ONI INI GIPAI RE?

Tipagine i aayamba Nineve ti ni nga “bakporo kure”?

Nineve angia gu bakporo nangia ga aAsuro. Si angia nyanyaki bakporo na wenewene abambu rogoho na ayekaru, kikindigi agene, gbiati nyanyaki angapa. Gu nebi nangia Nauma afura tipaha wa “bakporo kure.”—Nauma 3:1.

Wai saki yó pai tipaha re daada mbiko agu akpiahe naadu kua Saneriba Nineve yo aayugopa gu gbegberẽ mangapai nangia ga aAsuro. Gu kuraha sa aayugopa zizi boro i abanga ní kusande ki nimo mirãni. Kekeapai nayugoho nga i anaazunguda zizi aboro ti gire na kini kofodi hõyo na kpoto ngbayo na akombe. Agu aboro nanaangerakurii zizi aboro, i anaavo kpia rii gayo abakindo goyo wa arẽkẽ.

Kumba sa nangia Archibald Henry Sayce apepa gu gbegberẽ apai i anaamangaha fuo zioyo gbata ki yaa: “Gu gbia naanizi gbata, ní anidungura rii aboro si ki ru wakina muro; i anaazo akumbagude na adegude niungayo watadu ka bandayo tipa ka imoyo ngba gbegberẽ gene; i aakenga akumba; kini yuku kpotoyo niungayo, kini vurasiyo, watadu ka kafu abeeyo, kpetenduyo, tuyo na hõyo.”

Tipagine aYudo anaamaa ndugu ti ni ri gayo abambu yo?

Mbori azinahe fu aYudo nga: “Ho oni ka nidua vovo bambu ni, oni ki nivo ndugu ri he yo kirikiri, ka ngbanga kure du nga ku ri gaoni bambu mbiko boro . . . ti ya.” (Pa Fu Rugute ni Ue he 22:8) Gi ndugu re ani duho tipa kadu nibandahe, mbiko agu aYudo naadu ti agu aregbo i ake Ziazia Kekeapai, i anaasungo asungo rii gayo abambu yo.

Badungu gayo abambu naanidu na kpasakpasa rihe yo. Riibambu yo aningia gu wene ba aboro anaandu ka sungo fu nzere uru ni na kini gbia wene zezeredi wege watadu ka manga kura gayo asunge yo. Si anidu nibawene ba tipa rame garã. (1 Samuere 9:26) Basopobino anaaugusa gani aũati riihe yo watadu ka ugusa vurumo na gu kura ahe.—Yosua 2:6.

I anaamangasunge na riibambu yo tipa ka irisombori, ndikidi ko watadu kpiahe. (Nemaya 8:16-18; Yeremaya 19:13) Gu mokedi nangia Petero andu kurii bambu yo bebere uru tipa ka kpara. (Amokedi 10:9-16) Ho bakakue aniwa ni riibambu yo, watadu kpe mbiro, si anidu niwene nzereme.

Buku sa nga The Land and the Book nayaa, aYisaraere anaamaa tanga “ti vuro bambu zegiyo, ono kina vuru ndugu yo” tipa aboro nindu kuriihe yo. Irakporo anirengbe ka zora rii gani bambu yo zanga ní rimi ku dimoyo. Gipai re rengbe ka sakarogo ga Yesu zahe naadu tipa guari niipo kusayo rogo gu gbata i aandu ka gberesaha, niyaa: “Gu ni ka du ri bambu yo ka ni azórã nga ka roga agu ahe ka du tii gani bambu yo ya.”—Matayo 24:17.