibi gu tambuahe du ani nani ngbaduraniyo tipa agu apai dunduko Yekova amangihe furani, ani kpatagaranga akpatagara kuti fu motumo fu Yekova na ngbaduraniyo dunduko.

[Blurb on page 27]

Ya mo ga Yekova wene asino nafõngbaduraniyo ani mbakadi gaani motumo tambuahe?

[Gu sura du ti kpewaraga 25]

Ya mo ani naamangasunge na amomu dunduko tipa ka manga dezirepai?