Oni Mangi Ome Tipa ka Banda Gaoni Rogatise

“Ono mi nagumba ha fu agu yo aima roga tiyo, mi a te, ono Gbia.”—1 KOR. 7:10.

ONI RENGBE KA SAKAROGOYO?

Rogo gini gene Mbori akpamia arogotise?

Wai rengbe abaakumba ka undo agu aKristano duna kpakarapai rogo gayo ramukporo?

Wai si aida ani bi rogatise?

1. Wai gu aKristano abi rogatise, na tipagine?

HO AKRISTANO arogatiyo ni, i nazungahe ku bangiri Mbori, na i abingo gu zungahe re nitaataha te. (Batu. 5:4-6) Nidu Yekova ni Baenge mburu rogatise, ko ‘nakpamia’ agu aboro narogatiyo re. (Mk. 10:9) Bangiri Mbori, i nikpamiakpamia yó zanga bipa agu andiko nga ga ringara. Si naida ga Yekova amoyambu bi rogatise niguhe nakpamia yó sa, ka si vura du vurũ nga i arogotiyo fuo da yó ni airisiko watadu mbata fu i da ni airisiko.

2. Gini asanahe ani nika wisigopai tipaha rogo gi kekeapai re?

² Gu ramukporo du na diabese, si naye na bakere ngbarago. Ono ginipai rengbe ka manga ka si du nga ramukporo na akpakarapai? Ya mo i rengbe ka nyakasa gu rogatise du na akpakarapai rogoho? Gini undo duho fu agu aboro adunga zereda rogo gayo ramukporo ya?

YA MO NGBARAGO ADU ROGOHO WATADU GBERARAGO?

3, 4. Ginipai rengbe ka manga ka boro asianga badiarogatise na tatamana ya?

³ Ho du ga Kristano rogatise ni na diabese, si nipa ngbarago na kini fu irisa fu Yekova. Ka si gberẽ, si nafu kina gberarago. Gu Kristano naberãpa manga rogatise, ka ní pekefuo ga Mbori arugute, gani rogatise tona atona ngba wene gene. Ono ka ní amanganga wene diaberã ho ní asia badiarogatise ni ya, si rengbe ka ye na gberarago watadu rungo. Nikpiapai, kura paranga aboro natona kaa mbakadapa rogatise mbata fu i rẽ ba agu atindiro nga ga rogatise. Aguyo nagbia badiarogatise rogo Internet na ki ima gu ki rimisi tiyo kurogo gu rogatise adunga na ngbarago ya. Aguyo namanga kere ingapai ti gu regbo i ambakada pa rogatise na ki rogatiyo kinawo, ono gayo ramukporo rengbe ka tona na kina bete irisa tooni gbua dagbatiyo.

⁴ Gu kura aKristano amanganga rogatise “kina rogo Gbia yo” te, na sangbanaha fuyo nga imisiri mbiko gayo badiarogatise airisongo Yekova te. (1 Kor. 7:39) Kangia wo du pai tipa roni, oni kpari fu Mbori tipa ko mbupai furoni na ki undo roni. Ko adianga sangbana gu irairapai re kusayo ti boro te, ono ko naundo agu boro aundo nasa gayo berã tipa i hi fudifudiapai. (Tam. 130:1-4) Oni mangi ome tipa ka fu ngbarago fuko awere na nyeanye kindi, na ‘ga Yekova ngbarago nikangia gaoni ome.’—Nem. 8:10.

HO DU AKPAKARAPAI NI ROGO RAMUKPORO

5. Nibipa zingo ngbarago rogo rogatise, gini ngbatunga berãpai si aida aboro nehe?

⁵ Agu aboro nagbia bakere gberarago rogo gayo ramukporo rengbe ka bakabangiriyo nga: ‘Ya mo ngbaangba nzunzu mi bandapa gimi rogatise? Ya mo si aidanga mi mbu gimi badiarogatise na ki gbata gu kurani te?’ I rengbe ka berãpa mbu gayo badiarogatise na ki berẽ gupai nga, ‘Mi naida ka ongoda! Tipagine ka mi ambunga gimi badiarogatise ti ni ya? Ka si vura du vurũ nga Ziazia Kekeapai azanga gene fere tipa ani mbu tirani te, ya mo si aidanga ani kparaka wa ka mi gbia wiri ngbarago rogo raka yo te?’ Kuba gupai nga aKristano nawakana ngbatunga agi apai re riyo yo, si naida i sovura awere kuti agu akpakarapai du yó rogoho nipeka yó fuo ga Mbori arugute.

