Wa “Oni Naye ki Ini Mbori”—Gini Kurapai Du Koyo Berewe Furoni?
‘Awere oni ye ki ini Mbori.’—GARA. 4:9.
1. Tipagine bagu na tiyara awisigo gu waraga duna rimo ahe ti ni mbata fu ní gu?
AGU aregbo dunduko abagu na tiyara aida ka gu na tiyara, waraga kinaho na rimo agu ahe si aida i wisigihe ti tiyara mbata i nika gu na tiyara. Ka i awisigonga agu ahe re wenengai ya mbata fu i gu, i arengbanga ka ino gupai rengbe ka sa tiyara si ti na aboro te. Mo ini gini ngbatunga bagu na tiyara i aya funi niwisigi gu waraga re mbata fu gu ní na tiyara? Guni niima dia gbanga regbo kuti gu na tiyara. Si taata fu ní tipa bangiri go ka ni awisigongo gu waraga re sirisiri ya.
2. Ginihe si aida aKristano niwisigihe dedede?
2 Wakina gu waraga bagu na tiyara naamangasunge nani, apai kinaho si aida mo wisigihe ka ino singia ga idapase adu ninyanyakihe zavura ti regbo kpakaraapai. Singia mo zi bapatiza awere watadu mo aima digo nimangisunge fu Mbori tipa dungu agarã, si ninyanyakipa pai mo niwisigi gamo idapase na gamo ra nigose fu Yekova Mbori ti aregbo dunduko. Ka ani awisigonga gaani idapase dedede ya, ani ima rengba ka kpi rogo toro yo. Ziazia Kekeapai naza rani nga: “Gu ni naberã ha ya ni ru, ni bánda tini, ni ka ti.”—1 Kor. 10:12.
3. Ginipai si aida agu aKristano naadu Garatia yo mangihe?
3 Si aaida agu aKristano naadu Garatia yo wisigi pa nyaka gayo idapase na kini bi gayo ranirii nga ga toro na nyanyakipaha. Vurube ga Yesu motumo, ko azakigene fu agu aboro duna idapase kutiko i ye ka ino Mbori ngba iiriwo gene na ki da ni awiri Mbori! (Gara. 4:9) Tipa ka nye rogo gu wene pagume re, si aaida agu awirina naadu Garatia yo mbu gu yugopai nangia ga aYudo nangia kakuti iriso ga Moize aNdiko. Nirengo, agu aGendiria nangia azanga yeratise naadu dagbayo i aadunga tii aNdiko te! AYudo na aGendiria dunduko si aida i mangi sona kumbatayo rogo toro yo. Si aida i ini gupai nga Mbori aidanga gupai be aboro nga i nipekefuo aNdiko berewe te.
AGU APAI ANI AMANGIHE KA INO MBORI
4, 5. Gini rugute Pauro afuhe fu aGaratio, na wai duhe na nyanyakipaha furani?
4 Ndupai adu kinaho i ake agu arugute Pauro afuhe fu aGaratio ti ni. Si adu tipa ka banda ndikidi aKristano ka i arianga tiyo kusayo ti gu rengo nga ga Ziazia Kekeapai sa agu apai i aima mbuhe ya. Ga Yekova toro aadunga kugii gu mokedi re ko ngarasi kina agu adungurati naadu Garatia yo sa te, ono airisiko dunduko ru nyanyaki.
5 Ani dunduko si aida ani tingidipa wai ani akuru be gu bitimo nga toro na ki dani aDezire Yekova. Tipa ka tingida agu apai ani amangihe, ani wisigingo agi asanahe du ue re: Ya mo mo natingidapa agu adiandue mo amangihe tipa ka rẽ ka zio bapatiza? Ya mo mo natingidapa wai mo aini Mbori na ko ki ini ro na mo ki gbia ndikidi ranirii nga ga toro?
6. Gini apai si aida ani wisigihe?
6 Ani dunduko namangi adiandue ribua. Agu adiandue re gu du rogo gu sanduki nga “Agu Adiandue Nandu na Boro sa Zio Bapatiza na Kini Sani Ní Nisono Kumbatayo.” Ka ani atingida tirani na agi adiandue re dedede, si nika nyakasa rani ka ani karaganga tirani fuo agu ahe nga ga zagino ya. Kina wai si niidi gu bagu na tiyara du na wene inohe niwisigi gu waraga du na rimo ahe ti ni, kinawo rengbe wisigo agu apai mo amangihe ka zio bapatiza narengbe ka nyakasa gamo idapase.
AGU ABORO MBORI NAINIYO NASONA KINA KUMBATAYO ROGO TORO YO
7. Gini ziazia apai si aida ani pekefuoho, na tipagine?
7 Gu waraga re naundo bagu na tiyara tipa ní rengbe ka ino singia he kinaho si aida ní mbakadihe mbata fu ní gu. Si naida ani niwisigi tirani awisigo dedede na agu apai ani amangihe tona tigu regbo ani azi bapatiza ni. Pauro akepai fu Timoteo ki yaa: “Mo ká kuti kpia gu wene apai, mo agi ngbare, ni idapase na nyemuse du rogo Kristo Yesu yo.” (2 Tim. 1:13) Gu “ziazia apai” re gu du rogo Fugo Mbori yo. (1 Tim. 6:3) Kina wai wene bake asura narengbe ka gbaka kpiahe si ki ima yugo guhe ní aida ka kehe, kinawo rengbe “ziazia apai” ka undo rani tipa ani ini gupai Yekova akpinyemuhe berani. Sidu, ani wisigingo agu adiandue ani amangihe tipa ka zio bapatiza na ki bingo wai ani apekafuo gu ziazia apai re.
8, 9. (a) Tipagine si aida ani sono ti ni kumbatayo rogo inohe na idapase? (b) Oni ringbisinga pa nyaka sona rogo toro yo na ndu gupai duhe ti ni nigupai si aida ani naamangaha amanga kindi.
8 Gu bambata he si aida ani wisigihe nga inohe. Fuani, ani ki sonosi idapase. Agi apai re dunduko si aida ani naasona asona rogoho kindi. (2 Tesa. 1:3) Ka sona kumbatayo nakoda manga dungu ariapai rogo gaani raka yo. Gu fugo nga “namaa pai” watadu ka sona, rogoyo nga ka kio. Sidu, tingbafuo zio ani bapatiza, si naida ani naasona kindi kumbatayo rogo toro yo, angianga ka nye rogo bangisa ba ya.
Ngua adigisongo sona te. Si naida aKristano naasona asona kindi
9 Ani rengbe ka ringbisapa gaani sona kumbatayo rogo toro yo kuti wai ngua naasona. Ngua ima rengba ka sona ni bakikihe gbe, ka si dunga tarãha ima rimo kusendeyo wenengai na ki gbaragi tihe. Nikpiapai, bete agu angua kedara du Rebanona yo ima rengba ka sona bagizoho kidu wa ametere 37, na si na gu nyanyaki tarãha narimo wenengai ti sende, pati rigoho kidu nga ametere 12. (Ga So. 5:15) Gu ngua re nasona niipo na ki mbu sona, ono fuo gure, si nikaa sona kindi zanga aboro inihe. Wa agarã nika susa, abehe nikaa kparaka na atarãha kini rimi ti sende na kini gbaragi tihe, si ki saha ninyanyaki ngua. Kina gu bangisapai re du tipa sona kumbatayo nga ga Kristano rogo toro yo. Ti gu regbo tona ani wirika Ziazia Kekeapai, ani ima rengba ka sona niipo rogo toro yo na ki zi bapatiza. Agu aboro du rogo dungurati rengbe kadu na ngbarago ka bi gaani sona kumbatayo. Si rengbe kadu nga ani ima rẽ ka da nibazakigene watadu ka gbia kura amomu rogo dungurati. Fuo bete agarã, aboro arengbanga ka bi gaani sona kumbatayo te. Wa vura duhe wo, si naida ani sono rogo idapase yo na inohe “sa du ni bakumba, sa rengba na sona gu hibepai nga ga Kristo.” (Ef. 4:13) Rogo gi gene re, ani nasona wa wiri tooni ngua ki da ninyanyaki Kristano, wakina gu ngua niima sona ki nyaki.