6. Oni sakingo rogo gupai yo Yesu agumbaha rogo Matayo 19:9.

⁶ Kangia Kristano naberãpa mbu gani badiarogatise, ní rengbe arengba ka manga rogatise berewe ringbisihe kuti agu arugute nga ga Ziazia Kekeapai watadu ní arengbanga ka mangaha te. Yesu ayaa: “Gu ni ka he diani tipa kura pai angia nga pa bari ya, ki di kura ri, ni namanga bari. Gu ni ka di gu de i nihe ri, ni namanga pa bari.” (Mt. 19:9) Rogo gi veresi re, “meteka” nakoda bäri gbiati gu kura kere aingapai nga ga kodaba. Si ninyanyakipa pai Kristano kpari fu Mbori na ki berẽkurii gu diaberã nga ga mbutise mbata wenengai ka si du nga gani badiarogatise amanganga bäri amanga te.

7. Ginipai rengbe aboro ka gumbaha ka si du nga ga Kristano rogatise gberẽ?

⁷ Ka pa ga Kristano rogatise gberẽ, aboro rengbe ka bihe nga wiripai kina tiní rogo toro yo. Gu mokedi nangia Pauro asana nyanyakipa sanahe ki yaa: “Ka kumba aina nga pa zoga kpuko ya, ko awira pa banda ga Mbori kanisa wai?” (1 Tim. 3:5) Nirengo, ho arogotise ata ngbaduyo ni ki ya i nga akristano ono pa gayo rogatise ki gberẽ, aboro rengbe ka bihe nga i amanganga agu apai i naatungusaha te.—Rom. 2:21-24.

8. Ginipai rengbe ka sa agu arogotise nga Kristano i idi ka kparaka?

⁸ Ho agu arogotise niima zio bapatiza aberãpa ka kparaka ni watadu ka mbutiyo, pai kinaho nzunzu nambusa yó rogo toro yo. Si rengbe ka du nga boro sa dagbayo watadu i dunduko ue amanganga pai kuti agu arugute nga ga Ziazia Kekeapai ya. Ka i ‘kido kuti Yekova na kpotoyo yo dunduko,’ pai ho rengbe ka gbarasapa gayo rogatise te.—Oni gedi Asanza 3:5, 6.

9. Wai gu kura aKristano agbia mosoro mbiko gayo zerangbaduse rogo gayo rogatise?

⁹ Gu dungu aramukporo naadu bangiri aboro wa si nandu ka gberã agberã, si aima ngba na kidu na diabese. Agu aKristano nahi agu akpakarapai nga ga gayo rogatise nigbangaha zanga kparaka, i nagbia wene mosoro nisangbanaha. Oni kparianga gupai rengbe ka manga rogo gu kporo duna aboro rogoho na gayo apambori nibakiakia. Gu mokedi nangia Petero akepai ki yaa: “Dere akumba, oni rá fu kina akumbaroni; ya ka ngia agu yo aida nga sangba Mbori ya, i aye ka ida pa ko mbiko gaoni mangaapai. Si arengba nga oni gumba fugo te; wa i nabi gaoni rurupai du na gunde ti ni.” (1 Pet. 3:1, 2) Ii, mbiko gu wene mangapai nga ga Kristano, si rengbe ka sa gani badiarogatise ní di rengo kugume! Ngbatunga gu rogatise i abatasa wa gure rengbe ka ye na taarimo fu Mbori na bakere maku fu kumbakudee, diakumba, gbiati agu agude kadu beyo.

10, 11. Gini tunguotunguopai rengbe ka kura rogo rogatise, ono gini kido rengbe Kristano kadu nani?

¹⁰ Mbiko wa du agu aKristano ata manganga rogatise ya na nyemu ka fu ngbarago fu Yekova, i nasia kina gu kurayo nga idipase tipa ka rogatiyo nani. Ono wa vura duhe wo, apai ima rengba ka ariatihe ti wai i aberãha. Nikpiapai, gayo badiarogatise ima rengba ka du nifudifudi ní gbe. Watadu fuo mangayo rogatise, gayo badiarogatise ima rengba ka zera rogo toro yo. Ani yugungo ho na kpiapai: Gene aadunga be Lindaa ka manga wiripai te ho kumbaari naima zio bapatiza atona ka manga agu apai naadunga kuti agu arugute nga ga Ziazia Kekeapai ya, na si asa gupai nga i debee tiko niyangaraha. Ginipai rengbe Kristano ka mangaha ka si du nga ní bi gupai nga, rurupai berewe tipa gani rogatise te?

¹¹ Ní rengbe ka tona sana tiní nga, ‘Ya mo si naida mi asadi ka bandapa gimi rogatise apai ki vura nimangi vurũ?’ Anga boro ho rengbe ka manga watadu si aida ní mangi ngbatunga gu diaberã re furoni te. Ono tie, wene ndupai kinaho si aidanga ti ni boro mbupa gu gani ramukporo du na akpakarapai ya. Gu irisimbori nahi agu aˈasada du rogo gu rogatise du na akpakarapai mbiko gupai nga sangbakpotoniyo ambunga gene funi tipa ní kparaka te, Mbori nabi ní na nyanyakipa ní. (Oni gedi 1 Petero 2:19, 20.) Yekova nika mangasunge na gako toro tipa ka undo gu Kristano namanga ome tipa ka nyakasa gani rogatise re.