10. Tipagine du sona kumbatayo rogo toro yo ti ni ninyanyakipa pai zavura fu agu aKristano niima nyaka?
10 Ono si aidanga gaani sona kumbatayo digi kina kuho te. Si naida gaani inohe na gaani idapase niki akio na kini nyaki kina kumbatayo. Si nika undo rani tipa ani nyaki rogo Fugo Mbori yo. (Snz. 12:3) Rogo gu dungurati nga ga aKristano, dungu awirina kinaho niima manga gipai re. Nikpiapai, wirina sa mangisunge nibakumba tipa agarã niima susa 30 abi gupai nga ko nasona kindi kumbatayo rogo toro yo. Ko ayaa: “Mi nabi Ziazia Kekeapai na nyanyakipaha kisusi gu naadu mbata. Dedede wo mi nagbia dungu amomu tipa ka mangasunge na bangua rugute nga ga Ziazia Kekeapai ngba dungu agene. Mi nabi sunge tungusapai na nyanyakipaha a kisusi.”
ONI NYAKASI GOANI PAGUME NA MBORI
11. Wai rengbe ani ka ino Yekova vuru gbanga regbo yo?
11 Gaani sona kumbatayo nakoda mbeda ani koyo du Yekova ni na ki sako ni Bakurearani na ni Barani. Ko naida ani bi tirani nga ani ima rẽ bangiriko. Ko naida ani ini gupai nga ko nakpinyemu rani na ani nibandabanda rani kina wai gude nabi tiru ho avunguru adungo ru ni, watadu ho du ani ni dagba rimbasa ndikidi abakurearani. A wa ini oni he, gi wene pagume na Yekova re arengbanga ka sona rogo uru sa te. Si nadia regbo adia tipa ani iniko na kini kpinyemuko. Tipa ka ino Yekova wenengai, si naida mo di regbo adia tipa ka geda Fugoko dedede. Si naida mo nigedi agu aNgbaõbambu Sinziri na Awake! nakura kodihe na agu awaraga du mburuhe rii Ziazia Kekeapai.
12. Ginipai si aida ani mangihe tipa Yekova ini rani?
12 Abakurea Mbori nasona kumbatayo rogo toro yo gbe vurube gayo akparakpee na wene kodatise na akurayo. (Oni gedi Maraki 3:16.) ‘Tu Yekova nihaha ha tipa gayo akpe.’ (1 Pet. 3:12) Wakina gu baagude duna nyemuse, Yekova nadegatuko adega kuti gaani akpee sarawati tipa undo. Si naida ani “kpatagara kuti kpe kindi.” (Rom. 12:12) Ani arengbanga ka nye ninyanyaki aKristano ngba gaani ome nitirani te kinagu ka Mbori aundo rani. Si ima kpakara furani ani sovura na diabese kuti agu akpakarapai nga ga gi sino raka re. Ka ani akpatagaranga kuti kparakpee ya, gure wa ka i ya ani nasoga gu undo Mbori aida ka fuhe furani. Ya mo mo nabihe nga gamo kparakpee na wene rogoyo ti ni watadu si naida mo mangi sona kumbatayo rogo gi bangiriba re?—Yere. 16:19.
13. Tipagine duhe ti ni ninyanyakipa pai tipa ani kodi tirani na akuarani aKristano tipa sona kumbatayo rogo toro yo?
13 Yekova na ngbarago be agu aboro dunduko “nakida kutiko,” zavura tingbafuo ino ani ko, si naida ani naandu kumbatayo kindi kaa kodatirani na agu aboro iniko. (Nau. 1:7) Rogo gi zagino hi be zerakpotoseyo re, si nipatatamana furani ani kodatirani na agu awirinarani nikaa ngarasa rani. Gini aundo ani nika gbiaha? Ani nika bi aboro abi rogo dungurati nika ‘nyakasa rani kuti nyemuse na wene mangaapai.’ (Eb. 10:24, 25) Ani rengbe ka pekafuo ga Pauro arugute kina gu ka ani adia regbo na dungurati. Yugo ngbatunga gi nyemuse re nakoda fura na akuarani aKristano. Si naida ani naandu tipa adunguratise na kini fu akaragapai.