I BARAMBEDA TIPA KA UNDO RONI

12. Wai rengbe abaakumba ka bi rani ka si dunga ani nagbata undo beyo?

¹² Kangia oni na kpakarapai rogo gaoni rogatise, ka oni gundenga ti gbata undo be agu aKristano niima nyaka rogo toro yo ya. Abaakumba namangasunge wa ababanda akandoro na i nagbeberã aboro dedede kuti agu arugute du rogo Ziazia Kekeapai yo. (Amo. 20:28; Yak. 5:14, 15) Ka oni bingoho tigaoni nga ka oni gbata undo be abaakumba rogo toro yo tipa agu akpakarapai nabipa gaoni ramukporo, i funga irisa furoni berewe te ya. I nika kpinyemu roni na ki fu bakere irisa furoni mbiko wa oni amanga ome tipa ka sa ngbarago ti Yekova.

13. Gini rugute du rogo 1 AKorindo 7:10-16?

¹³ Ho boro asana abaakumba ni i undo ní ho du gani rogatise ni rogo kpakarapai, i namangasunge na agu rugute Pauro akehe ki yaa: “Ono mi nagumba ha fu agu yo aima roga tiyo, mi a te, ono Gbia, ya ka de guari nga pati kumbari ya, (ono si ngia ri guari, watadu ri nye ni sa ri, na ri mbakadi pai na kumbari berewe) – ka kumba mbu nga diako a ya. . . . Bambiko, mo aina waĩ, de, si ngia mo abatasa kumbamo? na mo aina waĩ, kumba, si ngia mo abatasa diaro?” (1 Kor. 7:10-16) Nairiwo gu maku kangiaha ka si du nga gu badiarogatise angianga idipase ya re idi na rengo!

14, 15. Gini regbo rengbe gu badiarogatise nga Kristano ka berãpa guari, ono tipagine du du kparakpee gbiati wisigotise ti ni ninyanyakipa pai?

¹⁴ Gini ngbatungapai rengbe ka sa gupai nga dia Kristano “guari”? Aguyo nakparaka mbiko gayo abadiarogatise aidanga ka ngerafuoyo rogo borose yo te. Aguyo nakparaka mbiko gu gbegberẽ mangapai nga ga zuũ du gayo badiarogatise nani watadu mbiko ní moi gayo raka ngbapai rogo toro yo.

¹⁵ Ka boro sia ka guari watadu ka nye na gani badiarogatise, gure nabi kina gani diaberã. Ono tie, gu badiarogatise niima zio bapatiza, si naida ní kpari tipa gipai re na ki wisigihe mbata wenengai. Nikpiapai, ya mo gu gani badiarogatise angianga idipase re ya du nasa gupai nga ka ní dunga wenengai rogo toro yo ya, watadu kina gu Kristano re nitini mbu wisigo Ziazia Kekeapai, ndu pati adunguratise, na sunge tungusapai?

16. Gini he si aida si za aKristano ti diaberã niˈipiˈipihe tipa mbutise?

¹⁶ Wa duhe nga ani nabipa gaani pagume na Yekova gbiati gu gako gamahe nga ga rogatise na nyanyakipaha, si naida si za rani ti diaberã niˈipiˈipihe tipa mbutise. Nidu ani niga Yekova amoyambu, ani nabakabangirani naapa ziasi rimoko. Nirengo, si aidanga ani mangi gupai nika ba gberarago ti gaani badiarogatise tipa wa ka ani ruho ka manga gu kura rogatise te.—Yere. 17:9; Mara. 2:13-16.

17. Ti gini regbo rengbe ani ka ya Mbori yambu agu arogotise nga aKristano sa zereda?

¹⁷ Gu Kristano du gani badiarogatise nga zanga idipase, si naida ní mangi ome tipa gayo ramukporo du niwenehe. Ono tie, ka si du nga gu Kristano re mangi ome vurũ tipa ka bandapa gani rogatise ono ka rurupai adunga ya, si aidanga ní du na rungo nga gani badiarogatise aidanga ka raka naní ya te. Pauro ayaa: “Ono ka gu ni guari adu nga na idapase ya, ni guari; ka si du wo, gu idipase nye, watadu kumba na de, ni adu nga ni vodivodi ni te, bambiko Mbori ayambu rani sa zereda.”—1 Kor. 7:15.b