14. Wai gu du saberã ti ingapai na mbu mangaha ni agu apai adigongo ya?
14 Gaani saberã ti ingipai na ki mbu mangaha naaundo rani ani dani aKristano. Saberã nga gupai si aida ani naamangaha amanga kindi. Wa du ani nga kpakpa aboro, ani na kina ingapai rogo rani yo nga gu duwa kina zingizingi wo naida ka dee rani. (Rom. 3:9, 10; 6:12-14) Si naida ani naangera angera kindi, ki zanga mbu gaani arungbura si fu rirani. Si nipa ngbarago tie nga, Yekova nahipai ahi furani ho ani asota ni na gaani arungbura na ki nimangi agu ariapai si aida ani mangihe. (Frp. 2:12; 2 Pet. 3:9) Si naida ani mangisunge na gaani regbo na agu ahe du berani tipa ga Yekova sunge angianga tipa kina agu apai ngba tirani ya. Wirinarani sa ayaa: “I asonosi re rogo rengo, ono mi asono na gu bipai du kia tipa Yekova. Mi abihe nga si naida i nagunde agunde beko gbe, na mi arengbanga ka sa ngbarago tiko te.” Tifuo bete regbo, ri abi gupai nga ri “anyakanga rogo toro yo te” bambiko dungu nduapai nakaraga ri kusayo. Ri ape kurapai nga, “Si aadunga wo bambiko gupai nga mi akpingo nyemu Yekova ya te, ono bambiko mi ainonga ko nzunzu te. Ono tie, tingbafuo manga mi bakere kparakpee fuko gbe, mi aˈaria berãre.” Ri agbia gu kurapai kutini nga: “Mi abi tire nga Yekova nanungusa re wakina tooni gude, kini kusi re rogo kpakaraapai ti kura aregbo na kini yugu gupai si aida mi mangihe.”
15. Ginipai Yesu gbiati Bako abihe?
15 Si naida ani ‘tungusipai atungusa fu aboro dunduko.’ Ga Mbori maraika ape agi afugo re fu Petero na gu kura amokedi tingbafuo kusa yó ngba iiriwo gene bambukiso yo. (Amo. 5:19-21) Tungusapai na aposo dunduko nga gu kurapai si aida ani naamangaha. Yesu na Bako nabi gaani idapase na gaani sunge tungusapai abi. (Yugo. 2:19) Gu bakumba ani nifura tipa ko mbata ayaa: “Sunge tungusapai nga papara gaani raka.”
16. Tipagine si aida ani naaberã kuriipa gaani kparatise fu Yekova ti ni?
16 Oni berẽkuriipa gaoni kparatise. Gu nyanyakipa he du berani nga gaani pagume na Yekova. Ko ima ino agu aboro nga gako yo. (Oni gedi Yesaya 44:5.) Si naida ani wisigi pa nyaka gaani pagume na Yekova. Kurigure, si naida mo tingidi gu ramediwi mo azi bapatiza ti ni. Gere nika undo ro tipa mo nitingidi gupai nga, ga bapatiza nayugopa gu nyanyaki diaberã mo amangihe rogo gamo raka yo.
HIPAI UNDO RO MO NYE MBEMBEDI NA YEKOVA
17. Tipagine si aida ani du ti ni na hipai tipa ka nye mbembedi na Yekova?
17 Rogo gu ga Pauro waraga ko ake fu aGaratio, ko anyakasipa hipai. (Gara. 6:9) Gere nga nyanyakipa pai fu aKristano areme a. Mo nika gbiatiro agbia na aˈasada, ono Yekova nika undo ro aundo. Mo kpari tipa ziazia toro dedede. Mo nika gbia wasa agbia na ngbarago gbiati zereda. (Mt. 7:7-11) Mo berẽnga tipa gipai re: Ka si du nga Yekova naberãpa azire aberã, na ginipai tigaha du tipa ro nga gu boro nakpinyemuko na ki nifu tiro fuko? (Mt. 10:29-31) Ka kina gini ngbatunga asada vura gbia ro agbia vurũ, ka mo karaga nga tiro kusayo ya; ka ome ro batinga a ya. Nairiwo gu bawenepai nga Yekova ini rani re!
18. Wa “oni naye ki ini Mbori” ginipai oni aida ka mangaha awere?
18 Singia oni ini Yekova awere na ki zi bapatiza, gini kurapai tie du koyo berewe? Oni susi kumbatayo ka ino Yekova wenengai, kini sono rogo toro yo. Na ka si du nga oni aima zio bapatiza dungu agarã kusayo, gini kurapai du koyo berewe? Si naida oni ndu kumbatayo kaa kiiso gaoni inohe tipa Yekova. Ka ani mbunga gu sino nga ga sakparakpa si gbarasipa gaani pagume na Yekova ya. Kuba gure, si naida ani naawisigo gu gaani apai nga toro tipa ka ino nzunzu singia ani nasona rogo gaani pagume yo na Yekova na kini sa ko ni Barani, bakurearani, na nigaani Mbori.—Oni gedi 2 AKorindo 13:5, 6.