ONI KIDO KUTI YEKOVA

18. Ka si vura du nga taatapai ngaha ka banda rogatise te, gini wene sangbanapai rengbe gu manga ome re ka kusaha?

¹⁸ Ho oni asovura ni kuti agu akpakarapai nga ga ramukporo, oni ngere koyo du Yekova ni tipa wingbaduse na ki du na maabangirise ti aregbo dunduko. (Oni gedi Atambuahe 27:14.) Oni kparianga gupai naadu tipa Linda ani nifura tipa ri mbata. Niyangaraha, gari rogatise adigi rogo mbutise, wa si avura du vurũ nga ri amangi ome tipa dungu agarã tipa ka bandapa gu gari rogatise re. Ya mo ri nabi tiri nga ri aima gbarasa gari regbo? Sangbari nga: “Wa gu sa te. Gu ome mi amangihe re aima fu wene dezirepai fu agu aboro naabi re nani. Sangbakpotoreyo nigigirihe. Gu ngba dagbaha yo gbe nga, agu agarã re aundo gu wirani nga degude ri nyakasi gari idapase kurogo rengo yo. Ri asono ki kpara gari raka fu Yekova na ki da nizaaza natungusipai.”

19. Ginipai rengbe ka manga ka si du nga boro mangi ome tipa ka bandapa gani rogatise?

¹⁹ Wirinarani ni Kristano nga Marilyn na ngbarago tipa wai ri akido kuti Yekova na gu ome ri amangihe tipa ka bandapa gari rogatise. Sangbari nga, “Si anye koyo tooni tipa ani kparaka na kumbaami mbiko ko aidanga ka undo re te na gimi raka rogo toro adu ngbapai. Ono tie, kumbaami adumbata nibakumba mbata fu ko rimisi tiko kurogo gbegberẽ sunge marã. Ko atona kaa kpa adunguratise, niyangaraha fugodagbase ki kati dagbarani. Ho abamoi azubo gaani gbata ni, si adu fere nikpakarapai tipa mi nikodi tire na akuare aidipase. Fuo gupai re, mi ki bihe a nga wiri ingahe kina tire. Ani atona kaa fura berewe, ki tona gaani wisigopai nga ga aborokporo, na ki tona kaa ndu tipa adunguratise dedede. Sino abaakumba aima ngba na i aundo rani. Gaani rogatise akaragatihe berewe nivovoho. Kusa, kumbaami arẽ berewe tipa ka mangasunge rogo dungurati. Si adu nikere wirikapai furani ono na wene sangbanaha.”

20, 21. Nibi gu irisa du ani nani tipa rogatise, ginipai si aida ani diberã tipa ka mangaha?

²⁰ Singia ani mangi rogatise watadu ani ata manganga ha te, si naida ani nimangi apai na wingbaduse ti aregbo dũ na kini moibangirani koyo du Yekova ni. Kangia ani nagbiatirani na gu fudifudiapai nga ga ramukporo, si naida ani mangi ome tipa ka nyasa riipaha, na kini tingidi gupai nga, agu aboro koditiyo rogo rogatise, i ‘ue berewe te, ono kina sa.’ (Mt. 19:6) Na si naida ani moi gupai ku rirani yo nga, ka ani hi agu akpakarapai du rogo gu kporo du aboro rogoho na gayo apambori nibakiakia, sangbanaha nikadu furani nga ngbarago ho ani nika bi gupai ni nga gaani badiarogatise ima ida na rengo.

²¹ Zanga bipa agu apai namanga, ani dinga berã adia tipa ka ta nitatamana wa ka ani ruho ka manga wene dezirepai fu agu aboro adunga na ani rogo dungurati ya. Kangia kpakarapai rimi kurogo gaani rogatise, ani kpari nyanyaki fu Mbori, na ki wisigi tirani wenengai, na ki gbata arugute rogo Ziazia Kekeapai yo gbiati undo rogo toro yo be abaakumba. Kuri agi apa re dunduko, ani dinga berã adia tipa ka sa ngbarago ti Yekova Mbori rogo apai dũ na ki yuguhe fuko nga ani nabipa gako gamahe nga ga rogatise na nyanyakipaha.

[Footnotes]

[Blurb on page 16]

Agu aKristano nahipai nigbangaha rogo gu rogatise du na akpakarapai, sangbanaha fuyo nga wene mosoro

[Blurb on page 18]

Oni moibangironi koyo du Yekova ni dedede na kini ngere kubeko tipa wingbaduse

[Gu sura du ti kpewaraga 15]

Yekova nafu maku afu fu agu aKristano namanga ome tipa ka nyakasa gayo rogatise

[Gu sura du ti kpewaraga 17]

Gu dungurati nga ga aKristano rengbe ka du niba wasa gbiati undo rogo toro yo